Lal Isua Tuarna – Part 3 {Sunday Pual}

November 25th, 2012 8:30 am by Dr John

Thuhmahruai
Lal Isua Tuarna – Part 1 & 2-ah khan Taksaa Lal Isua Tuarna chungchang famkim lo takin kan sawi tawh a. Vawiinah chuan Rilru Lama Lal Isua Tuarna chungchang kan zirho ve thung dawn a ni. Kan sawi tawh kha han thailang leh lawk ila. Lusun ţheuh ţheuh te, nâtna thuhmun tuar ţheuh ţheuh te, retheih dan thuhmun ţheuh te leh piansualna tuar (ramtui lei lo, pianphunga rual ban lo) ţheuh ţheuh te hian, hrehawm kan ti hlei hle-in, kan tuarnâ hlei hle ţhin. Hei hi a chhan ber chu rilru lama tuarna a tel ve leh ve loh athu a ni. Rilru lama tuarna hian hrehawm tihna leh thawpikna nasa tak a thlenin a tizual ţhin ni zawkin alang. Hei hian rilru lama tumruhna te, rilru lama lo inbuatsaih lawkna te leh rilru azira tuarna a nât hleih theih dan leh rilru pawimawh zia a hril chiang hle a ni.

Lal Isua Kha Ava Thi Hma Ve?
Kan sawi tawh ang khan, Kros-a mi an khenbeh-te reng reng chu a tlangpuiin, hrehawm tinreng tuarin ni tam tak an awm ţhin kan tih laiin, Lal Isua kha an khenbeh aţanga darkar 6 chhung vel lekah a thi ta mai a nih chu !!! (zing 9:00 am velah khenbeh a ni a, tlailam dar 3:00 pm ah thi anga ngaih a ni). Hei tak hi Lal Isua thawhlehna awihlotute tan chhuanlam tur siam a remchang ta hle a ni. Josefa’n Lal Isua ruang a dil khan, Ramawptu Pilata meuh pawhin mak a tih thu Marka 15:44-45-ah a inziak thlap a, “Chutia a thi ta thuai chu mak a ti hle a. Tichuan, Sipai zahotu chu kovin, a thihna a rei tawh emaw tih a zawt a. Sipai zahotu ka aţanga a hriat chuan a ruang chu Josefa hnenah a pe a” tih thu hi chiang takin a in ziak a ni.

Achunga Marka record khian Inkhenbehna chungchang kan sawi kha thudik a nih zia a rawn tichiang a. Mi an khenbeh-te chu an thi hma ngai lova, an lo thi hma ta mial a nih pawhin, an thi ngei a ni tih finfiah chu Sipai zahotu tih tur a ni a, an finfiah ngei ngei bawk ţhin. Lal Isua pawh a thi chiang ngei a ni tih fiah nan Sipaiin a nâkah feiin a chhun leh ngat a nih kha (cf. John 19:32-37). Lal Isua a thi hma êm êm hi Ramawptu Pilata meuh pawhin mak a ti hle a. Bible scholar ţhenkhat chuan, hetianga ‘mi an khenbeh thi hma riau case hi a vang hle’ a, Pilata pawh hian a vawi khat tawnna leh hriatna a ni hial angin an ziak nghe nghe a ni!

Engatinge chuti êm-a Lal Isua hi a thih hma ni ang aw? Taksaa a tuarna kha a nasa êm a, a tlin lo hrim hrim em ni ang? Thil awm thei tho a ni. Mahse, a aia nasa zawk leh rit zawk tuar a nei niin alang. A rilru lama a tuarna a nasa êm êm a, Gethsemani huanah khan Amah ngeiin, “Ka rilru a lungngai êm êm a, thihna khawp hial a ni” (Mat.26:38) a lo ti daih tawh a. A rilru lama a tuarna nasa tak ngei kha a thih hmana chhan hi ni ngeiin a lang. Engang chiah-a nasa in nge rilru lamah Lal Isua khan a lo tuar tih chu kan zir chho zel ang.

Rilru Hi A Lo Pawimawh Hle Mai
Rilru lam chanchin zirmi (Psychologist/Psychiatrist)-te chuan, “Mihring hi hlawhtlinna te, hlawhchhamna te, nunna leh thihna te tawk turin rilru lama inbuatsaihna leh tumna a pawimawh ber” an ti a. An sawi zelnaah chuan, “Âtna tam tak te, mahni intihhlumna (suicide) te, leh nâtna ţhenkhat thihpui tham loh thihpui tlat ang te hi rilru lama inbuatsaihna vang a ni a, rilru chhungril thûk tak aţanga nawrtu emaw, thununtu emaw a awm vang a, hetianga thil thleng ţhin a ni” an ti bawk. Hei hi tam takah a dik hle a ni. Hetiang thil tifiah turin, Hollywood pawhin hetiang lam hawi Film hi an siam nual a, a taka thilthleng pawh News-ah kan hmu a, kan chhiar fo a ni.

Mihring hi Pathian anpuia siam kan nih vang nge, thil kan tih-theih dan (ability) hi a mak-in a hlauhawm zawk hle a, kan rilru ngaihtuahna hian min thunun (control) hle bawk. Thil engemaw ti thei tura kan inngaih chuan kan ti thei tlang pui ţhin. May 3, 1999 (Monday) zan-a CNN News aţanga an thupuan hi a entirna ţha tak a ni awm e. Doctor-te ngaihdanah chuan, kum 60 chunglam leh Naupang tan Vansang aţanga Parachute-a zuanthlak chu a hlauhawm a, thih theih a ni, an tih avangin tumah-in an tichhin ngai lo. Mahse, mak tak maiin, Pitar kum 72 mi chuan, Vansang tak, Thlawhna (Boeng) aţangin Parachute-in a zuang thla a, him takin lei-ah a ţum thei ta mai a nih chu!!! Medical Doctor-te ngaihdan rawn ţhiat-in, khawvelah record thar a siam ta der mai a nih kha!

Rilru pawimawh zia ti chiang leh zual turin, Khawvela Hruizawh thiam ber (world greatest tight-rope walker) Charles Blondin-an a hnungah mi paw chunga Niagara Falls-a Hrui a zawh chanchin hi han sawi leh lawk ila. Niagara Falls, khawvela tui khawhthla sang ber leh ropui ber, Canada-a awmah khuan, June 30, 1958 khan, Charles Blondin chuan Niagara tuikhawh thla chungah hrui zawh a tum thu a lo puan lawk daih tawh chu a lo ti tak tak reng chu niin! https://en.wikipedia.org/wiki/Charles_Blondin

June 30, ni a lo thlen chuan, zing aţangin ral leh lam leh lamah chuan thlir tum mipui chu an khat hmuk tawh a. Niagara Falls chungah chuan a kam ve ve-ah thir-hrui khauh tawk ft. 1100–a sei chu an zam a. Charles Blondin chuan a tiang ft. 38-a sei, pound 100-a rit chu kengin, hrui chu a zawh ţan ta a. Thlirtu mipuite chuan ţawng pawh ţawng ngam lovin, thaw dep dep chungin an thlir thuap a. Blondin chuan fimkhur taka thir-hrui chu zawh-in ral leh lam chu a thleng ta mai a! Mipui hlim leh lawm au thawm chu a nasa hle. Tichuan, a inher a, awlsam zet chuan a zawh let leh a, ral leh lam chu a thleng leh ta mai a! Mipui lawm, kutbeng leh authawm chu a nasa lehzual sauh a.

Blondin chuan mipui hnenah chuan zawhna a siam a, “Ka hnungah mi paw chungin ka zawh let leh dawn a. Ka zawh kaipui thei ang em?” a ti a. Mipui chuan, “I zawh kaipui thei ang” an ti rual dual dual a. Blondin chuan, “A nih leh tunge inpe ngam che u, lo chhuak rawh u le?” a han tih chuan, mipui chu an ngawi ţhup a. Tumah an rawn penchhuak ngam lo. Blondin vek chuan, “Ka zawh kaipui theih in ring em?” tia a zawh leh chuan, Mipui chuan, “Ring e,” an ti rual leh dual dual bawk si! Mahse tumah an rawn inpe (volunteer) ngam si lo.

Blondin-a Manager Henry Colcord chuan, Blondin chu a rin êm avangin hlauhna chhete pawh nei hauh lovin a rawn inpe ta a. Bondin-a hnunga a pakai hnu chuan, Hrui chu an zawh ţan ta. A laihawl vel an thleng tih-ah chuan an hrui zawh chu a insawi ta chiam mai a! Mipui chu an chiaiin, an rak nasa hman hle a, chhiatna râpthlak tak thleng ngei turah an ngai hman tawh a ni. Mahse, Blondin chuan Henry hnenah chuan, thlamuang taka amaha innghat tlat turin a hrilh a. Henry pawh chuan Blondin sawi ang chiah chuan a rihna zawng zawng leh a taksa leh ngaihtuahna zawng zawng chu Blondin-ah chuan a nghat (focus) ta hmiah a. Tichuan, him takin ral leh lam chu an thleng thei ta a ni. Blondin-a hi eng ang pawhin thiam mah se, Henry hi zamchhe ta mai se… an tum ang hi chuan thil a thleng hauh lovang le! Chuvangin, Blondin-a hrui zawh chungchang hian rilru pawimawh zia leh thiltihtheih zia a tarlang chiang hle a ni.

Thian-ten An Phatsan, Chipui-ten An Do, Dik-lo-takin Thiamloh An Chantir
Lal Isua kha, a Rilru lama a Tuarna a nasat êm avangin a nunna pawhin a tlin rei loh phah a ni ngei ang tih hi thil chiang a ni. Amah zui tura a thlanbik-ten (Zirtirte) anmahni duhthlanna ngeiin Lal Isua an zui a. An rinawm zia tihlan nan pawh, “I thihna ah chuan ka thi ang a, midangin tlanchhiatsan vek che mahsela, kei chuan ka phatsan tawp lovang che” tiin an tiam ngat ngat a. Mahse, a sa-seh a lo thlen meuh chuan, thih ngamin an phat leh ta si!!! Hei chauh hi a ni hleinem, Hnamdang leh ramdang-mi Rom sipaite chuan Lal Isua hi beiin, do pawh nise, a nât dan a nep. Mahse, Lal Isua hi, amah ţan tura rin leh beisei, a Chipuite (Judate) ngeiin an phiarru a, dik lo taka hek-in, itsikna avanga inthurualin, ram dân leh Sakhaw dân zawng zawng bawhchhia a, kalh vekin a chungthu dik lo takin an rel a, dik lo takin thiamloh an chantir ta a ni!!!

A thian ţha ber ber-ten an phatsan a, a chipuiten an dova, chance pe miah lovin dik lo taka thiamloh chantir a la ni zui a nih chu!!? A va nâ dawn êm! Lal Isua hian a rilru lamah eng ang takin tuar nasa ang maw! Lal Isua chunga thil thleng kan sawi tak zinga pakhat chauh tal pawh khi kan chungah thleng ve ta sela, he Hringmi Rintlem, Phatsan ţhin, Hel reng thinlung leh ngaihtuahna hian a zo ang em le?

{A sei lutuk dawn avangin Hun remchangah rawn chhunzawm leh ka tum ang}