Nimin (25th Sept., 2012) khan Archive Hall, Aizawlah Mim Kût hman a ni a. Art & Culture Minister PC Zoramsangliana’n a hmanpui. Minister chuan ‘Mim Kût’ hi Mizote Kristian an nih hma lam thil a nih thu sawiin “Tûn hnaiteah hian tuten emaw Mim Kût hman an rawn thar thawh leh chiam mai a, a mak ang reng hle,” a ti. Hmânlaia Mizo piputen mitthi leh Mim Kût an hman dân chu zêldin thu bâwl a ni a, chûngte chu Mizoram Kristianna a luh hnu-ah ûmbo a nih thu a sawi a. “Mim Kût hi kum tam tak kan hmang tawh lo va, a chhan lian ber chu kan sakhua kan thlâk tâk vang a ni,” a ti.
“Kan Kristianna nêna inmil leh kal dùn thei apiangte uarin chhawm nung ila kan tih mêk laiin, Kristianna tiṭhuanawp leh nêk zawnga kal hi thil ṭha niin a lang lo,” a ti a. “Kan sakhaw vawn lai nêna inmil zêlin kan culture kan her rem tùr a ni… Hnam nunphung leh ziarâng te hi sakhua nên a inmil zêl tùr a ni,” a ti. Kristianna nêna inmila culture thlifim tùrin kalkhawmte a chah bawk.
Mim Kût lo chhuahna: Mim Kût lo chhuah dàn history ziaktuten an ziah dàn tlângpuiah chuan, Tlingi leh Ngama, Nupa induh leh inkawp rem tak chu, vanduaithlâk takin Tlingi chu a thi ta hlauh mai a, Ngama chu a lunglêng thei êm êm a. A mumangah ‘zêl angin’ mitthi khuaah a zuk kal a, Tlingi chu chêr leh dawl dâng êm êmin a zuk hmu a, chuti anga a awm chhan a zawh chuan Tlingi chuan, ei tùr ṭha a awm loh avanga an ei a chhiat thute lo hrilhin, an nupaa loa an thlai chin, thlai thar ei a châk thute a lo hrilh a. Ngama a lo harh leh hnu chuan a mumanga a nupui thusawi kha hre rengin loa thlai thar ṭha ber berte chu a nupui Tlingi tân chuan a thlai chhiah ta a.
Chumi hnu chuan Ngama chu a mumangah mitthi khuaah a zuk kal leh a, Tlingi chu a zuk hmu leh a, a hmêl a lo ṭha-in a lo thau mawi hle tawh a, a chhan Ngama’n a zawh chuan, Tlingi chuan a thlai chhiahte a lo hmu a, a lo ei thute sawiin, chu chu a ngeih a, a lo ṭhat tâk thute a lo hrilh a. Chu thu chu ṭhenawm khawvêngte’n an han hriat chuan an chhûngte thi tawh tân mitthi thlai chhiah chu an chîng ve ta a, chu ta ṭang chuan Mim Kût kan tih hi a lo chhuak ta a ni, an ti. Mim Kût hi mitthi pual bîka kût a ni a, ‘ṭahna kût’ tite pawhin an sawi ve bawk ṭhin.
Chutih laiin: ‘Bruchko’ tih lehkhabu hi vawi 3 lai ka chhiar chhuak tawh a. Bruce Olson-a’n Colombia Motilone Indian ho hnêna a rawngbawlna hian min hneh ngawt mai. Motilone-ho dawithiam chu hnawl hauh lo va rawngbawlna hmanraw pawimawh taka a hman dân te hian ngaihtuah a titam ṭhin. An hnam culture mil zêlin a nung a, anni pawhin a tirah thah tum mah se, a tâwpah chuan an hnam ang hialah an lo pawm thei ta a ni. Isua pawh Motilone mi angin a sawi, kawng ṭum a nei a, sangha a man ṭhin a, sa pawh a pêl bawk ṭhin. Chuti anga hrilhfiah leh zirtir an nih avang chuan an tân pawm a nuam a, Isua chu hruaitu ṭha tak niin an hria a, a hnung zui an châk tawh êm êm mai a ni.
Chuan: Kan culture mila kan sakhuana kan her rem thiam lo hi thil pawi tak a ni. Tùnah pawh kan culture tam tak chu hnâwl a nih tawh hi. Kristianna hi western culture thlirna mit aṭangin kan thlir a, kan hnam nunphung chu kan Minister sawi ang maiin ‘zêldin thu bâwl’ mai a lo chang ta! A va pawi tak êm! Tute nge kan dem ang? Kan pioneer missionary-te em ni ang? Nge keimahni zâwk? Enga pawh chu lo ni se, tûnah hian harh chhuahna’n khua a la tlai lo ve.
Similar Posts:
- Mîm Kût thuchah
- Enge in ngaih ve dan le?
- Vangpui Kut – Cultural Exchange Nite
- Mizorama thuneihna sem dan hi
- Cheng Nuai 67 senga sak E.Lungdar Hall Hawn a ni
(Y)
September 27th, 2012 at 6:39 am
Chhiar ang u lem.
Report this comment
September 27th, 2012 at 6:43 am
A lo chhuak ve ta hlawl mai
Tuk chhuah nuam vek ule
Report this comment
September 27th, 2012 at 6:44 am
A va thawnthu tawh ve aw! eng ber nge awih tur pawh ka hre lo ve.
Report this comment
September 27th, 2012 at 7:05 am
Minister chuan a va sawi tha teh phian ve. Kristian nih tawh hnu si a, kan rin dan kalh tlata nun si chu a dik thei lo ang. Missionary te khan enge tih fuh em em an neih a, heti taka mizo te kristiana kan inleh duak? Kan pi leh pu ten an hlauh em em, an ngam loh leh tih lungawi nana an ranvulh hmanga an inthawi thin, an tana phurrit em em mai kha, ‘HNEH TAWH’ anih zia leh Kristian(Ringtu)te tan chuan a hlauhawm loh zia an zirtir kha anih ka ring. An hlauhna laka an saltanna lak atangin ZALENNA DAR an rawn vuak sak takmeuh a ni.
Report this comment
September 27th, 2012 at 7:06 am
Hmanlai kan pi leh pute Kut hman thin kha thil thleng leh an suangtuahna atanga an hman a ni tlangpui a. Chapchar kut, Pawl kut leh Mim kut te. Mim kut pawh hi khitiang khi a lo chhuahna ni mah se, Mizo kut pawimawh tak pakhat a ni a, kan culture-ah a bet tlat a ni. A nih chuan hmanlaia an hman thin dan ang a, hmang diak diak kher lovin a Kut hlutna hi kan tihlan a, kan hman uar deuh deuh a tha a ni. ‘Tahna kut’ an lo tih thin angin Kan chhungte thi tawh hriatrengna (Memorable) Kut atan te pawh a hman theihin ka ring. Enga mah hmaa “hmanlai thil, Kristian kan nih hnu-ah kan sakhua avangin kan umbo tur a ni” tih ngawt hi hnam culture tih ralna a ni thei
Report this comment
September 27th, 2012 at 7:09 am
A tlangkawmna khi a tha khawp mai. Kan hnam ze mil hian kan Pathin hi a chawi mawi theih a, kan hnam hla leh rimawi te hian min hneh a, Pathian kan biakna kawngah pawh tih tak takna rilru pu turin min zut na ber a ni.
Kan hnam cuture chu engpawh lo ni rawh se kan humhimin kan ngaihlu em em tur a ni. Mim kut pawh hmang mah ila, kan rilru a rinna leh innghahna tak tak chu Pathian a ni tho. Kan nunphung leh ziarang kal san zawnga thil kan tih reng reng chuan hnam boral tur kan ni mai.
Kan Biakin-ah vaikhuang sei pui pui te leh dambori(a sipel pawh ka hre nek love) kan put luh tir a, kan rimawi tumna hmanrua seki te leh kan rimawi tumna hmanrua dang ken luh chu tih ngai lovah kan ngai leh si. Aw ZORAM harh la, i puan ven sawi chhing rawh, i tlai ang e. (duah mai a)
Report this comment
September 27th, 2012 at 7:10 am
Mitthi ten Vaimim an ei ngai lo tih hre kur tawh chung si a, la thlai chhiah tluk tluk chu thil atthlak tak ani mai lo maw? Amaherawhchu, a tradition thangthar zel te tana hriat tura vawnhim ve hrim hrim chu ka kalh lutuk chuang lo.
Report this comment
September 27th, 2012 at 7:14 am
@Chhuaklinga
@PKfanai mitthi tawh te la thlai chhiah ang u, kan tihna a ni lo va. He kut (Mim Kut) hi kan chhungte thi tawh kan hriat thar lehna, kan ngaihzia lantirna hun tha tak, Mizo mipuiin inlungrual tak leh a huhoa kan hman theihna hunpui duhawm tak a ni. Chuti zawng chuan kan siamrem theiin ka ring asin
Report this comment
September 27th, 2012 at 7:18 am
Tukchhuah nuam vek u le
Report this comment
September 27th, 2012 at 7:21 am
#9
Report this comment
September 27th, 2012 at 7:41 am
Vawikhat leh chiah
Art & Culture Minister atan a kan hnam culture paih then pawh pawi ti lo kan nei chu a va zia lo ve aw. Khua hi a var lo teh zawng a ni e.
Hmanlaia an hman dan tak tak khan tumahin hman kan duh tawh lovang, hman pawh tum ila a theih tawh bawk hek lo. Amaherawhchu, kan culture te hi kan hnam rohlu a ni a, kan nunze mil ang zel a her danglamin kan chhawm nung tur a ni. A neitu berin kan humhalh loh chuan khawi hnam mah hian min rawn humhalh sak lovang. A nihphung hriat na’n erawh chuan hmanlai an hman dan te chu short play drama ang tein an chang ang a, hmuhnawm enin kan lo en mai dawn a ni.
Report this comment
September 27th, 2012 at 7:48 am
Kristian rindan nen a inkalh na vak a awm chuang em ni aw. Protestant denomination thenkhat tan a kalh deuh tih mai loh chu!
Mim kut hi mitthi tawhte thlarau tan, an tan a tawngtai sakna ang a an lo hman, an thlarau tan an duhsakna an hlanna a ni ber awm e.
Catholic Kohhran, Anglican, Orthodox te chuan chhungte thi tawhte thlarau tan Pathian zahngaihna dil sakin la tawngtai sak theih chu an rinna pakhat a ni. Chutiang anih vangin mitthi chhungte tan pawh kalta te tan beiseina a awm thei a, a hahdam thlak thei viau mai. Kumtin, November 2 ah “thlaraute tan a tawngtai sakna ni” (All souls day), a bik tak a hman a ni ziah nghe nghe.
https://en.wikipedia.org/wiki/All_Souls'_Day
Kristianna pawh hi Mizo culture nen inmil takin a her theih asin. Latin American leh hnam hrang hrangte pawh hian an culture mil zelin Kristianna hi an pawm tlat zel…vai thlengin.
Report this comment
September 27th, 2012 at 7:57 am
#12 kawreksawn: #Latin America*
Report this comment
September 27th, 2012 at 8:39 am
Awmtea leh Hva te ngaihdan hi thil awmang lo a ni miah lo. Mizo culture hi Kristiannaa seng luh hi khuareiah thil tha tak a ni thei tlat. Kristian thurin zulzui taka tih a nih phei chuan. Pagan culture tam tak Kristianna hian hmasang atang tawhin alo senglut tawh a (xmas, easter etc), mahni culture ber kan hnawl nachhan tur a awmin ka hre chuang lo.
Mitthite hriatrengna chungchangah phei chuan Bible meuh pawhin MITTHITE tana baptisma chan thu a sawi ve tho alawm. Hmangaih kalta-te hriatrengna kut hi chapchar kut ai mah hian a tha zawk lo ang maw..? la damte pawh hian thi ve thuai tur nih inhriain kan inhmangaih thar phah deuh sawt maithei asin – hmangaihnain hmun a chan tlem tawlh tawlhna khawvel ramzauvah hian :mimal ngaihdan mai mai, min hnial hlek su:
Report this comment
September 27th, 2012 at 8:48 am
Keipawh Minister thusawi kha ka helh deuh. Pi leh pu te tihdan te kha, kan Kristian na dodal thei an nih loh chuan chhawm nun zel hi a tha ka tia.
Report this comment
September 27th, 2012 at 9:43 am
Mizo hnam nun leh ziarang chawikang zawka, khawvel changkan ang zela her rem tur berin, khiita tawngkam a chhuah duh khi a va tha lem lo ve aw…
Comment ka tum a, a sei dawn em mai, ka insum rih phawt te’ng…
Report this comment
September 27th, 2012 at 9:51 am
Pa Sanga hi hmanpui tura an sawm ve chu a ni bawk sia, a tul tawhlo zia lampang chu a va sawi khum nghek bawk sia
Report this comment
September 27th, 2012 at 11:49 am
Mim Kut kan ngaih pawimawh dan a tidal thei dawn tlatin ka hria
Report this comment
September 27th, 2012 at 12:12 pm
duhthu insamsiak ang…tunlai khaw mi kan buai hle tawhna hunah hian lungphun hi a lothlawna hun khawhralna a ni titih ta. mimkut ni bik hi ni khat puang ila sawrkar chawlh ni se…chumi ni chu lungphun ni atan voh ila…
pahnihna…mimkut ni hian chhungte thi tawh pualin thenrualte nen inhmukhawm ila…lungphun pawh kan ti alawm le.
pathumna thihna intuarnatsiak hi kristian zirtirna a ni lo.
mimkut theology leh purgatory( roman doctrine) hmeh pawlha theologise tum dawn ai chuan hman loh ka duh…chawlh lawkna hrim hrim mimala rin dan chu thuhran ni se…
Report this comment
September 27th, 2012 at 12:27 pm
Kristianna lam chu thudang ni se, kut hi kum khatah pakhat bak neih tul ka ti lo.
Kan ram economy nen a inhmeh lo. Chu bakah sakhaw hrang hrang festival leh international festival zawm kan duh ve vek si. Han thawh festival lam i uar zawk ang u.
Report this comment
September 27th, 2012 at 1:14 pm
@vakul rawtna pakhatna leh pahnihna khi kaikawp ila a tha ngawt ang a. Kei chu Mizo Kut pathum te hi tih nun reng ka la duh
Report this comment
September 27th, 2012 at 4:16 pm
#6 ,8 & 19
Report this comment
September 27th, 2012 at 4:25 pm
Mim kut thla zawhah thitin thla kan hmang em ni kha
Report this comment
September 27th, 2012 at 4:49 pm
Mim kut aia ropui Anthurium festival ngat an hmang thei tawh alawm. Mim kut hman te chu tangkai an ti vak nang, Politician te chuan…
Aizawl khawpui chhunga hall pakhata Mim kut ngui nghuaia hman ai chuan, inlachangkang taka Reiek tlang ngeia nula chhe lo tak tak leh zawlaidi te nena kut hman te chu a nuam zawk fe ta ve ang… 
(Tunlai chu, rilru a kawi laklawh tlat… )
Kar leh lawk hian, Pu Sanga lah chu kan Kut Pa a ni dawn lehnghal a. Mi(sual).com a lut ve thin a nih chuan, ka comment hi politician a nih angin khawngaihin lo hmuh hmaih hram teh se…
Report this comment
September 27th, 2012 at 5:29 pm
@23.Ulawng, mu leh mal pawh kan nei tawh lo anih hi. September thla chawhnu lamah te chuan Vaimim a rem vek tawh ang chu. A awmchhun pawh a chi tur emaw, Aiawt chiahna atana hman tlak chauh ani tawh ang. Vaimim thar lai August thla lai velah hian Mimkut hmangin, September thla velah chuan mitthi thlarau ho kha tin tawh tura ngaiin Thitin thla an ti thin kha ani ngai a. Mimkut hi anih ang ang lo deuh a Christianize chu tha ka ti reng mai. Kan pi leh pu te tihdan pawh ni eng ang mahse, Kan rinna kalh leh Ramhuai biakna nena inkungkaihna awm ang chi reng reng hi chu
ani mai.
Report this comment
September 27th, 2012 at 5:42 pm
masi hi ka duh tawk mai :
Report this comment
September 27th, 2012 at 5:48 pm
@ulawng August kha Thlazing a ni a, Sept chu Mim Kut a ni a. Thitin thla chu Mim kut nena inzawm, mitthi thlahna a nih avangin an dah tel ta lo. Hemi thu-ah hi chuan inhnialna a tam a. Tunhma chuan August hi Thitin thla an ti thin.
@PKfanai Mim kut leh ramhuai biakna a inzawm reng ka hre lo. An chhungte thlarau an thlahna a ni mai a. Keini pawn tunlaiah pawh rindan chu kan nei ve tho alawm. An thih veleh kalbo nghal nal nal turin kan rin ve tho hi
Report this comment
September 27th, 2012 at 5:58 pm
Awmte #27 sawi ve ta mai mai ila, “Mizo te chu ramhuai be thin kan nia lawm…” tih ang zawng tawngkam hi ka ning vei riau thin tlat pek a
A chhan pakhat chu keini thlahtute, “Mivam” tih thinte khan ramhuai an hlau ve ngai lo tlat. Inthawina pawh an hmang ve ngai lova, vawk pawh an duh hun hunah an talh thiang a ni. Sechhun a awm leh an thlahualna a ni ve mai. Tunah erawh, Mivam tiin kan awm ta hlawm lo. An lal loh hnuah a thenin Hmar lal an bel a, a thenin Chhim lamah Lai (Pawi) lal an bel a, saphun-in an fin ta hlawm a ni. ♫ Hmar ah Saivate, chhimah Chunthang. In man tam e, sial sawm in ngen e.♫ tih hla pawh a awm nghe nghe a ni. (Sawi ve mai mai)
Report this comment
September 27th, 2012 at 6:59 pm
Khuang pawh hi paih law law ang u……..
Report this comment
September 27th, 2012 at 7:02 pm
I sawitum chu a a hmawrbawknaah khian i rawn phawrh chhuak tha khawp mai.
Juda-te culture ang zel khan Pathian Fapa, Isua khan a hun a rawn hmang a. eg. Eucharist Sacrament atan khan chhang leh wine…Punjab ah chuan rawn piang tase atta leh dal a hmang zawk ngei maithei.
Sialsukah te rawn piang tase “beram” a tih fo pawh hi “sial” tiin a rawn thlak mahna.
Kan sakhaw rinna (faith) hi Kristian ni mahse, kan culture chu Mizo a ni reng dawn. Faith leh Culture te hi ngaihpawlh chi niin ka hre lo. Gentile-te hnenah pawh chanchintha puandarh tur a thu a pek khan (Mark 16:15) “Chanchintha” tih hi Judate emaw Culture tih lam aiin “Christ Values” lam a kawk zawk mah thei lovang maw! Isua Krista hian Mizote leh kan culture hi a hmangaih bawk ani tih hi keini lovin tuten nge puangchhuak chuang ang le!
Report this comment
September 27th, 2012 at 7:33 pm
A nih ang takin hmang dawn ta ila, mim kutah hian a tui thei ang berin eirawng kan bawl ang a, kan chhungte fam chang tawh te thlanah an thlarau ei atan kan thlaichhiah tur ani ang. Mahse chu chu kan kristianna nen a inrem tawh loh bakah, mitthi thlarau ten an rawn ei tak tak dawn lo tih kan hre bawk si(Ramhuaiin an rawn ei anih loh chuan). Chuvangin kan rinna mila, Thlan thut leh Pathian hnena tawngtai höna neih ang chi chu a tha ka ti. Khuang te pawh thil tha lem loah a hman theih laiin Pathìan fak nan a hman theih a, Rock music te pawh Pathian fak nan a hman theìh a ni. Tin, mim kut leh Ramhuai biakna a inzawm ka ti lo va, hmanlai kan pi leh pu te kha, Ramhuai tih lungawi tumin an inthawi fo thin. Khatiang kha kan pi leh pu te lo tihdan mah ni se, engtikawng mahin tih chhunzawm ve tha ka ti lo mai a ni. Kan minister pawh hian, kan kristianna nena inremlo chu paihthla ngam tur leh amil tura her rem thiam turin a sawi mai aniin ka hria. “Hnam ziarang hi kan sakhua nen a inmil tur a ni” a ti mai anih khì.
Report this comment
September 27th, 2012 at 7:58 pm
1. Bible hian eng hnam tihdan phung (culture, traditions & norms) mah hi a pawng hnawl mai lo.
2. Bible-in Hnam tihdan phung a hnawl reng reng chu Pathian (& Bible zirtirna) do chi leh Mihringte tana tha lo leh hlauhawm a ni tlangpui, e.g. fate inthawina atana hlan (meialh-a zuanluh tir, etc).
3. Bible Zirtirna-ah chuan Christianity & Culture hi a theih chen chen kal-kawp (compromise) tura ngaih a ni. Mahni Culture atanga Pathian kan hmuh leh biak hi Bible zirtir tum ber niin alang hial (Tirh.17:26-28, etc). Chuvangin, Relationship of Christ & Culture (Gospel & Culture)-ah hian, Mithiamte chuan- Christ Against Culture, Christ Of Culture, Christ Above Culture, Christ and Culture in Paradox, Christ the Transformer of Culture, tiin, a tul dan ang zela apply turah an ngai a ni.
4. Kan Mizo culture tam tak hnâwl a nihna chhan hi, a bulpui ber chu European missionary te an ni. Anni khan Western Culture kha Christian Culture anga min pawmtir a, min zirtir-in, Western culture nen-a inmilh lo leh an duhloh apiang kha chu min hnawl sak ta vek mai niin alng!
5. Missionary-te bakah hian, ringtu hmasate (first generation christians or leaders) te khan mawh an phur bawk. Kan Mizo ringtu hmasa-te khan “Abolition of Customs & Cultural Practices”-ah khan mawh an phur nasa zawk hial ang em aw? tih theih hial a ni. A chhan chu, Hist. of Mizo Christianity han chhui hian, Missionary-te kha chuan mi tlemte chauh an influence thei a, Mizo ringtu leh hruaitu hmasate kha Impact of Christianity on Mizos-ah khan an “Influencial” zawk daih! Chuvangin, ngaihtuah a ti-thui khawp mai…
6. Kan Pipute atanga kan Mizo Customs & Cultural Practices tha tak tak (a chhia tel lovin)-te nuaih-bo an han ni ta vek mai kha chu…a pawi tak zet zet a, a rapthlak bawk!
7. Post-tupa “Hma-thlir” leh beiseina ang hian, Tûnah hian harh chhuah nan khua a la tlai lo turah ngai ila. Rinna kawnga min ti-chak thei leh, Mizo nihna zawnah leh khawtlang leh nunphunga hma kan sawn theihna tur chi Customs & Cultural Practices-te chu… hawh u,,, i Chhawm-nung tha leh teh ang u?
Report this comment
September 27th, 2012 at 10:35 pm
Pu PK, kan pi leh pute kha an inthawi thin ngei a, an inthawina tam zawk erawh chung khuanu hnenah a ni. Rinzova te ngaihdan ang hi a ni maithei. Ramhuai hnena inthawi chang te pawh an lo nei mah na, mahse an bia tihna erawh a ni lo. An ngaihdan kha a la mawlmang em em a. An natin emaw, buaina an tawhin ramhuai tihah an ngai a, tlawn lungawi an tum mai thin. An inthawina hrang hrang te kha chung khuanu lakah a ni. Hnuaipui, hnuaite, adt. a tam mai. Thing bul, lung bul an bia kan tihna chhan pawh, malsawm theitu awma an hriat vang mai a ni.
@Dr John
Report this comment
September 27th, 2012 at 11:18 pm
Ramhuai tlawn lungawi nan chuan an inthawi thin ngei a lawm. A theih chin chinah hnam ze mila sakhua kalpui a tha ti tlat tu ka ni. Amaherawhchu, inkalh alo awm hunah chuan, “Jesus Christ is not only above the Culture, but, he is above all”. ani tawp mai.
Report this comment
October 1st, 2012 at 1:38 pm
11#
Kan hnam min phuarkhawm tlattu chu Kristianna ni lovin; kan culture hi a ni zawk e. Chuvangin heng kan pi leh pute hun ata Kût kan neih te hi chhawm nuna, kan khawsakna, kan nunphung te leh ramte a lo than dan zel mila a hmandan kan her rem thiam hi a pawimawh a ni.
Report this comment
October 1st, 2012 at 1:46 pm
Art& Culture minister hi dem ngawt tur pawh a ni lo, hnamah a la chiang tawk lo a ni mai a, hnama chian em avanga Art& culture minister nih ngawt thei lah a ni bawk si lo.
Hawh u hnama chiang hmasa te hian kan ram hruaitute hi hnam-thuthlungah i kaihruai ang u.
Report this comment
October 1st, 2012 at 2:10 pm
33# Awmtea Khiangte.
Sap misawnari te khan thing bul lungbul biaa min rawn chhal vang a nih kha; tun thlenga Mizo mipui tam takte rilruah kan pi leh pute khan thingbul leh lungbul mai mai biaa nia ngai tlat kan la awm hi.
Report this comment
October 3rd, 2012 at 12:14 pm
Thingbul lungbul chuan huai nei turah an ngai thin a. Chutah chuan malsawmna pawh awmin an ring ni ngei tur a ni. Chuvangin an inthawi thin a nih hmel
Report this comment