Kan tûnlai Zoram khawvêl hi ka thlîr ṭhin a, lungawina zawn ngial ka tum pawhin ka lung a chhe leh tlat ṭhin. Kan ram kalsiam hi a bilhah a tho lo tih chu tu mân kan hai lo. Kan tihsual zînga pawi ber mai leh nghawng nei lian ber mai chu thil ṭha lo kan hriat reng pawh siam ṭhat kan tum lo hi a ni.
Kan rama politics lo luhna te kha hmân ni lawk tak tak kha a la ni a, tûnah chuan patling tap hnung puaka titi pawhin politics thu-khaw-châng bâk sawi tûr an hre meuh tawh lo. India sum hlutna a tlahniam nasa a, Rs. 56.50-in US Dollar 1 a hen pha ṭâwk. Indian GDP lah kum tam tak chhûnga a tlâk hniam ber ṭum niin, 9% thleng pha ve mai dâwna a lan laiin 5.3%-ah a tla leh dawrh a. Central laihrui ringa dam ve ṭâwk ṭâwk tân chuan a luhai thlâk ve viau âwm e.
NLUP kâwl êng kan thlîr a, ṭhenkhat tân erawh beiseina beidawn thlâk mai a nih châng a tam. NLUP bâwng chhan hrang hrang avanga thi ta te hi Ministers, Directors, Secretaries leh mi hausa pui puite hian a nghawng an tuar ve hauh lo vang. Hêng thiltihtheihna (power) neiho hian mi dam khaw chhuahna tûr ang chi (NLUP, centrally/state sponsored schemes, adt.)-ah hian eng pawh lo thleng se harsatna an tâwk ve mang hauh lo, mi fate erawh chuan an tâwk asin.
Kum 2010-2011 chhûnga SSA sikul naupang 1,85,789-te tâna uniform leina tûr chêng nuai 743.16 lai mai a lapse tih chungchânga thu inchuh te hi aw! Kan tân hamṭhatna a awm dâwn loh vang em ni, a lo thlâwna sum bâwmah kan dah hmuar mai le? Kan ngaihsak loh a leiah mi fate chuan an tuar asin. Ni tin eichawp zawnga inhlawhfa ṭhin leh neih thinglung khâwng tak meuha fate zirtîr ṭhin tân chuan hêng hamṭhatna luang ral mai tûr hi chil lem dawk dawkin kan thlîr liam lo thei lo. Keini’n tuar lo mah ila, mi rethei fate erawh chuan an tuar asin.
Sawrkâr office hrang hrangah pawh vawiinah tih zawh ngei ngei tûr tih order a chhuah loh mai avanga hna kan pending ṭhin hian midangte tân harsatna a va siam nasa ṭhin tak êm! Keini’n tuar lo mah ila, kan hnathawh ṭhat loh man hi mi fate chuan an tuar asin.
Kawngpui chhe taka siam a nih hian a siamtuten sum hailût hnem mah se, mi fate chuan an tuar asin. Tui, gas leh electric current-a harsatna te hi a tuar nasa ber tute chu mi retheite bawk an ni. Zan rei pawh sawi thei lovin tui an chawi a, gas chan loh chuan black-in cheng 1,000 chuanga lei a ngai a, electric current awm ṭhat loh avanga mawmbati (candle) leina ngawt pawh hi mi tam tak tân chuan uiawm tham a tling ngei ang.
Hruaitu ṭha chuan hmangaihna thinlung nên ram a hruai tûr a ni a, mite harsatnaah amah a inbarh lût ve ang a, a dâwm chhuak ngei tûr a ni. Upa-in “Mahni ṭhenawm do ai chuan khaw sarih do pawh a thlanawm zâwk” an lo tih angin he kan Zoram zîm têah hian inṭhenawm khawvêng vek kan ni a, kan indo a thiang lo vang. Midangte hamṭhatna dawn tûr ang chi rêng rêng a rang thei ang bera pe ṭhin mite hi ‘Hruaitu ṭha’ tiin khawvêlin an hming a chhinchhiah ṭhin a, mite fak leh chawimawi an hlawh bawk ṭhin. Mi hausa leh thiltithei tlêm tê te chawimawi nih ai chuan mipuite (mass) chawimawi hi a tlo a, a hlu ber bawk.
PS. Full Article chhiar duh tân vawiin (04.06.2012) Vanglaini issue-ah emaw KA BLOG-ah emaw a chhiar theih e.
Similar Posts:
- Mite chuan…
- Amen! Haleluia! (Sunday pualin)
- Fate hmangaih natzia hi!
- Duhthusâm
- “Operation Global Blackout” ! Internet a buai dawn em?
June 4th, 2012 at 5:38 pm
Ni ngawt mai.
Report this comment
June 4th, 2012 at 5:44 pm
Ngaihsamna leh mahni hmasialna hian rah tha a chhuah lo, tih lampang niin ka hria.
Report this comment
June 4th, 2012 at 6:00 pm
Ka sawi/ziah ka chak ngawih ngawih leh ka thut hmun (!!!)atanga ka lo vei ve em em i rawn sawi tlat mai…phaia purun sen man a to vak tum khan,central sawrkar thleng rak khawpin an au chhuak mai a…Mizoram hi level ngaiah a awmna a rei tawh.Thil man a sang a, tui/gas/electric ah harsatna kan tawk a…kan react chuang lo reng reng…thlai man a to pawhin, “ka lei ngam lo a to lutuk” tiin kan phun duhtawk ringawt zel…A saptawng takin kan agressive a ngai ka ti hmiah kei chuan…growth and development kan duh tak tak a nih chuan aggressiveness hi a thatna lai a awm ve a nia…kan hmangaih kan ram tan…
Report this comment
June 4th, 2012 at 6:15 pm
A dik khawp mai, kan tan a tha tur lo hi chu kan ngaihtuah tha peih meuh lo nih hi maw.
tren tren
Report this comment
June 4th, 2012 at 6:17 pm
Mi fate mai in an tuar lo e!! Mizoram pumpui hian kan tuar mek anih hi le. Next generation Mizo hian tuna kan tih dik loh hi an tuar zel dawn ani. ‘Tun’ siamtha tur chuan kan politician ho hian nasa leh zual a an rilru kalphhung an siam that angai ani..
Report this comment
June 4th, 2012 at 6:18 pm
A tha. Ka ngaihdan chiah a ni. A thupuiin mit a laa, a thulaimu pawhin rilru a dek zar mai. nakinah ka la rawn comment chhunzawm ang
Report this comment
June 4th, 2012 at 6:32 pm
I ziak tha in i fun kim e.
Kan tuar mek a, kan tuar zel dawn bawk anih hi!!
Report this comment
June 4th, 2012 at 6:34 pm
Kei kan sawrkar hian thil a tihmasâwn ve ta khawpin ka hria a, ka lo lungawi viau mai asin.
Tuirial kawlphetha khawlpui siam hna an thawk leh mup mup mai te leh thil dang tam tak ka hriat hian Pu Ṭhena sorkar lai tih lohvah chuan tün Pu Hawla rorèlna hi a ṭha filawr lakin ka lo hre ve mai mai a.
Baffacos per ṭhelh leh hmasawnna hmuh tùr awm chhun veng kilkhawr deuhva zun in ṭawih deuh deuh siam tih vêl lai kha ka lo ngai lo ve viau ringawt a.
Duhthu chu la säm lo teh mah sé, hma zawng kan sâwn takzetin ka hria, ve mai mai a, kei ariangtë hian.
Thuziak mite leh chanchinbumite leh mipui nawlpui ṭhahnemngaihna azarah hma kan sâwn ve zël dáwn hian ka hmu a, Mizote hmakhua pawh a ëng vè viauvin ka lo hmu ve mai mai ṭhin.
Mahsé NLUP tih vêl, athlawna sum sem ṭangkai lohzia hi chu Mizo mipuite hian hmu thiam ve tawh ila chu a va han duhawm tak êm.
Kan retheihna hian min la timäwl a ni.
Sawrkar beisei lova intodelh tum ngam khawp lahin kan taima peih leh bawk hlawm si lo, te ka han ti ve duah a ni e.
Mizoramina thar chhuah kan la neih chhun chu Zawlaidi deuh chiah hi a la ni a, kohhran khân lo khap vei khangláng phei selang chuan a va pawi dawn tak em, sawi chhunzawm zël lo mai ang, tukhawmahin an chhiar leh chuang lo vang e
.
Report this comment
June 4th, 2012 at 7:12 pm
Ania sia! Kan zoram hi ngaihtuah chian poh leh bei a dawng chianga hawina lam apiang mai hi thaw tipik leh rilru tihah an ni. Kan Bible chuan mihring siamthat nan khawdur a ngai ati a. Kan ram siamthat nan hian enge ngai ve ta ang le? Khawdur satliah mai hi chuan a siamtha zoin ka ring tawh lo. Thisen chhuak lova siamthat dante hi la awm hram se ooo.
Report this comment
June 4th, 2012 at 7:13 pm
Tha khawp mai
Report this comment
June 4th, 2012 at 7:16 pm
Kan ram hruaitu te tih awm tawk vel ani…huis!
Report this comment
June 4th, 2012 at 8:45 pm
Karnataka MLA, Y Sampangi, chu cheng nuaikhat thanna a lak avangin inrinni tlai khan jail-ah a tang! Source: Sunday Times, Bangalore, Front page headline. Cheng nuai 100 chuang eiru te’n zaklo taka khua an hawi laiin!
Report this comment
June 4th, 2012 at 8:50 pm
# 12.. *thamna
Report this comment
June 5th, 2012 at 12:01 am
Hma kan sawn ve hret2 zel e Pathian khawngaihna zarah.
Report this comment
June 5th, 2012 at 11:30 am
Hmasawnna hi nasa lehzual zawka a zuan theih nan mipuite hian voice kan neih ve a hun tawh tak zet a ni
Report this comment
June 5th, 2012 at 11:54 am
Kum 5 danah voice in nei alawm. Congress leh MNF ringawt in vote tlut tlut chhung chuan eng ruai inni lovang.
Report this comment