PEACE CHILD(Inremna Nau lo piang chu) – {Krismas }

December 28th, 2013 4:50 pm by PKfanai

Kum zabi sawmhnihna chhunga Missionary ropui ber mai pakhat chu Canada mi Don Richardson hi ani awm e. Kum 1935 ah lo piangin Kum 1965 khan Indonesia a Western New Guinea ah a nupui Carol Richardson leh an naute thla 7 mi lek nen, Lu la hnam leh Hringei nia an sawi thin, hnam mawl em em leh kawlhsen em em mai, ‘Sawi’ ho an han luhchilh a ni.

An zinga an han chen tirh atang rengin harsatna tam tak an tawk a, vawi tam tak thah an tum a, thi lo aruangin an chhuak hram hram thin a ni. Theih ang tawkin ‘Sawi’ ho tawng te an han zir nghal a, an tawng lah chu a lo har kher mai lehnghal a. Amaherawhchu, an tumin an bei ngawrh bawk a, an thiam ve ta mai a. Carol chuan damlo enkawl lam a lo buaipui ve nasa a, Sawi ho pawhin an pawm ve sawt em em a ni.

Tichuan le, tumkhat chu Don Richardson-a chuan hun remchang a hmu fuh ta a, In pakhat khat tlata ‘Sawi’ ho thukhawm chu an tawng ngei mai chuan, Lal Isua chanchin chu thahnemngai takin a han hrilh ta a. Isua hun tawp lam a han sawi lai chuan an phun ta mur mur mai a, a thusawi chu a tla tha hle niah ngaiin, eng vanga phun ta mur mur nge annih a han zawh nak chuan, an hotupa chuan, “Chutianga a Zirtirte zing ami mai maiin tangka sawmthuma a hralh theih Isua chu kan ngaisang ve lo, Mahni Zirtirtu pawh hralh thei khawpa fing Juda Iskariota chu kan ngaisang daih zawk” an ti ta mai a, Missionary tan chuan a beidawn thlakin a mangan thlak hle awm e.

Chutia a ngaihna a hriat vak loh lai chuan, an hnam chin dan pakhat mak danglam tak chuan beiseina a rawn pe thar leh ta a, chu chu hei hi a ni:-
‘Sawi’ ho hi Khawvela Tribal hnam dang ang bawkin Khawtin kha Lal hrang neiin an awm a, an in halin an indo reng mai thin a. In run tawn reng leh phuba inla tawn reng thin annih avang chuan, anmahni pawh chuan hrehawm an tiin an nun a ralmuang lova, ralti takin an nung a ni. Chutia Lei do an neih chuan, Inrem dan kawng khat an nei a; chu chu, ‘Inremna Naupang(Peace Child) inthleng’ a ni. Naupang an inthleng dawn ni chuan, a khaw nawtin an thawk chhuak a, an in ep tuar mai thin a. Khua pahnihte chuan, an khua atang chuan, naupang an thlang chhuak ve ve a, chung naupangte chu an Pate ve ve chuan an rawn hruai/pawm a, an inthleng ta thin a ni. (Tin, a chang chuan inthleng lovin Mi pawi sawitu khan, a hmelmate inah a fapa ava pawm lut a, a va pe thin bawk)Chu chu Inremna saui an tan ve dan a nia, chutia naupang an inthleng(in pek) tawh chuan, Indo a thiang tawh thin lova, an inhuatna leh an inhmelmakna zawng zawngte chu a lo tawp thin a ni.

Don Richardsona’n Chu thil a han hmuh chuan, a rilru a khawih ta em em mai a, Chung khaw pahnih indo reng mai ten naupang an inthleng avanga an inkara Inremna a lo awm ta ang chiah khan, Pathian leh Mihringte inkara inhmelmakna rawn titawpa, Inremna rawn siam leh nan, Pathianin a fapa mal neih chhun Isua Krista chu ‘Peace Child(Inremna naupang)’ atan a rawn pe a, Chu Pathian fapa mihringte anga rawn pianga, Mihringte tuar ai tuartu avang chuan, Pathianin min ngaidam a, min huatna zawng zawng a reh a, Inremna neiin, Inrem takin kan lo awm leh thei ta a ni” tia a han sawi chuan, Sawi ho chuan an hrethiam ta em em mai a, Kristianah an rawn inpe ta ruih ruih mai a, Kum 1972 phei kha chuan, Khawvela Thingtum tlawn(Thing zai loh) hmanga sak, Biakin bial pup mai, Khawvela lian ber an lo nei thei ta hial a ni.

Ani taka, Setana bumna avanga Mihring hmasa ten Pathian thu ringhlela, Setana thu an lo awih zawk a, an lo zawm tak zawk avanga Pathian anchhia kan chunga lo tla ta leh, Pathian thianghlim nena kan inzawmna pawh tih chaha lo awm a, Hmelma kan lo nih lai ngei khan, Pathian chuan Mihringte min hmangaih em em mai si a, Amah nena kan lo inzawm leh theih nan, Nun kan lo neih leh theih nan, Setana lak atanga min lei let leh nan, Kan hremna tuar ai chu a fapa neih chhun, a hmangaih em em Isua Krista chu He leia rawn tirin, Mihring nausen angin Nula Thianghlim Mari lak atangin a lo piantir a, Fapa pekin kan lo awm ta a ni. Isua Krista chu Pathian nena Inremna kan lo neih leh theihna tur atanga ‘Peace Child(Inremna nau)’ Pathianin min pek chu a ni. Hlim takin I lawm ang u.
“Kan tan naupang a lo piang a, fapa pekin kan awm ta…A hmingah chuan…’Remna Lal’ an la ti dawn si a” (Isaia 9:6)
“Lei chunga a lawm em em mihringte hnenah rem thu leng rawh se” (Luka 2:14).

Similar Posts:

Recent Posts:

11 Responses to “PEACE CHILD(Inremna Nau lo piang chu) – {Krismas }”

  1. 1
    virginia Says:

    pu don-a chu ngaihsan awm ve.gud post.

    Report this comment

  2. 2
    Dr John Says:

    (Y) Gud post. He Story hi Theological College-a kan Zirtirna-ah hian kan sawi nasa asin aw. Khawvela Thil-thleng ngei Entirna sawi tur leh Tehkhin tur tha deuh mai Pathianin min lo pe hi a lawmawm tak zet zet e.

    Report this comment

  3. 3
    PKfanai Says:

    Dr.John hian sawi belh tur a hre teuh tak ang chu. A chhuak tlai ta deuh hlek a, a relevant lo lek lek hman a lawm le. Sunday pual ah ring nghal tawh mai ang. :)

    Report this comment

  4. 4
    chhana Says:

    Bengvarthlak e. Nia, Sawi ho sawi ang deuh khian Iskariot a chu ngaihsan tak mai pawh thil awm tak a nih ve tho chu mawle.

    Report this comment

  5. 5
    caribou Says:

    Misual.com member 90% in min kal bo san tawh na a, ka la awm reng a ni tih lan nan comment hmangin ka sulhnu ka’n hnutchhiah ve leh hrim hrim ang e.

    Report this comment

  6. 6
    Vladimir Putin Says:

    Mizo ho anga thawka phita Kristiana inlet thut an ang. An video (Never The Same) ka en a, hei hi ka impression ani.

    Report this comment

  7. 7
    Hotunu_pasal Says:

    Ka ngawi rei tawh viau mai. A naihnawmin rilru a khawih kher mai. Krismas sermon ropui tak ani e.

    Report this comment

  8. 8
    hltau Says:

    a tha khop mai. Ka passwd hi ka kutin ahria a, ka thluak chu hrelo.Ka kut hian a theihnghilh reng a, mahse he sermon hi atha ngang a niang, ka khap fuh leh tlat mai.

    Report this comment

  9. 9
    PKfanai Says:

    Vladimir Putin, Ka hmuh dan ve mai mai chuan, Mizote zinga Kristianna hralh a tlak em em chhante nia ka hriat chu:- 1. Kan Zawlnei hmasa Darphawka mumang vang. 2. Kan Pi leh Pu ten an hlauh em em Ramhuai hlau miah lo Missionary te kha an ngaisang a, Ramhuai hlauh miah loh theihna zirtirna kha an lo lawm hle. 3. An ngaihsan em em leh anmahni hneh taka awptu Sap Bawrhsapte pawhin an zah leh an ngaihsan Kan Zosap hmasate, Pu Buanga, Sap Upa, Pu Zosaphluia, Zosapthara leh Dr.Fraser-a te ho kha ngaihsan loh rual anni lova, an mingaihsan em em te zirtirna chu zawm a awl. 4. Changkanna Ki pui ‘Education’ an rawn keng tel. 5. Zosap Missionary te khan Sawrkar chakna an hmang thiam. etc.

    Report this comment

  10. 10
    Borat Says:

    Kum Thar chibai vek ule. Peace Child pawh chu ka va pawm ve chak ve.

    Report this comment

  11. 11
    PKfanai Says:

    Misual.commer zawng zawng te, Kum Thar Chibai vek u. Post erawh a chhuak khat hle mai. :(

    Report this comment

Leave a Reply

You must be logged in to post a comment.