A hmasain Pathian thu dikna leh dik lohna lam kan sawi lova, A rinawmna leh rinawm lohna lam kan sawi dâwn bawk hek lo. He ta “A ram leh A felna” kan tih fo hi engnge ni a, eng tin nge zawn tur? Chumi hnuah “chûng zawng zawng chu a pêk belh chhah dâwn che u nia” a tih hi engnge ni ang? tih te hian ka rilru a tibuai fo a, ka auchhuahpui ta nge nge a ni.
Têtte aṭangin Kohhranah inhmangin a kûl a tâiah ka ṭang ve ṭhin. Kohhrana ka inhman hian ka nun a hlim a, lâwmna pawh tam tak ka chhar a, ka taksa leh thlarau tân hahchawlhna leh chaw ṭha tam tak ka hmu bawk. Tûn thleng pawhin ka la inhmang a, ṭhalaiah OB ka ni a, Bial Zaipawl Conductor ka ni mêk bawk. Chuti chung chuan MA ka zir a, 1st class-ah pass-in top 3-ah ka lang ve nghe nghe. Hêng zawng zawng hi ka thawhrah ni lovin Lalpa malsawmna ka dawn a ni. Ani chuan taimâkna leh hriselna min pe a, ka dil loh malsawmna tam takin min vûr ṭhin. Ka tum ber chu Pathian rawngbâwla Kohhrana inhmang chung hian kan zirna leh hnathawhnaah ṭha takin kan ti thei a ni tih lantir hi a ni a, ka hlawhtling ve viau chuan ka hria. Lawmthu sawina tûr hlîr a lo ni.
Hun a lo kal a, hna zawn a lo ṭûl a, exam neuh neuh hmachhawn tûr a lo awm ta! Hetih hunah tak hian eng chu nge a ram leh a felna ka zawn hmasak tûr chu tihah hian ka buai fo ṭhin. Nikum kum tâwp lam khân kan Kohhranin mission field kan tlawh dâwn a, kal tûrin ka inpe ve a, mahse ka hna dil pakhat chu written-a ka tling ve a nih chuan kan zin hlâna interview a ṭûl dâwn si a. Ka ṭhulh leh ta a. Written-ah chuan ka tling a, interview-ah ka tling leh ta si lo. Mission field tlawhho an rawn hâwn chuan “A ram leh a felna i zawng hmasa lova, i hlawhtling lo a nih kha” min ti ta!
Tûn hnaiah pawh exam tûr neuh neuh ka nei a, lehkha zir ngai bawk, Kohhran leh thalai, Bial zaipawl programme khat tlat bawk si, ka buai ṭhin kher mai. Hnatlâng emaw, Kohhran zaipawl hlazir emaw han kal lo hlek ila ṭhenkhatin “A ram leh a felna hi zawn hmasak tûr a nia” min ti ve chhên bawk nên. Nun hi a chêp ru tlat! An thlîrna tlâng aṭang chuan a âwm hliah hliah. Bial zaipawl conductor ka nihnaah Kohhran zaipawl hlazir chu tel ngei ngei tûra ngaih ka ni. Ṭhalai OB ka nihnaah ṭhalai thiltihnaah tel ngei ngei tûra ngaih ka ni bawk. Ka nun khaw chhuah nân ka beih a ngai a. Ka ei leh in, silh leh fên leh inchhûngkhur mamawh ka thawh chhuah a ṭûl bawk si. Tunhma kha chuan ka moderate thei viau, mahse tûnah chuan a har ka ti ve ta. Nu leh pa châwm hlâwm nih reng hi ka duh lova, theih tâwkah mahni mamawh na na na chu thawh chhuah ve ka duh a, ni tin private-ah ka inhlawh a. Chu a chhapah Mizo dânin ka nu leh pa te hi ka châwm tûr an la ni zui. Nun hi fight tak zet zet a ṭûl a ni.
Eng tarmit nge ka vuah tâk ang aw… Kohhran mite chuan hetia ka inkhung a, Kohhran thiltiha ka tel tlêm hian min hmu he mai zuk nia. Mi ṭhenkhat erawh chuan kan nunna atâna nasa taka kan beih hian thil dik tiah min ngai ve bawk. Helai inkar tak hi siam rem harsa ka va ti êm!
Mathaia 6:25-34 thu hian min daikhalh ve bawk si a:
“Chuvangin, ka hrilh a che u, ‘Engnge ka ei ang a, engnge ka in ang aw?’ tiin in nunna thu leh, ‘Engnge ka silhin ka fên ang aw?’ tiin in taksa thu lungkham suh u. Ei tûr aiin nunna a thupui zâwk lo vem ni? Silhfen aiin taksa pawh a thupui zawk lo vem ni?
“Chunglêng savate hi en rawh u; buh an tuh lo va, an ât hek lo, buh inah an seng lût hek lo; nimahsela in Pa vana mi chuan a châwm si a. Nangni chu anni ai chuan nasa takin in hlu zâwk lo vem ni?
“Tin, nangni zîngah lungkham avangin tuinnge mahni dung lam tawng khata tisâng chuang thei? Tin, silhfen thu engahnge in lungkham ni? Ram tûktinpâr ṭhanzia hi ṭha takin ngaihtuah rawh u; hna an thawk lo, la pawh an kai hek lo; Nimahsela ka hrilh a che u, Solomona meuh pawh a ropuina zawng zawnga a inthuam khân, hêng tûktinpâr pakhat tluk pawh hian cheiin a awm lo. Chutichuan, ram hnim, vawiin anga nung, atûka thuka tuah leh mai tûr mah Pathianin chuti kauva a chei chuan, aw nangni rin tlêmte u, silhfen a pe zâwk êm êm dâwn lo che u em ni?
“Chutichuan, ‘Engnge kan ei ang?’ emaw, ‘Engnge kan in ang?’ emaw, ‘Eng sinin nge kan awm ang?’ emaw tih, lungkham suh u, Jentailten chûng zawng zawng chu an zawng ṭhin a ni. Chûng zawng zawng chu in mamawh tih in Pa vana mi’n a hre reng a ni.
“A ram leh a felna chu zawng hmasa zâwk rawh u, tichuan chûng zawng zawng chu a pêk belhchhah dâwn che u nia. Chutichuan, a tûk atân lungkham suh u, a tûk chuan ama tân a lungkham chawp dâwn si a. Ni khat atân ni khat hrehawm chu a tâwk a ni.”
Thil ṭha pahnih thlan tûr a awm hian thutlûkna siam a har ṭhin an lo tia, a dik hle. Rawngbâwlna ka thlîr chuan a thim a var pawh thlu lova thawk bawrh bawrh tûr ka nih laiin, ka hmalam hun ka thlîr erawh chuan ka beih ve hi chu a ṭûl a ni tih ka hre bawk si. Eng pawh chu ni se, “A ram leh a felna” tih Bible-a kan hmuh hi he lei kohhrana inhman hi a ni tihna nge ni a, kan zirlai, eizawnna leh kan ni tin hnathawhnaa rinawm taka thawh mai hi?
Similar Posts:
- Mizoram Baptist Kohhran Zaipawl intihsiak
- Besy Choir Ebenezer Album
- BCM Zaipawl inelna result
- Thawhlawm
- Chhiarpui hlau
April 19th, 2012 at 5:43 pm
kan hna rinawm taka thawh ringawt hi ” aram leh a felna” zawnna chu ani thei lovang,i thiante sawi khi a dik zawk mah ang..
Report this comment
April 19th, 2012 at 5:54 pm
Thui tawk comment ka type a, ka tihbo palh daih chu le!!
Ka ngaihdan ve:
1. Kohhran Thalai Pawla inhmang ho hi zirlai kan ni tlang pui. Zirlai fail khawpa rawngbawl hian Pathian a chawimawi lo va, a tihmingchhe zawk!
2. Kohhran rawng nge kan bawl Pathian rawng? tih hi inchhut fo a ngai.
3. Mihring tihlawm nge ka tum Pathian tihlawm? “Mihring tilawm ila Krista bawih ka ni lo vang”.
4. Kohhrana mawhphurhna min bel apiang hi Pathian kohna a ni kher em tih pawh chhut a ngai.
5. “A ram leh a felna” tih awmzia chu Amah Pathian leh a duhdan zawn hmasak tihna ni maiin ka hria. Thil tih tur tul 2 emaw 3 emaw an lo inrual a, tih tur ber kan hriat thiam loh chuan AMAH PATHIAN ngei kha han zawt tawp mai ila, min chhang mai ang. Pathian nung bia kan nih hi.
Rawngbawlpuite demna tawngkam ai chuan Pathian demna tawngkam dawn hi a hlauhawm zawk.
Report this comment
April 19th, 2012 at 6:00 pm
Ka la sawi zo lo!!
6. Nu leh pa chawmhlawm ringawt ni lova anmahni zawk chawm let thei tura thahnemngai taka beih hi PATHIAN RAWNGBAWLNA chi khat a ni der tawh zawk!
7. “Rawngbawl” kan tih hi Biakin Compound chhung leh kohhran rim nam ringawt hi a ni lo. Kan awmna a piangah, mahni in chhungah te, kan nitin hna leh eizawnna hmun te hi Pathian rawng kan bawlna hmun pawimawh ber ber an ni tih kan hriat hi a hun ta e! Kan hnathawhna hmun hi kan rawngbawlna maicham, kan sermon thlakna “pulpit” an ni tih kan hriat hunah “I ram lo thleng rawh se” tia kan tawngtaina hi chhanin a awm tawh ang! Amen!
Report this comment
April 19th, 2012 at 6:33 pm
Post tha hle mai! A pawimawh khawp ani.
Keimah hian a rawn comment tha khawp mai, kan ngaihdan a in ang.
Bible thute hi uluk taka interprete a tha. Eng hun a ziah nge, tute tan a thawn/ziah nge anih tihte pawh hi ngaihtuah tel a tha thin khawp mai.
Report this comment
April 19th, 2012 at 6:39 pm
keimah comment ho khi full mark ka pe e, ka thlawp chiang!
Report this comment
April 19th, 2012 at 6:44 pm
Post a tha, comment a tha bawk.
Report this comment
April 19th, 2012 at 7:39 pm
Rawngbawlna hrilhfiahna chu i kutah dah phawt ila, tichuan hei hi ka chhanna neih ve chu a ni: “Lalpa, i Pathian rawng chu bawl hmasa phawt mai rawh, tichuan a bak chu Anin a thawk mai ang. I duhdan nila, Ama duh dan in”.
Report this comment
April 19th, 2012 at 7:43 pm
“I duhdan nilo” tih zawk tur ani e.
Report this comment
April 19th, 2012 at 7:57 pm
Post tha, komen pawh tha.
Report this comment
April 19th, 2012 at 8:40 pm
Vawikhat chu, MLA tlingthar minister ta hian a bial hawnna a kal ve turin min sawm a, in-leng thenkhat zinga sawm bik ka nih avang in, min lawmpuitu pawh an awm ve. Bial kawng hawnna a kalte hi chuan, ‘contract thawh tur’ duhsakna an hawn nual thin.
Chutih lai chuan Crusade puitham tak a awm dawn bawk a, chu crusade committee chuan reception committee secretary ah min ruat bawk a.
Atuk zing a lo nih chuan, Lehkha tar vel leh hnatlang turin rawngbawlpuiten min rawn sawm a, chutih lai chuan minister chuan motor leh driver, min lam tur a rawn tir bawk a(chan san ve lai). Rilru a phir ta thaih mai le…
Khawilam kawng zawh tak a in rin le…? Chhungte lah chuan ‘..i rilru siam fel thuai rawh’ min lo ti ve chhen bawk si. Ka tawngtai ta ngawt a, “A ram leh a felna…” chuan ka rilru a luah ta zawk a, minister driver hnenah chuan, “…ka rawn kal lo mai ang, min lo phatsak mai rawh’ ka ti ta a, lehkha tar vel leh hnatlang vel in hun ka hmang ta zawk a…..hausak ve na ‘chance’ ka hnawl ta a, ka rethei zui ta reng a.
Mahse vawiin thlengin, Pathian rawng ka bawl zui theih phah ta a ni. Hausak ni ka nei ta lo, mahse A ma thlazar hnuaiah ‘hlim takin’ amah ngeiin, min enkawl ta a nih hi.
A hunlai chuan thiante leh chhungkhat laina tamtak chuan A lian min han tih zia chu’h….mahse ka in chhir lo vawiin thleng in.
(Post hian ka rilru a khawih deuh a, Ka han inpuang ve lawk a ni e)
Good post
Report this comment
April 19th, 2012 at 8:43 pm
Hmm… Kan hriat hmaih fo ni a ka rin chu hei hi a ni.. Rinna hi a pawimawh hmasa ber. Kohhran leh KTP a kul a tai in inhmangin nih na eng engemaw pawh nei mah la, thil tha, Pathian duhzawng anga lang ang hlir pawh ti niin inhre mah la, kha i thawhrimna kha Pathian aw i hriat vanga ti nge i nih mahni thahnemngaihna a thawk i ni zawk tih te mai hi! “Lalpa’n in a sak loh chuan a satute chuan an thawkrim thlawn a ni”, tih ziak a ni si a! Ti hian i inngaihtuah thiam mai ka ring deuh!! Post tha tak a ni.
Report this comment
April 19th, 2012 at 8:49 pm
A ram leh a felna kan zawng ang, tiam chin lam chu kan pan hram2 bawk ang. Missionary emaw Pastor emaw turin Pathianin alo duh daih che pawh a ni thei…Pathian aw hre thei tura nun uluk a pawimawh dawn in ka hria!!
Report this comment
April 19th, 2012 at 8:51 pm
Awmtea Khiangte: Harsatna a ruka miin an neih chi helaiah i lo sawi chhuak thin a. A lawmawm ka ti khawp mai. Midang tan ti hian malsawmna a ni ve zel a.
Helaia Bible thuchang i lo lakchhuah leh hriatthiam i chak em em hi TLANG CHUNGA ISUA THUSAWI zing ami a ni tih han hre phawt mai ta la. Tlang chunga Isua thusawi hi kristiante tan thuhlawm pawimawh tak tak vek a ni. Enge a chhan? Eng dang vang ni lovin helaia Isua thusawi chhuah ho hi Sinai tlanga dan sawm pek lo ti chiangtu a ni tlat!
Chhum leh khawpui ri dur dur hnuaiah Pathianin dan sawm min pe a. Mahse helaiah erawh chuan Pathian ngei mihring angin a lo chang ta a ni. Lawmawm haih haih khawp mai.
Nihlawh thu, phuba lak chungchang, Hmelma hmangaih, Vana ro khawlkhawm leh a dang tamte hi kan kristian nun ze pui diktak tur atana pawimawh tawpkhawk a ni.
Helaia A RAM LEH A FELNA tia a sawi, chang lar tak ni ta hi Isua thusawi tum ber (CENTRAL THEME) ni awmin a lang tlat bawk. Lungkham luat nei lo tura fuihna zirtirna hi Isuan a sawi hmain SUM LEH PATHIAM RAWNG IN BAWL KAWP THEI LO tiin thuhma a nei daih tawh! Jentailte a lam tel kherna chhan pawh hi Amah ringlotute leh A thu awih duhlotute a sawi tumna a nih a rinawm tlat bawk. Pathiam thikthu chhia hian AMAH aia thil dang ngaihpawimawh hi a duh lo em em a ni.
Isua khan a duhthawh khawp mai. A ram leh a felna chu zawng rawh u ti mai lovin zawng HMASA rawh u a ti ngat a ni. Ngun taka ngaihtuah chi chu ni tho mah se a tum ber erawh chu AMAH ngaihven leh thlakhlelh ngawih ngawih tur tihna lam hian a awn em em! KINGDOM leh RIGHTEOUSNESS han tih ngawt pawh hian thui tak a kawk thei bawk.
Kohhrana inhman satliah hi Pathian rawngbawlna tluantling a nih lohzia i lo SHOW niin ka ngai tlat bawk! Pathian leh keimahni inkar atang hian he Bible chang hi a chiang em em mai tur niin ka ngai.
Tin, kohhrana inhman hian a tawk thiam tur. Engkim hi Pathian hian a tawk chauhin a siam a. Chu chu kan man a ngai thin khawp mai. A nih loh chuan tuna i harsatna ang hian kan thlarau nun a vaw let vak thei. Exam inbuatsaih nan hun i neih tlem phah dawn chuan kohhrana inhman hun pawh tihtlem a tha viau ang le. Kei hian college ka kal lai zawng zawngin nilai zan inkhawm thlengin ka hmaih lo. Mahse Pathian zarah record ka subjectah ka siam tho. Mahse hla zir tih vel chu rawngbawlpuite mak tih khawpin vawite khat mah ka tel lo thung. A chhan chu hla zir leh zel ka tih chuan lehkha zirna hun ka nei lo dawn miau a.
Kan Lal Isua’n a zirtirte hnenah ‘Nangnin unge ka ni mi tih?’ tia thu pawimawh a zawh khan Petera’n a chhang fuh hlauh. ” KRISTA, Pathian nung fapa chu i ni” tiin a chhang a nih kha. Mahse Isuan engtin nge a tih? TISA leh THISENIN a hriattir che a ni si lo, ka PA vana miin a hriattir che a ni zawk tiin a chhang daih a nih kha. Isua Krista hnungzuina leh a duh anga awm tura kan INPEKNA (CONVICTION) pawh hi CHUNGLAM puihna atanga lo awm tur niin a lang.
Lo lunghnur lutuk suh. Amah ringtu diktak i nih chuan i la hlim deuh deuh ang. Hna hmu miah lo mahla i la lawm deuh deuh ang. Khawvel thil(Material world) lam hi A haw khawp a nia.
Report this comment
April 19th, 2012 at 11:10 pm
Hei chu post thling baw hawk a nih hi le. Mi tamtakin an tangkaipui ka ring. Ka tluk lo che, kei tehlul hian han hrilh ve teh chai tur che ka nei lo, i rina kha lo hre chiang zual zel ang che.
muttui to you all
tren tren
Report this comment
April 20th, 2012 at 7:12 am
Kan belh leh lawk,…
Pathian hian ‘a tan’ alo ruatlawk reng tawh mai thei che – chutiang a nih chuan, a ma hniakhnung i zui hma chu, khawvel thilah chuan i hlawhtling chuanglo mai thei. Chu chu ‘high calling’ an ti hial a. A ma hnen a kan in ‘surrender’ hi a pawimawh khawp mai. Mahse, tuar te, chan ngam te, in huam a ngai. A mah in a ma duh zawng ti turin min chawikang tawh zawk dawn a ni.
Mihring tak pawhin, kan kawng zawh tura kan thlan hi thihchilh thak ngam a pawimawh.(a rum deuh em aw?..)
Pathian dawr nung la, mifel tak i ni tih a hriat a, Pathian rawngbawlna i dah pawimawh hle tih a hriat bawk a, i kawng zawh tur i la hre fuh lo mai mai niin a lang.
A ram leh a felna zawn hi,’Sam 37:5′ ah hian a chiang viau in ka hria.
Report this comment
April 20th, 2012 at 7:37 am
Lal Isua’n,’
Marthi, Marthi, thil tamtak i ngaihtuah a, i buai a nih hi…” a tih kha.
I nu pa leh enkawl kha i rawngbawlna turah i ngai a nih chuan hna thawk la enkawl mai la. Pathianin a lo che a nih chuan, Missionary a chhuah i duh leh, i nu leh pa chu, Pathian kutah dah la, (Mizo dan) tih velah buai a ngai lo.
J.F Kennedy, a te unau kha a pa in,” khawvelah hian enghna pawh thawk rawh u a pawi ka ti lo, mahse, hmun phiat in nih pawhin, khawvela hmun phiat faiber in ni tur a ni” a ti.
Lal Isua pawhin, “lei lehna kut nghat a, hnunglam hawi chu..” a tih kha.
Lei leh van siamtu, kei ni mihringte min siam tu, min chhandamtu Lal Isua hniak-hnung zuitu nih tluk a hlu hi khawvelah hna ropui dang a awm ka hre lo.
Hman ni khan, “Lalpa Chhiahhlawh” ka post a, mihringte Pathianin min thiatna lam a nia, tuipui (comment) an tlem hle,i remchan leh lo bih ve chhin teh, i harsatna hi, ka hriatthiam pui khawp che. Pathianin eng atan emaw a ruat che niin ka hria.
Report this comment
April 20th, 2012 at 7:57 am
Ka lawm e. Pathiana rinni nghah pumhlum hi tun thleng pawhin thil har tak niin ka la ngai a, ka la thei meuh lo a ni. Rinna te hi sawi chu a awl a, rin tak2 hi a lo har khawp mai. In mi fuihnaah ka lawm e, lo zawm ka tum ang. Tin, Pathian min duhna hmun hriat fiah hi ka duh ber a ni a.
Hna hrang2 ka dil ve thin a, mahse eng emaw tui lohna hi ka nei tlat zel a, ka hna tur ni lo tlat hian ka hre thin. Chutih rual chuan, ka hmaah hian eng emaw awm hian ka hria a, chu chu eng tikah emaw la thleng tur niin ka inhre bawk a, mahse eng nge a nih tih chu ka hre thiam hauh si lo.
Report this comment
April 20th, 2012 at 12:38 pm
Infuihna tur thu tha hre tam lo mah ila, kan tawnhriat ve a tangin aw…
I sawi ang khian ‘A ram leh A felna zawng hmasak’ min ti buai ve khawp mai. Hna dang thawk lovin Pathian rawng(a ram leh a felna) chauh bawlin awm ila, ka nu leh pa te engtin ka chawmang tiin Pathiana rinna nei tlem takin ka ngaihtuah thin. Ti chuan kohhran thalaite lah chuan U enin min ena min rinchhan ve em em si chungin, ti hian ka thu ka ti tlu ta a. A ram leh a felna chu engkim ka thawhna ah Pathian duhdan dah lal hmasak hi a ni e, kohhrana rawngbawl chuah hi a ni lo tiin. Tichuan hnathawk turin ram dangah mi pawisa puk chawpin ka chhuak ta a, rin aiin hlawh a tam si lo, kan pawisa puk a capital chu sawi loh a pung pawh kan rul hlei thei lo. Kan sum ba a vangin ka nu leh pa an rilru a va hah em. Tunah chuan ka in chhir ta. He khawvel thin en tawh lovin Isua chuah ka zui tawh ang, chance ka nei leh a nih ngai chuan.
Petera’n Isua tui chunga a kal a hmuh khan, tui chunga kal ve a duh a, Isua’n a kal tir ve a, thui lo te chu Isua a en chhung khan a kal ve thei, mahse a vela tuifawn te a en khan a pil mai dawna Isua a au a nih kha. He khawvel thilte hian min buai thin.
Report this comment
April 20th, 2012 at 1:15 pm
Lal Isuan a ngaih pawimawh em em hi chu ngaih pawimawh ve em em tur ani mai. Kan thinlungah hian Pathian Ram hi thlen tir ila, (Lal Isua hi Lal tir ila), Chatuan nunna min buatsaih sak hi chang fel hmak phawt mai ila, thildang hi chu secondary ani e. Pathian hre chunga lehkhazir a fail tlut tlut ka ring hauh lo mai. Tin, Kan thinlunga Lal Isuan ro a rel miau chuan, Fello tak chuan kan nung hauh lovang. Mihringin ama hun a hrelo tak zet a ni. Nakin nghah chi ani lo. A RAM leh a FELNA hi kan la hmulo anih chuan thildang zawng aia zawn tur chu ani e. Thil dang te hi chu Secondary anni e. Kan mamawh chu Kan thinlung LAL chuan min pe em em ang.
Report this comment
April 20th, 2012 at 1:20 pm
Kan hna(Profession) leh Zirlai thulh/tihchhiat phah khawpa Kohhrana inhman hi A ram leh a felna erawh ani kher lo. Lal Isuan i sualna ai a rawn awhna hi i lo pawm ve tawhin, i thinlung Lalah i lo thlang ve tawh em? Lal Isua Lalna thinlung alo pun zel theih nan i tha i thawh ve tawh em?
Report this comment