Bangalore Mizote Leh Tunlai Boruak

August 21st, 2012 12:44 pm by Dr Mahminga Sailo

Khual-thuthang leh ar-pan-chuk
Kan pi leh pu te’n an sawi thin a, a dik em em bawk. Thu belhchiandawl lem lo pawh hi, a kual a kual chuan, hmun thenkhatah awih tawk an awm fo thin. Tun hnaia Assam chhunga Bodo leh Muslim mite inkara buaina hrinchhuah harsatna chuan, namen lovin India ram a nghawrnghing a. He harsatna avanga Bangalore-a cheng hmarchhak mi tam tak thlabara an awm tantirh lai hian Mumbai leh Pune-a ka zin lai a ni a. Chanchinthar ka en a, mak ka ti em em a, mahse a thleng mek bawk si! Tin heti hi a ni a, Bangalore ka haw dawn meuh chuan, thuthang avang khan kei ngei paw’n ka hlauhthawng tlat nia!

Hlauhthawnna
Thuleng vak leh thlalak (belhchiandawl miah si lo) te’n hnam leh sakhaw inkara inhmelmak theihna tam tak a darh chiam a. He boruak thlen laia remchanga lo la duh tawk misuaksual an lo awm fir fer nawk nen. A bik takin zirlai leh dawra thawk tam takte chuan tihthaih leh vau hial te tawkin, a vanduai deuh phei chuan kut an tuar bawk. Hei vang hian, zirlai class kal ngam lo leh hnathawhnaa kal ngam lo te an awm teuh a. Hetia engmah ti thei lova tawmsen ngawt bakah, hlauthawng reng renga awm ai chuan tia sum leh pai neih ang ang senga haw an tam phah hle a ni.

Tin, haw ve lo te zingah lah chanchinthar maksak tak tak, a lem leh tak hriathran har bawk si avangin lungmuangin an awm thei lo va. Khawtual mi leh an thenawm te ngeiin, ngaih titha lo tawk turin engatinge in haw ve loh? lo ti tawk lah bo lo. Pawna chhuak thenkhat te lah ringhlel taka zawhna lo zawt nawlh nawlh te an awm bawk si nen. Mi tam zawkte thla a muang lo a ni.

Sawrkar hmalakna
Theih ang tawkin Bangalore Mizo Assocation, Mizo Students’ Assocation leh pawl dang dang bakah mimal thahnemngai te’n thlabar leh hlauthawng taka mahni awmna chhuahsan ngam lo te hi hmun him zawkah kan thiar khawm a. Tahrikni 19, august 2012 khan Minister zahawm tak Pu Lalrinliana Sailo leh MLA Pu John Siamkunga te chuan, Mizo te min thlamuana, Karnataka sawrkar hnena kan thlavang min hauhpui tur leh hma min laksak turin Bangalore an rawn thleng a. Mizo leh hmarchhak mite tana Karnataka sawrkar hnena ngenna min siamsak leh hma an lakna erawh chanchinbu-ah chiang zawka an tarlan tawh avangin ziah lan vek ka tum lem lova. A tul tak leh remchan angin kan la tarlang zel zawk dawn nia.

Ka sawi tel hram ang: Incheina hi
Harsatna kan tawh mek nen a inlaichin lo mai thei, mahse sawi tel hram ka duh. A hranpaa post siam te pawh a la ngai mah na, kan Minister zahawm tak Pu Lalrinliana Sailo rengin a vei; thu a sawina apiangah a sawi tel ziah bawk.

Mizo leh hmarchhak mite hi kan hmel, kan inchei duh dan, ka tawngkam chhuak reng reng hi, kan Indian-pui te nen a inang lo hle tih kan hre vek. Kan nihna hi thlak theih lah a ni hek lo. Chutih rualin, kawng tam taka khawtual mi mit kan tihkhamna zinga pakhat chu kan inchei dan hi a nih a rinawm. Mi fel leh tha tak tak an awm karah, thuamhnaw maksak tak tak, lumeh dan pangngai lo tih hriat reng reng te leh a dang sawi tur a tam mai.

Incheina atan chumi chauh chu phal a ni tiin dan kan siam thei lo. Chutih rualin mi rama kan khawsak chhung erawh chuan fimkhur a tul. Tin, Indian mi tam zawk te hi chu kherkhiap tak an nih avangin, an khuaa kan chen chhung hi chuan over lutuk-a inchei te hi bansan i tum ang u. He harsatna kan tawh hian, Mizo thalaite min siamthain, min tuai harh mawlh teh se…

36 Responses to “Bangalore Mizote Leh Tunlai Boruak”

1
LaMea CâcTùs FLh Says:
August 21st, 2012 at 12:52 pm
Burma lama ka thianpa sawidan chuan khi lamah pawh tamtak an that a, assam lam aiin muslim laka kutthlakna pawh a nasa in a rawng ani awm e..tuna muslim te laka kutthlakna video clips tamtak pawh khi khilam ami ani awm e
Report this comment
2
ɪ̣uɪ̣pnoɥ Says:
August 21st, 2012 at 12:53 pm
Chhiar dawn ila…
Report this comment
3
PKfanai Says:
August 21st, 2012 at 12:53 pm
mi a nileng anni bik lo va, a pawng atak chuan kut an thlak ngawt ngam che u ka ring chiah lo. Mizoram leh NE hmun danga an unau ten namen lovin an tuar ve thei dawn tlat a. Tin, sawrkar leh muslim groups ho pawhin theihtawp a hma an lak chu a rin awm. Post ka thlawp e.
Report this comment
4
PKfanai Says:
August 21st, 2012 at 12:58 pm
Vaiva pawh Burma mi ni sela chuan, thahah an vau tak kha a. An lo che na deuh a lo nih dawn tak chu a.
Report this comment
5
ɪ̣uɪ̣pnoɥ Says:
August 21st, 2012 at 12:58 pm
Incheina khi kei paw’n ka thlawp khawp mai; vaiho khu keini mizote anga rilru zau an ni ve vek bawk si lo va, incheina lamah hian…

A ṭha khawp mai
Report this comment
6
sheldon Says:
August 21st, 2012 at 1:03 pm
Awi ha! Mahminga hi i reh daih sia, i biru aniang ka tia…haha
Report this comment
7
Dr Mahminga Sailo Says:
August 21st, 2012 at 1:05 pm
Hmanhmawh taka post ka buatsaih avangin ziahlan hmaih ka nei tlat. Karnataka DGP-IG Pu Lalrokhuma Pachuau a awm hlauh hian hmalakna a tichakin, Mizo-te tan bik thlamuanthlak hle…

@ sheldon… Ka zin bo reng a, ka haw hnu lahin harsatna avang hian kan kual ve nasa bawk si a….
Report this comment
8
Awmtea Khiangte Says:
August 21st, 2012 at 1:08 pm
Tha hle mai
Report this comment
9
chhangteval Says:
August 21st, 2012 at 1:42 pm
Last para khi
Report this comment
10
hlatekhua Says:
August 21st, 2012 at 1:46 pm
Dr Mahminga Sailo, tun dinhmunah khan Mizo leh North-East mi tan chhuahvah a him lo-in in hria em? Mizo zingah hemi avanga mi kut tuar tak tak an awm em?

Incheina chungchang i sawi hi ka support zawng tak a ni e. Inchein bakah khawsazia leh tawngkamah pawh mi mit tikham thei zawnga awm loh hi chu a finthlak reng a ni.
Report this comment
11
Sasaks Says:
August 21st, 2012 at 1:49 pm
Dr. Mahminga Sailo, post pawmawm tak a ni e.
Tin, hemi sentence: “Tin heti hi a ni a, Bangalore ka haw dawn meuh chuan, thuthang avang khan kei ngei paw’n ka hlauhthawng tlat nia!” hi han en tha leh teh aw (a tawplam hi).
Report this comment
12
Mx Says:
August 21st, 2012 at 1:54 pm

Report this comment
13
Puii Says:
August 21st, 2012 at 1:58 pm
Mahminga,,i zin vang ani blore ah buaina a chhuah….I haw a, afel duak alawm..

kan sorkar(north eastho) chu an ti tha ngei hlawm mai,thlamuantu Minister leh MLA te an kalvat hlawm a, hetiang ngei tur hi a ni e….

Pu Rinliana leh Pu Siamkima te an thlamuan pui awm lutuk…

Pu Rotea chu thlamuanpui awm chiang sa a nia, midang poh in fakawm… Nunau leh naupang zirlai in thlamuan na zawng zawng….

BMA President Pi Rinpuii mawlh ka lo fak e,, hmeichhia a ni na a, he thilah hian a huaisen ka ti top…. chawimawina nopui….ehermmm…. kan hlan teh ang…
Report this comment
14
James Bond Says:
August 21st, 2012 at 1:59 pm
Dr saheb chuan a ziak tha khawp mai. Khual thuthang leh ar pan chuk vanga sum seng leh thlabar an tam hle ta kha a pawi ani. Mahse (ti talh teh ang) ka thianpa fate chuan engtik lai mah khan hawn an tum lo reng reng. An huaisen nge an at huai? Mimal ngaih dan ani tawh ang.
Awmna hmuna inthuam dan, tih lam hi chu kan ziak ngun tawh viau. Mahse hnam dang ngang kan ni a, anni anga inchei reng tur tihna ani lo. Vai nu thenkhat kalna apianga sari ha(?) ziah te hi a dik bik lo. Thenhkat chuan beach ah te sari zuk ha a!. London Olympic opening ceremony a sari eng leh jacket dum inmil loh zia kha. Bangalore (berkher) nula lo lang khan a scene a hmuh theih phah ta hial asin.
Report this comment
15
vakul Says:
August 21st, 2012 at 2:08 pm
airport vela mizo nula kekawrbul …bul tak mai ha ka hmuh hian ka lo zak thin. sap nawhchiziar inchei dana kan han infam at mai hi chu kan zuamawm hliah hliah.

thuthang a ni a..hlauh loh ngawt chi pawh a ni lo bawk a ni. mahse a reh ve leh hrih chuan ka ring. buaina erawh a awm dawn chauh a ang….RSS leh VHP an pawr thar deuh tlat a…

muslim inzirtirnaah chuan hun hnuhnung a thleng mek…keini pawh…a nih hi. anni chuan kristian nena la indo tur an nih thu an sawi.
Report this comment
16
Dr Mahminga Sailo Says:
August 21st, 2012 at 2:30 pm
@ hlatekhua… Kan hmel ang pu Tibetan, Nepali te pawh he harsatna hian a fawmkem vek. Nia, an haw huk lai kha chuan Police-a case han file tak erawh a awm lo nangin, thu thalo a darh avanga remchang lo la tawk awm khan hmarchhak mi tam tak a tihlauthawng bawk a ni. Police hnena thlen tlak lem si lo, invau leh intihbuai tum erawh, tun boruak vang hian a pung a tih loh theih loh..

Vanneihthlak takin Mizo zingah kut tuar kan awm lovin kan hria a. Zirlai nula tleirawl auto-rickshaw chuanglai chil an chhak leh, an chhaihbuai te, bottle-a zun an thun hnua, an in an vawmsakte leh a dang te hi, hlauthawng leh thlabara awm tawh tan chuan rilru tinuam zan lo thei tlat.

Mahse, he harsatna hi thuthang mai mai erawh a ni bik lo. Tun thleng hian, Bangalore Police chuan he buaina kaihhnawih avang hian case 15 vel file tawhin, mi 2 chuang an man tawh a ni.
Report this comment
17
Alejendro Says:
August 21st, 2012 at 2:34 pm
Ka sawi vak dawn a maw ka tia, ka la sawi ve hrihlo mai ang. A NEP ka ti lutuk.
Report this comment
18
Chemtatrawta Says:
August 21st, 2012 at 2:34 pm
Mosolman ho hian Kristian min target tan a ang riau ka ti. Middle East ah lah chuan engtikah nge an indo ang tih a ni ngawt mai a, khawvel hmawr lam chu a ang khawp ka ti. India ram, khawvel ram lianah heti zawnga boruak irhchhuak tur pawh hi a ang ka ti mah mah.

Pakistan atanga Thlalak leh video hlui leh belhchian dawl lo tam tak an upload nasat avanga he boruak hi punlun tan niin an sawi a, ka pawm khawp mai. TUnah hian website 180 bawr vel an block tawh a. Myanmar buainate, Gujarat buaina ami te, hmun hrang hrang ami thlalak rintlak loh pui pui an thehdarh nasa a, Pakistan hi chu an huatthlalaawm teh thin e.

Pakistan sipaite lah chuan India sipai post an kap ve ngawt zel a, nimin maiah pawh India sipai post an kah buai chhungin hel pawl boundary kan tir an tum a, hel pakhat chu an kahhlum kha. Pakistan hi a la buai tulh tulh a, a buaina hian India a rawn kangkai awlsam dawn hle tih a hriat tlat. India-Pakistan buaina kan tuar ve tan ta a ang khawp mai.
Report this comment
19
Puii Says:
August 21st, 2012 at 2:40 pm
incheina chung chang hi chu sawi tham ve a awm ang chu… Post hranah sawiho chi…

@Pu Vakul…Hmeichhia te hi kan lang sar hma ve deuh bawk a, zoram pawn han chhuah tawh chuan a hmei apa hian incheina thlak tur emaw kan ti deuh vek tlat a…

Aizawl leh mizoram khawpui hmun dangah hian kan mipa te pawh hi t shirt banbul.. tawnzau chauh leh kekawr bul leh kekawr bul u nen an kal chhuah vak pawh ka hre lo… mi statea kan kal hlek chuan he tiang hain hmeichhia chauh lo pawh an inchei fo mai ka hmu thin.. ..
Report this comment
20
Dr Mahminga Sailo Says:
August 21st, 2012 at 2:41 pm
@ Sasaks… Ka lawm e. Ka sawilan tum chu, Pune ka cham laiin, Bangalore chanchinthar hi lar thut a nih avangin, a hminga hruaitu ni ve ta chu chanchin min hrlih leh min zawt an awm chamchi si a. Awi leh awih loh tur ber pawh a hmuna awm chilh loh chuan hriat a har, tin Bangalore-a ka vawikhat tawnna a ni si vang a ni…

@ Puii… Nia, fiamthuin ka ti tak asin. Ka zin hma zawngin engmah buaina a awm lova. Mumbai ka thlen tukin an buai chiam a. Ka thawhpui te’n min ngaihtuah em em a, Pathian zarah engmah harsatna tawk lovin, Muslim hotel-ah ni 5 zet ka cham a. Pune NE mite tana boruak tang awm bera an sawi lah ni 3 chhungin engmah a thleng bawk si lo nen. Bangalore hian min ngai a ni chiang mai…

Nizan dar 11 hnu lama mahni chauha ka inkhalh haw det det erawh, Bangalore kawngpui zau takah, khawhar ru em emin ka lung a leng vawng vawng…
Report this comment
21
Pakak Says:
August 21st, 2012 at 2:54 pm
hman deuh khan ka fiamthu (dawt var) vangin ka pa nen kan in hau hrep tawh a kual duah hnu hian a tak emaw tih mai hi awl tak a ni,
hmeichhe kekawr bul chhing teu ha hi chu an hmuhnawm ve…
Report this comment
22
Dr Mahminga Sailo Says:
August 21st, 2012 at 3:00 pm
Alejendro… Nia, a tawng lo tan chuan a HO viau zel ti raw. Fiamthua an sawi ang deuhin, hmarchate tai sen hler hlawr pawh hi, la ei/tem ngai miah lo tan chuan a thlum ve suk hmel a; hahmaia sehchhum hmak hmak tawh chauhin a thakzia an hria.. Thu puarpawleng pawh a ni mahna, mahse hemi remchanga laa chet lo la tawk awm hian a nia kan nau tam takte tithlabar zawk chu. Tun thleng pawh hian ngaihzam tur tam tak a awm bawk.

Mahse, kar hmasa zirtawp tlaia Manipuri tlangval 3 haw tum te’n Mall-ah bag an lei a. Dawra pawisa dawngtu chuan Assamese an nih leh nih loh zawtin, anni chuan Manipuri an nih thu an sawi a, ngaihtha takin an kal ve mai a. Pawisa dawngtu chuan a thian dangte 4 ko nghalin, Manipuri rawlthar 3 te chu kut an va thlak rawn nghal ngawt a. Hei hi tun harsatna avanga Police case file hmasak ber pawh a ni awm e. Pu Rotea an hrilh nghal a, heng misual 5 te hi man nghal an ni. Hei hi entirna pakhat a ni e…
Report this comment
23
vakul Says:
August 21st, 2012 at 3:03 pm
Muslim ho hian Kristian min target em em pawh a la ni hrih lo; target hun chu min la nei dawnin a lang a, an sakhaw pute thusawi hmangah.

Tunah rih hi chuan a sakhua anga ngaih theih turin tihduhdahna an tuar viau hrih a, hei hian an rilru a kap ber. Anni hi chu an mak khawp a, muslim an nih phawt chuan anmahni awmna ram aiin muslim ram kha an tan tlat mai hi a ni.(muslim rama an awm loh pawhin).

Tuna mi tak hi Pakistan politics tenawm lutuk a ang ber mai. Hindu hi tangrual thiam miah lo an ni reng a, a chhan pawh an sakhua hian a ham kim leh lutuk a, tunah chuan pawln neuh neuh an nei ta a, an hlau viau tawh chuan a lang a, muslim hian an thinrim hrikthlakna hnai vai an dap a ang ber
Report this comment
24
Lamji Says:
August 21st, 2012 at 3:08 pm
Calling CFL-a n’ Co. … Ghy lampang boruak hi engnge le? Naktuk ka nau te kal an tum a hlauhawm a awm em le aw..? Urgent.
Report this comment
25
Pakak Says:
August 21st, 2012 at 3:12 pm
Ka rilru a thil lo awm ve daih pakhat chu, kan chanchinthar reng reng hi a tha lo lam hlir, hriat nuam lo tak tak a ni fo ta mai a, mitin te hian kan nun kan uluk zual sauh a va tul tawh tak em..hun hi a hmawr tawh tak tak a niang tih hi..
Report this comment
26
Zaithiamlo Says:
August 21st, 2012 at 4:12 pm
Incheina khi ka vei ve lutuk kei pawhin. Bangalore ka awm tirh khan ka inkhawm ve hmasak berah ka thianpa hnen ah enga ti nge hetianga hmeichhe ho hi an inchei a. Mizorama inkhawm pui chi a kan ngaih loh an va ha nasa ve ka tia. A a a, an inkhawm duh phahna a nih chuan enliam ve mai mai teh a tia. Ka phunchiar, ang reng si a ka inkhawm ve chuan haw kawngah ka la phun ziah, ka inkhawm tlem em mai pawh a
Report this comment
27
Lalthoimoia Says:
August 21st, 2012 at 5:58 pm
Zorama kan inkhawmna a kan incheina ang em em hi chu hmundangah chuan beisei tur ani lemlo a, pawnlamah zawk hian kan inbelte fimkhur a ngai khawp mai. A tha e..
Report this comment
28
Dr Mahminga Sailo Says:
August 21st, 2012 at 6:05 pm
@ Lalthoimoia.. A dik chiah. Kei leh Pu Rina Sailo sawilan tum ber pawh a ni e. Inkhawmnaa an incheina ai maha tuna kan sawi tak zawk chu, inchei dan pangngai aia uchuak hi kan sawi deuh ber e. Ralkhata tlangval kawng kal lai, beksam lehlam sei em em, a bak zawng kawlh lul si te, leh a dang dang (sawilan vak chuan phunchiar tih the kan hlawh zel zawk si a) te hi anmahni thu zawng a ni teh meuh mai. Mizo tan pawha maksak an nih phei chuan, vai leh muslim inla-kherkhiap tan chuan paidaih a har leh zauh awm mang e. Tin, tribal kan nihna leh Central sawrkar chawmhlawm kan nih an hre ve reng bawk si a…
Report this comment
29
mr.Duhlova Says:
August 21st, 2012 at 6:07 pm
Kei pawh, incheina chungchang i sawi hi ka support zawng tak a ni.
Report this comment
30
Lamji Says:
August 21st, 2012 at 6:31 pm
24 khi chhanna ka va duh em aw khawngaihin.. tap ta vel ang!
Report this comment
31
Sasaks Says:
August 21st, 2012 at 6:48 pm
Dr. Mahminga Sailo, i sawi tum chu ka hrethiam e .
Ka’n sawi chhan chu: “thuthang avang khan kei ngei paw’n ka hlauhthawng tlat nia!” tihlai hi ania, ka pawmzam thei mai lo deuh, Mizo tawng ulh (dik lo) a ni tlat. Nangni angin hetiang hi in hman a, a dik lo a ni tih kan sawi loh chuan mi tam takin an hmang zui ve mai ang tih a hlauhawm. (A ri-in han chhiar chhin la i hrethiamin ka ring).

Kan boruak hi a ziaawm turah ngai ang. Vawiin lam ah chuan Id-mubarak an tia NE ho leh Muslim unaute pawh an inkuah lawp lawp kha! Media lam hian ‘message of goodwill’ an uar deuh a ngai hrih a ni e.
Report this comment
32
bigboss Says:
August 21st, 2012 at 7:07 pm
Bangalore-ah chuan Muslim ho hlir em ni awm ? Hindu ho pawhin NE mi an tihthaih ve duh tho tihna em ni?
Report this comment
33
ulawng Says:
August 21st, 2012 at 7:45 pm
An feisbuk vel vangte hi a lawm thu belhchiandawl lo, boruak tichhe thei a len tam em em

Post tha e
Report this comment
34
Zaithiamlo Says:
August 21st, 2012 at 7:54 pm
Ti leh hram, inkhawmna ka sawi lan nachhan pawh, inkhawmna ah pawh khitianga an inchei ngam phei chuan, bazar tura an chhuahna ah te leh thil danga an incheina tur zawk han hisap phei chuan a nasa awm em a ka ti zawk mawle
Report this comment
35
Dr Mahminga Sailo Says:
August 21st, 2012 at 8:53 pm
@ Sasaks… Ka lawm e. I sawi tum ka man ta chiah..

K’u Lamji khi ka lainat roh eee…

@ bigboss… Nia, a bultumtu ber chu Muslim angin lang mah se, an man zingah pawh hian Hindu leh Catholic ngei pawh an tel lawi si a. Chuvang tak chuan, Muslim sakhaw hruaitute tan pawh hian a thanatthlak ve ngei ang…

@ ulawng.. a dik chiah. Tihtur fumfe nei si lo, hun nei tak tak an tam si a…(N) (phunchiar leh lawk te’ng )

@ Zaithiamlo.. i ngaihdan khi ka tawmpui che. Fimkhur a ngai teh e. Inkhawmna i sawi tel takah chuan, Biak In kawta meizial lo zu tawk an awm te hian, hnamdangin min ngaihdan chu dang tak a ni asin. Inthunun tum lah an tlem si, ngen ngawih ngawih chung paw’n…
Report this comment
36
Maisek Says:
August 22nd, 2012 at 7:23 am
Post tha tak ani…
Report this comment