mi(sual).com

Thuhmahruai
Bible-in Khawvel tawpna thlen hma thlengin, Finna leh Hriatna-te a pung dawn tih min hrilh tawh a (Thuhriltu 1:18, Daniala 12:4). Finna, hriatna, thiamna a pung tual tual a, buaina erawh a tam tual tual thung chu a nih hi. Hei hian Bible hrilhlawk hi rawn tifamkimin, khawvel tawp hi a hnai tawh a, hun hmawrah kan awm tawh a ni tih a rawn tichiang em aw, a tih theih. Chuvangin, heng finna leh hriatna pungte hi khawvel ti-nuamtu nge an nih ang a, khawvel tihrehawmtu tur tih hi ngaihtuah tham a tling. Khawvela changkanna leh hmasawnna-te hi Pathian min hlat-tirtu an nih chuan, Kristiante tan chuan a ţha dawn lo tihna a ni. Doctor te, Scientist te, Technician te leh thiamna hrang hrang nei te thil hmuhchhuah mak leh danglam tak takte a ţhen chauh, tawi te te-in i lo thlir thuak thuak teh ang.

1. Organ Transplanting
BBC leh VOA in August 26, 1983 khan Mihring taksa bung hrang hrang thlak theih a nih tur thu an puang daih tawh a, khawvelin awih harsa an ti. Mahse, tunah chuan thluak thlak-thleng (brain transplanting) chiah hi harsa an la ti, hei pawh hi a complicate deuh vang chauh niin an sawi (TIME, Nov.1999). Chutihloh-ah chuan mihring taksa peng hrang hrangte hi chu an thlak zung zung thei tawh. Mihring taksa bung hrang indaih-lohnaah chuan Vawk pawh an hmang thei ta!

2. Test-Tube Baby
Test-Tube Baby hi kum 1970 vel aţang khan an piantir thiam tawh a, kum 1978 a vei meuh chuan US ah pawh Test-Tube Baby hi 1,00,000 an tling tawh. Hmeichhe hrisello leh la Nula duh ten hetiang hian naute an nei ţhin. An pung chho zel a, kan nunphung leh khawsak duhdan ngaihtuah hian an punchhoh zel pawh an ring.

3. Mipa-in Nau a Pai Tawh ang
Prof. Jerome Legeune, Paris University chuan, March 12, 2000 khan, “Kum zabi 21-na aţang hi chuan Mipa-in rem an tih phawt chuan Naute an pai thei tawh dawn” a tih kha, atakin Prof. Edwin Symonds, Obstetrics & Gyaecology, Birmingham University chuan Mipa pum chhungah chhulbawm dah dân an thiam tawh a nih chu! Kum 2008, June 29 khan a takin Mr. Thomas Beatie (34), (Pi Nancy Roberts-a pasal) chuan naute a pai a, fanu duhawm tak Susan Beatie a hring ta, tunah hian a fa 2-na a pai leh mek! TV Show Host lar tak, Oprah Winfrey chuan he “Khawvela Mipa Nau Hring Hmasaber Tur hi Interview Hmasaber” April 3, 2008 khan a neihpui nghe nghe a nih kha. Ram changkanga Nuho-ten an nghah-hlel zia leh an lawmzia chu sawiin a siak lo an ti!

4. Cloning
Tunah chuan Beram leh sazu te chu duhtawkin a ang chiah chiah, duh zat zat an siam thei tawh. Kum 1996 July 6-a, Beram an siam (cloned) hmasak ber kha “Dolly” an ti a. Mihring pawh an siam thei thu an puang! Hmel, pumrua, vun rawng, rilru engkim inang chiah chiah, duh zat zat an siam theih tur thu chu US President George W. Bush hnenah an hrilh a, enchhin phal tura an ngenna chu George W. Bush hian “Cloning hi Pathian Dân (Bible) leh US Dân (US Constitution) Kalh a ni” tiin a hnawlsak hmiah! Mahse, Doctor leh Scientist-te hi an beidawng lo, kum 2036 khian US Constitution-ah thunluh a, pass-tir tumin hma an la mek!

5. Zâwng Pawhin Mihring A Hring Thei Ta!
Zâwng chu Mihring Nau paitu-ah an hmang a, nau a hring thei ta mai bawk! He Zâwng chhul-ah hian mipa chi (sperm) an dah a, Hmeichhe naute pound 7 leh ounce 14-a rit a hrin thu Weekly World News, Nov. 13, 1984 daih tawh khan tarlan a ni! A ngaihna awm lo!

6. Ser Awm Lova Inzai (Surgery)
Tunah chuan Medical doctor-te thiamna a sang tawh a, taksa peng hrang hrang chhe palh emaw, vun thlak ngai emaw, taksa rualrem lo leh duhdan ni lo deuh te chu laser hmangin ser (scar) awm miah lovin an zai thiam tawh. Movie lâr tak, Face-Off film kha a entirna ţha tak a ni awm e. Dr. Robert White, Cleveland, Ohio State, USA phei chuan, “Dân-in min phal sela chuan mihring lu hi taksa dangah harsatna awm miah lovin ka thlak thei” zu han ti a!

7. Nunna Dahţhat (Greek. Cryobiology)
Cryobiology hi ‘Vawta hmeh-khang’ tihna a ni. Prof. Dr. Paul Segal Physiologist leh a thawhpuite, Berkeley, University of California chuan Washington DC-a Federal of America Societies for Experimental Biology member pungkhawm ho hmaah, “Mihring hi duh chen chen kan thih-tir (dah ţha) lailawk thei a, an duh hunah kan kaitho leh mai thei a ni” tih thu an puang daih tawh (TIME, April 2, 1987). Hetianga Hnim-hlum (anaesthesia) inpek a, hun engemaw chen nâ hre lova indah/ insiam theih hi a ţangkai zia inzaina (surgery)-ah a lo lang a. An sawi ang thil khi a tak tak ni dawn ta se, a ţha zawngin nge min nghawng ang a, a chhe zawngin, tih chu ngaihtuah tham tak a ni.

8. Euthanasia
Euthanasia tih hi ‘mercy killing’ (khawngaih vanga tih-hlum) tihna a ni. Pitar/putar hna thawk thei tawh lo te emaw, nâtna khirh-khan tak tuar mek, thi thei mai silo te chu anmahni (leh chhungte) remtihna-in Doctor-ten nâ hrelovin, an tihlum mai ţhin. Dr. Watson & Dr. Criek, Nobel Price pawh dawng tawh te chuan, “Tar kum 80 chunglam chu Euthanasia hmanga tih-hlum vek a ţha ber,” tiin rawtna an siam! Ram hrang hrangah kua a hreuh chhoh mek zel a, China-ah chuan arukin an hmang mek. Hei hi Evangelical Christian-te chuan an do nasa hle a, “Mihring nunna lak-sak theihna hi mihringin a nei lo, Pathian chauhvin a nei”, an ti.

9. Fast Travelling
Scientist Isaac Newton khan kum 1680 daih tawh khan, “Tun aţanga reilote-ah mihringte hi Darkar 1-ah mel 50-a chakin kan la tlan dawn a ni,” a ti a. French mifing Voltaire chuan a nuihzat hle a, “Chutianga Darkar 1-a mel 50 chaka kan tlân te chuan kan thaw a chham dawn asin,” tiin deuhsawh takin a chhang a ni. Mahse, tunah chuan Darkar 1-a mel 40 tlân te chu kan tihdan pangngai a ni ta!  Kum 1965 June 3 khan America Astronout Edward H. White chuan Mins 15 chhungin America khawmualpui a thlawk-tlang hman, hei hi 17500 km/h a ni daih! Tunah chuan Thlawhna hmangin New York leh Tokyo chu darkar 2/3 lekin an kal ta. Kum 1800 khan Jules Verne chuan Ni 80 chhungin khawvel a hel chhuak a, “Around the World in 80 days” tih a ziak nghe nghe kha. Tunah phei chuan Rocket hmanga Thla (Moon)-a lawn leh chhuk nan mins 80 chauh an hmang tawh, an ti!

10. Computer
Kum 1830 khan Prof. Charles Babbage, Mathematics, Cambridge University chuan Computer hi a hmuchhuak a, 1940 khan a aia ţha zawkin an siam a, 1960 aţangin Micro-chips hmang, tuna kan hman ang hi an lo siam chhuak a. USA CDC 760C phei chuan Second khat chhungin hna hrang hrang 3,60,00,000 a thawk thei. Tunah hian Lehkha zir nan, chanchin hriat nan, ram hrang hrang biak nan, lirthei leh thlawhna khalh nan, library lian pui puia lehkhabu awm zawn nan, document dah ţhat nan, traffic, military, business, medical, tax, video, tv, etc. ah an hmang nasa tawh êm êm a ni. A lovin kan awm thei tawh lo tluk a ni e (Cellphone/mobile phone nen hian group 1-ah dah mai ila).

Dr. Robert Jethrow, Founder NASA’s Goddard Institute for Space Studies (Prof. of Astronomy at Columbia University, leh Prof. of Earth & Science at Dartmouth University) chuan “Tun aţanga kum reilote-ah chuan Computer pawh hi kut-a command a ngai tawh lovang a, mihring anga thluak hmanga hna thawk thei turin kan siam tawh ang, lehkha phek siam nan thing leh mau kan suat hnem ţhin a, computer hmangin Paper-less Office khawvelah kan din dawn a ni,” a ti a, tunah hian a thleng chho mek tawh a nih hi. Hnathawh nan chauh nilo, intih-hlim nan (Games khelh nan) pawh an hmang uar ngang mai, Korea-ah khuan ţhalai Computer Games at-chilh avanga thluak buai an tam êm êm a ni.

11. Nu Pumchhunga Naute An Zai
November 1, 1999 khan, British Medical History-a awm ngai lo a thleng a. Tyne Hospital, New Castle, London-ah Baby Jaydon chu a Nu pumchhunga a awm laiin, a thawkna dawt-ah hnawhtu (wind-pipe blockaged) a awm avangin a thi mai dawn a. Chu chu hriain Doctor-te chuan Naute, a Nu pumchhunga awm chu an zai ta a, a thawkna dawta hnawhtu chu ţha takin an zai chhuahsak a ni. Hei hian Doctor-te thiam tawhzia a tarlang chiang hle.

12. Television
Tunah chuan inchhung aţangin TV kaltlangin khawvel ram hrang hranga thil thleng kha ţhut-hmun aţangin kan thlir thei tawh a. Kan duh duh ram inchhung aţangin kan tlawh thei ta, ti awlsam mai ila. Research beituten an chhut danin ram changkangah chuan Naupangin H/S a zirchhuah veleh-a a TV enchhung belh-khawm chu darkar 17,000 a tling, an ti. TV hian a ţha zawngin nghawng a nei thei viau bawk. Kum 1996 April khan Rev.Dr. Billy Graham Crusade kha Ţawng hrang hrang 42-a tihchhuah (LIVE Telecast) a ni a, Ram 160 chuangin, LIVE TV kaltlangin an thlir a, khawvel mipui 3/2 ten kha Crusade kha an thlir tih theih a nih chu! A pawi ta ber erawhchu, Chhungkaw tin hi han in-en ila, a ţha zawng vek erawh kan hmang si lo!

Kum 2008 ni ta-in ka hria, Vanglaini-ah TV that loh zia ziakna chungchang ka chhiar a. Aizawl-a Pastor nupui 1, zu pawh temchhin ngai reng reng lo chuan Bacardi Zu a in châk thu a sawi mauh mai! A chhan an zawh chuan, “TV-ah Bacardi Zu Fakna ka en hian, a tui hmel si a, ka in châk tlat a ni,” a ti! Naupang ten insual, inkap, thisen chhuahna leh action film lampang hlir an en chuan, tharum han thawh mai leh insual, inhnek mai te hi an awlsam nghal tih, Zirmi-ten an hmuchhuak bawk a ni.

13. Thlai Chin Dan Thar
Israel-te khuan khawvel leilung da zel leh, hun leh hmun ren avangin thlai chin dan thar an hmuchhuak a.Thlai kung pakhat an phun kha an phawi tawh lova, eng thlai pawh phun duh se, a kung awm sa-ah khan an zawm (transplant) tawh mai ţhin. Sun hlu kungah pawh Serthlum an rah tir ta tihna a nih chu! Tin, Theirah (fruits) reng reng khu ei tur chi leh, a mu (seed), a chi atana hman tur chi chu an chin laiin an siam hrang mai. A rah ei tur chi chu a mu (seed) awm lo turin an buatsaih mai ţhin! Theirah tak lo emaw, a chi ţha lo emaw a awm ve thei tawh lo. Mizoram pawh hian kan hmang (apply) ve thei dawn hnai ang chu maw.

14. Scientist Pung
Dr. John Wesley White, USA chuan, “Tun Kum-zabi chhunga Scientist 75% te chu tunah an la dam a, Kum-zabi hmasa aiin a letin kan pung bawk,” a ti a. “Hemi avang hian khawvel thiamna leh finna thu-ah te, khawvela harsatna sutkian thu-ah te beiseina kan nei sang hle a ni”, a ti leh zel bawk. Bible zirtirna leh Thlarau hruaina aia mahni thiamna leh finna hmachhuantu an pung tual tual a nih chuan, thiam leh fing zingah Pathian-a rinna nghattu chu an tlêm tial tial dawn tihna a ni.

15. Dam Rei Zawk Tawh Ang
Dr. Jonathan Weiner, American Physician Scientists Association, chuan, “Thiamna leh finna, hriselna leh hmasawnna avangin kum 2050 aţang khi chuan, kum 100 mi chu vantlang (average) a ni tawh ang a, kum 2100 ah chuan kum 200 mi chu a vantlang (average) a ni tawh dawn a ni,” a ti. Hetia a sawi theih chhan hi, Thiamna leh finna, hriselna leh hmasawnna bakah, mihring upat-tirtu (aging hormones) an hmuhchhuah tawh avang leh mihring upat-tirtu hnathawh-tir loh dan an hmuh-chhuah theih huna awmzia a neih dan tur beiseina avanga sawi a ni.

16. Cancer Tidam Thei Tawh Ang
Dr. Shannon Brownlee, American Medical Association, chuan, “Kum 2050-ah khi chuan Cancer natna chi hrang hrang kan buaipui em em te hi awlsam taka tihdam theih an ni tawh ang”, a ti. A chhan chu, thiamna leh finna a sang chho zel ang a, Doctor-te pawhin nâtna tihdam dan tur an hmuhchhuah belh zel ang a, hei bakah, taksa peng hrang hrang thlak theih an nih chuan a nâ lai kha a thlak zung zung theih mai dawn bawk a ni, an ti.

17. Bawlhlawh Awm Tawh Lovang
Dr. Evan Amato, USA chuan, Khawpui (city) hrang hrang aţanga research an neih aţangin, mi pakhatin kum khat chhunga bawlhlawh chi hrang hrang a siam hi 725 kg average a ni, a ti a. Heng bawlhlawh paihna tur leh tihralna tur hi khawi khawpui-ah pawh kan buaipui êm êm ţheuh a. Kum zabi 21-na tawp hma-in he harsatna hi sutkian tum a ni a. Biotechnology hmanga Recycling-a hman-nawn (re-use) theih zawk tura siam tum a ni a, hei hi a taka kan hman theih hunah chuan Bawlhlawh buaipui ngai hi a awm thei tawh dawn lo a ni, a ti bawk.

18. Sa Ei Tawh Lovang
Dr. Ed Ayres, USA, chuan, kum zabi 21-naah hian mihring tana a hrisel zawk avang leh mihring tana a ţhat zawk avangin, sa (meat) ai hian thlai (vegetables) hi kan ei tam tawh zawk ang a. Kum zabi 21-na a tawp meuh chuan sa-ei (non-vegetarian) aiin sa-ei-lo (vegetarian) kan tam zawk daih tawh dawn a, sa-ei nih chu a zahthlak hial tawh zawk ang, a ti! Research aţanga an hmuhchhuah chu – Bawngsa Kg 1 insiam turin, Bawng ei tur hnim (thlai) Kg 7 leh Tui ltr 7000 a mamawh a. USA-ah phei chuan Ranrual chawm nana thlai leh tui etc. an sen zat chu 30% a tling hial a! Hei hian thlai ei tur leh tui harsatna a siam bawk tih a lang a. Hei aia la buaipui-awm zawk chu, Sa hian nâtna hrang hrang – memory loss, skin disease, high BP, diabetis, cancer etc. a siam nasa a, sa ei loh hi a lo him ber a. Chuvangin, mi tam tak chuan sa ei loh hi an in-chawh nasa ţan hle tawh a ni, an ti.

19. Sex For Fun
Dr. Matt Ridley, Sex Education Specialist, USA chuan, kum 2050 ah chuan mitin hian hnathawh tur leh tihtur pawimawh tak neia kan hmanhlelh avang te, leh intih-hlimna chi hrang hrang a tam tawh dawn êm avangin, ngaih pawimawh êm êm a hlawh tawh dawn lova, sex pawh hi intih-hlimna satliah ang lekah kan ngai tawh dawn a ni, a ti. Human Cloning te, Mipa-nau pai te, Test-tube baby te a lâr tawh dawn êm avangin sex hi kan ngainep tawh hle ang, a ti bawk .

Engtin Nge Ni Ang Le?
Kan sawi tak-te khi khawvelin changkanna leh hmasawnna a thlir dan (secular perspective of modernism) a ni a. Thil hi a chhe-zawngin an lo thlir bik hauh lo tih a lang chiang hle. Amaherawhchu, khi’ng changkanna leh hmasawnna-te khian hringnun-ah eng ang in nge a chhe zawngin nghawng a neih ang? tih lam erawh an chhui phak lova, chhui nachang an hre lo ve thung. Hei hi a chhan ber chu, he lei-ah bak hian beisei dang an neih loh vang a ni.

Pathian ringtu tan erawhchuan, khi’ng hmasawnna leh changkanna te khi lo thleng pawh nise, kan awmna khawvel chawp hian la boral mai tur a nih avangin, Ringtu piangthar vanmi chuan khawvela thil awmte chu hmangaih lo turin (ngaihhlut berah nei lo turin) min ti a, “Khawvel hi hmangaih suh ula, khawvela thil awmte pawh hi hmangaih hek suh u. Mi tupawhin khawvel hi a hmangaih chuan Pa a hmangaihna amahah a awm lo…chung lama thil awmah te chuan in rilru nghat tlat rawh u, leia thil awmah te chuan nghat lovin…Lalpa ni chu rukru angin a lo thleng ang…lei leh a chhunga hnathawh awm te hi a kangral ang” tiin (Col.3:2, 2Pet.3:10, 1John.2:15).

Khawvel changkang zelah hian ringtute hi kan danglam bik zia hi khawvelin min hriat-theih nan kan nun hi uluk zel turin Pathianin min duh a. Kan awmdan te, kan duhzawng te, kan khawsak dan te, kan rilru thlek dan te, kan rilru put-hmang te, kan tui zawng te, kan châk zawng te, kan ngaihhlut zawng te, etc. chu khawvel mite nen-a danglam turin min chah mawlh mawlh a ni (Rom 12:1-3).

Similar Posts:

• Siamtu i fak ang u
• Lalpa’n Khawvel a ti mualpho leh ta..!!! Atheist te pawh a la timualpho zel ang che u..!!
• Kan au zel dawn!
• Lung a leng a ni !!! Mahse…
• Mizoram Designers’ Week

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Sunday, October 28th, 2012 at 6:00 am and is filed under Education, Health, Information, Lifestyle, Mizo Society & Culture, Nature, Opinion, Religion, Travel, Zu. You can follow any responses to this entry through the RSS 2.0 feed. You can leave a response, or trackback from your own site.