mi(sual).com

contd from Part II

Tunah chuan, Roberto chu phatsantu a ni tih ka hre ta. A rang thei ang ber a thah dan tur ka ngaihtuah nghal char char a ngai a ni. Joey, Johnny leh Al te chu Roberto a bodyguard 2 te chu va tlawh a, lenchhuahpui a sawm turin ka tir a. 1 tal kan dahthat a la ngai. Tichuan, member ni tur a sawmna lehkha chu vantlang pool hall ah te chuan kan sem darh a, mi 20 vel in rawn chhangin Roberto nau chuam te zing a la bang zawng chu dah tha turin kan tir ta a.

Chung ho chuan an bei ve nasa ngang mai, mahse a tawp ah chuan Roberto nau te zing ah chuan 1 a damchhuak tlat. Engkim ruahman fel ve a ni tawh a, hriattur pawimawh engkim kan hre vek tawh, Roberto leh a nau 1 chauh chu Don ka nih theihna tur a min daltu te an ni.

Roberto thah dan tur chu kar 3 leh a chanve dawn lai ka ngaihtuah ta, a In a a awm lai ngei in ka kaphlum ang, a chhan chu a nau te ho a zawng ngei ang a, guard a nei lovang, a chhan chu a lubur a chhah em avangin mi tumah a In ah chuan an rawn kal a rin loh vang a ni.

Kan tum zan chu a rawn thleng ta a, a In chhak lawk ah chuan ka car chu ka hung a, kawtthler ah chuan Joey leh Al cu an chhukthla a, In hnung lam ah chuan Dave leh Johnny an awm bawk. Dar 12 a ri a, In chu kan hnaih hlawm set set tawh khawp mai. Hmalam kawngkhar atang chuan Joey leh Al chu an lut ru a, chutih lai chuan Dave leh Johnny chuan kawngkhar an lo kar chhe mek bawk.Keichuan pawn ah ka lo nghak a, darthlalang keh ri nasa tak leh au thawm ka hria, chumi hnu reilo te ah chuan ‘Mihring Awm lohna Ram’ tih mai tur khawp in a reh leh thuap a.

Minute 10 vel ka nghak leh a, mihring taksa thisen kai hneng hnuang hi an rawn hnuk thla a, ka hma ah chuan an thingthittir a, ka pistol ka la chhuak a a chal ah ka tin nghal a, mahse tukverh atang chuan a fapa in tap chungin a lo thlir reng a ni tih ka hmu ta a. Joey hnenah chuan ‘he thil hi mi tam tak hmuh lai ngeiin kan ti ang’ tiin ka hrilh a, a ‘aw’ ve mai a, Roberto chu a man bet a, car awmna lam ah chuan a hnuk phei a, car hnung bawm ah chuan a nawr lut a.

Lawng chawlhhmun lam pan chuan kan tlan ta a, bawm atang chuan Roberto chu kan la chhuak a, vaukam atanga lawng panna sawngka an dawh ah chuan kan thingthittir a, ‘The Marco’s’ ten nen a an inkungkaihna chu hriat ka duh a, ‘Engvangin nge nang leh I ho te kha an thah loh che u? Pawl khat a thawk ho kan ni lo em ni?’ tiin ka zawt a, min chhan duh lawk loh avangin a hliam hma chuan ka silai in a lu leh hmai chu vawi engemaw zat ka khawng nghe nghe. Tichuan, engkim min hrilh ta a, a sawi dan chuan Don a ni thei anih chuan kan chhungkaw pumpui(the Riggiaza’s) chu ‘The Marco’s’ ho kut a hlan a lo tum reng a, kan headquarter bul lawk a garage a thawk, mechanic nen inzawmna an neih thu te min hrilh a. A hriat zawng zawng min hrilh zawh hnu chuan ka silai chu a lu ah nghatin ka kap ta a, tui ah a tlak hnu chuan, kan kalsan ta a.Tunah chuan, ka hmelma te 2 an awm ta lo bawk a, ka duh leh ka tum ber tih a hun ta.

Cancer natna ang maiin khawpui kil tin mai ah chuan ka ho te chu an inzarpharh a, pawl member neih belh nan tiin pool hall te chu a mal te te in kan luhchhuah hmiah hmiah tawh a, pawisa neih belh nan tiin dawr pawh a mal te te in kan rawk zel a, kan kawng daltu apiang kan that nghal zel a ni. Heng thil hi ka tih chhan chu, ka duh vang reng a ni, Crime Family lian ber nih ka duh a, chumi thleng tur chuan ‘The Marco’s’ ho chu ka tihtawp an ngai dawn a ni. Sawi mai chuan a awlsam hle, mahse a tak a tih dawn meuh chuan huphurhawm ve tek tek tak a ni.Khawpui chanve vel emaw chauh chu ka kut a awm a ni a, a bak zawng chu Tony kut ah a awm.

A chanpual chu laksak duh a, ani paw’n ka chanpual chu min chhuhsak a duh bawk. Tichuan, ka neih ang ang chu ka pe dawn ta a ni, chumi hmang chuan khawpui pumpui chu ka kut ah a awm tawh ang. Ka tum dan hi atthlak pawh in ti a ni maithei, mahse chu chu a ni he ngaihtuah atthlak leh mak tak mai min puttirtu hi.Ka ruahman dan chuan ‘The Riggiaza’s’ leh ‘The Marco’s’ te kan inkar a harsatna awmte chingfel turin joint-meeting ko ila. Chhan tha tak ka siam anih loh chuan Tony chu a rawn kal dawn lo tih ka hria.

Chuvangin, he meeting ah hian kan thiltih lai a inhnawmhnawih tawh lo a inthiarfihhlim mai ka duh avang leh ka chanpual, khawpui zatve te chu a kut a hlan ka tum thu ka hrilh ta a. Tunah chuan, ka tum ang ngeiin a ngaihven ta hle mai. Tichuan Roberto nen inzawmna nei, kha mechanic kha hmu turin ka kal ta a, thil eng eng emaw zawt fiah turin reilote va tlawh zuai kan tum a.

He pa hi pa luhlul leh tuarchhel tak, uangthuang ve tak a ni na in a mawl lem lo, amah hmu tur a kan va kal chu min lo hmu reng a, tap pah in ka zawh tum bak te pawh min hrilh fai ta vek mai a, ka duh chu Tony chuan mi engzat nge meeting a rawn hruai dawn tih chauh chu a ni a, mahse he pa hian ‘Tony chu meeting ah chuan a lo kal ang, I chanpual a chhuhsak hnu ah che chuan bank a rawk a nga, I pawl te tih ang in sawi a tum a ni’ tiin min hrilh a. He thil kher kher hi chuan min tilawm lo kher mai.

Tichuan, Tony ruahmanna chu hmang a, a thiltih tum dan ang ngei chuan amah chu hrem let tum in ka inbuatsaih ta a. Joey, Dave, Johnny leh Al te chu ka thil tih tum dan chu engkim ka hrilh vek a, an za in min zui an tum ta a. Anmahni chauh ka hrilh, a chhan chu ka ring ngam a, rintlak an ni in ka hre bawk.A tuk ah chuan kawtthler a Dave leh Al te’n Joey an lo khawih lai chu ka zuk hmu a, ka thelh nghal vat a, Joey chu vawi 3 vel ka theihawpin a hmai ah ka hnek a, ‘engthil nge thleng ta?’ tiin ka zawt a, Dave chu thinrim takin a rawn hawi a ‘He pa hi Feds (FBI) te nen an inbe lai ka hmu, I ruahmanna zawng zawng te pawh a hrilh vek tawh ang.

Tichuan, kei leh Al chuan a sawi tawh tur a ni lo tih hriatchian kan duh vang a heng thil hi ti kan ni’ a ti a. Joey chu ka en a, a mitmeng atang chuan a zak hle tih ka hmu thei, tho turin ka hrilh a, a thuruk zawng zawng mi hrilh turin ka ti a, hmai a thisen kai hluam chung chuan Feds ho an rawn kal chuan ka tihtur ni a ka ngaih chu ka ti ve ta mai a ni. Pawisa min pe a, nangmahni ho enthla tur in min tia, mahse ka nu nunna chhalin ka sawi e, engmah ka sawi lo, ka ti tak tak, min ring rawh Frankie khawngaihin’.

Minute 1 vel Joey chu ka en reng a, ka inher a, Dave leh Al chu min rawn zui turin ka ti a, in lam pan in ka kal ta a. Joey chu enthla a, Feds ho nen an inhmu leh em tih hre tur leh an hriat ang ang te ka hnen a rawn report zel tur leh amah khawih tawh lo turin Dave leh Al chu ka hrilh a. Joey chuan Feds ho hi he thil ah hian a kangkai thei anih ngai chuan ka ruahmanna siam chu a tiawlsam sawt dawn a ni, a be thin a nih phei chuan Tony leh a ho te chu a hneh thei ngei ang.

Meeting Ni chu a lo thleng ta a, mi 12 in In chu an din-hual a, Inchung ah mi 15 te’n pawn lam an veng bawk, Inchhung lam ah ka bodyguard te zing a a tha tha leh suamhmang mi10 ka nei bawk. Tony rawn thleng ka hmuh chuan mak ka ti khawp mai, a chhan chu mi10 leh a bodyguard 2 te chauh a rawn hruai a. Chutah chuan ka thatin ka duh chu ka nei nghal vek thei tih ka hria, mahse ka ruahmanna siam ang ngei a tih chu ka duh tlat a ni. Tony chu min2 vel a hawi kual a, a overcoat dum leh suit dum bawk kha vawiin pawh hian a rawn ha leh a, kawtthler a coat dum ha a ka hmuh hmasakna ber kha ka mitthla ah a rawn lang nghal zuai a.

A nui a, a tawng zui nghal a ‘Frankie, I tan hna tha tak I thawk a ni. I tan a rinawm tak tak, chhun-zan a I bul a awm reng I nei a. Kei leh ka chhungkua hi Crime Organisation lian ber nihna chuhpui ah min cho ta a, suangtuahna hmasawn lo tur leh thleng ngai lo tur a ni, nge mi dawihzep ilo ni ta zawk?, inthahna leh tharum thawhna te hi I hlau ta mai em ni, eng ber hi nge ni ta Frankie?’ Amah chu ka en a, sawi tlang nghal tawp mai ka duh thu ka hrilh a, a nui chu a tawp ta hmiah a. Ka hlauh thu chu ka hrilh a, chumi tichiang tur chuan ama tan Bank ka rawk dawn tih ka hrilh ta a, a ho te min hman tir turin ka dil a; mak a tih hmel hle mai, a chi-ai tih a hriat bawk.

A insawithiam vel a, a phuahchawp mai mai ani tih pawh ka hria, mahse ka ngawi reng a, a ho te 12 chu ka hman a remti ta a. A car lam pan chuan a chhuk thla a, car chhung a a luh hma chuan ‘Ka nau te hian pawisa chu an keng tur a ni, anni chauh hian ka hnenah an rawn keng ngei tur a ni, nang chu I bi-bo nghal tur a ni ang’, a car ah chuan a lut a, a tlan nghal a. Ka ruahmanna siam chu, a mal mal in a hun tak ah a rawn thleng ta, Tony chu kei ai chuan a fing lo tawp mai. Bank rawk tur a min tih pawh chu amah awlsam tak a puh mai theih tur in a ho te chu ka kut ah min pe bawk si.Bank rawk dan tur chu ka ruahman fel vek tawh a,chumi ni ah chuan kan ti ngei tur a ni tiin thuthlukna ka siam a. Tichuan, ka nau te ho chu ka ko khawm a, Bank lam chu kan pan ta a. Dave leh Al chuan Tony a nau 6 te chu an hruai a, building hnunglam ah chuan an phei a. Joey, Johnny leh midang 6 te nen kawngkhar hmalam chu kan pan ve nghal a. Inchhung ka lut a, guard ho chu kan kap nghal a, counter zing a 1 ah chuan ka zuang lut a.

Johhny pawh chuan midang zawngin hmalam pan a silai an kah mawlh mawlh lai chuan counter 1 ah chuan a zuang lut ve a. Johnny an kahhlum lai tak chu ka va hmu a, silai mu in a lu fuh avangin a taksa chu Wrecking ball (In nawr chhiatna) ang mai a bang a a va bei thlawp chu ka hmu a. Joey chu thinur em em in a ding a, a silai chu a kap nghal chiam chiam a, guard 3 a kapphlum hman, keipawh ka ding a, ka silai mu a zawh hma chuan ka kap ve nghal char char a, chumi hnu chuan ka beng a ngawng ta mai emaw tih tur khawpin a reh thuap a. Ka hawi kual a, ka ho te leh guards te chu thlanlung tluchhe toh mai a chhuat a lo let phung chu ka va hmu a.

Kei, Joey suamhmang2 te chauh kana wm tawh. Tichuan, pawisa dahna lam chu a rang thei ang ber in kan pan nghal vat a, a chhan chu tuman kan thawm an hre lo awm ang a awm a tum lo. Tukverh hnunglam atangin paw lam ka en a, Dave leh Al chu midangte chu rawn hruai lut tur in ka ti a. Safe awmna ah chuan kan lut thei ta a, kan rukru 2 te chuan an han hawng a, zawi muang a a rawn inhawn chuan a chhung a rangkachak tle-nalh em em mai kan hmu chu kan phu chiang kher mai, a mawizia chu room chhung ah hian Ni a awm ta emaw tih mai tur a ni.

Mak ti tak in min 2 vel chu kan ding reng a. Tichuan, mi 6 te chu an zawh tawk a rit a bag chu dah khat turin ka tir a, midang zawng chuan kan lo thlir reng a, police siren ri a rawn ring tulh tulh tawh si, midang ho chu hmanhmawh tur in ka nawr sek tawh a. Bag chu a khat tawh a, hnunglam kawngka atang chuan kan chhuak a, kawtthler kal tlangin vantlang lnsukna hmun (laundry) a, washing machine a kan bag kan thuhrukna ah chuan kan lut a, kan thawmhnaw te chu apron var leh thawmhnaw pangngai ve deuh te chuan kan thlak a. Chutah chuan tu emaw pawn lamah eng thil nge thleng hre tur a kan tirh hma in darkar3 vel kan nghak awm rih phawt a.

Tony a nau te zing a 1 chu ka chhuah tir hmasa a, pawn ah ding in kan enzui nghal a, a hawikual vel phawt a, engkim a tha tiin min rawn signal hnu ah a rawn kir leh a. Tunah chuan, ka tiam ang ngeiin Tony a nau te ho chu pawisa nen kan haw tir dawn ta, chutiang deuh vel chu a ni e.Tony chu an headquarter chhawng chung ber ah, tukverh bul ah a nau te 6 pawisa nen a an lo kir hun nghakin a thu a. Dar 7 leh Minute 7 vel ah chuan a duh ang chu a thleng ta a. A lo rin dan ah chuan heti hi a ni a, a ho te chu a awmna lam panin an rawn chho tham tham a.

A thutna ngai ah chuan la thu reng in a lo nghak a; inchung lam rawn pan, pen ri a hriat chu a ring tial tial a, kawngkhar a rawn inhawn chiah chuan a thilhmuh chuan a tiphu chiang ngei mai, a hmai a hlim hmel chu a bo a, ang phuau chung chuan hlauh hmel takin a khur zawih zawih a. A hma a pawisa nen a ding chu Keimah ka ni; eng thil nge tihtur a hrelo, a chhan chu he’ng hi a ruahmanna siam ah a tel lo, hetiang em em hian ka fing in ka mak ang tih a hre pha lo. Thu kam khat a sawi pawh ka nghak hman lo,

ka silai ka la chhuak a, ka kap nghal thuai mai, a thutthleng atang chuan a tla a, chhuat ah chuan a let der mai. A thisen chuan carpet chu a khuh sen vek a, ka pa thisen in kan chhuat a khuh sen ang bawk khan. Ka hmai a hlim hmel leh ka pawisa ah lai nen chuan In lam pan in ka haw ta a. Kawngsir a Pay phone atangin tunge ka nih pawh sawi lo in feds te chu ka call a, bank rawktu te chu ka mit ngei ka hmuh thu leh pawisa chu vantlang insukna hmun ah a awm thu te ka hrilh a, ‘The Marco’s’ member 6 te basement ah phuar beh a an awm thu te chu ka hrilh bawk a.A tuk ah chuan tukthuan ka ei laiin, Feds ho chu rawn kalin ka in chu an rawn bei thut a, inchung lam ah rawn chho in min man ta a. Keimah ka ni tih an hria chu mak ka ti khawp mai, engkim ruahman ang in a thleng vek a, thil tihsual engmah kan nei lo. Inhnuai lam kan pan thlak lai chuan ka chhuih theih theih chhuih thlak pah chuan an car kan luh thleng in ka au vak vak a, ka hawi kual a, ka thenawmte chuan kan tlan chhuak chiah chu kut an beng nghal dar dar a.

A chhun a zanin thu min zawt a, mahse engmah ka hrilh duh lo. Tichuan, Cell ah chuan Joey nen chuan (a tir a ka sawi tak ang khan) min dah ta a. Tunah chuan, he Ramhuai Puk hi ka chhuahsan hun tur nghakin nghakin hetah hian ka thu ta reng a. Min chhanchhuaktu tur a rawn kal ta; Police captain, a badge tle nalh tak, a suit pawl-duk mam nalh tak a nawh leh a pheikhawk dum fai tak nen chuan Cell kawngkhar chu a rawn hawng a, Joey chu a en zawh chuan min rawn en a ‘Frank Tulli, I chhuak thei’ a ti a. Joey-a tum hmel ka hmuh chuan ka nuihsawh vel a, cell atang a ka chhuah chuan Joey beng bul ah chuan ‘chance I neih lai khan Feds ho kha inremsiamna I neihpui lo anih kha, kei hi The Insider chu ka ni’ tiin ka hrilh ru a. Joey chuan min hnek a tum lai chuan police te chuan an man bet a, ka zalenna lamtluang chu zawh tan in, ka hlim em avangin ka nui vur vur a. Ka chhuah hma chuan Joey chuan ‘I pa phuba chu engtinnge I tih dawn?’ tiin min rawn au a.

‘Phuba chu ka la tawh’ tiin ka lo chhang mai a. Tony chu ka timualpho in ka hneh tawh a, a hlauh ber lai in ka pa hreawm tawrh ang bawk kha tuar in, ka pa chhuat a a let lai ka thlir reng ang khan chatuan a hreawmna leh natna tuar turin ka thlah liam tawh.A tawp ah chuan ka zalen ve ta, ka pa thihna te’n ka rilru a tibuai tawh lo bawk, tualthahna leh tharum thawhna zawng zawng lak ah ka zalen ta.

Lou vui Ni a ni a, a nu leh a bialnu tih loh chu keimah lo midang tumah an lo tel ve lo. Amah ngei paw’n mi tam tak an lo kal chu a beisei lo tawp ang, a chhan chu a thusawi kha ka la hre reng ‘The Riggiaza’s hi crime family lian ber ah ka la siam dawn a ni’ a tih thin kha. A kuang an dahthlak lai chu ka en reng a, a mawng a zuk thlen chuan ka inher a ka pa thlan lam pan in ka chhukthla a, a thlan hma ah chuan ka thingthi a, phuba chu ka lak tawh thu ka hrilh hnu chuan a thlanlung chung ah chuan ka pangpar ken lai chu ka dah a, ka ding a, thlanmual chu ka chhuahsan a, ka kal zel a. . . .

–The End–

Similar Posts:

• The Insider: Tualthahna leh Phuba – I
• The Insider: Tualthahna leh Phuba – II
• Chanchin duhawm loh
• Thanchhingi & Son dawr tlak an ni em?
• Australia-a thilmak thleng!

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Saturday, July 28th, 2012 at 6:30 am and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.