FIFA-in goal-line technology a pawm ta

July 8th, 2012 8:30 pm by ramhmangaiha

Hun rei tak inhnialna thlentu football-a a goal leh goal loh enna tura ‘goal-line technology’ (GLT) hman chu football dan siamtu International Football Association Board (IFAB) chuan a remti ta a, FIFA pawhin a pawm zui nghal.

Ningani khan Zurich-ah IFAB hi an thukhawm a, football-a inhnialna tam tak chawk chhuaktu GLT chungchang an ngaihtuah a, hman a tha tiin lungrual takin an pawm a ni.

FIFA secretary general Jerome Valcke chuan, “Tokyo-a khelh tur Club World Cup (kumin December), Confederations Cup ( 2013) leh 2014 World Cup-ah hman nghal a ni ang,” a ti a; English Premier League-ah pawh season tharah an hmang dawn a, eng tik hunah chiah nge hman turin an peih dawn tih erawh an la puang thei lo.

IFAB-in ro a rel e:
FIFA hi football dan siamtu a ni lo a, dan siamtu chu IFAB a ni. He pawlah hian football dan siamtu hmasa England-a Football Association, Scottish Football Association (SFA), Football Association of Wales (FAW) leh Northern Ireland-a Irish Football Association (IFA)-in member pakhat theuh an tir thei a, FIFA lamin member pali an tir thei thung.

IFAB hi Ningani khan thukhawmin GLT hman hi an rel thlu ta a, chutah pawh technology pahnih Hawk-Eye leh GoalRef chiah FIFA hian a pawmpui a ni. Heng thil pahnihte hi an hmanna tur stadium-ah enchhin vek phawt zel tur a ni. GLT hman hi FIFA-in a pawmpui a ni chauh a, ‘hman ngei ngei tur’ tih lam a ni lo.

Official panga an pawm:
IFAB hian Euro 2012-a an hman ang match official panga hman pawh a rem ti a, a goal leh goal loh entu tur leh penalty area chhunga player-te che vel entu tura goal bula official pakhat ve ve dah chu an pawmpui.

Hei vang hian inkhelh apiangin match official panga an awm ziah tawh dawn tihna lam a ni lo a, competition organiser lamin hman tul an tih chuan an hmang thei chauh ang.

Hei bakah hian IFAB chuan inkhelh laia lu tuam chu a phal tawh bawk a, Muslim hmeichhiate’n international football an khel ve thei dawn ta a ni. Muslim dan angin hmeichhiate hi an lu an tuam tur tih a ni a, FIFA-in football khelhlaia lu tuam hi a phal ngai lo a, IFAB lamin a phal takah chuan FIFA hnuai inkhelhnaah pawh lu tuam theih a ni tawh ang.

FIFA hotupa thu:
FIFA president Sepp Blatter chuan, “Ka ngaihdan thlaktu chu 2010 World Cup kha a ni a, GLT hman theih chhanah hian, ‘Lampard, ka lawm e,’ tih a phû a ni… Lampard-a goal pawm loh a nih hnu kha chuan FIFA preaident ka nih tirha ka ngaihdan kha ka sawh sawn tawh a, GLT hman a tulzia hi ka hmu chiang a ni,” a ti.

UEFA president Michel Platini chuan GLT hi a duh ngai lo a, mihring ni lo thil dang hmanga football-a ngaihdan siam hian football a tidal zoah a ngai a, chumi piah lamah goal leh goal lo enna mai ni lo thil dangah technology lakluh zel a hlau a ni.

Blatter chuan a goal leh goal loh enna atan chiah an hman tur thu a sawi a, thil dangah technology chu hman a ni dawn lo tih a sawi chiang bawk.

https://vanglaini.org