Chhass nei ve rawh!
Rawlthar tilpawr aw ka nei ve dawn chauh emaw ka tih laiin, mi ngaihah chuan tlangval ka lo ni ve reng tawh a ni awm e. 
Chhass an tih ang hi neih tur mai an awm remchang mang si lo. Leng dang te lah chuan inthurualsa ni awm tak hian awlsam te hian an inkawp rem ang fir fer si. Kum tinin Valentines’ Day–a rosepar hlutna ka chhiar fova, hman tangkai erawh ka la nei lem lo. Rosepar han hlan tur nei ta lo chuan, mahni’n rose par ka hnim leh vung vung thin. 
Tin, laina hnai leh thian ngamtlak deuh te’n, nang hi chhass nei ve tawh teh an han ti ngawt zel thin a. Min duhtu tawng ve ni ila’ng chuan e, chhass nei tur rual zawng ka ni ve tawh alawm. Sawrkar lah chuan NLUP an sem chur chur a, kan tana NLUP (NuLa Upa Pawl) sem tih lah awm hlei lo. Sawrkar huna nula sem thei apiang ka vote ang tiin valrianga hi ka inhrosa ta fo mai. 
Ka vawng khawl thin
Chhass nei ngailo mah ila, hmeltha erawh ka hre thei fu si! A ruk tea duh leh star tak tak phei chu ka ngah mah mah. Amarawhchu, a tawp thlenpui erawh ka nei ngai lem lo thung tih mai a nia!
Khawvela thiltithei ber leh chak ber – rilru ngaihtuahna sengin, ka runlum nuthai tur ka’n hisap vel ve thin a. Biathu ka hlan tur zawng zawng ka ziak kawi nguai a. Tin, zankhua lo thlenin, mitthlaa lengi hmu reng chungin mutmu ka’n tuah a. Tawnmang mawl tala biathu hlan beiseiin beng sa vung vung hialin ngaihtuahna zawng zawng ka sawr bing a. Biathu ka hlan tur ka vawn lawksa thlap nen laikhum ka bel a.
Ngai teh, vanduaithlak takin tawnmang mawla ka tawn theih an ni tlat lo. Mumang bo thak khawpin ka mu tui leh thin si alawm! A tukah bek leh tukhum sam delh pheng nuaiin ka tho chhuak hlawl thin. Mumang neihna damdawi hi siamchhuak vat se ka ti mang e…
Ka muttui vang phiangsena tawnmangah tal hun remchang ka neih theih tak si lovah chuan, a tak ngeia hmuh beiseiin, duhthu ka sam chhunzawm leh a. Biathu ka hlan tur ka ngaihtuah lawksa vek te, ka hmaa boruak chu ka hlan mawlh mawlh thin. Tin, heti ringawt a biahthu hlan tur phur a, ka phur rit nghahna tur ka hmuh tak mai loh bakah, thaikawi biahthu hlanna hun ni tawh bawk silo nen; phur chang changin kawlthluak nei hmaah thuin ka chhu chhuak mawlh mawlh mai chu a nih hi.
‘Bialnu i ngah thin’.., an ti
Primary sikul pawh ka kai hma hauhvin bialnu ka ngahzia ka chhung te’n min hrilh thin. Mahming, tunge I bialnu ? tia min zawt an awm chuan, kan venga nula tleirawl zawng zawng hming ka sawi vek thin ni awm e; Mupui veng atang Dam veng nula thlengin!
Tu maw I bialnu te chu in ti maw? An hming ka la hre kim thei em aw.., Khai mah aw, Tlankimi te, Achungi te, Dinsangi te, Elisianmawii te, Awmpuii te, Nunkimi te, Rinliani te, Vanlalsangi te, adt, tiin tawp mai te’ng. Ka thaw a chham tak ngial dawn! Vanduaithlak takin ka naupan laia ka bialnu te hian pasal min neihsan vek tawh a. An fanu te pawh ka rim rual an ni der tawh!
Chuvangin,
Vala hi, chhass nei lovin ka leng zel mai dawn. Anpai tawng tialin, Single Bachelor’s life is the best life an ti emaw kha?. Thik tur nei lo, thiktu nei bawk si lo hian, min sawmtu apiang te inah chaw ei kual vel ila. Phur changin ngamtlak deuh nula biain khi ve vur vur ila, a nuam ber.
Duat, ne tih, Mu mi? Nai lo em em, muah muah.. adt tia sms thawn tur chhut mual mual reng ai chuan, single, ready to mingle an tih ang hian leng ziai ziai ila ni mai!
A tawp nan
Daduhi Khiangte hi zaithiam ka ti a, he hla pawh hi ka ngaithla ve nasa thin.
Tuarthiam a har, dik ruk neih chu,
Hmangaih biahthu hrilh ngam si lo;
Thinlaiah a ruk te’n ka vawng khawl thin biahthu,
Mahse lung D tawnah ka hlan ngam lo che.
Tih hla morning walk lai ngata ngaihthlain, uih zawn ang zia-zangin kal vawk vawk mai ang aw. 
Similar Posts:
- Tawnmang mawl!
- Banzai ka rel mahna
- ‘Chhass’ in tih hi!
- Composer Girl
- Bike-a Nula Phurh Kekawrte lang hi
September 4th, 2012 at 7:29 pm
#36 Sihtea
ha ha ha
I ziak chhiar a nuam zŵk daih mai ti khan…
I thusawi khi a ṭha lutuk bawk
Ehe…! Ka beisei phâk hauh lohvin phêk tharah pakhatna ka la ni zui nia…
Ṭah te pawh a chhûak e…
Report this comment
September 5th, 2012 at 9:09 am
@ K’u mamboih, a ngai te tein ka la himpial e…
Siamthangi Hauhnar hla sak hi a nalh riau tak asin…. 
Report this comment