mi(sual).com

Hun rei tak atanga a lo er ve tang tang a ni a, a tawp a tawpah chuan, Pu Rudolph-a chuan a it zawng tak mai Car nalh tle zak mai chu a lei ta nge nge a. A rilruah thil dang a leng meuh lova, naupang thil thar nei ang main, a hrufai a, a tihhtletna hriak chulhin a hrufai tle var mai a. Chawei theihnghilh lek lek khawpin a lawm a, chaw ei kham thuai thuai a, bazara han chhuah pui a chak tawh kher mai.

Tukthuan chu a ei sawk sawk a, a ei kham veleh chuan, a kam a thuah puat puat a, bazara chhuak tur chuan a insiam ta thuai thuai a. A insiam zawh a, bazara khalh chhuak tura hmanhmawh taka a han chhuah chuan, a thil hmuh chuan a thinphu a ti rang ta vek mai a, a thin ur chu a so bulh bulh mai a ni.

A fapa naupang kum 8 mi emaw lek chuan, thirzumin a lo thai rang mial mial mai a, eng lem lem emaw a ziak ve a nih ngei a ring a. Chta a thinur han so bulh mai chuan eng dang ngaihtuah tawh lovin, a hmuh hmasak ber Wrench(Motor nut herhna thirtlawn) chu a chuh lawk a, a fapa kut chu a hlap ta pawp pawp mai le.

A thil ken chu thir chang tha tak mai a lo ni a, patling thinur tak tak chuan a tha a lo sum kar reng reng si lo va, a thiltih pawizia a han hriatchhuah meuh chuan, a fapa chu na tiin a tap tuar tuar ta mai le. Chutah le, Damdawiin lam an pan pui ta chuk chuk mai a. Doctor ten an theihtawp an chhuah nain, patling thinurin dimdawihna tel miah lova, naupang kut no tak thirtlawna an han hlap chuan, a kut ruh chu a lo sawp hneh hle mai hi a lo ni a. Tihngaihna awm ta ngang hek lo le, a kutzungtang zawng zawng deuhthaw chu an tan a lo ngai ta a, an tan ta a ni.

Hnimhlum hnathawh a lo reh a, a fapa a hmangaih em em mai, a lo harh chhuah leh chuan, a kutzungtang lo bul ta vek mai leh an tuam bur mai chu a han en a, pawisawilo mitmeng dik tak mai leh, pawiti em em zawk hmelpu hian a pa chu a han melh tawk tawk a, “A pa, I Car ka lo thairang kha pawi ka ti tak zet a ni” a han ti hmasa te te a, a han chhunzawm leh a, “A pa, engtikah nge ka kutzungtang te hi an lo to leh ang le? Ha pawh a bal chuan a dang tha zawk a lo to leh mai thin ang hian a lo to leh mai ang tiraw?” a rawn ti ta reuh a.

A pa chuan a thinur rawn so phut a thunun loh avanga a thiltih pawi zia chu a hrechiang ta kher mai le. A fapa chu chhan ngaihna reng reng a hre ta lo mai, a kut chu ha angin a rawn chawr ve dawn tawh lo, tih a hrechiang nasa mai si a. Chutah pawnah a han chhuak a, a fapain a car a lo thairan lai chu a han enchiang ta ngat a, a thil hmuh chuan a a rilru a tina zual ta kher mai le. “Papa I love You”(Apa ka hmangaih che), tih ngei mai chu fiahlo riai hian a lo inziak a. A pa ang thovin car thar an nei chu a lo lawm ve a, A pain Car thar a lei avanga a lawmthu sawithiam ve dan a lo ni reng si a.

Thinur bulh thunun hman lova chetchhuah hi a lo va han pawi thui thei thin ngai em. Fa duatsual ho thenkhat hi, an fate naupan tet lai a, an kum phu lohva na a lo hrem tawh, a hnua inchhir leh inthiam lo leh lutuk, an ni duh khawp mai. Hrem an tul ngawih ngawih hunah pawh, kha thil kha an hre reng a, an hrem phal tawh thin lova, an duat sual zo duh khawp mai.

I nunah I nupui/pasal fanaute emaw, I thiante emawin I thin tiur tak thil an tih hunah, thinur khaw hmu mang lova I chet chhuah dawn a piangin he thawnthu hi hrechhuak thin ang che. Car rang te mai mai chu awlsam takin rawng a kah that leh theih mai a, naupang kut erawhchu a rawn chawr tawh dawn si lo. Chu aia la thalo zawk, kumkhuaa thinlung na leh inchhirna a siam thei a, Thunun an ngaih hunah thunun hrehna a hring thei thin ani.
Mihring kan nih chhungin, thil kan tisual rem rum fo thin ang, miin kan chunga thil an tihsualin, thinur laiin tawngchhuah emaw chetchhuah emaw hi insum fo tur a ni. A pawi hnuah kan inchhir leh si ang a, kan damchhungin kan rilru tinuamlotu leh thian tha aia hmelma insiamna a ni thei a ni. “I thin a ur laiin Lehkhathawn ziak suh” tih thufing hi a awm thin. Tunlaiah pawh a la dik reng mai, thin a ur thut a kan alh pup pup anih chuan, tawng/chet chhuah hmain vawi 10 tal chhiar hmasak phawt tur, an ti thin. Vawi 10 pawh hi a la tlem lutuk, thinur so bulh a reh fel hma chuan chhiar char char thin tur a ni. Kan inchhir ngai lo vang.

“Chhanna nemin thinur a tikiang thin a, Tawng huatthlala erawh chuan thinur a chawk tho thin” (Thufingte 15:1
“Thinrim hmang mi chu thian suh la, Mi thinchhia chu kawp suh” (Thufingte 22:24)
“Mi a chuan a thinur thu zawng zawng a sawi chhuak a, Mi fing erawh chuan a thup a, an ngawihpui thin. (Thufingte 29:11)
Sunday hman nuam vek u le.

Similar Posts:

• “Ngawi la, awm hle hle rawh” (Sunday Pual)
• A hlet
• Naupang sual siam dan
• Saizahawla thufing pasarih
• Ui vulh (Chhangchhe tan)

Recent Posts:

• Brigade Mela 2015 Christmas lai
• Kawrtethawveng lai tak
• Sabengtung Kher Han Thlan Chu!
• Kerala beef fry siam ang
• LAL INPUANNA LEI HRIATNA HRUAITU MOSIA KA NI

This entry was posted on Sunday, September 9th, 2012 at 2:41 am and is filed under Advice, Event, Lifestyle. You can follow any responses to this entry through the RSS 2.0 feed. You can leave a response, or trackback from your own site.