mi(sual).com

Kei hi zin nuam ti lo chi, zin huphurh chi ka ni nain loh theih lohna avang hian ka zin ka zin ve ta mai a. Misual.com lamah pawh Vaivawm chanchin a nih loh vek chuan ka zin chanchin hi ka ziah tam pawl tak ni awm e. Inkhel ngai miah lo hi  Vaivawm avangin sport writer ka ni ta ngawt a, zin tlem ber hian ka zin chhun chhun ka thlasik mau puah pui ve fo avang hian travel writer ka ni leh ta hrim a nih hi maw. Hei tun tum chu ka zin loh chanchin kan ziah daih teh ang.

Jerusalem atanga Nghawngkawl Area: Ka zin tumna hi ka pianna khua, Kanghmunah a ni a. Kanghmun tih hi khaw hnih a awm a, tuna ka sawi tur hi chu Reiek thlang Kanghmun zawk a ni a. Mizoram buai hma lam kha chuan Tlawng thlanga khaw lian ber a ni thin a. Khaw inlungrual tak an niin, khaw nuam tak a ni ve pawh a ni mahna ‘Tlawng thlang Jerusalem’ tiin an sawi thin ni awm e. Amaherawhchu, he Jerusalem-ah hian Middle Sikul dah tum a ni a, kha tih hun laia an Lal khan sikul sak te a hautakin hnatlang te thawh a ngai ang a tiin a duh lo ni awm e. Chutiang a duh lo na na na chu a ai khaw te zawk, Reiek ah Middle Sikul an din ta a. Kanghmun a mi te pawh chu Middle sikul sa chuan an va hnatlang thin ta tho a. Kohhran do leh sahriak do chu an ro tawlh tawlh an tih ang hian sikul duh lo pawh chu hmasawnna lamah an ro chho ta khawp a, khaw pawimawh tlawh kal kawnga ni lo bawka inkalpawhna a chhe hle a, nikhua a lo rei zel a, motor kawnga che bawk a niang Tlawng thlang Jerusalem chu Nghawngkawl Area-ah (nghawngkawl hmang a thil phurhna ram) tih a ni zui ta mai a.

Gabriela pawhin khal se ka chuang lo ang: Nghawngkawl area-a kawngpui an laih chanchin hi tlem han sawi lawk ila. Mizoram buai tam harsat lai khan tam tuar tanpuina atan Kanghmun kawng chu mipui an lai tir thin a. A kawng a chhengchhia in laih mai mai theih loh a tam khawp a ni awm a. Buai lai a nih avangin lung hal darhna gelatin te chu vana rah ang a nih avangin a kawng laih har deuh laiah chuan motor kal theihna turin thing te an kham kai ta ngawt a. An laih an laih nakah chuan Kanghmun chu a lo chhun tlang ve ta mai a. Eng tin tin emaw motor a lut ve ta hlawh mai a ni awm a. A kawng laihna enkawltupa ber pawh khan an kawng laih kha ropui a ti vak lo ni tur a ni a “Vantirhkoh Gabriela pawhin khalh sela ka chuang lo ang” a ti a ni awm e.  A chhiat zual lai kan hmu ve hman lo na in kan naupang laia Aizawl kan kal ve tum pawhin km 50 lek kha thimah kan lut chauh reng a ni.

A sawh gear te lek lek : Sawi tawh ang in kan khaw kawng hi a chhe thin khawp a. Kan hmuh ve phakah khan kawnga thing kham te chu awm tawh lo nain la che ve tak a ni. Comedian search lo chhuah hma a kawng chhia fiamthu a an sawi thin Reiek kawngchhia, kuhva pawh thial ngai lo, motor sawhah hian sawm vek an tih thin kawng kha kan khaw kawng a ni a. Khang hun lai kha chuan Buhfai phur Motor leh Inthlan laia lo duty tur a lo kal motor bawk kha chuan kan khua kha a rawn thleng ngai bar lo. Kan khua a motor a lo kal tawh kha chu reconditioned Jeep, tawng tawh lam kha a ni tlangpui a. An lo thlen hi chuan hnuai a handyman mut ngai chi, hma lam atanga her nun ngai motor lo kha chu a lo thleng ngai meuh lo. Driver-ah rau rau pawh a thin chhe deuh te, kawng sir dai huai ngam deuh te kha kan sawi ve laih laih thin. Tun hnu hian Motor lian pawh kal theih turin a lo tlang ve a. Vantirkoh Gabriela khalh lohah pawh chuang ngam an tam tawh ang.

India ram khawpui atangin Nghawngkawl Area-ah: He Tlawng thlang Jerusalem hi a par ka tlan chhung a rei lo hle mai a, mahse, lo chawr chhuahna na na na chu rilru hian a hre ve reng a. Thiamna sang umin vairampur lamah puanthuah telin kan liam ve hnu, Khawpui ung (Delhi) pawh ka khua ti thei tur khawpa ka tal hnuah pawh he nghawngkawl area hi ka ngai ve fo thin.

Kum 2003 Masi dawn khan Mizoram lamah ka haw lova. Khawpui ung-ah khawvawt kan tuar ngawt ngawt mai a. Ni chhuak hmuh tur awm loh avanga khua chang pawh nilo rilru pawh a hnim ruih laiin rinna mitthla in ka zuk zin tawh a. Duhthusam dawn in ‘sam ah sam a luat a awm love” an ti bawk a ka zin dawng avanga in siam velin tlai KTP fellowship te pawh kal lovin Vaivawm ka eng ngat a. Ka zuk zin chu ka thlenna kawmchhak nula te nen kan in kawma tuikhur ah te ka in su a. Masi thing phurhnaah te kal in fatuah te hial ka zuk tang vel a. Suangtuahna a ni na vang vangin nuam ka ti a, a hnuah pawh ka zinna chanchin chu ka chhiar ka chhiar thin a. Kum 2008 khan, hmanni lawka Pune Jail-a an khaihlum tak Ajmal Kasab a ten Mumbai an tlawh lai tak khan kei pawh Kanghmunah hian ka awm ve mek a. Taj Hotel vel an hal alh duai duai lai khan kei chu ram lamah ka feh san daih thung a…

Tlawng thlang Jerusalem titi ngaiin: Sawi tawh angin Tlawng thlang Jerusalem hi rilruah a awm fo va. Tunah pawh hian Khawpui ung atanga ka haw hnu hian zin ka tum leh fo thin a. Ka tum hmasak ber tum hian thihna avanga kal tum ka ni a. Mahse, mi dang ka kian ta zawk a. A vawihnihna ah phei chuan kan tum ruh zual a, ka pu leh ka pate a hova kal tum kan ni a. Mahse, a rem lo leh a. Kan zin loh mai ka hlauvin keimah ngeiin rawt phur in ka thiante pawh ka zuk hrilh lawk diam tawh a. Ka pu pawhin a unaute a lo sawm khawm bawk a. Mahse, hun te hi kan ta nih loh zia lantirna turin zin dawn tlaiah ka thulh leh a ngai ta si a ni.

Chuti taka zin chak leh zin tum ta chu zin chhan te pawh ka neih in lo ring mai thei a. Tlangval puanthuah khai lai ka nih avanga rangngo zawn tum pawh ka ni lo. An tuikhur te khu Delhi-a Fun and Food ai chuan a nuam dawn lo tih chu sawi ngai lovin hriat sa ni a. Ka thlenna tur in pawh Five Star–a ka thlenpui vaipa, khum dup a mu thiam lohna ai chuan a nuam dawn lo tih chu ka hre chiang. A kawng pawh Bereilley (Bareilley road trip ka ziah tawh kha) kawng ai in a lun hauh lo ang a. A chhim thler kawng ngil te pawh Delhi a Embassy awmkhawmna, Shanti Path vel ai in a ngil thui lova, a mam lo zawk tih chu ka hre reng a. Mahse, tapchhak zawl a, mei lum ai paha thingpui sen dawm chunga an khaw pa titi ngaihtlak ngawt pawh kha thil chakawm tak chu a va ni em.

Tlawng thlang Jerusalem hi khaw mak tak a ni ve reng reng a. He thu ka ziah lai hian ka pu (Ka pi Unuate) an lo leng a, an titi kan ngaithla mai mai a. An han sawi vel atangin mihring hming mak deuh deuha phuah pawh an lo thiam ngiang mai a. Mizoramah hetiang tak mihring hming phuah hrat leh maksak hi awm ve tak ang mawle…Ka pa in an tlangval laia a sawi zinga ka hriat reng chu, tum khat chu an khaw Uama Sial tur hi khaw dangin an lo kaih khalh hlauh mai a. An thinrim chu tlangval ho in hawrkhawm a, an Upa ten an khap dai hram hram a. “Ngawi teh u. Han kal suh u, lehkha na deuh takin kan thawn dawn nia” an ti a, an tlangval pakhat chuan “chu lehkha chu an chhiar anga, an tlu tawp dawn a mi” an ti mauh mai a. Pathian zarah kan dam ang a, an khaw pa tapchhak titi zawng ka ngaithla ngei turah ka ngai.

Similar Posts:

• Tawng upa a dik hlel ami ?
• Tlawng Khuah leh Rel kawng
• River Tlawng
• Mizo Lal ropui, Lallula Lungphun
• Aizawl khawpui – Zofate Jerusalem Tan

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Tuesday, November 27th, 2012 at 1:38 pm and is filed under Adventure, Travel. You can follow any responses to this entry through the RSS 2.0 feed. You can leave a response, or trackback from your own site.