mi(sual).com

A thian mipa naupang rual ho chuan, “Zova, Zova, insiam ve rawh, hmelma kulh kan run dawn” tiin sahawk em em mai tihhriat hian an rawn au va. Zova pawh chuan a thiante chu zui ve a, hmelma runnaa han tel ve chu a chak kher mai. Mahse, a Pa thusawi kha a hre reng a. “Zova, hei I nu nen Bazarah kan kal dawn a, khawiah mah lo chhuak hlek suh ang che, In hi lo chhuahsan reng reng suh” a tih kha. A Pa chu Bazarah ala thang mek a, a la rawn haw mai dawn lo tih a hria a, lo chhuak ru pawh ni se, a rawn kir leh hmain inah alo awm fel diam tawh ngei ang. Mahse, Zova hian a Pain a hmangaih a, a tana tha a duh a, a tana tha tur leh a himna tur a ngaihtuah reng thin tih a hria. A Pa chuan rawn hmu dawn lo mahse, a thu awih loh chu harsa a ti a ni.

“Ka chak ve viau na a, Ka Pain ‘in lo chhuahsan reng reng suh’ min ti a, ka lo kallo mai ang” tiin a chhang theI hram a. A thiante ho thawm chu a reh fel a, rei vaklo hnuah chuan Hlim em em maiin Hnehna hlado an rawn chham a, “Kan chak, kan chak” tia khek chel chul chungin an rawn tlan ham ham mai a, a nawm hmel kher mai.

An hotupa deuh ber chuan, Zova chak ve hmel a hmuh chuan, “Zova, kha a rei hlei nem; kulh dang kan bei leh dawn a, lo tel ve tawh ngei ngei rawh, I Pa lo kir hmain inah I awm leh hman daih ang” tiin a rawn thlem leh ta hauh hauh mai a. Zova chu a inngaihtuah buai nasa ta mai. An hotupa sawi chu dik a ti a, a thiante chu ava zui ve zawk ang a, a pa lo hawn hmain inah alo awm fel leh diam ang a, a Pa chuan in a chhuahsan tih a hre hauh lovang le. A tawpah chuan, A Pa thupek chu ngai pawimawh zo lovin, a thiante chu a zui ve ta nge nge a.

An kulh beih tur chu an va hmu ta a. A hmaa an va beih kha chu Khuaite bu mai mai kha ani a, a zuk ana tham lova, Tun ami erawh hi chu Khawidang bu ani ta tlat mai. Naupanga thuchang chuan Khawidang hlauhawm zia chu an hre reng reng si lo. Tichuan a thenin Lungin an tawng a, a thenin an fei lem chuan an hawlh bawk a. Chutah, a themthiam fal deuhvin an han vawm fuh sak sak takah chuan,” Khawidang bu tawn darh ang” an lo ti mathlawn lovin, an rawn um ta hak mai le.

Tumah chu an lo inthuam tha si lo, Khuai chuan an umpha hneh si, an zuk vung ta lek luk hlawm ta mai a, an tap ta chel chul mai a ni.
Zova ngei pawh chu T-Shirt pan te mai chauh ha kha ani bawk a, a lu, hmai leh ban velah chuan khuai chuan an rawn zuk a, Naupang tan chuan khawidang zuk te chu tawrh rual ni hek lo, a rak ve nasa ta mai a. Chumai ani lova, naupang vun no tak hmui-hmai vela an han zuk chuan a vung kawh tha duh hle a ni.

Engmaw ti ti chuan in chu a thleng thei hram a; a Lu leh hmai vel chu a na tur ut ut mai a, Darthlalangah a han in en a, a hnar, biang leh hmui te chu alo vung kawh nasa mai a ni. A taksa na aia tawrh hrehawm a tih zawk chu, a Pain a thu a awihlo tih a rawn hre ngei mai dawn chu a ni. Nidanga a Pa hmel hmuh a nghahhlelh theih thin teh reng nen, Vawiin zet chu, thlakhlelh chu sawiloh, a huphurh ngawih ngawih mai a ni.

Tlaiah chuan a Pa te chu an rawn haw ta ngei a, a hmai vung lek luk an hmuh chuan a thu awih lovin a thiante khuaibu laknaah a kal ve tih a hrethiam nghal vek a, a nat dan tur zia pawh a hrethiam nghal vek a ni. Chutiang ang thil na lutuk a tuar chung pawh a, a Pa hnem leh thlamuan pawh beisei ngam lova, hlauh hmel tak leh ti dak chunga alo en a hmuh chuan, a thuawih loh man chu a fapa a hmangaih em em chuan a tuar nasa tawk tih a hria a, hauh pawh a tum ta lo a. Damdawi te a hnawih sak a, na chhawkna damdawi te a pe ta zawk a.
Zanriah an kil lai pawh chuan, an ngawi nghiai mai a, a tawpah chuan, Pa ber chu a rawn tawng chhuak ta a. “Bawihpui, vawiina hmelma kulh in va run chu in hnehlo chai chai hle mai ani maw? In thleng rawkin an rawn um let mai che u a law?” a han ti ban ta charh mai a. Zova chuan, “Aw, ka Pa, inven ngaihna a awmlo a ni. Kan tlawm chiang hle mai” a ti chuai raih mai a.

A Pa chu a han ngawi vang vang a, a fapa chu a mit takah a en a, “Bawihpui, Thil pahnih avangin hnehna changlovin hnehin in awm a nih kha. Pakhatnaah chuan, Hmelma kulh run turin in in buatsaih tha tawk lo va, in inthuam tha tawk lo a ni. Tin, Pahnihnaah chuan, Commander thupek hmulovin, nangmahni thu thuin in chet ve rikngawt vang anih kha” a ti ta a.

Kristiante hi he khawvelah hian Sual ral nen kan Indo reng thin a. Kan hmelma lah chu Tisa leh thisen anni si lo; Lalna te, thuneihna te, Boruaka Thlarau sual ho te bakah, keimahni tisa chakna te, thian sual te, an ni nuaih mai si. He Ral do hneh thei tur hian Pathian RALTHUAM famkima inthuam a tul tak zet a ni. Tin, mahni thu thu a, sual hi basa ngam leh nel lutuk chi a ni lo. Inbuatsaihna tha tak nen Chung lama kan Commander nena inbe pawp reng chunga chet chhuah a ngai a ni.

Have a blessed Sunday.

Similar Posts:

• Thlahrang!!(a ni em?)
• In dam tlang em?
• Zoram_Genesis nen kan titi!
• Hmelma hlauhawm ber!
• Zet U Zu (he ti zawng hian)

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Sunday, April 22nd, 2012 at 11:00 am and is filed under Advice, Religion. You can follow any responses to this entry through the RSS 2.0 feed. You can leave a response, or trackback from your own site.