mi(sual).com

Duhtak Taylor Swift,

“Duhtak” kan ti ve mai che hi tlangnel khaw lo lua ah min ngaih phah em lo ang chu tiraw?

Kum liam ta kum 2011 daih tawh a, “World tour – Speak Now” kha ka lo en ve chiah a. Ni e, ka en chiah tak tak a ni. Vanglaini phek hlaiahte chuan ka lo hre thawi ve tawh tho na, hetiang ang deuh rup hi chun tun hi ka en ve na chauh a ni.

I hnenah lehkha tawi tê rawn thawn ka duh a, mahse khawi Dâk Inah nge ka dah ang a, tu Dâkpu nge ka rawn thawn ang tih ka ngaihtuah a, Sipai bang ve hlei lo hi ka bo map mai. Kan khaw Bazar Bus Conductor hi ka rawn thawn tawp mai dawn em ni? Ziah ngei chu ka duh si.

Ti hian lo ziak ta ang ila;

Taylor, ka u khawmawi lo mai ang che aw, nula “u” trut trut chu kan Mizo nula, thawnchhuah nei aia thawmhnaw ngah ngaisangte  hian thing an ti tlat a, I duh bik loh tak in.

I hmelthat chungchuan zia hi sawi ve ngawt ila, he lehkha hi I chhiar chhuah duh loh phah lo ang tiraw? Pu Zualthauva In sang leh len zia sawi dawna an kawmthlang hmeithai pitar In tet zia sawia a fiah zawk ang hian, I lar pui Miley Cirus-te ai chuan I mitmeng te hi a mawiin ngaihno a bei nghet zawk a. Selena Gomez phei hi chu amah hrilh chuang lo la, a mitmeng hi a phakar hmel ka tireuh lutuk. He he, ka thu a nawi sawt em? Dik tak chuan I hnenah meuh lehkhathawn ziak ka ni a, ka zam ve em a ni.

Taylor, ka bawlah che ngai lo a. He he, mizo chu rilru ni lo sawi vak hi kan ching a, “BAWL” tih tawngkamte kan nei a, chuvang ania ‘ka bawlah che ngai lo la’ ka tih kher! I hmelthat dan hi hmeltha ka lo mitthla ang chiah hi a ni a, I aw ngaihnobei takte hi kan khaw lama Biak Ina zai thin atan ka awt lutuk! Thlarau bo pathum hi a rualin I vawi khat zai hian a chhanchhuah theih te ka ring hial asin. Mizo chu kan inhlan hma alawm, thil ngaihtuah vak hi kan ti ngai lo a. Tha kan tih chuan kan pan nghal ruak ruak thin, chuvang a nia, thlarau bo pawh I hmuh kir zung zung theih ka rin bik.

I ‘tour’ chunchang kha ti raw ka sawi tum ber kha. I hnen meuha lehkha ziak tur ka ni si a, ka rilru a buai hle mai. I tour kha vawi khat ka en a, vawi hnih en ngei ka tum a, vawi hnihna ka en chauh a, vawi thum en duhna a lo lang a, ka en ka en ta mai a. Ihmaw, mizo chu kan tlo lo lutuk, Mizo Idol te, Youth Idol-te, Youth icon, adt… kan thlang a, a hun lai chuan an boruak pawh a chhah tha thin mep mep khawp mai. Mahse thla hnih thum a liam a, tuman an ngaihsak zui tawh lua lo thin. Engtin nge in tih bik ka hre duh ngawt mai.

In tawngin “Guiter” in ti nge, Violin ka hrethiam ve meuh lo a. Tingtang kan tih nen hian I perh thin kha a in ang chu ka ti tho a, mahse ka sawi dawt ngam lo. A changa hrui ruk(6) nei niawm tak I perh lai khan hrui li (4) nei chauh te I perh leh thinin ka hre lawi a. Ka thiam tawk a I zai tiding meuha ka thlek pawhin ka man thiam chuang lo. Nangma perh ngei kha a richhuak kha anih chuan I hmelthatna timawi tura rimawi lo ri chu nang hmeltha eltiangin I tum chhuah kha a lo ni reng tihna a ni a, khatiang khawpa rimawi tum thiam ta chu “Van hlamawi” remtu Van Angel-te zinga mi I nih ka rinna kha a nghet ta tulh tulh mai a, mahse lei mihringte I awi si. Khuanu thilthlawnpek I ni zawk em ni, Paula bu nena keu kawp pawhin ka hrethiam chuang lo ang, kei ve hi chuan.

Ka thinlungah erawh kan Ram a lo lang a. Mizo zingah chuan zai thei te hi kan tam em em a, Music Video-te pawh kan ram len zawng teh chuan ngah ve tak kan ni. Mahse kan zai mite zingah hian solfa chu sawi loh tingtang perh pawh sawi loh, Khuang takngial pawh mi te zai tuina khawpa pu thiam lo tur kan Demmand Channel-a zai thei hi kan ngah em em a. A zira zir theih reng hi thatchhiat luat vangin kan kal kan a, mite hringnun phena an thawhrimna kan hmuh kan a, LAR chiah an ngaihtuah a, a bak chu an hmuhhmaih lui char char a, tuman zir tang e pawh an ti chuang lo!

Taylor, nang chuan I zai chhung zawng khan I duh leh Piano I tum a, I duh leh Tingtang I perh a, I duh leh I lam mai a, hla thu pawh I theihnghilh teh nuai hek lo. Heng zawng zawng hi lehkhaah chuan rawn ziah vek ka duh a, mahse a sei mah mah ang a, I chhiar zo peih lo ang tih ka hlau deuh bawk si.

Chuan maw,  ka sawi ngei ngei ang ka ti a, I ha var rual tha lutuk kha. I hmui sen no chêk mai phena I nui timawi tura I ha var rual tha tak lo lang thin khan ka thinlung hi a chhun a, nilo a khei a ni mah zawk! Mizo chuan “Sahdah” te kan nei a, kan nula tlawntlai mawi ve tak tak, YMA leh KTP lama an chhawr ve tak takte pawh hian an phawrh leh ruk ruk thin. Tribal kan nih vang maiin Tribal taka khawsa tur chu kan ni bik lo tiraw? Nang pawh famkim lo mihring chu I ni ve tho a, famkim lo takin I khawsa bik lo a ni lawm ni?

Duhtak, ka’n ti leh ang che, ka duh em si che a. I lehkha tur chu rawn thawn tak tak che ka duh a, ka sawi tawh angin tunge ka rawn thawn ang ka hre lo a, eng nge ka ziah ang pawh ka hre lo. I hriatthiam tur Sap pui Mingo tawng lah chu ka hre meuh lo a ni bar si a.

Taylor, I lehkha tur chu ka ziak phawt ang a, remchang awm elah ka rawn thawn dawn che nia. Mahse a chunga ka sawi ang chi khi chu sawi chi pawh anih ka ring lo. Mizo hian hnam dang laka mizo timualpho tiin min ensan phah reu reu ang e.

(110820120136)

Similar Posts:

• In Ngaihtuah Ve Thin Emaw!
• Ka lawmpui che
• RIP Elizabeth Taylor
• SMS hmangin tawng kan suasam
• Lehkhathawn Hnuhnung

Recent Posts:

• Pathian Malsawmna
• Doctor-ten min rawk em?
• Keini chu thingtlang mi kan ni a
• MIND-SET: MIZOTE LEH KAN RILRU SUK-THLEK
• ZoRO Press Release

This entry was posted on Sunday, August 12th, 2012 at 1:00 pm and is filed under Luangliam. You can follow any responses to this entry through the RSS 2.0 feed. You can leave a response, or trackback from your own site.