mi(sual).com

English Premier League kan en fo thin a, player thenkhat chu ‘thiam tak’ tia sawi tur ni lo mah se a pawimawh huna pet goal thei tak, finishing tha tak an awm thin. Chutiang mi chu , ‘A thiam vak lo nain a finishing a tawih em a ni’ tiin ha hipin kan fak a.  A dang leh chu ‘A that tehreng nen a finishing a tawih lo a ni’ tih kan nei bawk. Mizote hi kan han inkhela , kan chak lova, ‘a khelhah chuan kan hneh lutuk, goal chance pawh kan ngah mahse kan thun thei tlat lova tih emaw  Referee in min tan lo, offside a ham lo’ tiin chhuanlam kan siam fo thin. Goal kan thun lova finishing athat miau loh chuan kan chak lo a ni mai. Chutiang bawk chuan hringnunah hian game khel tha viau in inhre thin mah ila kan finishing a that loh chuan  atawpa boralna tho a ni. ‘Bul tan that hi a zahve zo tluk a ni’ tih hi a dik love tiin ka hnial hauh lo mahse, a bul tan thata a tawp thleng tang mar pat peih kan ni tur a ni tih hi kan sawi tur chu a ni.

Khawvel miropui nia kan chhiarte zingah finishing tawih lo fe fe sawi tur an awm nual mai. Adolf Hitler kha a hun lai na na na chuan pa ropui leh thil ti thei, a ke pen khat ringawt pawhin khawvel hi a ti nghing dur dur thei ti ila kan sawi sual awm lo ve. German mite hi khawvel roreltu turte kan ni’ tih chang chawiin Nazi Party a rawn dinchuahpui a, Indopui II-na a rawn chawk chhuak a nih kha. Mahse, kan chhut chiang em?, a finishing hi  a duhawm lovin, a tawih lo ve khawp a sin! A nupui leh a fanaute a kah hlum vek hnuah a mah leh a mah a inkap hlum hial a nih kha. Saddam Hussein chuan Iraq-ah ropui takin lal a hrawta, a tawpah chuan mualpho taka khai hlum a nih kha. An finishing hi a duhawm lo teh a sin!

Bible-ah pawh finising tawih lo fe fe kan hmu nual mai. Samson-a kha michak hmingthang a ni. Sabengtung khabe ruh kual hmang ringawt pawhin Philistia mi Sangkhat ngawt a vaw hlum thei a nih kha. Kulh kawngkhar ban te kha a len dawn teh reng nen, a phawia Hermon tlang lam hawiina la pu chho ta deuh deuh leh nghal a. Chuti khawpa mi chak chu nula zunah uaiin, dawl zawr takin a zawr a, Pathian thu zawm lova a tawp thlenga a tan theih tak loh avangin Buh rawtna khawlah te, ennawm chhuahna a tan te an hmang ta mai mai a, ama nunna hial pawh lak ngaiin a hmelma te a thih chilh a ni tih Bible-ah kan hmu. A hun laia mi chak hmingthang kha a Finishing hi a duhawm thlawt lova, a lungawi thlak thlawt loh a ni. Lal Saula khan Pathian  remtihna tel lova ral lak thila a inthawi a vangin a tawpah chuan amah leh amah a invithlum  a, a hun laia a ropui teh reng nen  a tawpna chu a va rapthlak em!

Awle, vawiin a kan awm dan hian kan Future engemaw chen hril mah se kan Hringnun hmawr bawkna ala ni lo tih kan hriat a pawimawh hle. Lehkha thiam tak niin, result  tha tak nei i ni mai thei. Chutah lungawiin duhtawk mai suh, “ Mi hman tlak ka ni em?” tih zawk hi a pawimawh a ni. Mark sang tak hmu, record tha tak nei kha hman tlak lovin kan zuih ral mai ang tih a hlauhawm hle a ni. Naupan laiin kan tum sang ve fu thin, mahse kan zir sang tial tial a, zirlai a lo zau tawh a, chin chang kan hriat chian chinah chuan tum hniam tial tial a awl khawp mai.

Zirlaia  kan en hniam ve em  em thin, keini  aia thiam lo zawka kan ngaih te kha an tum ruh leh a tawp thleng an tei rei peih a vangin kan ai chungah anla  rawn awm anga, VIP car nen min tlan pel hunah “Kha pa kha maw? Ka hre lutuk, kan class mate thin a nih kha, akan zirlaia a thiam loh thin teh reng nen’’ tiin kan thlir liam vawng vawng mai ang tih a hlauh awm a ni….Tuna kan result neihah lungawia kut kuang kuaha thu mai tur kan ni lo, a tawp thlenga tang reng tur kan ni tih hi I hre thar leh ang u.

Chu mai ala  ni lo, hna tha tak leh zahawm tak  kan thawk  a ni thei e, engtin nge chu hna chu kan thawh tih a pawimawh leh khawp mai. Lehkha zir laia Pathian tih mi tak mahse, officer hna sang chelh hnu a, mi chan ai eiruk pawi ti leh miah si lo kan nih chuan Finnishing tawihah kan chhiar chuang lovang. Lehkha thiam mi hlauhawm ni lova a tawp thleng a rinawm taka thawk tu nih i tum ang u.

Awle, a dawt leha ka sawi duh chu hei hi a ni. Vawiin hian a tha ber kan ni lo mai thei, result tha ber kan nei lo mai thei, mi fel ber kan ni lo mai thei. Hlawhchham chan lo thlengin, kan nunah harsatna tawkin beidawn rum rum chan kan nei a ni mai thei e. Kan thian te, kan zirpuite  hnasang tak chelhin tluk lo leh pha lo riauin kan in ngai a ni mai thei. Chu chuan kan nunah depression  nasa tak thlen in, mahni insitna leh rilru hahchawlh loh na a thlen a ni  mai thei e. Mahse, beibdawng lovin bei fan fan ila, finishing tawih tak kan la siam thei a ni. Vawiina kan nihna ai tha hi kan hma ah a in chhawp mek a ni.

Abrham Lincoln an America President a nihna tura a kawng zawh hi a na mai lo a sin, hlawhchhamnain a hneh theih loh , vawi tam tak hlawhchham mahse beidawng  duh miah lova a beihna chuan Mihang zalenna a rawn thlen a, vawiinnia US President ngei pawh Mihang a ni ta hial a nih hi. Khawvel misual hmingthang Nicky Cruz-a kan hria. Khawvelah hmangaihtu nei lova a inhriatna chuan a ti bei dawng a, nun hian awmzia neiin a hre lova, tualthah chakna in a khata, thisen lum in a tui hal a ni Mahse he tual thattu hming thang hian hmangaihtu ISUA a hriat chhuah meuh chuan khawvela Pathian thu  hriltu ropui ber te zinga mi leh a chanchin mi rilru hnen em em mai tu a lo ni ta  a ni, a finishing hi a va duhawm ratk em! A hun liam tawha a sualna zawng zawng te a hun hnuhnung tawih tak chuan a rawn khuh bo ta vek a  ni.

Tirhkoh hming thang Paula ngei pawh Christian ti duh daha  dodal tlat tu a ni, mahse Pathian a hmuh chinah zet zawng  Chanchintha  hriltu ropui,  Pathian  tirhkohte zinga kan lam zin ber pawl a lo ni ta  a nih hi. Isua hnung kan zuina kawngah chauh chang neiin sual bawihah kan tang mek a ni thei e, Mahse, thiante u, Vawiin hian Finishing tawih tak nei turin tu pawh hi Pathianin chance min la pe vek a, insiamthatna hunk an la nei vek a ni tih hi I hre thar leh angu.

Sazupui leh Satel intlansiak thu kan hre fo. A tirah sazupui chaktakin a tlana,  mahse a tawp thelng a tan peih lova a inthlahdah tak a vangin zawi muang leh inthalh dah miah lova  a tawp thleng rawn bei tang tang tu chuan hnehna a chang ta a nih kha. Thiante u , vawiin hian hei i hre thar leh ang u, vawiina kan record hi a tha viau a ni mai thei e, mahse a tawp thlenga kan tan lohva kan inthlahdah mai chuan keini aia thiam lo zawk, chak lo zawk leh sual zawk te hian hnehna changin kan chungah an leng daih thei a ni. Rukru leh nawhchi zuar te hian vanram min kai khalh a nge?

Awle, he point pahnih, a tawp thlenga tang fan fana finishing tawih tak nei tur leh a tha ber leh fel ber ni lo mah ila fishing tawih tak siam turin Pathianin ‘Chance’ min la siam sak reng tih hi i hre thar leh ang u.

Similar Posts:

• Chawhchawrawi
• Tawih kawrlum hring ha
• Kan thatna tur-II
• Setana hi a biak tlak tak tak em?
• Ka hlenchhuak tur ani-Derek Redmond

Recent Posts:

• Pathian Malsawmna
• Doctor-ten min rawk em?
• Keini chu thingtlang mi kan ni a
• MIND-SET: MIZOTE LEH KAN RILRU SUK-THLEK
• ZoRO Press Release

This entry was posted on Monday, September 3rd, 2012 at 6:00 am and is filed under Opinion. You can follow any responses to this entry through the RSS 2.0 feed. You can leave a response, or trackback from your own site.