Thawkkhat lai khan,Stanford University a Sociology Department chuan, experiment pakhat an buatsaih a. Car Model thar leh nalh tak mai hi mimal(chhungkua) in awm teuhna bulah an park a, miin engti angin nge an ngaih tih an en thli thlai ru reng a ni. Chawlhkar khat lai an dah hnuah pawh, mitam takin an kal pel a, anmahni motor te pawhin an tlanpel zut zut a, naupangte, puitlingte pawhin chu car thar nalh tak mai chu, tu ta nge ni ang aw? tih leh, engvanga chulai hmun kawtkaia awm nge anih ngaihtuah neuh neuh chung leh inzawt chungin an pel mai mai a, Chawlhkar khat hnuah pawh tuman khawih reng an tum lo a ni.
Chawlhkar khat hnuah chuan, Zirlaite chuan chu car pangai vek chu, a piah deuh hla vak chuang lo, mahse, tuma ram ni lem loah chuan kawngsirah an hung leh ta a. hmun hla deuh hlek atangin, a ruk tein entlangna/enhlatna nen an vil leh ta a ni. Tun tum chu an nghak rei ta lo hle mai, thim thet thet atangin rawlthar rual deuhvin an tan a, a ke an herh thlawn a, chutah pa valai lam pawhin an rawn ti ve zel a, tumah vengtu leh neitu awm talo chu, kar lovah a part thlawn thlak theih ang zawng zawng an thlawn ta vek a, an rubo ta vek mai a ni. A tuk khawenah meuh chuan, a part thlawn theih leh ruk theih ang chi zawng zawng chu Saruang Sakeibaknei rualin an han bawr a, an duhtawk an ei zawh hnua an han kal darh chuan, a lo filh thuau tawh ang mai hian, a lo filh vek tawh a ni.
Car ngai reng ani si, veng(locality) thuhmun reng, ami chengte pawh thuhmun reng ani si, an dahna hmun a danglam hlek ani chauh si, mahse, thil awmdan chu a danglam em em mai si chu mak hi an ti ta em em mai a, a chhan an ngaihtuah ho ta a ni. Mithiam tak tak(Scholars)hovin an han sawiho ngial hnuah chuan, a chhan ni thei awm pakhat chiah awmin an hria a, chu chu:- “Kan ta leh kan ta ni lo(tu ta mah ni lo)!” tih mai hi a ni. Tu ta ber nge? Tih kan hrechiang lo chung pawhin, kan in emaw thenawmte kawta Car in hung chu, kan zing ami tu a ber emaw ni turah kan ngai mai a, khawih kan tum lo va, amaherawhchu, tu kawtkai mah nilo, khawilai hmun fianrial deuhva tuma vil-vat lohva lo inhung ve ringawt chu, tu ta mah nilovah kan ngai a, khawih thiang leh a theih ang anga, a hlawkna tel leh a thau sawh kan tum ta mai thin a lo ni awm e.
He thil nalhlo tak mai, “Kan ta leh kan ta nilo” hian kan nunah danglamna nasa tak a thlentir thin a. Engvangin nge, miin silai tha ber ber hmanga midang timna nei hauh lova a kah cher cher theih mai? Engvangin nge, miin mipui tamtak awmnaah bomb an kam a, an tih puah a, Embassy te an bomb a, World Trade Centre te an sut chim a, mi sang tam tak an thah theih mai thin? Engvangin nge mi pakhat thil tihsual avanga pawisawilo nunau chena tlangchil leh suat kan nap mai thin le? Engvangin nge, Central sawrkar atanga sum Tluklehdingawn tam tak lokal thin hi, a thei fa ten, motor part thlawn ang mai a, a thlawn theih theih thlawn a, ah bo hmiah hmiah an duh thin? Engvangin nge Sawrkar sum vantlang thil siamna turte, a tam thei ang ber pawh pen kan duh tlat thin ni le aw?
A Chhanna chu; kan mi kahte kha, kan mi leh sa nilo, kan laina leh inzawmna kan neih loh, thi mah sela, kan theng thawngah kallo annih vang ani mai. Central lam atanga budget sum lokal chu kan ta emaw ka pa ta emaw angin kan ngai lova, a van tla, tu ta bik mah nilo, a rut thiam thiam vanneihna tur angah kan ngai tlat alawm maw le!. State Sawrkarin Central atanga an budget dawn hmanga vantlang thil an siam turte chu, mi taah kan ngai tlat a, chhawrna pakhat mah neilo turah kan inngai a, a theih zah zah lo ziah bo mai pawi kan tita thin lo ani mai lo maw? Mirethei, in leh lo nei lo, eitur pawh nei lo te chu, kan ta nilo, mi ta/ mi dang daihah ngaiin, an manganna leh mamawh kha kan manganna leh mamawh angah kan ngai lova, an tawrhna khan kan tan natna engmah a thlen dawnlo niin kan hria a, lehlam kan hawisan thin a lo ni.
Lal Isuan, “Nangmah I inhmangaih angin I vengte I hmangaih tur a ni” a lo tih te, “Miin I chunga an tiha I duh tur ang bawkin, mi chungah pawh ti ve thin rawh u” a tih, a zirtirna te hi a ril a sin. Keimahniah ngai ila, engvang tehlulin nge mi kan kah thluk phawk phawk duh anga, engvangin nge pawisawilo kan bomb darh duh ang ni? Mirethei in leh lo neilo te, eitur neilote pawh keimahni angah ngai ila, engvangin nge tanpuiin, an silh leh fen tur leh ei leh in tur, chaw kaw puarna kan ngaihtuah loh teh lul ang? Miin eng thil emaw an tisual a, an chungah kan duh chhe thei thin hle mai a, kha thil tisualtu kha, ka pa emaw, ka unaupa emaw, ka fapa emaw, ka fanu emaw angah kan chan thin em le? ‘Mi ta’ in thil an tihsual chuan, an chungah a chhe thei ang bera action lak kan duh a, an chi leh kuang pawisawilo thleng thlenga tuar tir mai pawh kan pawisalo thin; chutih laiin, thil tisualtu kha keimahni lam lo nita ila, kan duh chhe tho ang em le?
Mizoram hi kan ta tih kan hrelo em ni le? Mizoram hmasawnna tur atana sum lokalte hi “kan ta” ni lovin, “mi ta” angah kan ngai tlat mai a, a theih ang atam kha, mi ta atang khan sawhthlak kan tum ta thin a nih hi. A tawpa a tuartu tur chu keimah leh ka thlahte hi kan ni tih hi I hria ang u. Motor thar tha tak tak kan lei a, Kawng siam thatna tur kan eizawh leh zel si chuan, kumkhat lekah kan motor alo tar buih mai ang a, a siam nan sum tam tak kan seng leh si ang. Chutiang zelin, Ramngaw humhalh te, Lui tui vawn thianghlim leh pump chung chang te, Kawlphetha siam nana Tuikhuah te, inkhelhna hmunhma buatsaih te, ldt, ldt…Bairabi tuikhuah kha ka ta ani a, ka tu leh fate chhawr tur ani tih lo hre khiau ila chuan, tunah chuan, Power kan va han hniang hnar tawh dawn em!
A bik takin Chanchin tha hi mi zawng zawng ta ani a, kan ta theuh ani a, mi zawng zawng chan tur leh mi zawng zawng hnena hrilh hriat tur a ni e.
Sunday hman nuam vek u le.
Similar Posts:
- Kan Himna Kulh
- Pickle thak
- Rilru nghet lo kan ni takzet em?
- Ngaihdan siam hmat lutuk hi…
- Motor Registration tih that ngai
October 28th, 2012 at 9:13 am
A tha hle mai.
Report this comment
October 28th, 2012 at 9:32 am
I illustration hi a tha-in a POWERFUL hle mai a.
Kan tunlai dinhmun atan a va han RELEVANT chiang tak em! Kristian diktak – ngaihngam taka rawngbawlpui ngam tur i ni e, Pu PK!
Ka comment tam lo mai ang, kan pherh leh nuai palh ang.
Report this comment
October 28th, 2012 at 9:32 am
Post tha tak a ni.
Report this comment
October 28th, 2012 at 9:56 am
“Mahni ta pawh in ni lova, Mana lei in ni tawh asin” (1Cor.6:19-20), tih leh “Miin I chunga an tiha I duh tur ang bawkin, mi chungah pawh ti ve rawh u” tih te hi Ringtute tan Thupui-ah neiin, Nitin nunpui reng thei ila, ringtu leh ringlo-te pawh kan hneh lehzualin ka ring.
Report this comment
October 28th, 2012 at 10:15 am
Amen
Report this comment
October 28th, 2012 at 11:03 am
Chhiar a nuamin a va tha em.
Report this comment
October 28th, 2012 at 12:38 pm
Tun tum chu ka tumloh deuh danin ka chhiar, tunlai boruak nen i her mil thiam hle mai, tha ka ti ltuk tlat. Chhiar zawh veleha theihnghilh zui mai atan chuan a uihawm lu hrat, anyway God bless you
Report this comment
October 28th, 2012 at 12:52 pm
A va han tha tha thin tak em! Mi in i chung a an tih-a i duh ang bawk in,
mi chung ah pawh ti ve rawh u. He thu chang hian ngaih tuah na a va’n
ti thui thin em! En tir nan ei ruk hmang ho hian, an mah ni ei ru ve tu tur an duh chu a ni chek ang chu maw? Mi pawng sual hmang ho pawh hian, an mah ni pawng sual tu tur an duh ve ang em aw?
A nih leh tual thah hmang ho hian, an mah ni thah pawh thah an duh ve kher ang em le? Khi ta ka rawn sawi ho, thil tha lo leh thiang lo
tih hre reng chung a, ti sual lui ngam ngat tu te khi chuan hrem na
eng pawh, an hma chhawn ngam-in an tuar ngam tur ah ka ngai.
Khaw ngaih na ngawr ngawr hian, mi sual a sim tir thei ngai lo tlat.
Hre reng chung-a thil kan sual a nih chuan, a sawh khawk pawh kan tuar
ngam tur a ni. Sual hrem na dan kan tuar ngam dawn lo a nih chuan,
tu chung ah pawh thil kan ti sual tur a ni lovang. Pathian in a thu awih duh lo tu te chu, a khaw ngaih hliam hluam kum khua lo vang a, mei dil ah, khaw ngaih na leh zah ngaih na tel hauh lovin a paih zawk dawn tih
hre tu te kan ni vek si a. He khaw vel ah hian Lal Isua chauh lo chu,
ring tu te’n ta dik tak eng mah, kan lo nei reng reng lo ve.
Report this comment
October 28th, 2012 at 12:52 pm
Pu Pk, sunday lo thlen ka nghahhlelhna pakhat, i thu paws nung leh awmze ril tak nei, kei ni ang thlarau lam pachhe tak mai tana chaw tui tak mai chhiar tur awm thin hi ani pakhat a.
Tun ami pawh hi ava rilin ava ngaihnawm leh pek em! Amen.!
Report this comment
October 28th, 2012 at 1:22 pm
Inkhawm hman loh ni a sermon tha tak tak chhiar tur a awm thin hian misual.com hlutna a ti zual thin.
Report this comment
October 28th, 2012 at 4:12 pm
A dik lutuk. Tin, mahni family, friends leh kan chunga thra te chuah hmangaih hi Bible a kan hmuh angin awmzia nei thui lo hle.
In hmangaihtute chuah in hmangaih hian lawmman enge in hmuh ang? chhiahkhawntute pawhin chutiangin an ti ve bawk lawm ni? Tin, in unaute chauh chibai in buk hian enge in tih hnem bik chuan? Jentailte pawhin chutiangin an ti ve bawk lawm ni? Chutichuan in Pa vana mi a tha famkim angin in tha famkim tur a ni? – Matt 5: 46,47.
Report this comment
October 28th, 2012 at 5:24 pm
Amen..
Report this comment
October 28th, 2012 at 8:40 pm
Tha thei hle mai Pu Pk-a leh Pu John-a te in fakawm. Mitin hi kan rilru ah hian mi duham tak chu kan ni phawt a, chuvangin Paula pawhin a tawk chauh a dil thin anih kha. Chulovah duham tur a inzirtirna hi alo awm lo khawp mai a. Kan hmuh angin Chaw puar lutuk a ei pawh Bible hian a phal der lo mai. Hei tak hi a nia thingtlang a officer ho an zin hian ran vel an lo talhsak na chhan hi, puar tawh hi chuan ngaihtuahna alo lawm thin a ni.
Sual tur hian Pathian hian duhthlan theihna min pe emaw hi kan ti ngawt zel a, duhthlan theihna kan nei lo hrim hrim. Bible zirtirna Deuteronomy ang te hi kristian ten kan chhiar ngun loh avang hian Pathian thu hi kan zawm lo ni hian ka hre thin. Bible chuan mi thil chhar chuan hawn a, puanzar tur a ni, an lo lak hma loh chuan tha tak a lo enkawl sak tur a ni. A ti hmiah. Tun hma in America leh Europe te Calvinist in a chiah lai kha chuan a mi cheng te lhawsak phung a danglam a, an vantlang inkawlna leh moral thlengin a fuh anih kha. A hnu ah en eng emaw theology alo chhuak a charismatic thlengin chu chuan phur hluai a, tawp leh mai ang chi khan a bawhbuai ta a ni. A nihna takah chuan kan moral chhia hi chu kohhran avang hian a ni tlangpui. Kan ram pawh hi Calvin theology kalpui dan tak khan kalpui se chuan hetiang a thatchhe lutuk leh corrupt lutuk ah hi chuan kan chhuah a rinawm loh. Eg Switzerland, Scotland, S. Korea, Netherland.
Engpawh nise kan kristianna hian kan pawnlam khawsak dan hi khawih danglam rawh se, chu chu a ni. Ka lo comment ve ta duah a, hei pawh hi Pu Pk-a taimakna rah a niin ka hria.
Report this comment
October 28th, 2012 at 8:45 pm
Comment a thain a ngaihnawm hlawm hle mai. In kan thleng chiah e. (Keini chu, kan inkhawmpui ve hi, inkhawm hnuhnung ber hi tlaiah kan nei a, inkhawm banah kan haw darh vek zel, Nuho inkhawmpui ania mikhual(delegates 3000 zet an ni. )
Report this comment