High sikul kal lai
Inla-khawpui cheng ve tawkin Rahsiveng mawngah mi inhnuai chep tak luahin lehkha kan zir thin a. Kha’ng laia Lunglei khawpui ropui ka tih thinzia kha aw. Lunglei kan zin hma hauha kan nu leh pa te’n an sawi fo Town hall bula fly over bridge te chu lawn/zawh kan chak ve em em thin. Vawikhat chu pawl riat kan zir kumin, MZP hun hman avangin Town hall kal a ngai hlauh mai a. Chumi ni chuan leilawn ropuiah chuan ka lawn ve. Ka va’n hawi kual nasa tak! 
Town bus hi engzat tak awm maw?
Leilawn ropui atanga lirthei inzui zut zut mai chu hmuhnawm ti takin ka thlir a. Lunglei kan zin changa town bus kan chuanna thin kan hmuh baka town bus hrang hrang ka’n hmu te chu hmuhnawm tak a ni. Ngawi teh Bus neitu hming, Bus hmalama an tar pawh ka la hre thei asin. L.H. Sailo, L.H. Vannawla, tih te a nih kha maw le. Town bus panga vel lai ka’n thlir liam zet kha chuan heng bus zozai hian mihring an phur zel bawk si a, an va indaihzai tak em ka ti thin. 
Aizawl khawpui
Tin heti hi a ni a. Lunglei khawpuia kum nga zet ka chen ve hnu chuan ka tlangnel ta phian a. Ngai teh Mizoram khawpui Aizawl ka va zin zet chuan Lunglei ai ngawt chuan a lo ropui teh e. Town bus reng hmuh tur awm tawh lovin, City bus ngat an insulpel zut zut a. Han chhiar theih chi rual a ni lo. Kan lam hawia rawn tlan mek a awm laiin, a rawn zui tu a awm a. Min tlan pel chiah emaw tih laiin kan hnung lama tlan a awm zel bawk si. An va indaihzai tak e ka ti leh ringawt thin.
Hmasawn nge hnungtawlh?
Hun te a ral zel a, zirna avanga Aizawl khawpuia kum nga zet ka awm leh hnu chuan lirthei a pung, city bus thar lah a pung bawk. Mahse, lunglei ka haw erawhin Lungleia cheng te hi an hausa ta thut nge, an rethei tlabal zawk ka hrethiam lo! Town bus ka hmuh thin te chu hmuh tur reng an awm lo. Chuan man to zawk tak chawiin Auto rickshaw-in kan in sawh bawp bawp a. Keini ang duang tan chuan, veng hla deuha leng chhuak tur paw’n a ngaihna a awm hlawl lo. Mahse, tun hnaiah Lunglei khawpuiah pawh Town Bus pariat an tlan tan leh tawh niin ka hria a, ralkhat atangin ka lo lawm ve em em.
(more…)
