“Hnam inpumkhatna” hi le:
Ram leh hnam humhalh a, hnam anga dinchhuah nan “Hnam inpumkhatna” a pawimawh hle. YMA ina ram leh hnam humhalh a tih hian “Mizoram leh Mizo hnam” humhalh tihna a ni. Mizo ah hian Zohnahthlak chi peng hrang hrang a awm a; unau kan ni tih kan inhriatchian chauhvin Mizo hnam inpumkhatna a awm thei dawn a ni.
Inunauna-in inpumkhatna a hring a; inpumkhatna hi chakna thahrui a ni tih kan hriat a tha hle. Chumi rual chuan Mizo zingah ngei pawh “khawi chin nge Mizoram? Tute nge Mizo?”, tihah kan inlungrual a pawimawh a ni.
Mizo kan tih hian ‘Mongal’ hnam lianpui zinga hnam peng ‘Mongoloid’ zinga tel; tawng lamah ‘Tibeto-Burman’ hlawm zinga mi; ‘Sa’ inphuntawn thin Zo hnahthlak chi peng hrang hrang – Hmar, Ralte, Lusei, Lai, Mara, Kuki leh an chi pengte hi a huam vek a ni.
Mizo tih hming inlumlet dan kan en chuan kum 1901 chhiarpuiah khan Mizoramah mihring 76,678 an awm a. Mahni hnam hminga ‘Mizo’ inchhal pakhatmah an la awm lo. Kum 1961 chhiarpuiah chuan 96.50% ‘Mizo’ an inti tawh a ni. Kum 1947 a Mizo Union Conference chuan Zo hnahthlak chi peng 38 lai mai Mizo hnam ah a puang tawh a.
Kum 1981 chhiarpuia a lan danin Assam, Manipur, Megalaya, Mizoram leh Tripura rama Zo hnahthlak zingah 53.05% in Mizo an inti tawh a ni. India ram pum chhiarpui 1981 ah pawh Zo hnahthlakte zingah 63.16% in Mizo ah an inchhal tawh bawk. (Mizo chanchin – B Lalthangliana) Mizo inti avangin kan chi emaw, chi peng emaw nihna a bo chuang lova tu hnenah mah kan lut hek lo. Kan nihna ngaia ding reng chungin kan Mizo mai zawk dawn a ni.
Zo hnahthlak hrang hrangte unau kan ni tih ti chiangtu pakhat chu “Tawng” hi a ni. Kum 1954 khan Prof. GH Luce, Rangoon University chu Chin Hill hmar lamah zinin an tawng a zir chiang a. Thu mal 1000 a lakkhawm atangin 70% chu thuhmun a ni tih a hmuchhuak a ni.
Rev. Vanbika (Lai-Halkha tawnga Bible letlingtu) chuan Mizo tawng leh Halkha tawng 80% vel, Laizo (Zahau) tawng nen 70% vel, Tiddim (Kamhau) tawng nen 50% vel a thuhmun tih a sawi bawk. Mizo chanchin ziaktu Pu B Lalthangliana chuan kum 2007 khan Mizo tawng bul leh hlun thumal 1690 a la khawm a. Chung zingah chuan Mizo tawng leh Hmar tawng 71.50%, Lai tawng 65.73%, Ralte tawng 87% a thuhmun tih a hmuchhuak a ni.
Tin, Mizo, Hmar, Lai, Mara, Paite, Ralte leh Thado-Kuki te chu 28.16% a thuhmun bawk tih a sawi. (B Lalthangliana, Vanglaini- March 3, 2012) Heng atang hian Mizo tawng hi Lusei tawng mai a ni lo; Zo hnahthlak tawng hrang hrang luangkhawm a ni tih a ti chiang hle. Kan tawng hmante hi innuihzat leh inenhran nan hmang lovin, unau kan ni zia tilang chiangtu ni thei se; hnam inpumkhat tura tan kan laknaah kan tangkaipui ngeiin a rinawm.
Zau zawka kan ngaihtuah chuan ram leh hnam humhalh tih hian Mizoram chhung bakah ram pawna kan Zo hnahthlakpuite, Duhlian tawng hmang ve lote leh an chenna thlengin kan huam tir thei ang. Chumi rual chuan mahni zawh loh nghawngkawl inbah palh pawh awl tak a ni thei tih kan hriat a tha hle. Eng pawh nise, ram leh hnam humhalh tur chuan Mizoram leh a chhunga chengte a pawimawh hmasa ber ang; kan rilru sukthleng dan leh hma kan lak dan a zirin ram lak tur chin pawh azauvin a zau lo mai dawn a ni.
Chuvangin, Mizoram hi Mizo hnam ‘Inpui’ a ni tiin hnam inpumkhat zawngin tan la ila; duhlian tawng hmang pai leh thiamlote innuihzat leh inhmusih mai lovin, Zo hnahthlak hnamdanga inchhung lut tawh te leh Mizo nih duh lote pawhin Mizo nih chak tur khawpin tan han la ila; kan chhehvela Zo hnahthlakpuite leh an chennate humhalh kawngah pawh awmzia a nei ngeiin a rinawm a ni.
Ram leh hnam humhalh hi thil awlsam leh nuam a ni hauh lovang. Tuna kan kalphung tam takah siamthat ngai lai leh inven ngai lai tam tak a awm tih pawh a chiang a. Chumi hna thawktu tur chu Mizo te chauh kan ni. Hnamdangin min rawn siamthatpuiin min rawn humhalhpui hauh lovang. Chuvangin, kan ram leh kan hnam himna chu Mizote kutah a awm a, Mizo tawh phawt chuan mawh kan phur vek a ni. Mizo hnam dinchhuah nan “Inunauna leh inpumkhatna awmphaw” hain, hnam ro “Tlawmngaihna ralthuam” nena tan kan lak chuan kan hmalam hun a eng ngei ang.
Similar Posts:
- Mizo hnahthlak inunau nan Mizo tawng
- ‘ZOLUANKAWR’ Pu P.L.Liandinga’n a tlangzarh
- Mizote Chu Mizote Hi Kan Ni
- Tute nge Mizo?
- Mahni hnam tawng thiamloh a zahthlak
July 14th, 2012 at 5:32 pm
Chiar i1a.
Report this comment
July 14th, 2012 at 5:40 pm
A va ṭha tehlul êm, lehpek a’na!
Mizova inchhal zât tihvêl a kum azira i ziah khi a bengvarthlâk hlë bawk.
Mizo ṭawng pai kan la hmusit hi chu kan mawl vang mai mai; sâpho hian an ṭawng pai hmusit ualau ve chiah se… an ṭawng hi a tuitla lo khawp ang…
Mizo ṭawng pianpui lova lo zir thiam ve ka hmuh te hian ka lawm ngawih ngawih ṭhin. An pai paw’n a mawi ka ti… Mizona tiropuitu chu kan ṭawng hi a ni.
Mizo ṭawng pai hmusitho chu inlasâp hnarbawngho an ni tlangpui. Záwng chung âwrhah tim deuh hlek chunga dah tâwk lek an ni. Mi pangngai lo, mi rilru chenbeh, inlafing mawl bawraw lutukho mai mai an ni.
Kan ṭawng a darh zau poh leh kan thuneihna a sang tihna a ni mai… Chumi hrethiam pha loho chu
mimäwl chènbeh… 
Ka ram leh ka hnam tan!
Report this comment
July 14th, 2012 at 6:07 pm
Hmeichhia leh mipa hming tawp a ‘i’ leh ‘a’ hi engtia lo hmang mai nge kan nih, kan chhuahna lam nia kan hriat lamah khian hmang ve dang an awm em tih vel hi a hriat chakawm ve mai mai. Zo hnahthlak zawng zawng hian kan hmang chuang bawk si lo a. Ka OT ah pawh ka in ngai hauh law
Report this comment
July 14th, 2012 at 6:18 pm
#Jacka Pi (*), mak ve tak a ni hei hi chu. A ṭha hi ka tia… Mizo ṭawng hmangho kan danglamna ve a ni.
Report this comment
July 14th, 2012 at 7:15 pm
A thain a dik hle mai.
Report this comment
July 14th, 2012 at 9:56 pm
Report this comment
July 15th, 2012 at 5:53 am
A dik khawp mai. Hnahthlak tih hi a buaithlak
Mizo nih mai hi a tawk pawh ti ila a dik reng. Mahse, engtikawng zawng pawh a ka pawm theih hauh loh chu, Mizo tawng sawi nan a Lusei tawng/Duhlian hman hi ani! ve tlat mai a. Kan tawng sawi nan vawichhete khat pawh heng thil hi ka hmang ngai lo ang!
Report this comment
July 15th, 2012 at 6:53 am
Hei pawh chu post tha tak a ni
Report this comment
July 15th, 2012 at 7:22 am
#2 NAKHI KA THLAWP E
Report this comment
July 15th, 2012 at 12:03 pm
Thuziak sei tak a tawp ka siam thei ta hram. Comment tute zawng zawng chungah lawmthu ka sawi e.
Report this comment
July 15th, 2012 at 12:21 pm
lrpa, i sawi dik khawp mai. Lusei/duhlian tawng hi Mizo tawng han ti tur chu a ni lo alawm.
Report this comment
July 15th, 2012 at 4:33 pm
Mizo tawng/Mizotawng/Mizo Tawng engpawhnise..a dik ber. Kan hnahthlak (???) te tih lungawi tum vanga duhlian/lusei tawng a kan chhuah chuan ‘mi tenawm’ tak kan niah ka ngai ve tlat..
. ‘A’ pawl ka nih atangin Mizo tawng hi Mizo tawng in ka zir char char. Mizo tawng duhlian leh lusei tawng a chhuah tumte reng reng hi Manipur/burma connection nei an ni tlangpui! 
Mizo ah kan lungrual anga, kan tawng Mizotawng ah pawh kan lungrual tur ani. Chuti anih loh chuan awmzia awm leuu!!
Report this comment