Chhiartu duh tak, nang nên a thlum a al kan eiza lêm lo maithei. Ama’rawhchu, hei erawh ka hria, ka ‘ṭhian’ i ni. Khawvêl hi ‘tu emaw’ tà bîk a ni lo va, ropuina pawh hi ‘tu emaw’ khum tùr bîk a ni hek lo. Thu leh hla te pawh hi tute emaw ziaha phuah tùr bîk emaw te kha ilo ti ngawt ang e. Duhsak takin ‘a ni lo’ tih ka hrilh duh che a ni.
Chhiartu duh tak, nang leh kei hian inzawmna ril tak kan nei. Sakhmêl intawng lovin ànka nêm inhlàn lo mah ila, changkânna hrui duhawm tak hmangin kan inthlun zawm tlat si a.
Chhiartu duh tak, tute nge thu ziak ṭhin a, tute nge hla phuah ṭhin? Keimahni anga tung chhoa kal ve tho an ni asin. An theih bîk vang leh an thiam bîk vang em ni? Ni lo. An tum a, an bei a, an pâr chhuak a, rah duhawm an chhuah mai ṭhin.
Chhiartu duh tak, Pu Kaphleia ‘Thlîrtu’ te kha ilo bih ve tawh ngei ang a. Thil ṭha tih tùr tam tak a hmu a, a hria a, nimahsela, tih tum lovin a thlîr liam mai mai a nih kha. Chuti chung pawhin thu leh hla lama kan mi ngaihsàn nih a ṭhulh chuang lo va, a thu leh hlate chuan Zoram pum a dêng nghîng lawih lawih tho mai. A tih tùr hmuh leh hriat te kha tiin, theih tâwpin han thawk teh sela aw! A aiin a va ropui nasa dâwn êm! Chuti ang chuan, nang leh kei hian tih tùr leh ziah tùr hi kan hre ṭhin ngei ang. Nimahsela, ti lova kan pàmṭùl leh ṭhin hian dinhmun ṭha zâwka kan dinna tùr kan hmaih leh si ṭhin.
Chhiartu duh tak, sum leh pai hi hman sên loh kan nei bîk lo asin. Mi thu leh hla kawmen pêk te hi hekna a nih ngai chuan kei hi rethei ber ka chang tawh ang. Ngai teh, kei aia rethei tùr fê fê hi an la tam mai zuk nia! Mahse maw chhiartu duh tak, kawmen i pêk hian eng nge hekna riau i neih le?
Chhiartu duh tak, midangte hlimna siamsak hi mihring ten kan tih theih ropui tak a ni. Mite paws-a kawmen i pêk hian a paws-tute thinlungah lâwmna mak tak i thlen tih nangmah pawh i inhre reng tih ka hria. Chu chuan anmahniah phûrna a siamsak a, chona thar a pe a, mi ropui takah i chhuah dêr thei.
Chhiartu duh tak, i thatchhe lo tih chu in ṭhenawmte pawhin an hriat reng kha. Mi paws-te pawh hi i chhiar chhuak ziah ṭhin ti raw? Chhiar mang lova kawmen pêk ngawt te hi thil zahthlâk a nihzia hrilh hriat kher ngai lovin i hria tih ka chiang alawm.
Chhiartu duh tak, sawi tùr a tam, ziah tùr lah a in pâng-aw-zial tup tup mai si a. Mizo hla phuah thiam Pi Hmuaki lah ‘thangtharte hla phuah tùr a phuah zo dâwn’ tiin a nung chungin an phum daih si a. Kan thu leh hla te hian tuipui râl kai lo mah se, a tlatna mualah chuan a hlim ve phian asin. Ṭhang leh tharte la rawn ziah tùr zawng zawng kan ziak zo vek palh ang tih pawh kan hlau hlel chuang hlei law. Thu beng lût tak tak ziak lo mah ila, kan thu leh hla te hi a nung chunga phùm duh tùr khawpa i rilru a chhiat kan ring phal lo. Uluk takin chhiar ṭhin la, ṭha i ti emaw, ti lo emaw, i ngaihdân tal chu sawi chhuak ve ṭhin ta che aw. Ngaihdân sawi thiam lo tùr khawpa râwn tlâk loh chu i nih hauh loh kha. Eng vangin nge midangte hian i bula awm nuam an tih êm êm? I â lo alawm.
Chhiartu duh tak, i theihna leh thiamna i rawn pho chhuah ve hun hi kan nghâkhlel teh asin. ‘Chhiartu’ mai ni tawh lova ‘Ziaktu’ emaw ‘Phuahtu’ emaw i rawn nih ve hunah chuan pialral kalkawngah Pawla’n a sai hauh lo vang che. Chutichuan, fai sa ringin pialralah kan inṭhenawm dâwn nia.
Similar Posts:
- Misual rethei nickname
- Hun Hlui – Hun Thar
- Mizo ṭawng ṭhenkhat
- Mizo tawng ziakdan tlem-II
- The Case for Mizo Wikipedia
September 18th, 2012 at 10:11 am
Comment ka hawng e.
Report this comment
September 18th, 2012 at 10:19 am
chhiar i la, chhiartu duhtak min ti bawk a
Report this comment
September 18th, 2012 at 10:22 am
Comment hawn a ni tawh bawk a chhiar chhuak dapin ka’n kawmen ang e.
Ngaihtuahna nasa tak seng a miin an ziah lo chhiar mai theiha a awm hi a hlu thin teh e.
Nia, chhiar chhuah leh han comment hi a post-tute lawmna ber a ni thin reng a ni.
Thlir liam mai lovin chhiarin i comment thin ang u.
tren tren
Report this comment
September 18th, 2012 at 10:23 am
A lo chhuak ve ta e
Report this comment
September 18th, 2012 at 11:17 am
Vawiin chu a van reh ve lee…
Report this comment
September 18th, 2012 at 12:35 pm
‘ka chhiar chhuak dap’ in ti deuh kher hi mak kalo ti deuh thin a, ka hrethiam ta riai ruai e. Chhiar chhuah loh ka neih tlem viau ka ring. Comment pek ve kher erawh ka in thlahrung deuh thin. Mikhual na a nula rim ang deuh hi anih ka ring a, mahni zawn zawn a lo puah ve phawng phawng chu ngam a har ve riau
Report this comment
September 18th, 2012 at 12:38 pm
@april comment te hi kan pe thin tur alawm. Chu chuan chona thar a siam a, tin, mahni ngaihdan sawi chhuah ve hrim hrim hi hlawkna nasa tak a ni thei
Report this comment
September 18th, 2012 at 12:51 pm
Chhiar i la, naupang zawkte (ti ve khanglang ila) thu thiam deuh leh thil tamtaka tha tak2 hi an tam a nia, hetianga in fuih hi tha khawp mai……..Han ti chho tak2 hlawm se tha tur hi nia an up bet hlawm ang tih hi thil hlauhawm tak a ni. keini ang pawn kan comment a kan tih ngam chuan tih ve zel mai tur.
Report this comment
September 18th, 2012 at 12:55 pm
hei april te pawh a inthlahrun em hi… Rawn ri ve bawrh bawrh teh se
Report this comment
September 18th, 2012 at 1:16 pm
Hman ni deuh khan ka’n thian pakhatin fiamthu titak deuhin, “Nang misual-ah pawh thu i post ngam i nia….” min ti a, misual hi an lo ngaisang hle ni tur a ni.
Kei chuan tihian ka chhang daih, “Misual a thu post te chu comment lamah kan sawi mam leh vek zel a lawm, hmun danga thu ziah ai chuan a awl daih zawk a lawm” 
Chuvangin a hranin thu kan post kher lo a nih pawhin kan ngaihdan leh duh dan, hriat dan te hi i tarlang ngam ang u.
tren tren
Report this comment
September 18th, 2012 at 1:19 pm
@Chhuaklinga chutiang chuan an lo ti elo? An van lo ngaisang awm em em ve! Chuti ka inthlahrung leh zo vek tawh
Report this comment
September 18th, 2012 at 1:55 pm
Kanla naupang ve bawk sia, duh duh han sawi ve dawn ila U Charice te hian, ‘i thlir dan a mawl hle mai’ te minlo ti ta se, chuta kar ah zah tawh nak alai in U Mahminga’n ka ziah dikloh 5 vel rawn hmu in, thahnemngai tak in min han hrilh kauh kauh seng, chumi hnu ah Uchemtatrawta hian bung thum a min chhuah hnu pawh in a tanna ngai ah tang tlat se, Pu Chhingte-a hian chtr-a ka hnial vang hrim hrim hian min lo tan em em mai bawksi sela, Pu HV-a nen kan ngaihdan lo in bát ta se, kei tu khawkha hriatloh daikil kar a mi hian tu tan mah ka hlawh dawn der si lova. Pu PK-a ten theihtawp chhuah in Pathianthu nen min chhan in, U Ainawni’n ka thlavang hauh eng ang mah sela, U Tsa’n fiamthu nen boruak tih zan tum viau mahse ngai awh leh har kati dawn em asin
tak takin, chhiar lam hi katih mi zawk ania, comments zawng zawng nen kalo chhiar kim ve dap zel ania. Misual.com dam reng rawh se.
Report this comment
September 18th, 2012 at 2:20 pm
@ april… Tawifel takin, i va’n comment tam thiam…
Nia, mi(sual).com hi kei chuan ka tangkaipui khawp mai…
Zep leh timna nei map lo hian leh mitmei veng lem lo hian, ka tawnhriat beitham tak tak te, ka tlangaupui hmiah hmiah mai bawk si. Ka tlangnel over ngawtin ka hria, mi(sual) runpuiah hian.. 
Report this comment
September 18th, 2012 at 2:39 pm
april leh
Hetiang khawp thu thiam te chuan luan liampui tura mual mual chu i ngah ang maw le.. Dr Mahminga te pawh an rik zaih zaih hi. mi(sual).com Jai hind!!
Report this comment
September 18th, 2012 at 4:10 pm
Ni e, a dik ngawt mai!
Report this comment
September 18th, 2012 at 11:54 pm
A va han thlum dup dup ve mawle, Chini hlawma Mangai pawlh ang vel ani e Post tu duhtak
Report this comment
September 19th, 2012 at 6:29 am
@chhangte_II
Duh chuan pawlh dal theih
Report this comment