mi(sual).com

Fanghma-thar-ko rawl hre phak lovin, ralkhat tlangbawma ruahkung paw chi chiai te hmu thei lo mah ila; panlai nun ngaiin Val hi ka kiu vawng vawng…

Panlai nun
Thingtlang, chhungkaw rethei berh ve tak atang seilian siin, kan retheihna hre lek lova hringnun par kan tlan lai si te ka dawn chang hian, nunhlui ngaiin suihlunglen a thar leh thin. Thingtlanga cheng ta chu, inrinni sikul chawlh ni bawk si; tih tur dang awm ngai hek lo, lovah kan feh dial thin. Thiante nen lungrual takin kan kal hova, losul haw hun erawh a inrual vek theih loh vangin a haw hmasa zawk zawk te’n ‘ka haw tawh e’ tih entirna’n, ka lo panna pengah chhawl min thuai thin.

Chhawl ringawt a ni lo…
Nia, in-chhawl-thuai han tih hian chhawl(thinghnah) tihna kher a ni law. Tun hnua ka dawnlet leh changin a hlutzia ka hre thar leh thin. Tunlai angin missed call in pek mai theih a nilo a. Kan missed call theih ve dan awm chhun, lamhnai deuh amite U-hi-hi kha a ni mai a! SMS thawn phei phei, a rim-a-ra kan hre lo; he khawvelah hian a awm ang tih pawh kan suangtuah ngai reng reng lo.

Tichuan le, lo kan thleng ta. Losul haw huna thiante kan chhawlthuaina tur mitin a zawng nghal ruai a. Fanghma nge ni ang vaimim? nge pangpar (derhken, chhuailopar,) zawk? ti reng renga ngaihtuahin rilru a hmanhlel a. Fanghma kha in-chhawl-thuai na’n a remchang leh zual. Fanghma kawm tha deuhah hmawlh suih zum emaw, sakuhin emaw kan thiante hming kan han chhu lang ngeia. A nih loh leh kan hming lamtawi: L.R.M.A(Lalrammawia) tih te emaw kan han chhu lang ngei a. A nuam ve em em thin. Tunlai a dawr changkang a man to taka duhsakna card mawi tak tak kan hre phak lo; tin kan mamawh hek lo.

Nula leh tlangval tan…
Ka hrethiam ve phak lem lo, mahse rual ute’n an tih erawh kan hmuin an tih chhan ka hai bik lo. Ti hian ka zeldin zawm ta a. Nula/tlangvalin thiantha emaw inngaizawng tan induhsakna remchang tak a lo ni dawn reng a. Hlo thlova an inlawm te a nih ngawt loh chuan nilengin hah hnepin hna an thawk thin si a. Tlai hnathawk zo, an haw kawnga duh ber te’n an hre reng a ni tih lantir na’n chhawl an lo thuai ngei han hmuh tluk a hahdamna a awmin ka ring lo.

Kan thil neih, thuamhnaw emaw eng pawh nise, a man tam lam ah chauh hian nge a hlutna (value) kan chhut thin? Englekhawle, man to na na na chu tha tur a ngaih a ni. Chutihrualin dawr changkang tak tak a ka kal changa ngaihtuahna mawl tak ka neih fo thin chu: pheikhawk man to tak tak te hi, a man tlawm te aia a fai rei bikna a awm si lo; tin mi in-uluk lo te phei chuan an bun uih rum rum tho si a, te ka ti rilru mai mai thin!

Thilthlawnpek
Mizo tawng thumal zinga amah leh amah inhrilhfiah chiang ber te zinga a mi ni hialin ka hria. Thilthlawnpek a nih tawh chuan a man kan chhut ngai lo, lawm takin kan dawng mai thin. Hmangaihna leh duhsak lantirna pakhat a ni tlat. Inngaizawng leh thian tha te hlei hlei hian thilthlawnpek an in pe tam ngei ang.

Pathian chhawl min thuai
Tehkhin chi a ni em? ka hre law. Suala tlu tawh, chatuana hrehawm tinreng kan tuar tur ngaingam lova, Isua Krista thisen hlu ngeia Kalvari tlang a chhawlthuai kan ni hi kan va vannei tak em! Hmangaihtlak tawh loh, hmangaihna leh lainatna tawp lova min pawmtu Pathian kan nei hi a ropui ti r’u.

Pathianin chhawl min thuai, lawm tak a pawmtute chuan, harsatna leh buaina karah, beidawnna te’n an nun tlakbuak thin mah se, an rin an hriat chian tlat avangin chakna thar petu lam thlir chungin hmalam an pan zel thin.

Chhiartu duh tak, Isua Krista neitu i nih chuan, chhawlthuai a zawng a hlu ber – Isua Krista hi; i awka, nunphung leh awmdan te’n midang te chhawlthuai zel la. Chatuan ram kan thlen hun chuan, nunna lallukhum kan tana ruat chu kan chang ngei ang.

Similar Posts:

• Kristian ka ni em?
• I vanglai hian i siamtu hre reng rawh
• Mihuai kalta te kha
• Krismas Thuchah
• Lalpa kan Himna Kulhpui nghet

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Wednesday, June 13th, 2012 at 7:00 am and is filed under Advice, Luangliam, More than words. You can follow any responses to this entry through the RSS 2.0 feed. You can leave a response, or trackback from your own site.