mi(sual).com

Lungphurna
Engvanga mihlim zingah mipa aia hmeichhia tam zawk nge an nih i ngaihtuah ngai em? Hmeichhe rilru hi a no zawk a, lungphurna(emotion) an ngah zawk vang a ni. Mipa, mihlim kan tihte pawh hi lungphurna ngah tak an ni chawk a, a nawlpuia lak dawn chuan hmeichhe zingah an tam zawk fe a ni. Mipate aiin hmeichhiate hian Hmangaihna leh khawngaihna an ngah zawk a, an lungphurna kha a thawhna lam lamah a nat theih em vang a ni. Phutzuk ngah mihringte pawh hi hi lungphurna nei lian an ni fo va, taksa leh rilru kha a thawh kawp tlat avangin thil lo thleng phutah khan an phu hma ta em em bik a ni.

Amaherawhchu lungphurna hi a luan liam huau huau chuan fim rem rawma ngaihtuahna a awm thei lo va, mahni rilrua a thawh dan leh mi dangte thusawia vir vel chiam chiam hi a awl ta em em mai a, an rilruin an chet dan tur kha a thunun a, hriatthiam theih bakin a lo awm theih ta a ni ber mai. Kohhran Upa fip rem rawmin a zungtang a phut zeuh zeuh hian lungphurnain a tuam hma mi thenkhat chu an vir fe tawh thin a, tumah mah an demawm loh ve ve, anmahni mimal ziaa pathian chibai an buk dan a ni mai. Mahse chutih rual chuan mahni lama a thawh dana mi danga thawk ve tura beiseina hi mi fim ker kawr leh mi phul hlut chi zingah khaikhinin mi phul luai chi hi an thahnem zawk a, an thawm pawh a ring fo thin, mahse mi fim chin chuan a chhana lak an la thiam fan thin.

“Pa zai kal rut rut leh luipui tlak dawna pa kuk ruih ruih pa-rawn an awm ngai lo” tih hi mizo thufing pakhat a ni a, a awmzia berah chuan lungphurna ngah tak mihring hian fim taka ngaihtuah a thiam duh lo chawk tihna a ni ber. Mizo mipate hi chu mei a alh pup leh lui luang ri a rin viau tawh hi chuan phul khat chu kan phul tlang vek a, kuk kher kha chu mahni inthunun theih lohna rah pawh ni fa hmiang. Lungphurna hian mahni inthunun theihna piah lamah min hruai a tum ber a, chu chu a chhia tia han sawi ngawt chi pawh a ni chuang lo va, rorelna fel tak erawh a awm hlei thei lo thung.

Khuangpu zingah Kohhran Upaa thlan an tlem chhan?
Thutak deuhva han sawi kual chiam ka tum lo va, tumah han tihlungawi loh ka tum na hek lo; thil ni thei zawnna mai a ni a, lungphurna hi sakhuana lama a thlek chuan chhepchher nena rik deuh bung bung a chakawm thin. Ri hian lungphurna a kaitho hma em em mai a, mihlimte tihlimtu chu mizo zingah…Khuang hi a ni chawk. Khuangpu chu zai lam tui mi a ni a, zai lam tui mi chu music ngaina an lo ni a, zai lam leh music ngaina chu lungphurna ngah mi an lo ni a, lungphurna ngah mi chuan rorelna fel thlep thlawp lam aiin a thawh dana phul kual hi an lo awn deuh tlangpui a, khuang nufa chumchilha mihlim rual an suk nghawng nghawng theihna turin hna an thawh laia heti zat an vai peih miah lo tur an ban khan a reia rei mangkheng khuang an vaw peih tlat… emotion vang chiah a ni, an taksa kha lungphurna chuan a thunun thei tlat. Kohhran kal zel tur ngaihtuahtu atan chuan mi fim kek kawk hi mipuiin an lo duh daih thung thin si a, lungphurna nei tlem deuh hi Upa an ni duh khawp mai. An ni ka ti vek miah lo va, mahni awmna hmunah a fiahna tura ngaihtuah kual mai chi a ni ber.
Hleihluakna
Lungphurnain a ken tel tlat chu hleihluakna hi a ni a; mi thusawia let tawp tawpa nui thin chu lungngaih niah let tawp tawpin a tap leh mai thin a, mi thusawia nui ri huau huau thin chu mi thusawi veka insut ri hruih hruih chi an ni leh chawk. Kohhran huanga mi baka hlim thin, mawi leh mawi lo pawh thlu lo va phu kual chiamte hi an bo vek chuan kohhran sadai pawng zawk khawpin an bo kual leh nge nge thin a. Mi hleihluakte phurna leh thathona ang hian pawl ho hi kal ta se, a nawlpuiin an zo lo vang. A phur lo ber leh a phur ber inkar a lai vel hi thil tha chhuahna a ni ber ang chu.

A tha lamah
Isua zirtir zinga ropui bera ngaih Petera kha lungphurna ngah tak mai a ni a, Pathian pawh hian hetiang mi hi a duh riau em ni aw…tiin a ngaihtuah theih. “Min zui rawh” Lal Isuan a tih khan an Len leh an pa kalsanin an zui rup mai a, Bible-in a sawi tel lo na a, an nupui fanaute pawh a nih ngei hmel e. Chutah, hmel danglamna tlangah Isuan a hruai a, a lungphurna a chhuak thut a, Bawkte khawh a rawt chiam mai bawk a. Isuan a zirtirte kal bo an duh ve leh duh ve loh a zawt a, “khawiah nge kan kal chuan ang le nangin chatuana nunna thu chu i nei alawm” a ti chiam a, a hnuah a phat leh tho va. Isuan “nangnin tunge a ni min tih” tia a zawh khan “Krista Pathian nung fapa chu i ni” a ti hluah hluah a, phat thei tawh lo ang hrim khan a chhang chiang a ni. “I kalna apiangah ka kal ang a, i thihnaah ka thi ve ang” titu khan ar khuan hmain a phat zut zut mai a, Isua man tura an rawn kal khan Puithiam bawih beng a lo hlawih thla hmanhmawh bawk a; Bible-ah lang lo mahse an sawi dan phei chuan a thih dawn khan “ka Lalpa chu kraws-ah an khengbet a, kei chu ka Lalpa thih dana thi ve tlak ka ni lo ve, a letlingin min khengbet rawh u” a ti e, an ti bawk….lungphurna ngah hi Pathian pawhin a lo duh hle tih a lang.

Engemaw thil ti tura phur tharna chan hi kan mamawh fo va, Pathian rinnaah pawh min ti phur tur thu kan duh hi a tha em em a ni. Phur taka thawh hi phur lo chunga thawh ai chuan a hlep a tha zawk a, Charismatic movement lo chhuahna pawh mi dangte nun chawh phur hi a ni ber mai a, tunlaia an uar em em “Praise and worship” pawh hi heti ang zia hi a ni; lungphurna ngah mi kan ni emaw ni lo emaw hringnunah hian chintawk a awm fo va…dam chhung ni chhiarpui har khawpa lungphur thinte eraw hi chu mi hleihluak an ni a, zir tur kan nei tlang vek mai….mihringte hian.

Similar Posts:

• Lungphurna (reference Vakul)
• Pasal neih vanga kohhran thlak…?
• Thalai ni si:
• Bangalore Titi
• Ka thawh zel dawn! (Engtin ngai che’u maw?)

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Sunday, September 30th, 2012 at 6:15 pm and is filed under Whatever. You can follow any responses to this entry through the RSS 2.0 feed. You can leave a response, or trackback from your own site.