mi(sual).com

September ni 7, 2012 a ka chunga thil thleng a ni a, ho pawh inti mai thei e, mahse han puan chhuah ve ngei ka rilruah alang tlat mai. Mi hlim an tih zinga mi hi chu ka ni hauh lova, han halelui chiam lam pawh ani chiah lo, han kurpui dup chi pawh ani in ka hre lo.

Tin, heti hi ani a, hemi ni hian enge maw ṭul pawimawh a awm avangin Champhai lam panin ka kal a, thilpawimawh ve tak a ni a, office lama interview angreng ka neih dawn avangin ka thawmhnaw inbel duhdan te ka tih danglam angai a, kekawr pawh pangai taka hak a tul, ka duh vang reng nilovin ka kekawr neih chhun erawh a kawng ka thawl avangin hak pawih deuh chu angai tho mai, a zia awm takin kati a, kekawr bul kan hak thuah ṭuk mai a, kha mi ni kha chuan nula ho pawn min pawngsual dawn sela an hlawhtling lo ve ngawt ang chu. T-shirt satliah nena mi hmaa interview kha chu hope a tlem riau in ka hre ve a, ka kamis neih ang ang chu ka keng ve bawk a.

Kan tluang a, kan tum ram chu ṭha takin kan thleng ta, ka thianpa Chhuanga Fanai te inlam pan chuan ka kal phawt a, ani hian hna min kawhhmuh avanga kal ka ni. Ani chu alo in peih diam tawh a, chaw ei nghal turin minti a, ka kil ve mai a, ṭawngṭai lemlo chuan kan ui chal chaw ei ve leh tawp mai a, an chawhmeh chuan duhthu chu sam lo mahse eng hnarum mah thawk lo leh ngaihtuah neitam hek lo kan ei leh ṭeuh phawt mai, ka pum hian azo angem, ka taksa tan aṭha em tih lam chu ka ngaihtuah lo hrim hrim.

Dul vun khat phuarh khawp chu ka lem lo, ka pumpui a tet avang hian ka puar hma hrim hrim bawk, pa tê na na na chu kan ei pawh a tlem, eng thawk lo mah ila chawm ka huphurh awm hran lo in ka hria. Ka duh khawp ka hmuh hnu chuan kan ṭhu chawl veng veng phawt a, ka vitamin chu ka hmuam leh phawt a, khawvel a dam man hi a awm mange aw kati rilru vawng vawng mai, mifaten ei tur an tlak chham a, a nei fate hrisel loh avanga duh duh ei theilo te an tam nen rethei bekberhte nimah ila a tui emaw tui lo emaw puar pengpawng khawp a ka la in ei thei te ka ngaihtuah hian vannei ka inti a tudang ka awt bik lo heti zawng kher kher hi chuan.

Tin, heti hi a ni a, chaw eikham ka ṭhut muan hnu chuan nula hleitling zet zawt hi ka awmna inah chuan alo kal a, Chhuanga a rawn ti a, a chhuah tawh thu hrilh tuma room aṭanga kan chhuak chu ka rei….. amah ngei mai KA HMANGAIH BER khawvel hmeichhia a zawnga ka duh ber mai hmel ka hmu ta thut mai le, ka phu zawk mai, ani pawh a hrilh hai hmel khawp mai vai film chu nise ka hmel leh a hmelkha a phe tawn zak zak anga music ṭangtawk nen, khawvel hi a nuam ru veng veng a ngaihtuahna ah chuan ka awm ve awm der silova aw kati rilru niap niap mai a ni.

Ami hmuh duh a awm tak lovah chuan chhuah leh mai a tum a, mahse ni thei in a hre bik lo a niang chu, thil ka lei dawn min kalpui rawh a ti a, ka phur teh sin, ka phur lutuk chu ka chhuak nghal a kal mai ka tum, tumah inah an awm silo kawngka te i khar dawn lo mi min ti a, ni dawn tak e, a dik tak chuan a bulah hi chuan ka nawih nuaih zel. A thil leiduh chu a zawnga kei chu a bodyguard ang mai hian a bulah ka kal ve det det a, a pian han nalh zia te, a hleitling ziate chu ka hriat hnu leh hmuh hnu mah nise rilruah a thar leh a, champhai khawpuiah khan khami ni khan kei aia hlim an awm kher awm love.

A duh a hmuh hnu chuan in lam pan chuan kan haw dun ta a, an ina leng nghal turin min ti na a, mahse ka ṭhian pa te in ka nghak a, bakah interview tur kani tih ka hre chhuak zawk a, nakinah ka hman leh ka rawn leng dawn nia tiin ka thlah leh ta a, a kal liam hmu lawk chuan enge maw tak hian min mawlh ta tlat mai, ka pumah a rawn zem ṭial ṭial a, eng thlarau emaw chu ka dawng niin ka hria, kawt laiah chuan pum dawm chungin ka kal dem dem a, doctor pan mai turin hospital ka hlat si, mipui lah chu engmah lungkham neilo ang mai hian an vei suau suau mai a, rilru ṭawngṭaina nen lalpa minpui rawh kati vawng vawng mai a, eng rau tak chu dawng dawn i maw.

Tiang hian kala awm ngai lova, a chhun chhunah ramhuai hi an inlar ngai emawni le, ni a sen sat nen kati a, tun ang huna ka pum chhung a ramhuai te lo luh le, ka zu in laite khan lo lut zawk sela ṭha tur ka nghei tawh vangin min rawn zawngṭha leh ani ngei ang, chu pawh nise inchhunga ka awmlai tala rawn kal ve mai tur a nia, kawt lun laia ka awm lai kher kher a min rawn tihbuai le, kati a, ramhuai anih leh nih loh pawh hre chuang lo chuan rilru in ka dem ve ngawt mai a ni.

In ka thleng tep tih chuan thlarau thianghlimin Paula a em thluk ang pawh ni chiah lo, thlarau aw pawh aniin ka hre lo, ka rilruah ti hian a rawn lang a, i pum chhunga sual awm hi ilak chhuah vat loh chuan pum na in i awm anga nikhaw hre lovin i tlu dawn a nia, i interview pawh iti thei dawn lo i sual puang la a chhuak mai ang minti a, engtin nge ka tih tak ang aw……..

Catholic ho emawni an puithiam bula an sual puan na ṭhin ang kha ka mitthlaah alo lang a, tih ve ngei angai dawn ta anih hi kati a, mahse khatiang hmun a awm bawk silo, a na tawh si, engtin nge ka tih tak angle, rilru a buai mup mai, thlan fim a tla lek lek tawh, ka in ngaihtuah buai lai chuan in pakhat hi ka rilruah alo lang leh ta, ka mit ala ta khawp mai, a fal bawk a, tumah ninti buai thei an awm dawn lo tih ka hria, chu hmun pan tur chuan keimah a awm hian min tur ta sek bawk a, ka pan ta a, mahse a kawngka kalh ani tlat mai luh theih ani chuang lo, ka ṭhianpa nau chu alo hawnga sawlai in saw kal theih ani em, ka mamawh tlat mai engtin nge ni ang kati a, sualpuan ka ngai tlat alawm, tumah an chen loh thu leh a fal a mahni chauha awmna chi tak ani ang chu min ti a, chahbi min pe a, chu inte reuhte tuma chen ngaih lohna hmun fal lam pan chuan ka kal ta a, ka pumna nen ka hmanhmawh tawh khawp mai.

A hmun chu a nuam phian a, a fianrial bawka sual puanna chi tak anih dawn hi ka ti a, rilruah thu tam tak a lut ka pumna avang chuan engvakmah ka ngaihtuah theilo zawk a ni. A chhungah chuan ke dahna tur niawm tak pahnih hi a awm a, bucket-ah tui alo awm bawk a, thlarau thianghlim in baptis a ngai dawn a niang a te kati rilru a, chuan ke dahna hmun aniang ka tih ah chuan ke dah turin keimah a awm chuan min hrilh ta a, ka dah a, chuan kekawr kawngphelh turin minti leh a, enge maw a awmzia aw niang, ka kekawr kawng ka phelh a, ka kekawr chu ka hlim thla ta a, ka langta vek mai tiang zawng kher kher a han intih chule a eng chu ni dawn maw ka tia, a thu chu ka ngaichang ta ran a, ṭhu turin thu min pe leh a, kan ṭhu chiah chu, tha thawh vak ngai lovin keimah a awm chuan a hran pa taka sual puan ngailo leh tha seng vak lo chuan ka mawnglam aṭangin min chhuah san ta zul zul mai a ni.

Thlarau sual emaw ka tih ramhuai ani awm mange ka tih kha alo ni awzawng lo mai. Ka thil ei ka pai ṭawih tawh ka pum lamin a mamawh tawh loh ek chhia mai alo ni a, tichuan kan ṭhu veng vawng a, chu inte chhungah chuan tu tihbuai lovin duh tawk in KA E ta ṭeuh mai a, hnara hlit phawi an sawi ang mai in ka thaw huai mai. Sual puan tur em em ka neilo bawk a E thei a min siam tu hnenah lawmthu ka sawi ta mawlh mawlh zawk a ni. Tichuan interview turin thlamuang takin ka kal thei ta a ni.

Similar Posts:

• GnR atakah ka hmu ve ta
• Peih ta hrim hrim chu
• Ka pu leh a Kekawr
• Thikthu chhia
• An lo tunlai mi ve tawh thin

Recent Posts:

• Pathian Malsawmna
• Doctor-ten min rawk em?
• Keini chu thingtlang mi kan ni a
• MIND-SET: MIZOTE LEH KAN RILRU SUK-THLEK
• ZoRO Press Release

This entry was posted on Wednesday, September 12th, 2012 at 6:00 pm and is filed under Luangliam, Religion. You can follow any responses to this entry through the RSS 2.0 feed. You can leave a response, or trackback from your own site.