Archive for June, 2012

Zawrh sum mai mai tilovin aw by K. Sangkhuma

Friday, June 22nd, 2012

(Lo chhuah tura min tih, Pu K. Sangkhuma, Chanmari West thuziah kan chhuah chhawng leh a nge. A damlaia ka chhuahsak hman ta lo kha chu pawi ka ti hle mai)

Hnam tin mai hian fel tawk lohna lai engemaw chu kan nei theuh awm e. Keini Mizote fellohna, hmingchhiatna leh mualphona tak pakhat chu kan thil zawrh sum tur engpawh hi “Zawrh sum mai mai te chu” tia tihnawmnah kan chîng hi a ni.

Hei hi kan chîn thar a ni hran lova, hmanlai atang tawha kan hnam thilsualtih leh dân thalo chin reng a ni. Vailen hma khan Thelrêt hi Vaiin an duh a, Mizovin an zuk zawrh thin a, an thahnemngai lutuk khan tiau lungthil an lo hlûm hnan a, thenkhat phei chuan lungtumte an lo hlûm hnan hial a, an han bûk a, a hlir ai chuan a lo rit si, Vaipa ngaihthalo chuan a han zai phel a, a chhûngah chuan lung leh thildangte chu a hmu ta mai reng a!

An leisak duh ta lo a ni. “Kan va tih luatah lêngin ka zir sual e” tih ang maiin hlâwk tum luatah kutbêngin an haw phah ta a ni. Chumi achinah chuan Vaiho chuan Mizo thelrêt hlûm zawrh chu an leisak duh ngai ta lo! Kan hma kum kalta mai, La tawlh lai pawh khan chute bawk chuan lung leh tiaulung pawlhin an tileh a, a thente chuan Mai pumah te lungtum an lo thun rû a, Vaiho chuan an han bûksak a, lungtumte chu an hmu leh ta, tuma’n an leisak duh ta lova, an paih ta ngawt mai a ni.

(more…)

Posted in Advice | 15 Comments »

Leitlang Dingdi

Friday, June 22nd, 2012

A saw raltiang Leitlangpui tual nuam ah sawn,
Mawiten a vul chiai e leitlang dingdi;
Zawlkhaw phunchawng, nauban leh ainawn ai pawn,
Kei ka tan a mawi zawk leitlang dingdi.

Ami zaleng zawng ten engtin ngai ve maw,
Chhim khawpui tual mawitu Leitlang dingdi;
Partin chhing zo tura khuanu duan ngei saw,
Kei ka thlir bang thei lo leitlang dingdi.

Kar hla tlang tin mual tin dan atang pawhin,
Rinna in ka thlir reng leitlang dingdi;
Theih chang se khawiva ianga thlawkin;
Dawn ka nuam e vul lai leitlang dingdi.

Mawiten vul zel nang che hawilopar iangin,
I parmawina leh rimtui leng velte;
Zoram dung leh vang mawitu lo niin,
Chutin duh ten Zoram par ka vuah nang che.

Kum 1993 December thla ni 20 zana MST night bus, Lunglei to Aizawl a ka chuan puinu, a sakhming ka hriat si loh leh zawn chhuah ngaihna ka hriat tawh si loh hriat reng nana 1999 a ka phuah.  Ka zirna ka zawh hnu a Mizorama ka haw hnu khan a copy hi ka ti bo ta tlat a, mahse vanneihthlak takin Aizawl lama ka thiannu in a lo la kawl tha hlauh. Khawnge tun thlenga ka zawn hmuh zawh loh pual hian in post ve leh phawng ang hmiang.

NB :Poem ka phuah vawikhatna leh la awm chhun a nia, in mit a tlung zo lo ang tih phei chu ka hre sa

Posted in Luangliam, Poetry | 111 Comments »

Dawn ve teh

Friday, June 22nd, 2012

       Hmangaihna chuan sual a enkan theih a, a ngaihdam theih bawk. Chu chuan kan hmangaih te lakah  kan mit a tidel  fo thin. Midang sual hmuh lenna leh hmangaih te sual hmuh tetna a thlen thei bawk.

Chu chuan “ A ni hi chu a a lutuk a, a thiante tih ang ang hian a awm mai thin a…” tih nu leh pa te ka atangin a chhuah tir phah fo a, mahni inhmangaihna avangin mahni inthiam chawpna a thlen fo bawk. A nihna takah chuan sual ti tur hian tumah a intihluih theih lo a, tumah a puh theih loh. Sei lenna leh thian kawm avanga sual theih ni ta se, veng/khua  ruihhlo hluarna hmun  leh zu zuar  fa ngei ngei te leh zilhtu pawh nei lo, fahrah vawiin ni a mi hlawhtling tak tak ni ta te hi  engtin nge kan sawifiah ve tak ang? Kan Bible pawhin ” In tuar theihna turin thlemna rualin tlan chhuahna kawng a siam nghal zawk ang” (II Korinth 10: 13) tiin min hrilh bawk. Chuvang chuan midang puh hi chu kan hmangaihte leh mahni inkhawngaihna avang leh hriatthiamna vang maia khuh bo tumna mai a ni.

Tin, tunlai chhanah Sawrkar leh CYMA, CADS hmalakna avangin ruihhlo man a sang chho ta hle a, damdawi mum khat cheng 10 ni thin kha cheng 50 atanga cheng 70 te a lo ni ta a, Zu (Local) fun khat cheng 50 ni thin kha fun khat cheng 200 te a ni chho ta. Hetianga a to tak avang hian mahni’n lo duh ve bawk si chuan a man thawh ve lo leh duh lo na na na chu in pek in pek luih thu a awm lo tih hi kan hriat a pawimawh. A ti thin zingah kuhva, meizial leh sahdah kam chhiat apianga duh ve ziah si, nei ngai miah si lo, midang ban ziah bula awm kan ning thin ang hi a ni.
(more…)

Posted in Mizo Society & Culture, Mizoram, More than words, Opinion | 14 Comments »

Thu ho mai mai

Friday, June 22nd, 2012

1. Tum khat chu search box emaw tiin site sira feed subscribe-naa Subscribe me!-ah khuan ka’n search mai a. Ka zawng hmu lo chiang asin aw… :-P

2. A sira milem anga awm MISUAL.COM GUIDELINES (The M Book) saw a tam zawk chuan chhiar nachang kan hre kher lo maithei. Chuvang chu a niang a update loh em em ni. :-P

3. He kan site-a page 7 awma a page 7-na hi a tangkai lo rei tawh ngei mai an tia. :-P

4. Tu’n lo haw lo se. A sira milem pakhat, Khawnge i awm? inziahnaa hmeichhia saw hrawkbawk nei a ang e… :-P

5. Nick-a (*) awm hi a fair lo reuh lutuk. :-P

Posted in Ask | Help | Suggest, HAHAHA, Internet | 138 Comments »

Pangpâr awmzia

Friday, June 22nd, 2012

Pangpâr hian awmze thûk tak leh ril tak a nei a. Chû’ng a awmzia leh nihna te chu kan hriat ve a ṭha hle âwm e. Ngaihzâwng emaw ‘zâwng lo emaw hnêna kan duh duh pangpâr kan pêk ngawt hian kan relationship a tichhe thei a. Sawi kher lova kan thinlung chhûngril târlanna pawimawh tak a ni thei bawk. Tin, pangpâr hming ka hriat lohzia ka inhre chhuak a, Mizote hian pangpâr chi hrang hrang hming kan nei lo nual chu a nih hi a te ka tia! Dictionary leh search engine lama nasa taka ka zawn hnuah pawh ‘Ram pangpâr’ tih vel ringawtin ka hmu a. A hming phuah thiam tak te in awm phei chuan Mizo hming ngei han phuah thei ula, a va lawmawm lehzual dâwn êm! Tin, ka rawn târlan ho pawh hi a hming hria in awm chuan min han hrilh ula, a lawmawm ngawt ang.

carnation

Carnation (Derhken): Induhna leh induatna a entîr a, kan hmangaihte leh kan kawppuite pêk chi.
(more…)

Posted in More than words, Pictures | 22 Comments »

Euro 2012 Quarter Final Thlirlawkna.

Thursday, June 21st, 2012

EURO 2012 chu League(Group) stage an lo zo fel ta a, Zanin atangin ram 8 ten Quarter Final an khel tan dawn a ni. Thenkhat tan chuan ninawm mai nimahse, thenkhat tan chuan mutmawh hnarmawh leh nunkhua tinuamtu alo tling ve bawk si! Game reng reng hi a dan leh hrai te leh a behbawm, an chak leh chakloh theih dante han hriat hian a tuiawmin a phurawm thin a, Khawnge Quarter Final khel tur ram 8 te hi I han thlirlawkin I han sawiho mai mai teh ang u. Sherlock Holmes an, “Londona sual kailo thil thianghlim awmchhun chu Football game hi a ni” alo tih khan keini ang pawh inthlahrung lutuk lovin min siam a, han sawi ve dawn teh ang.

1. Germany: Germany hi World Football a Super Power ram 4 an tihte zinga pakhat anni a, chetchhiat tak tak an nei ngai lo. World Cup ani emaw, EURO ani emaw, an players te that leh thatloh vang em em pawh nia lang lovin, Semi-Final hi chu thleng tura ngaih sa an ni deuh ta chawt mai, Tuntumah pawh hian Quarter Final-ah Greece an tum dawn a, tlang ngei tura ngaih anni. Striker(Centre Forward) ah duhthusam tak anneilo deuh nain, an ruakhauva, an rilru a huaisen bawk a, an goal bawh ana em em reng thin. Offensive game an khel tlangpui, Ka tan ngailo naa, ka tan ve ta khawp mai. (more…)

Posted in Sports & Games | 87 Comments »

Thian ngaihawm.

Thursday, June 21st, 2012

Ka thianpa, Serkawn tlangval (tunah chuan nupui a nei tawh), cher lam pang, sang iak uak deuh kha Lalmanga lawm rawih ni, ni rei be ni a a pian vang hi emaw ni a sang tha delh delh khawp mai a. Pumrua en chuan inkawm thei pawh a mawi lawi khawp in san hleih kha kan ni a.

Motor ke chu ni ila khalh kan hrehawm awm ve ngawt ang. A ni kha kan class a pa sang ber pawl a ni a, kei  ve thung kha kan class-a a palian lo thlan tur nise  hmaih hauh lo tur kha ka ni ve ngat a. Ti chung khan  enge maw  ti ti  chuan kan  inkawm  ngaih ve em em teh tlat a.

Nula chhai lamah  lah chuan chhim leh hmar em kan nih loh pawh in chhak leh thlang chu kan ni hial ang chu tih tur a ni a…. Nula lamah chuan ka adviser ni thei tur khawp a ni.  A thiamna te ka hmang tangkai lo kha chuan in ngaihzawng zawn kawngah ka sawngnawi phah a nih tak hi.

He ka thiana ka hriat chhuah fo na tur thawnthu hi ngaihnawm lo zet mai ka nei pek a. Tum khat  chu Pawl sawm pahnih kan zawh tawh dawn ruai khan  kan class-ah khan duh ve deuh mai , tun lai tawng tak a ‘Arsi’ ve deuh ka nei  ve teh tlat a, ka sawi mai hreh deuh a. Kum hnih lai nitin deuh thaw kan in hmu a. Kum khat lai phei chu class khatah kan awm hova. Ni kha leh chen ka  lo chu kha em em loh kha enge maw avangin tha ka ti thar deuh tlat a.

(more…)

Posted in More than words | 24 Comments »

Ka thil hriatchak thenkhat (Part I)

Thursday, June 21st, 2012

(Tunlai chu Part-a then a lar deuh tlat. Then ve ngawt teh ang.)

Pakhatna : He khawvel hmachhawn tura tap chunga ka pian chhuah laia min chhartu, ‘Veng sang Pitar’ an tih mai kha tunge ni ang le..? (A hrechiang tura ka ngaihte chung lama thawn chhoh an ni tawh hlawm si a.)

Pahnihna : Naupang sawngnawi tak ka ni chung khan ka nu duhtak khan min ‘Feh san’ lo thei si lova, ka tui a hal apiangin ka pi-in ‘Zéma’ (James?) nu hnute chhim turin min paw chho thin a ni awm e.. Tunge Zema Nu kha ni ta ang le..?

Pathumna : Sikul kal rual la ni lo mah i la, min awmtu mumal awm ta lo chu ka U-te sikul kal kha ka zui ve mai thin, ni vui zo ve hek lo, ka muhil ziah. kan khaw Zirtir, Sialhawk lam mi Pu Chuau-a khan min paw hawin an inah khan ka nu feh hawin min rawn lam mai thin, Pu Chuau-a an tih mai thin kha Tunge ka hrechiang chak ngawt mai.

(more…)

Posted in Ask | Help | Suggest, More than words | 56 Comments »

Hmeichhia te tan… :P

Thursday, June 21st, 2012

Tukin zing ka tho chu kan thenawm nulate ho phur tawkin thil an lo sawi ho sep sep mai a, chuan ka office kalkawngah pawh nula ka hmuh zawng zawng chu a nalh thei ang berin an lo in chei vek mai bawka, mak hi ka ti lutuk a. Chuan office ka thleng chu kan office a hmeichhe zawng zawng pawh make up leh kawr hot deuh deuh hi an lo ha vek a, ka bo chiang khawp mai…. Ku Aduhi pawn a FB propic te pawh nichin lawk khan a thlak hial bawk…

Mahse ka computer ka on chiah chu, thil a chiang ta vek mai a… Nimin khan Johnny Depp leh a bialnu Vanessa Paradis chu an lo inthen ni in! Johnny Depp a tan vacancy a awm leh vang lek lo ni in…

:)

Johnny Depp leh Vanessa Paradis hi kum 14 chhung zet an lo “tawm dun” tawh a, fa pahnih Lily-Rose (13) leh Jack (9) an nei a ni. An kohhran in an phuar ve nge phuar lo chu ka hrelova, mahse pangngai taka innei chu lo ni ta se, Johnny Depp a sum chanve tawp hi a hmeichhe zawk hian a chang thei dawn a ni. An inneihloh avangin Vanessa-i hian engmah a chang dawn lova, mahse hei hi civil court ah a lawyer ten an la appeal thei tho a ni, kum 14 lai an lo tawm dun tawh avangin. Chutia court a buai kual vel ai chuan Johnny Depp an a bialnu (hlui) hi 150 million dollars a pe dawn ta a ni, settlement a tan.

(more…)

Posted in Information, Lifestyle | 33 Comments »

Duham chu chânna!

Thursday, June 21st, 2012

Millionaire nupa hi an private jet-in an thlâwk chhuak dawn a. An thlawh chhuah hma chiah hian an nu chuan, “Pa-a, nang ve hi chu engtih mah i zei lo. Hmanni chu i ṭhianpa John-a nen kan mudun a, nang ai chuan a zei fe zawk,” a han ti a. A pasal chuan engmah sawi lovin thlawhtheihna a tinung a, an thlâwk chhuak ta a.

An thlawh chhuah hnu lawkah a nupui chuan, “Pa-a, inṭhen mai ka duh.In leh huan zawng zawng khu ka chang ang,” a han ti leh tân tân a. A pasal chuan engmah sawi lovin thlawhtheihna chu a her a, an piaha tlâng sáng tak lam pan chuan a thlawhpui ta a.

Nakin deuhvah a nupui chuan, “I bank account zawng zawng leh car te pawh khu ka nei vek duh a nia,” a han ti leh a. A pasal chu a ngawi reng a.Thlawhtheihna chu a han khalh chak sauh va. A nupui chuan, “Engmah i duh ve lovem ni? Kan inṭhen dawn chuan i mamawh te pawh han sawi ve bawk la mawle…” a han ti a.

Ani chuan, “Ka mamawh awmchhun chu hetah ka nei reng alawm,” a lo ti mai a. A nupui chuan bangbo tak maiin, “I mamawh awmchhun chu eng nge ni a?” a lo ti há a. “He parachute hi mawle,” tih pahin a pasal chu tlâng an sut hma lawkin a zuangthla ta daih a!

Posted in HAHAHA | 26 Comments »

Newer Entries »
  1. Page
  2. 1
  3. …
  4. 4
  5. …
  6. 6
  7. of 6