April, 2011 a Burma sorkar ding thar, President U Thein Sein leh a minister 13-te chu India ram New Delhi ah zin in India Prime Minister Dr. Manmohan Singh leh a cabinet member-te nen ni (4) chhung an inbia a, politics, economics, leh ramri chungchang thu an sawi a. Mahse, an sawihona in a ‘rahchhuah leh thutlukna’ sawi tur leh puanchhuah tlak tak erawh chu a awm meuh lo a ang.
Kumin (2012) May 28 ah chuan India sorkar lu ber Prime Minister Dr. Manmohan Singh chu a hote nen Burma an rawn zin veleh a, heihi kum 25 chhunga India PM lo zin hmasa ber a ni a, Burma sorkar kum 1 a tlin hnua ram lal ber lo zin hmasa ber a ni. India PM hi ni (3) chhung a chama, Burma ram tan Human Resource Development (zirna leh thiamna lam thu), Infrastructure (kawngpui, factory lam) tihchangtlun thu te, Agriculture tihhmasawn tur thu, Sipai (Defense) tih changtlun tur thu ah te hian India in tranpuina a pek theih dan tur an ngaihtuah a ni. Hetia India in Burma hmasawnna a puihbawm a tum chhan chu
(1) India in a mamawh Gas leh Petroleum oil Burma hnena a beisei avangin,
(2) Burma ah China in thu a nei lutuk (Influence) sukiang turin,
(3) India hmar-chhak (North-east) helho tihrem theihna tur – te hi a ni tiin India rama chanchinbu-te chuan an ziak.
India External Affairs minister chuan “India in 1994 atranga a lo duan tawh ‘Look East Policy’ atan hian Burma hi a pawimawh ber a, India leh Burma kan in-laichinna a hnget a a thrat zel hi kan beisei a, hemi hi tihpuitlin zel kan tum a ni” a ti. Hemi trumah hian India leh Burma chuan ram pahnih inlungrualna ‘thuthlung’ (12) meuh an ziak a ni. 2011 ah India leh Burma indawr tawnna (trade) hi US$1,200 vel a ni a, heihi kum 2015 ah chuan US$1,500 a nih chhoh an beisei.
May, 2012 ah India PM Burma a zin hnu hian Burma ram sipai lal ber the commander-in-chief of the armed forces General Min Aung Hlaing chu August 1 an 8, 2012 thleng India ramah a zin leh dawn ta a ni. Hetia a zin lai hian New Delhi a Indian Army, Navy leh Air Force chief ho nen an inbia anga, India Defence Minister AK Antony nen pawh an inhmu ang. Kolkota a Indian Army Eastern Command a tlawh anga, Visakhapatnam khua a Indian South-east Navy Command bakah India sipai hmunpui tamtak a tlawh bawk ang.
Hetia Burma sipai lal ber India a zin chhan ber tur nia an rin chu “China ram in Burma chunga thu a nei lutuk hi tih nep deuh theih nan, Burma in China chunga a inhngat lutuk hi a kian deuh theih nan” niin an ring. Burma ram hi India leh China inkara awm a nih mai bak ah heng “Asia Super Power” ram hnih inkarah Burma hi “thupui” na rio a nei tih a lang chiang hle a ni.
Hetia China leh India inkara Burma a “Thupui” na hi Burma sipai sorkar hian “phakar” takin a lo hmang (play) thrin a, khawvel sorkar tamtak in Burma sipai sorkar a “rep char” lai, kum kalta kum 20 chhung chu Burma hian China a bel tawp a tih theih hial a, sipai an lal reng theih nan. Mahse, tuna U Thein Sein-a sorkar thar chuan “China kut hnuaia awm reng ai chuan..” tiin hun remchang takah India lam a hawi tran ta niin a lang. Thein Sein-a sorkar hian Democracy lam hawia ke a pen deuh avang hian USA leh Europe lam in Burma hi puihbawma tranpui an tum tak ah chuan “Nang, China mai mai” tiin ‘bar ah khawn loh’ a tum ve deuh ta pawh a ang a ni.
India tanah Burma hian pawimawhna lian tak a nei ve a, India North-east helho tukdawl nan, India Econmics (Gas leh Petroleum), Bay of Bengal leh Indian ocean ah ramdang sipai an luh lohnan, Nicobar island ralmuana atan, Look East Policy tihpuitlin nan etc…Burma hi India in a mamawh ve tlat a ni. “Duh leh duh an in tawng” dawn pawh a ang vio a ni!!!
1988 ah Burma ram a buai hnu khan India hian democracy sualtute a lo tranpui a, a ramchhungah awmtir in a lo hum a, Burma sipai sorkar kha theihtawp in a lo sawichhe ve thrin a. Chmai bakah democracy hruaitu Aung San Suu Kyi hi India a sikul kala seilian a lo nihna ah India politics hruaitute leh mipui chuan democracy sualtute an lo tranpui in an lo lawm a, heihi Burma sipai sorkar huatzawng tak mai chu a ni a.
1993 velah khan China ram chuan policy pakhat, India hlauhzawng tak mai hi a zam ta a, “Indian ocean leh South Asia, South-east Asia ah China thu neihna kenkawh tum” hi a ni a, Strategy te ziak in an bei ta vak a. He China policy dodalnan leh mahni invenhimnan India in “Look East Policy” hi a bultran ve ta a ni.
1988 hnuah Burma chu khawvel ram tamtak in an “kawm serh” tak ah chuan Burma chuan a loh theih loh in China a bel a ngai ta si a, Burma defense, economics, natural resources ah China thu a lian ta hle a, “Burma chu China ram state pakhat a ni” an ti hial a. Tunah Thein Sein-a sorkar hian China hnuai atranga talchhuah a tum ve ta ni in a lang.
He India-Burma-China ram (3) boruak kal zel tur hi engnge a an zel dawn tih chu tuna Burma leh India lalho intlawhpawhna hian kawngro nasa taka su ngei ang. I thlir zel ang u.
*** He article hi a hnuai “Report” tranchhan in tunlai chanchin nena belhkhawma ka ziak a ni e. R.D.
-From Isolation to Engagement: Reviewing India’s Policy toward Myanmar
( A report prepared by the Indian Council for Research on International Economic Relations for the Asia Society’s Burma/Myanmar Initiative – March 2010 )
Similar Posts:
- State marches for Democracy in Burma
- Burma
- Anger greets Suu Kyi conviction
- The reason we have bad roads in the North East
- Pakistan Supreme Court-in Pakistan Prime Minister manna thupek an tichhuak.
July 28th, 2012 at 3:38 pm
A bengvarthlak e.
Report this comment
July 28th, 2012 at 3:39 pm
Post tha hle mai! An hmeichhia kha a tling nange ??
Report this comment
July 28th, 2012 at 3:48 pm
Burma ah inhmun ngaihtuah vat chi a nih chu le. Chuan BUrma ramah hian hetia mipui sorkar alo din tak ah chuan helho an be rem zel mai si a, amaherawh chu Golden triangle a awm an nih avang hian mafia ho hian awmhmun an khuar mai lovang maw ka ti mai mai. @ lrpa an hmeichhia kha inthlan laiin a chuh ve thei tlat lo a, a hnu ah bye election hmanga thlantlin a nih kha Aungsan-i kha.
Report this comment
July 28th, 2012 at 3:49 pm
in khaw lam khi tlang rin angin in fel duak dawn hauh lo a nia aw..
Report this comment
July 28th, 2012 at 5:12 pm
A ṭha e.
Mahsé India hmarchhak helna tihrêm tum hi ka thlawp ve vak lëm lo. Hel nasa deuh deuh se, India ram lakah hian zalèn nghe nghe se, mizote pawh chuti bawk…, tih hi ka lungkham leh duhaisam a ni.
Vairam kehdarh rawh se!
Report this comment
July 28th, 2012 at 5:27 pm
^i duhthusam khi a thleng har awm!
Report this comment
July 28th, 2012 at 7:30 pm
beng var thlak thin ve.,i ti tha e.
Report this comment
July 28th, 2012 at 8:43 pm
2011 ah India leh Burma indawr tawnna (trade) hi US$1,200 vel a ni a, heihi kum 2015 ah chuan US$1,500 a nih chhoh an beisei.
Hei hi Million emaw tal ani em aw? Khi ti zat teh tlawng chu ram puitling pahnih inkara in sum dawn tawn nan chuan a nep hle mai
Report this comment
July 28th, 2012 at 8:50 pm
A bengvarthlak fu.
‘2011 ah India leh Burma indawr tawnna (trade) hi US$1,200 vel a ni a, heihi kum 2015 ah chuan US$1,500 a nih chhoh an beisei’ i tih khi ram pahnih insumdawntawnna ve lemah chuan a tlem lulai deuh mang e ka ti! US$ 1200 million/1500 million tih tur a nih ka ring e.
Report this comment
July 28th, 2012 at 10:02 pm
@Houdini zalenna hmuhdawn pawhin intodelh sa a zalenna hi a ngelnghet zawkfo tih hre ta che. Ram retheiah chuan tuman awm an chak lovang, Pu Rokunga vission pawh kha a ni lo, a ni kha chuan intodelh a raltiang kai hmasa phawt turin min fuih hlawm a nih kha le…….
Report this comment
July 28th, 2012 at 11:12 pm
US$ 1,200 MILLION tih tur a ni e. Ziak sual palh a ni.
Report this comment
July 29th, 2012 at 1:25 am
refugee a kal tam tak chu an thawn let leh mai ang a!!
Report this comment
July 29th, 2012 at 6:34 am
Bengvarthlak e
Report this comment