mi(sual).com

Krismas alo hnai leh ta hle mai a, Mister-a thuziah kha han chhan ka duh viau laiin, hetia Post hrana chhan lawih law law hi ka thlang zawk deuh thin a(Ka style ani ve mai ang chu). a point te tein I han chip dawn ang hmiang.

1. Thuthlung hlui a Mosia hmanga ‘Dan’ a pek “Ha aiah ha, mit aiah mit” era atangin ‘Khawngaihna(Grace) Period min kai pui a, Jentail-te ni-ah min luhpui hi abik takin keini Jentail te phei hi chu Lawm tur kan ni tak meuh mai.

2. Setana leh a tirhkohte hi Thlarau taksa(Spiritual beings) annih tlat avangin, he mihring tisa pu thisen lum nei leh awlsam taka thi thei te hnenah hian, a ngial anganin an inlar hi a remchang lem lo.(Hei vang hi a nia, thupui tawpkhawk anih loh chuan, Ramhuai hmuh nazawng hi ka awih duh miah loh ni). Mihringte an rawn bia emaw, an pawl duh anih chuan, Tisa nei engemaw mihring emaw, ramsa emaw an hman a ngai a ni. Setana pawh khan, Rulpui a rawn hmang ani ve mai.

3. Pathianin, “TIH LOH TUR” Dan(Law) pelo sela chuan, SUAL pawh a awm lo tur hi a nia. Nimahsela, Pathianin mihringte kha TIH TUR (Purpose) neiin a siam a. Amah nena lengdun thin tur leh He khawvel leh a thilsiam dang zawng zawngte chunga thu neia, enkawl turin a siam a, Eden huanah khan a dah a ni. Tin, TIH LOH TUR Dan 1 a pe tel bawk a, chu a dan siam an bawhchhiat avang khan, Sual an lo ti ta a, Pathian thu aia Setana thu awih zawk na kha, SUAL chu a ni. Tin, Chhia leh tha hriatna thei ei kha, thil sual ani tih an hria a, Evi pawhin rul hnenah a sawi kha.

4. Tunlaiah ngei pawh hian, Setanan min thlemin, ‘Setana thlem ka ni’ tih kan inhre ngai kher lem lo. Hetiang ISUA BIRTHDAY Post siam a, Isua Pathian fapa sawichhiatna thil Post tur pawh hian Setanan a thlem thlu che tih I inhre kher em ni?

5. Eden huana Adama leh Evi thih nghal lohna kha, Pathian Khawngaihna(Grace) lo lan tanna ani reng a ni. Tin, Mihring ten Nunna kan neihna, Nunna hnar Pathian nena an inzawmna chat, Thlarau thihna kha THIHNA hlauhawm zawk, Lal Isua ngei pawhin HLAU tura min zirtir zawk chu a ni.

Tin, Adamate kha, thi tura siam anni lova, bawhchhiatna avang khan an thi ta chauh zawk a ni. Kum 930 chhung zet a dam a, Pathian ngaih chuan, ni 1 hi kum 1000 tluk ani thei a, kum 1000 pawh hi ni 1 ang chauh a ni bawk.

6. Setana thlemna tuar theia min siam hi min hrem a tumna hmanrua nilovin, a HMANGAIHNA ropui leh mak chung chuang lutuk, a fapa Isua Krista kan tuar ai tuar tira a lantirna tur a ni zawk e.

7. Setana Phuara a awm leh, Chatuan Meidila paih la nih hma hi chuan, hringfate hian kan la tuar zel rih dawn.

8. Isua Krista hian Mihringten thlemna kan tawh theih ang chi zawng zawng hi a tawk vek tih bible-in min hrilh a, a hautak em em zia pawh a hria. Thlalera Setanan a thlem te, Gethsemani huana a tawngtai dan te kan hria e. Nimahsela, Sualah erawh a tlu ve lo mai chauh a ni.

Tleirawl thisen lum lai te hnena a zirtir chu, “Mit 2 neia Gehena-a kal ai chuan, mit khing khat chauh neia Vanrama luh a tha zawk…kut 2 neia Gehena(Chatuan meipuia) kal ai chuan, kut 1 chauh nei chunga Vanrama luh a tha zawk” tih a ni tiap mai.

9. Pathian hian, a thianghlimna leh Dikna kalh khawpin a hmangaihna leh Ngaihdamna hi a pawtfan ngai lo tlat. Pathian dik (Just God) ani tlat a. Ama thupek kalha chet ai chuan, amahin a hremna tuar mai pawh a thlang zawk.

10. Thuthlung hlui hunah kha chuan, Mihringte(a bikin a hnam thlan Israel fate) kha Pathian thianghlimin Mihringte min phut(Criteria) ang chiahin a teh(Judge) a, an bawhchhiat chuan, hrem nghal tur anni mai a ni. Mahse Khawngaihna hlimthla(shadow of Grace) chu lo langin, a fapa Isua Krista thianghlim famkim aiawh turin Beram no sawisel bo chu an sual thawi nan, an sual aiawha tawrh tirin, Puithiam ten Pathian hnenah an hlan thin a, Pa Pathian chuan, a fapa Isua aiawha ngaiin an sualte a lo ngaidam thin a ni.

Thuthlung thar hunah erawh chuan, a hlimthla mai kha ni tawh lovin,amah tak tak Isua Krista chu a Pathianna hlip thlain, mihring rethei ber leh tlawm ber anga Hmeichhe thianghlim lak atanga lo piangin a lo sei lian a, vawi tam tak maichama inhlan nawn ngai tawh lovin, Kalvari tlang Maichamah chuan vawikhat inhlanah a lo tlak fel ta a, “A KIN TA”(It is finished) tiin HNEHNA HLADO a lo chham ta a ni.

Tin, “Thuthlung hlui hunah ‘HREMHMUN’ sawina a awm lo” tih hi in sawi leh thin a, bible zir chian loh vang mai mai a ni e. Thuthlung thara hremhmun sawina ho kha Thuthlung hlui hun ami atanga lakchhuah annih thin bakah, Deuteronomy 32:22 te, Daniala 7:10- te bakah Juda ho lehkhabu dang Rosh Hashanah 16-17 te, Baba Mezia 58 te, Misnah Eduyath 2:10 te, Judith 16:17 te leh Solomona Sam 3:13 ah te pawh chiang takin hmuh theihin a awm.
Pathian fapa mal Isua Kristain, a Pathianna hlip thla a, mihring rethei ber leh tlawm ber anga Hmeichhe thianghlim lak atanga lo piang a, lo sei lian a, vawi tam tak maichama inhlan nawn ngai tawh lovin, Kalvari tlang Maichamah chuan vawikhat inhlanah a lo tlak fel a, “A KIN TA”(It is finished) tiin HNEHNA HLADO a lo chham na tura a lo pianna Krismas, Pathian leh Mihringte inkara inzawmna chat tawh Suihzawm lehna leh, Chatuan nunna Kraun hlu Eden huana kan hloh tawh min rawn pek let leh na tura Van Lal fapa he leia mihringte anga alo pianna hi LAWM TUR KAN NI E.

Similar Posts:

• Tunlai ka mutmawh hnarmawh.
• Simna
• Setana hi a awm tak tak em?
• Halleluiah! A Tho Leh Ta!
• PEACE CHILD(Inremna Nau lo piang chu) – {Krismas }

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Friday, November 30th, 2012 at 9:39 pm and is filed under Christmas, Religion. You can follow any responses to this entry through the RSS 2.0 feed. You can leave a response, or trackback from your own site.