A hmelah duhthusam lai han sawi tur nei lem lo mahse, leng dang zawng a awt lul lo mai. Ama tawkah chhaih buaitu a nei nawk reng a, ‘a eng chu nge an duh chhan ni ang aw’ tih tur si chutianga an hel peih tak mai chu ka ti a, ka va thawk chhuak ve alawm.
A sam a kir deuh chiat a, a hmel a hang deuh thal bawk a, a nuih chuan mi a hip pawhin ka hre lem lo. Mahse, a nui hnem ve hrim hrim a, nui mawi tak nui duh bar lo ai chuan a thlanawm ve. A khabe kual chu han dawm deuh vang vang ila, artui sawl vuan angah te pawh a inchan theih ang tih tur ani. A heh no lo tak erawh a sep sual mawh khawp mai. Eizawn pui tlakin a hmang thiam a, a pian leh murna pheiin zir se, kan tum phak rual loha leng tur chi ani.A pumrua chuan lengdang pumrua a hen vetho nachungin thawmhnaw inhmeh alawi hi anei der lo thung a, a hak apiang mai ‘a va thlang thiam lo em’ tihsak zel chi ani. Mahse ani chuan engah a ngai lo a, mawipui inti takin aha thei zel.
Ralkhat atanga han hmuh mai chuan ‘a belhchian tlak fu awm e’ tih tur anih laiin han thlir zui ta vang vang erawh an vang khawp. Chuti chung tho si chuan han lenvah pui tur erawh a chham mawlh si lo. Zun a nei ni pawhin ka hre lo, ai a nei ni mai zawkin ka hria.
Kawm tlangnel takah chuan a kawm tlak fu a, khawilo kawmkar titi mai mai han hlimpui tur hi a nei zut reng a, a la kal ngai hauh lohna khuaa pa tlahawlh deuh chanchin atanga a khermei ber chanchin te chu a hre bel zek zel a, zu zuar atanga pastor thlengin khel fe tham a hre zel. Awih sak lo ngawt dawn ila, dawt ani tih kan hre bik si lo va, awih ngawt dawn ila, mi thu belhchian loh awih ngawt tiin rilru a inkhap ve khanglang a, ngaihthlak zawh ruala theihnghilh mai chi ani awm e.
A bulah hi chuan hre ber hi awm theih loh reng reng. Ani aia hre zawk nih tum chu a lehlinga zawngtah kung lawn tum ang hlauh ani a, ‘hmanlai deuh a hre lo ang chu maw’ ti ila, thlanrawkpa thlahtu bul chhui thui thei ber ani tlat a, khawvel tawpa sunhlu kung awm te chu a awmna thlengin a sawi thei. ‘Chu sunhlu kungte chu alawm Buizovan zai na hmuna ahman leh a hnah reng reng awm hman lo’ a ti dawt zut thei tlat.
Van lam chanchinah te chuan hnial lul suh. Hrangchhuana hian Chawngmawii a ‘Di’ zan a hre bel ang bawkin chumi zana ngaihzawng neih reng reng nupui/pasalah an innei ngei ngei tih chu a thuvawn ani a, a hnial thlaknan entirna tute maw i chhawpchhuak a nih phei chuan i hriat peih loh thleng rawka fah tur che nupa a insiam ta a hria.
Pathian thu maw! Ani hi Bible bu pumpui ziaktu hi a ni pawh ti ila, a awihawm hial ang chu. Genesis atanga thupuan mai ni lo, a kawm atanga akawm lehlam thleng hian a hre bel hle vek. ‘A hriat loh reng a awm lo va, a hmaah engkim hi langtlang leh inhawng sa ani’ ti tawp ila a dik ber. Genesis a thu hmasa ber ‘Atir’ hma chiaha thil awmphung pawh zankhua sawidaih a nei hial ta ve ang.
Chutah hmangaihna lama kan hel chhin ta chu a chem kalna zawng ber ani awm e tih tur a la nita deuh deuh. Hmangaih ringawt pawh zungtang thliaha chhiar rual loh a lo nei tawh a, Hmangaih ber pawh an chhungkaw member aia tam a lo neiin a lo then leh tawh mawle! Kei chu duhchuan ‘waitinglist’ ah ka chuang ve thei ang tih min hrilh. Chutih avang chuan min hnar hauh lo tih min fah zek. Beiseina sang tak nena nghah rih mai chu kan tih theih ani. Engzat nge nghah chhuah ngai ang tihte chu ngaihtuah ngam loh, tar lamah kan kuah ve hman chauh ang chu! A tih a tih chi lul loh.
Mahse, alo buaithlak lehzual zo ta! Enghunah pawh khawihmunah pawh inhmuh tawh chuan min hmangaih ber biak ta mauh mai a, khawilo khual khaw nula nen lenvah tum anih phei chuan chhei! Kan inhmangaih dun hleah an ngai nghal a, hmangaihna semzai nih kan hlawh zui a, ler leh rinawmlo nih kan hlawh ta hlawl hlawl mai. Ani zarah kan leng tar thei hial ang tih a hlauhawm ta.
Chutiang dinhmun khirh deuha ka va inbarh lut chu chhuah leh a har ta talh mai. Ka inhnial pui dawn chuan kei aiin a tawng chak dawn tih ka hre reng mai si a, tuar dawn aralah chuan thin hian a tuar lo leh thin bawk si a, khawilai thang emaw a sakhi awk, thi si lo, chhuak thei bawk si lo te chu ka inchan ta ber.
Chutih avang te pawh chuan ani ang mi chu zozai chuan an lo zar buai ni. Kei ang maia lo tang tawh te chu. Ngaihzawn dawn chuan rem si lo, then dawnin then theih mai si loh, duhloh rai ang maiin kan nuar tau ta reng a, ani lo duhthlan tur an kat nawk laiin thlang hlei thei loin kan awm chu ani ta der a, , a khawi zun mah neilo chuan min phuar bet si a, Ani hang ngaihnobeina nei map lo ah chuan kan bei reng lawi si a, ka va zalen lo lulai ta em!
October 29th, 2012 at 6:46 am
Tukchhuah nuam vek u le
Report this comment
October 29th, 2012 at 8:02 am
va ziak thiam ve,
a tawpah a nihna han sawi sak la a tha leh zual ang chu….
Report this comment
October 29th, 2012 at 10:28 am
buaithlak awm ve
Report this comment
October 29th, 2012 at 11:34 am
Ka hlauh zawng tak a ni, khitiang khi…
I bulah kan awm anga, min bawl vak ang tih ka hlau.. 
Mahse, thu erawh ti thiam..
Report this comment
October 29th, 2012 at 12:25 pm
Hetiang tawngkam thiam deuhva rawn ziak hi kalo chang thin a ..ka chang chhuak ta.. i ziak thiam lutuk
engamawchen chu a tak tak a nih hrim hrim..heheh
“…a pian leh murna pheiin zir se, kan tum phak rual loha leng tur chi ani. ” i rawn ti a,”…a hak apiang mai ‘a va thlang thiam lo em,tihsak zel chi ani…” i rawn ti leh si a a inman lo ka ti deuh..Tin, ‘ani’ leh ‘a ni’ i zawm hun h..lo en chiang leh teh!
Report this comment
October 29th, 2012 at 9:12 pm
Report this comment
October 29th, 2012 at 11:25 pm
debut post
va phurawm mai mai reuh ve..adang pawh post leh tur nih hi..hehe.. tuitan dawn tlats,
thanks to all comments..
Report this comment
October 30th, 2012 at 8:09 am
Thluaithlum nalh kawi kual vel khawp mai… Chân nei runin ka chhiar a, ka chang chhuak chuang lo :-).. Tiang thuziak nalh deuh deuh hi chhiar a nuam, min tiphur in ka hria.. Rawn ti zel teh..
Report this comment