mi(sual).com

1st. Friday: Kum 25 chhung zet Zu awmlohna khua (Dry Village) an nihna chu Phullen khuain an lawm a, he hun hmanpuitu CM Pu Hawla chuan hrisellohna tamtak thlentu Zuk leh hmuam chu do tel thei se a duh thu a sawi. Phullen khua hian Kum 1981 June ni khat atang khan an khua hu Zu awmlohna khuaah an lo puang tawh a, kum 25 kalta chhung khan tlawmngai pawl hrang hrang atangin Co-ordination committee siamin, Joint Prohibition Committee siamin zu awmlohna khua a nih theih nan theihtawp chhuahin hma an lo la thin a ni. JPC te hian an khua-a zu in leh lalut tih an hriat chian te chu pawisa te an lo chawi tir tawh thin niin an sawi.

2nd. Saturday: Mizoram sorkar-a Principal Secretaries, Commissioner & Secretaries te leh Secretary to the Govt. of Mizoram te hna chanpual tih danglam a ni a, IAS leh MCS-te hna chanpualte pawh tih danglam a niin ṭhenkhat an awmna hmun tih danglam an awm nual bawk.

3rd. Sunday: Dr.C.Lalhmanmawia Falkland vengte awmpui nula Vungthianlali (18) (Lali tia koh) Mimbung khua chu an in bulah thi chhawnga chhar a ni. Vungthianlali hi an hmuh hlim hian biak theih a ni tawhlo a, Durtlang hospital panpui nghal a ni a, doctor ten theihtawp an chhuah hnu ah pawh an chhan hman ta lo ani. Lali thih dan chiah hi chiang taka hriat nilo mahse current man ni in mithenkhat chuan an ngai. A tlukna bula pipe line pahnih kalah hian current a kal a, an nau pakhatin a tlu reng kaih thawh a tum chuan current hian alo man ve bawk a, in chung lamah tlan chhovin Mainswitch-ah a off a, chumi hnu chuan an bawihsawm ta a ni. A hnua police-te an va kal leh pawhin he pipe line-ah hian current chu a kal ngei tih an va fiah a, mahse, eng anga current sang nge tih an hre chuang lo a, current man a ni ngei an ti thei chuang lo. Lali ruang hi an khua Mimbung panpui nghal a ni.

4th. Monday: Lalrintluanga (30) h/o Ramlawmi, Hnahthial Bazar Veng chu Mat luia Suarzau bulah a lenkháng zàr sût a tumna lamah chesualin tuiah a tla hlum. Lalrintluanga hi lui-ah hian a nupui Ramlawmi leh mi dang pahnih nen an kal a ni.

5th. Tuesday: Ramngaw humhalhna ni atana puan, World Environment Day vawi 40-na a ni a, Mizoramah pawh Aizawl leh district hrang hrangah hman a ni. Aizawlah chuan Environment & Forests department huaihawtin PCCF, SS Garbyal hoin Tourist Lodge, Chaltlangah hman a ni a, thupui chu ‘Green Economy: Does it include you?’ tih a ni. Inkhawmah hian seminar neih nghal a ni a; ‘Environmental issues in Mizoram & its impact on economy’ tih chu Prof. H Ramnghinglova, MZU-a Life Sciences HoD chuan a sawi bawk. World Environment Day hmasa ber chu June 5, 1972-ah Stockholm, Sweden-ah UN Conference on Human Environment-ah hman a niin hemi ṭuma thupui chu “Khawvel hmasawnnain leilunga thil nung leh nung lo zawng zawng, nungcha, thing leh mau, sik leh sá thlenga a khawih danglam dante ngaih pawimawh hmasaka neih“ tih a ni.

6th. Wednesday: Vairengte Bangla venga cheng Thangpuii w/o Laldawnga chu an inthlang hmun biru lai deuhah inawkhluma hmuh a ni. A ni hi June ni 4 chawhnu lam atang khan a awmna chin hriat lohin a bo a, Pi Thangpuii bo ni June ni 4 tlai hian chhungkhat leh thenawm hnai ten an zawng nghal a. An hmuh mai loh avangin a tuk June ni 5 khan nilengin khawtlangin an zawng leh a, hetia an zawn buai lai June ni 5 zan dar 6:30 velah chuan Thangpuii fa te ber Zobela kum 18 chu an inhnuaia an ek inah a lo inawkhlum a, a inawhhlum chhan hi chiang taka hriat nilo mahse, a nu damlo rilru buai a enkawl mek laia, a bo ta chu ama mawh nia ngaiin a rilru na a inawkhlum ta mai ni a ngaih a ni. A fapa ruang nena an khawtlang leh chhungte an awm mek laiin hetiang thil rapthlak tak hi a thleng leh ta a ni. Pi Thangpuii ruang awm dan atangin a inawhhlumna hi a rei tawh hmel a, a bo ni June ni 4 lam daih a inawkhlum tawh kha a nih an ring. A inawhlum chhan hi hriat a ni lo na a; natna neuh neuh a neih avanga rilru beidawng nia ngaih a ni.

7th. Thursday: Pu Lalchawimawia kum 40 Parbung khua Zemabawka cheng chu, Bungbangla thlen hma kawng bul a quary chimah lungin a delh hlum. Pu Lalchawimawia leh a hnathawhpuite hian quary-ah lung la a inhlawhin an riahchilh a, zing lamah lung hal thlakna tur an sawh a, an lung sawh chu a pialtlep chawpa tawlhin Pu Lalchawimawia leh a bula a thawhpui pa chu a tawlhpui ta a, Pu Lalchawimawia hi lung chim hian delhin a hmunah a boral a. A thianpa erawh a kut leh ban velah hliam chhete a nei tihloh chu na dang a neilo hlauh. Zemabawk YMA ten Pu Lalchawimawia kuang tur hi siamsakin an khua Parbung lam panpui nghal a ni.

8th. Friday: Zemabawk Lungbial venga cheng Pu B.Munga kum 32 mi chu a hnathawhna Quary chimah lungin a delh hlum. Zinglamah Bungbangla thlenhma kawngpui chhaka quary-ah Pu B.Munga hian lung halna tur geletine phumna tur thirtiangin a sawh a, chutia hna a thawh mek lai chuan a awmna chhak ko sang tak atang chuan lung lian tak mai a rawn chim thla ta a, B.Munga hi a rawn hnawl thla ta a ni. B.Munga taksa hi lung hian a delh chhe hneh hle a, hei vang hian a chhungte leh khawtlangte an in rawn khawm a; chawpchilh taka vui nghal a ni. Pu B.Munga hian a nupui leh an fa naupang te te pahnih a kalsan a ni.

9th. Saturday: Tripura mi hnam dangte chu an thlenna room chhung Hotel Millenium, Dawrpuiah Pu Biakthansanga, People’s Conference (PC) Party Secretary leh Pu Lalchhuanawma (Maawma), Zawlnuam Vengpui Congress VCP te kalin Rs.20,000/- pe turin Maawma hian a vau a, kut a thlak a, heng Tripura mite hian an neih zawng zawng Rs.10,100/- atangin Rs.10,000/- an pe. Heng mi pahnihte hi Uttam Deb, Reporter, JANA KANTHA, Kailasahar, Tripura leh Debasis (Piklu), Red Cross Society of India, Damcherra, Tripura a mite an ni. Hetianga an tih ngawt nachhan hi rukruk/insuam angin misualte hian an inngai hauh lovang. Chuti a nih chuan dan lo anga donation khawn ang anni tihna a nia; a pawi khawp mai.

10th. Sunday: Hmar People Convention (Democratic) hruaitu lawk pahnih Army Chief, Ropuia leh Deputy Army Chief, Biaknunga te chu Mizoram Police-te chuan Silchar Airport-ah an man. Sangbera kaihhrui HPC(D) Army Chief Ropuia leh Deputy Army Chief Biaknunga te hian Imphal atangin Silchar hi thlawhna hmangin an pan a. Hei hi hre lawkin Mizoram Police leh Silchar Police te chuan an lo chang a, tichuan an man ta a ni. Mizoram panpui nghal an ni a; an hnen aṭang hian ralthuam man an neilo. HPC [D] te hian ralthuam atan AK 47 leh G3 bomb te an hmang thin a. Amaherawhchu, ralthuam tha hi an ngah tawk loh avangin SBBL leh tualchher silai leh pistol te an hmang nasa hle niin an sawi.
Anni pawl hi tunhnaia YMA ṭhiat tura khaw ṭhenkhat titute kha an niin Autonomous District Council an ngiat bawk.

11th. Monday: Thingtlang khua te hmasawnna tura Sorkar Laipui hmalaknate (Rural Development Programmes) viltu District Level Vigilance & Monitoring Committee chu DRDA Conference Hall ah Co-Chairman Pu Lalhmingliana, MP (Rajya Sabha) hovin an thukhawm a. Mahatma Gandhi National Rural Employment Guarantee Scheme (MGNREGS) – vantlang ro tling siama mipui inhlawhna siamsak chungchangte, Indira Awaas Yojana (IAY) – mi harsa te in sak sak te, Swarjayanti Gram Swarozgar Yojana (SGSY) – thingtlang mi harsa te sum leh pai dinhmun chawikanna tura self help group tanpuina pek dan te, District Rural Development Agency (DRDA), Aizawl hmalakna te, Integrated Watershed Development Programme (IWDP) – leilet, tuikhuah, dil, tui lakna, tuizem, thingphun etc. siama hmalakna te, Pradhan Mantri Gram Sadak Yojana (PMGSY) – thingtlang khaw kar kawng siamna te, Accelerated Rural Water Supply Programme (ARWSP) – tui in tur mamawh pek hna te, Total Sanitation Campaign (TSC) – inthiarna thianghlim siam hna te, National Social Assistance Programme (NSAP) – tar, hmeithai leh rualbanlote enkawlna chungchanga hmalak hrang hrangte an sawiho.

12th. Tuesday: Central Jail Tanhril-a tang, damchhung tang tura convict 4 leh kum 7 tang tura convict mi 1 an vaiin mi 5 te chu Central Jail hungna bang-ah lawnliamin an tlan chhuak.
Heng tang tlanchhuak te hi:
1, Kaplianthanga kum 26, Ngurkhua – damchhung tang tur.
2. MD Mister kum 28, Bihar lam mi – Damchhung tang tur. A ni hi Pi Muanpuii kudama thawk thin Nl Remsiami that tu kha a ni.
3. Bhudi Joy kum 20, Riang – Damchhung tang tur.
4. Baiara Riang kum 21 – Damchhung tang tur.
5. Miauchi kum 34, Kawl – kum 7 tang tura convict tawh te an ni hlawm.
Heng jail tang tlanchhuak zinga mi pathum te hi cell khata awm an ni a, 2 dang te hi cell khata awmdun anni thung. Cell chabi lem siam ruin chumi hmang chuan an cell kalhna tala hawngin an mutbu kawmawl chu Jail hungna fencing-ah an bang liam a, chumi hmang chuan Jail hungna bang hi an lawnliam ta a ni.

13th. Wednesday: Presbyterian Hindi Bible School Chapel-ah Batch 49-na pualin Graduation Service hman a ni. Graduation programme hi Rev. Lalchhuanmawia, Synod Mission Board Secretary-in a kaihruai a, Atmaram Laxman-in Bible chhiar leh tawngtaina hun a hmang. B. Kananmawii, Instructor-in Inhmelhriattirna hun hmangin reports a pe a. Zirlaiten thurin puanchhuahna hun an hmang a, Nl Lalruatthangi, Instructor-in result a puang a, Upa R. Lalmalsawma, Synod Mission Board Coordinator-in certificate semin thusawina hun a hmang bawk. Bawngkawn Kohhran Masihi Sangati zaipawl an zai a, Rev. John Sharma, Principal-in zirchhuakte fuihna thu a sawi bawk. Rev Darkhuma’n zirlai zirchhuakte tana tawngtaisakna hun a hmang a, Pi Zirnuntluangi, Office Assistant-in lawmthu a sawi a, chairman-in malsawmna sawiin a tin a ni. Programme hman zawhah hian inthlahna ruai kilho nghal a ni. Presbyterian Hindi Bible School (PHBS) hi Mizoram chhunga hnam dang ringtharte tihchakna atan August 24, 1990 khan hawn tan a ni a, batch hmasa berah mi 20-in an zir nghal a ni. A hawn kum atanga tun thleng hian zir chhuak mi 1175 an awm tawh a, tun ṭuma zirlai thlah takte hi mi 18, mipa 16 leh hmeichhia 2 an ni a, Assam, Arunachal, Tripura, Madhya Pradesh (TBZ Mission Field), Jharkhand, Bhutan, Orissa leh Mizoram atanga lo kalte an ni.

14th. Thursday: Mizoram district tinah Green Mizoram Day hman a ni a, Aizawlah chuan Chief Minister, Lal Thanhawla’n 23rd. Sector Assam Rifles complex, Khatla-ah a hawngin H Rohluna, E&F Minister chu inkhawm chairman a ni. He hunah hian thupui chu ‘Thing phun ila, Zoram nuam i siam ang u’ tih a ni a; theme song music video ‘Green Green Mizoram’ tih chu CM-in a tlangzarh. Inkhawmah hian kumin thál laia kângmei chhuak thei veng thate hnenah Fire Prevention Award 2012 leh district tina ti tha pathumte hnenah lawmman sem a ni a; district anga pakhatna Aizawl district-in Rs. 20,000/- leh trophy, pahnihna Serchhip leh Saiha district ten Rs. 15,000/- leh certificate, pathumna Lunglei district-in Rs. 10,000/- leh certificate an dawng a ni. Inkhawm zawhah AR complex-ah Chief Minister, Minister te, Parliamentary Secretary te, MLA te, Chief Secretary leh sorkar leh NGO hruaitute’n thing tiak an phun a; kumnin Green Mizoram Day denchhen hian Mizoram pumah thing chi hrang 28 phun a ni. Nikum khan thing ṭiak 2,06,339 phun a ni. Green Mizoram hi 1998 aṭang khan kumtin khel lovin kan hmang ta a; mi ṭhenkhatin, ‘Sorkar lah hi thing phun an uar em em ringawt a; a enkawl zui lam ngaihthah leh si’ tiin an phun fo ṭhin. Kan khaw nawmna tura thing kan phun enkawl kawngah chuan sorkar phut kher lova mahnin duat nachang hria ila a duhawm ngawt mai.

15th. Friday: Central Jail tang tlanchhuak mi 5 zinga 4 te man an nih hnu a man loh awmchhun Miauchi (34) S/o. Vanchunga, Burma mi chu man a ni ve leh ta. Midang chu June 13, Nilaini zan dar 7 vel khan Nghalchawm khaw dáiah man an ni tawh hlawm a ni. Miauchi hian Nghalchawm atanga Lengte lam, Km 1/2 velah motor a lo phar a, motor-a chuang te chuan jail tang tlanchhuak a nih ringin an lo phur ngam lova; Nghalchawm khawtlang hruaitute phone-in an hrilh a, VCP hovin mi thenkhat an va tlan vat a, an va nangching a, an man ta a ni. Miauchi hian Jail tang tlanchhuak a nih thu leh amah chu in man tir a duh thu a sawi a ni. Miauchi hian a kut pahnih hruiin a lo in tawn a, kham lawn a ngaih taka in dawm ngheh nan a ti niin a sawi. Ruah a sur avangin Miauchi hi a thawmhnaw a huh nasa a, ramhnuaia awm reng chu hrehawm a tih avangin a rawn chhuak ta ngawt mai niin a sawi. Miauchi hi a ril a tam hle a, a thawmhnaw inbel te pawh a chhe hle. Amah mantute hian Nghalchawm khuaah hruailutuin VCP inah chaw an ei tir a, thawmhnaw hul an hak tir hnuah Sairang Police hnenah an hrilh a, annin an rawn lam ta nghal a ni . Miauchi hian pawngsual thubuai pahnih, Champhaiah leh Vaivakawn PS hnuaiah a nei a, Champhai PS hnuaia mi zawk hi thubuai chinfel tawh a niin kum 7 tang tura tih a ni a, hetih lai hian Vaivakawn PS hnuaia a pawngsualna thubuai hi rel fel ala nih loh avangin hremna pek belh dan tur hriat a ni rih lo. Hetih lai hian a tlanchhuahpui midangte kha chu thubuai dang siam belh sak vek anni.

16th. Saturday: Mizoram Police-a Special Narcotic PS-te leh 26th Assam Rifles tangkawp chuan R.Lalhnuna (54) s/o. Lalbela (L), Republic Veng hnen atangin .22 PPK Walther pistol pakhat, a magazine pakhat leh .32 Colt pahnih an man. Pistol-te hi an hralh chhawn tur nia hriat a ni a, R Lalhnuna thurualpui, TBC Ralliana (41) s/o TBC Herliana, Bungkawn Vengthar an man bawk. Pistol pahnih hi Rs. 4,00,000/- vel hù-a chhût a ni.

17th. Sunday: Central Anti-Drug Squad chuan khan H Zaikungpuia (41) s/o. Thangchuanga, Tuikual North nia inchhal hnen atangin parvon spas mûm 87 an man a; F Lalthlamuana (43) s/o F Tialkima, Kulikawn nia inchhal hnen atangin parvon spas mûm 396 an man bawk. Ruihhlo leh a neitute hi Excise & Narcotics kutah an hlân a ni.

18th. Monday: Traffic Management Coordination Commi¬ttee thutlukna angin, Aizawl khawpuia hun rei tak taxi intlân chhawk thin chu tihtawp niin, taxi-te chu an vaia tlantir leh an ni. Aizawl taxi-te hmun thuma thena intlan chhawktir lai khan Aizawl khawpuiah ni khatah taxi 3,700 vel tlanin, taxi 1,300 vel an ding thin a ni.

19th. Tuesday: Synod Lay Workers Fellowship (SLWF) chuan kumin Lay DAY-a an buhfai thawhkhawm bag 37 chu Bethel Camping Centre, Chawnpui-ah an hlan. Lay Day (May 25)-ah khan buhfai leh pawisa thawhkhawm a ni a, pawisa thawhkhawmte pawh hi buhfaiah chantir vek a nih hnuah bag 37 a tling thei ta a ni. Lay Day pual hian Synod Hospital-ah damlote tan thisen pek thin a ni bawk a, kuminah hian Hospital lam khawl a chiangkuan loh avangin la pek a ni lo va, remchang hmasa berah Lay member ten thisen hi an pe ang. Tunah hian Synod hnuaia thawk Lay Member 861 an awm mek a ni.

20th. Wednesday: Mizo Zirlai Pawl hruaitute chuan pension tawh Principal Adviser a rawih nawn Pu P.Chakraborty chu Aizawl secretariat-a a Office ah kalin, an luhchhuak. MZP hruaitute te hi a office ah lutin rawih nawn leh anih chu an duh loh thu leh chawl nghal tura tiin lehkha ah banna ziak turin an ti a, Pu Chakraborty a hian ama letter head ah a hna pawhseina chu a hnawl thu ziak nghalin, Minister DP and AR a address ani. He thil thlen lai hian Law and Judicial Secretary Pu P Singthanga pawh telin, MZP te chu hetianga tih a thian lo thu a hrilh a, Pu Chakraborty a hian a office hi a chhuahsan zui nghal ani. Pu P.Chakraborty hi nikum November thla khan sorkar chuan a thawh ṭhat em avang leh thiam bik thil a neih avangin a pension hun tawh mahse, thla ruk chhung atan a term an pawhsei sak a; hemi hi hrethiam lovin zirlai pawlte hian a pisa kai tur chu an lo dang tawh a; hetih laia CM charge latu Home Minister zahawmtak Pu R.Lalzirliana chuan hrethiam tura ngenin tun tum bak pawhsei a nih loh tur thu a lo hrilh hriat avangin zirlai ho pawh an ngawi ta a; chu hun chu tawpin thlakhat dang an pawh sei sak leh hi an hrethiam theilo a ni ber mai.

21st. Thursday: Mizoram hmun thuma tuitlaah mi pali, heng mite hian nunna hlu tak an chan:
Zohmingliana s/o V.Vanlawma, Lungtian leh Sangalha Pangkhua, Lawngtlai District ve ve, Samuel Ngurliansanga (6) S/o. Laldinsanga Khawzawl leh Albert Hausanglura (29) H/o.Lalhmangaihsangi, Serchhip Hmar Veng te hian.

22nd. Friday: N.Khawbung Lal Thanghlianga Sailo Lungdawh chu Pu P.C.Zoram Sangliana Minister of Art & Culture in a hawng. Lal Thanghlianga Sailo hi Govt.Mizo High School an din dawn tumin Lal thenkhat leh Bawrhsap te meuh pawh school din tul ti lo lamah an awm a, mahse huaisen taka Bawrhsap hnena ‘Mizote rethei te te, Shillong ah te pawh lehkha zir thei lo an ni a, zofate hi in chhiahhlawh ah awm tir vek in tum emni?’ tia huaisen taka nawr ngamtu a ni a; a khua leh tui, a thiante leh a hote tana a thil phal tak leh mihuaisen a niin huaisen lawmman pawh a dawng nual a ni. 1911-a Abor run naa a kal pawh hna a thawh that avangin hming tha takin a lo haw a, 1917 –a German ral runin France ramah a kal pawh a huaisen zia ringawt an hrilh fak a ni. Tun thlengin Lal Thanghlianga tu leh fate hi chhungkaw chawimawi tlak, zahawm leh Pathian tih mi an ni. An chhungkua hian Rs.30,000/- N.Khawbung khawtlanga tan an pek chu Lal Thanghlianga fapa Upa Lalruma’n a hlan a ni.

23rd. Saturday: Olympic din champhaphak hriatrengna, International Olympic Day Run khawvel puma hman chu Aizawlah pawh hman ve a ni a. Sports discipline hrang hrang atangin infiammi thahnem takin Chanmari, Kulikawn leh Vaivakawn atangtea tlanin, Lammualah an intawkkhawm a ni. Lammuala intawhkhawmnaah Mizoram State Olympic Association President Pu Lal Thanhawla, Chief Minister chuan Olympic Day Run a thalai infiammi, Aizawl hmun hran hran atanga kalkhawmte chu chibai bukin, an chungah lawmthu a sawi a. ‘Sports discipline hrang hranga hmasawnna hmuh tur a awm chu a lawmawm tak zet a ni’ a ti a. ‘Thalai infiammite chu sorkarin mi hlawhtling tak ni tura chherchhuah a tum reng a ni’ a ti bawk. Olympic Day Run a Sports Association hrang hrang telte hnenah lawmman tangka fai Chief Minister hian a hlan a. Olympic Day Runa vawi 4 a zawna tlan tam ber nihna la tu, tun ṭuma mi 252 telna Mizoram Taekwondo Association chuan Rs. 6,000/- an dawng a ni.

24th. Sunday: June 22 – 24 chhunga neih tura ruahman Synod Revival Team Meet 2012 chu ruahman lawk angin Mission Veng Kohhranah a ṭiak ta. He meet thupuiah hian ‘Maichamah mei a nung reng tur a ni’ (Lev. 6:13) tih an hman a niin. Meet neih chhung hian Revival Speaker hrang hrangten thuchah an sawi a, Kohhran leh Bial Zaipawl hrang hrangten hla an rem bawk. Tun tuma Synod Revival Meet hi a danglam deuh hlek a. Kum danga la tih ngai loh angin team ho te mai ni lovin, Kohhranho te thlarau lam nun tihharh thar hi a tum ber a ni. Thupui pawh Mizoram Gospel Centenary thupui ngei mai kha hman a ni a, a sawitu tur pawh Revival Speaker hlir ruat an ni bawk. Synod Revival Committee hi kum 1977 Synod Inkhawmpuiin, kan rama Chanchin Tha hril uarna leh pianthar harhna darh chak tak lo enkawla kaihruai tur leh chawm turin a din a ni a. A din tirh chhovah hian enkawltu bik (worker) a nei mai lova. Kum 1980 atang chuan Rev. L.Z. Zolawma chu Revival Worker turin dah a ni a, a ni enkawlna leh hmalaknain zawi zawiin a thang ta zel a, kuminah hian Revival Team 70 lai an awm ta a ni.

25th. Monday: Institute of Applied Systems & Rural Development(IASRD) leh Rotary Club of Aizawl buatsaihin Bio-Fuel leh Green Energy pawimawhna chungchang sawihona, “Seminar on Promotion of Bio-Fuel & Green Energy for Sustainable Growth and Its Impact on Climatic Change” chu I&PR Auditorium ah neih a ni. He seminar-ah hian khuallian chu Pu Lalkhama IAS(Rtd), State Planning Board Vice Chairman a niin “Mihringte chenna leilung hi tihpalh thila lo awm ni lovin awmze nei taka duan a ni a. Leilung hausakna te pawh mihring te mamawh phuhru turin daih chin nei tura duan an ni,” a ti. Tun tum seminar hi IASRD-in hetiang seminar a buatsaih vawi 11-na niin Ministry of Earth Sciences leh Ministry of New & Renewal Resources te bakah Rural Electrification Corporation(REC) leh Indian Oil Company(IOC) ten seminar senso hi an tum a ni.

26th. Tuesday: Bungkawn Lai House dawlna lungrem a chim a, a thlanga mi pathum In, chhungkaw 7 luah lai chu luah zui ngam a nih loh avangin an inthiar chhuak a ni. Lai House dawlna lungrem chim hian a thlanga Pu Lungmuankima, Pu T. Lawmkima leh Pu J.R. Sangluaia In te chu a tichhe thelh a, Pu T. Lawmkima te In bang thenkhat phei chu a deng keh a, lungrem chim hian In hi deng chiah lovin an kawt a hnawh vek a ni. Lungrem chhim thlang zawna In pathumte hi chhungkaw 7-in an luah a, ruahtui a la tlak reng avangin In hi luah zui ngam lovin an inthiar chhuak nghal vek a ni. A kawmthlang dawlna lungrem ber a chhiat tawh avang hian Lai House thlang, Bungkawn Vengthara awmte pawhin an In riah rauhsan an tum mek bawk. He lungrem chim hi khawtlang mipuiten hnatlangin an seng hawi a, a min lai chu silpauline-in an khuh nghal bawk a, bungraw thiar chhuah ngaite an thiar chhuahpui bawk a ni.

27th. Wednesday: Lunglei Sacret Heart School-a Class VI zirlai Lalrinhlui kum 13, Pakiauva fanu Lunglei Circuit House bul Venglai ami chu an chenna inah inawk hluma hmuh a ni. Lalrinhlui hi a nu leh pa te an innei tawh lova, a pa hoin a nau te pahnih hmeichhia ve vete nena khawsa anni.

28th. Thursday: Mizoram politician hlun, Minister hlui leh ram kaihhruaina kawnga dinhmun pawimawh tak tak chelh tawh, Pu Zalawma chu zunthlum natna avangin a thi a, kum 77 mi a ni. Pu Zalawma hi kum 1935 December ni 23 khan Sesawngah a lo piang a, sorkar hna a thawh hnuah 1961 September thla khan politics luh chilhin Congress party a zawm a, party-a chanvo hrang hrang a chelh hnuah kum 1970 khan Rengdil bial atangin District Council member atan thlan a ni a, Mizo Dist. Council-ah Chief Executive member a ni. Kum 1972-a Mizoram UT a lo nih khan Kawrthah bial atangin MLA atan thlan a ni a, 1978-ah Kolasib bial atangin thlan tlin leh a ni a, 1989-a state Assembly inthlanah Bilkhawthlir bial atangin thlan tlin a ni leh bawk. Mizorama remna a awm theih nana beitute zinga a ni a, kum 1986 June ni 30 zana Mizoram remna thuthlung ziah a nih pawh khan a hmunah a awm ve a ni. Sorkar dept. hrang hrang enkawlin Minister a ni tawh a, a hun tawp lamah erawh chuan a bawrhsawm tak deuh avangin politics leh thil dangah a inhmang nasa thei ta lo a ni. Hun engemaw chen, Mizoram leh phaiah te a inenkawl hnuah tun hnaiah khan a chak lo zual a, natna chi hrang hrangin a tihbuai tawh avangin a chak lo telh telh a, tun hi a lo thleng ta mai a ni.

29th. Friday: Aizawl lam atanga Sihphir Vengthar luh chhoh hma, Oriental School thlen chhoh hma kawng kual laiah Silchar lam atanga lo chho Lawi 5 phur truck hnam dang khalh, MZ-05/2262 leh Aizawl lam atanga chho, 1109 truck MZ-01/F-773? te chu inpel sualin Hnamdang khalh Lawi phur hi kawngthlangah thui tak a lum a, a lawi phurh 3 te hi an thi a, truck chesual driver leh handiman te hian hliam an tuar ve ve bawk. Sihphir Vengthar YMA chuan hnatlang kovin chhanchhuahna hna an thawk a; hliamte pawh damdawi in lamah an kalpui nghal a ni.

30th. Saturday: MNF party chuan, India Sorkar leh MNF-in inremna an siam vawi 26-na Mizoram khaw 30 chuangah an hmang a. A lawmna pui ber Aizawl, Mizo Hnam Run-ah President Pu Zoramthanga hova hman a ni a, “India Sorkar leh MNF duhthusam inremna kan siam lo, nimahsela, hei aia tha duhthlan tur kan nei lo va, Pathian remruatnain kan inrem a ni” a ti.

Kum a chawhnu leh ta ruih mai. Damtakin ule.

Similar Posts:

• Kolkata-ah Mizoram House thar sa dawn
• NLUP atan Rs 100 crore hmang hman ta lo
• Mizoram annual plan cheng vaibelchhe 2300
• Mizoram sorkar leiba – “Vaibelchhe 3,611″
• Mizo hnam zingah Gangte telh an ni ve ta

Recent Posts:

• Kawnpui dai sex video a leakout!
• Ka Zirtirtu
• Zirtirtu Isua{Teachers’ Day Special}.
• TUMAN ZU HI AN CHHUNGKAW IN ATAN AN DUH KA RING LO
• ZONUNMAWI

This entry was posted on Sunday, July 1st, 2012 at 1:00 pm and is filed under Information, Mizoram. You can follow any responses to this entry through the RSS 2.0 feed. You can leave a response, or trackback from your own site.