November 2012, Mi(zo)ram Diary

December 11th, 2012 1:36 pm by chhana

1st. Thursday: India Today-in state tinte dinhmun zirchianna a neihah, Mizoram chu investment-a titha berah a puang a, he lawman hi India Today Chief Ministers Conclave vawi 10-na, Hyatt Regency, New Delhi-a neihah sem niin, Chief Minister Lal Thanhawla’n a dawng. Lawmman semnaah hian CM Lal Thanhawla chuan, hmasawnna leh sorkar felfai nei thei turin vawi tam tak conference te, seminar-te leh debate-te neih thin a nih thu sawiin, chuti chung chuan hmarchhak state-ah a taka hmasawnna hmuh tur a tam lo hle niin a sawi.

2nd. Friday: September 27th. Thursday a tan tak LPS Comedian Search 2012 chu zawh fel a ni taa; Lalnunsanga, Ramhlun North chu fiamthu thiam bera thlan a ni. Top 5-a parukte chuan final 2nd leg khelin minute 5 theuh fiamthu an inthawhsiak a; nikum lama an lo tih tawh angin elocution a awm bawk a; 1st leg intihsiakna leg intihsiakna bakah SMS vote an hmuhte chu belhkhawmin, Lalnunsanga, North, Aizawl chu pakhatna atana thlan a ni a, Lalduhawma, Aizawl Dinthar Veng chu pahnihna niin A. Lalhlimmawia, Thingkah chu pathumna a ni.

3rd. Saturday: Ruantlang ram, Mualkawi hnuai, Saitawngkawn rama Leipui nei, an leipui a riahchilha meihawl rawha riak, Pi Zorampari w/o Ruatliana leh a fa kum 5 leh kum 2 mite chu thlama an awm laiin khawipuiin a bei. Pu Ruatliana hian a nupui Pi Zorampari kum 30 mi leh an fate pahnih, Zonunmawii kum 5 leh an fapa Lalhmingliana kum 2 mi te chu a meihawl rawh thlithlai turin thlam ah a kalsan a, Thlama a nupui leh fate awm lai chuan khawipuiin an rawn bei ta thut mai a. Nu ber, Zorampari chuan a fate chhan nan khuai chu lo bei let a, a fate chu a kuah khawm a, a fate taksa chu a theih ang tawkin a hliahkhuh a ni. Nimahse heti chung pawh hian khuai hian amah mai bakah a fate pahnih hi an zuk rawn ta vak mai. Zorampari hi a lu leh nghawng bakah a taksa hmun tam takah khuai hian a seh a, a lu leh hmai, nghawng velah te a zuk nasa hle. Pu Ruatliana meihawl rawh en haw chuan an thlama a nupui fanaute na tuar leh tanpui ngai, biak hlei theih tawh loh a an lo awm a hmuh chuan Mualkawi khuaah rang taka kalin tanpuitu a han pun a, Mualkawi khawtlang chuan Ruatliana nupui fanaute hi kawngpui ah zawn chhuak in Med-Aim Damdawi In an panpui nghal a ni. Zorampari hi khuai hian a zuk nasat avangin Oxygen te nen tangkawpa enkawl a ni a, a hria a piangin a fate nun chhan nana a inpekna hi ngaihsan awm an tih thu an sawi.

4th. Sunday: Adventist Youth Federation, Aizawl West chu AR Lammuala bawlhhlawhte thianfaiin an hnatlang a; mi 40 vel an thawk chhuak. Lammuala hman turin bawlhhlawh bawm paruk MFA hnenah an pe nghal bawk.

5th. Monday: Vaphai khaw ram, Saikhumphai bâwka inte chu thiah tan anni ta. He khua Saikhumphai khua hi hetianga tih a nih chhan chu kum 1987 khan leilet nei chhungkaw 4 velin Bawk siamin an luah tan a. Helai hmunah hian Myanmar lam mite hna-thawka chhawr niin an pung ve zel a, tun hi lo a lo thleng ta a ni. Helai hmunah hian tarlan tak ang khian ramdang mitten awmhmun an khuarna hmun a nia; hei chauh pawh hi enghelh tham a nih lain an thalai mi thenkhatin drugs hmanga sumdawn an chin avang leh thil dangah pawh a thalo zawnga che thin engemawzat an awm vang nia hriat a ni. Kum 2007 September thla atang khan Saikhumphai bawk-a awm te hian Chamhai DLAO-ah Sub-Village an dil a, heta tang hian Vaphai chuan an awpna thin chu titawpin, a rang lama bawk chu thiat turin sorkar an nawr tan a ni. Tum engemawzat an nawr hnuin tun hi a lo thleng ta a ni. JAC chuan an ram chhunga khaw hran din an remtih loh thu te, foreigners awmkhawmna khua an duh loh thu te, sorkar laka hel leh Myanmar sipaite silai nena an chet theihna khua an duh loh thu te, ruihhlo leh ralthuam tawlhrutute him taka an awm theihna khua an duh loh thu te, ran hrisel lo laluttu leh nungcha tichereutu, thing leh mau suasamtu khua, an ram chhunga awm an remtih loh thu te an sawi a ni. Saikhumphai bawkah hian In 59 awmin mihring 326 an awm a. Mipa 174 leh hmeichhia 152 an ni. An zinga 99 te chu kum 2011 electoral roll-ah khan an hming a chuang a ni. He bawk-a mihring cheng 97.96% te hian ziak leh chhiar an thiam a, job card nei chhungkaw 29 an awm bawk. He bawk-ah hian Govt. Primary school, Middle School leh ICDS Anganwadi Centre pakhat theuh a awm.In thiahna châkte chu sorkarin Vaphaiah a phurhsak dawn a; in thiahsakte chenna tur pawh vote nei tawh annih chuan Vaphaiah ruahman niin, Vaphai V/C-in in hmun an pekah in an sa dawn a ni. Hetih lai hian vote neilo/khua leh tui nihna neilo te erawh chu Burma ram lamah thawn an ni thung ang. Tuna Saikhumphaia cheng chhungkaw 63 zinga 23 chu ram dang mi ni a ngaih anni. Mizorama cheng hlunte hi chhungkaw 41 anni a; Vaphaia an in benbel nan cheng nuai 17/- vel ruahman niin chhungkaw pakhat hian Rs. 50, 000/- heuh bakah in chung tur rangva bundle 4 zel pek tur a ni.

6th. Tuesday: MZP chuan 8th. Thursday thleng awh tur East Lungdar-ah Assembly 2012 an hmang tan a, thupui atan ‘Zirlaite leh hnam inpumkhatna’ tih an hmang.

7th. Wednesday: H.Lalfamkima s/o Darhmingthanga [L] Sihphir, tuna Parva II a evangelist thawk lai leh Vanlaldamchhani d/o Vanlalsanga, Thingkah te chu Thingkah Presbyterian Kohhran Biak Inah Lawngtlai bialtu pastor Rev.Lalrinfela Pachuau kutah an innei. Anni hi Thingkah Presbyterian Kohhran Biak In 1996 a a din atanga Kohhran dan thianghlima innei hmasa ber annih avangin mipuiin an hlut hle.

8th. Thursday: Differently Ables Society of Mizoram (DASM) chuan Persons with Disability (PWD) Commissioner atana ruat thar, B Sairengpuii duh lohna lantir nan Chaltlanga PWD Commissioner office kawtah an pung¬khawm a; an Commissioner atana B Sairengpuii ruat a nihna chu sût turin sorkar an ngen. B.Sairengpuii an duhloh chhan hrang hrang an sawite chu:

1, An Commis¬sioner tur hian rualbanlote enkawlna leh chhawmdawlna kawnga thiamna nei lo dah an duh loh thu an puanchhuah tawh thu leh, an duh loh chhan hrang hrangte chu ziakin Chief Minister, DP&AR Minister, Social Welfare Minister leh Chief Secretary hnenah an thehluh tawh thu an sawi a; chungte chu sorkarin a bengkhawn lo a, Commissioner atan an mi duhsak zawng hlawh tam tak neiin Commissioner tur an dah ta niin an sawi a ni.

2, B Sairengpuii chu mimalin an haw lo tih an sawi rualin, DASM chuan, “Commissioner tur hian a tlin lohna tam tak kan lo hmu tawh. Kum eng emaw zat Social Welfare Secretary a nih anga PWD Asst. Commissioner hna a kawp chhungin rualbanlote tan hma¬sawnna leh hamthatna a thlen lo. Chuvangin, kan thatna tur a thlen kan ring lo,” an ti a; DASM-in hmuh an tum chángin, vawi tam tak an hlawhchham thin niin an sawi bawk.

3, DASM chuan, PWD (Equal opportunities, protection of rights and full participation) Act 2005-ah chuan, Commissioner tur chu rualbanlote chhawm¬dawlna kawnga a hran¬paa thiamna leh hriatna nei emaw, a taka lo tuar tawh emaw an ni tur a ni, tih a nih thu an tarlang.

4, Commissioner chuan judicial function a keng tel dawn a, Code of Civil Procedure, 1908-in Court-a thuneihna a pek ang nei tura tih a ni a; IPC Section 193 leh 228 te, Cr.PC Chapter XXVI leh Section 195-te nen a inkaihhnawih bawk.

Hengte avang hian, PWD Commissioner tur chu ministerial service mi ni loin, administrative service-a mi, experience nei tawk tak ni ngei se an duh thu leh, Asst. Commissioner atan rualbanlote chhawmdawlna kawnga thiamna leh tawnhriat lo nei tawh ni ngei se an duh thu an sawi.
DASM huaihawta nilenga punkhawmnaah hian taksaa rualbanlohna nei mi eng emaw zat an pungkhawm a, DASM President leh mi dang eng emaw zatin thu an sawi. Commissioner office chu an office a nih angin, khâr rih an duh a, chhun dar 12 velah an khârin, an kalh nghal a ni.

9th. Friday: Home Minister Pu R.Lalzirliana chuan Regency Hotel Conference Hall-ah Chief Minister Pu Lal Thanhawla chanchin ziahna biography ‘Lal Thanhawla’ tih, David M Thangliana ziah chu a tlangzarh. Lehkhabu ziaktu Davi M Thanglian chuan Pu Lal Thanhawla chanchin hi ziak tura kum 2010 atanga a inbuatsaih tan thu a sawi a. Pu Hawla nena khunkhan taka inkawmna hun vawi thum chiah an neih thu te, Mizoram leh politics lam chanchin te leh tuldang tam tak hriat ngaite a hriat theihna tura lehkhabu rawn, bibliography 20 vel a neih thu te a sawilang a. Hemi bakah mi hrang hrang engemawzah leh Pu Hawla unaute bakah a nupui Pi Rii te a kawm thu a sawi bawk. He lehkhabua tihsual lian tak awm chu an inneih thla January anga a ziah chu February thla zawk niin, ni 24, 1969 tih zawk tur a ni. Hei hian lehkhabu hi a rawn duh turte hnual ang tih erawh a hlauhawm hle. Lehkhabu hming chawitu Pu Lal Thanhawla chuan tun hmaa a chanchin ziak duh leh ziah tum an awm tawh thin thu sawilangin, Pu James Dokhuma te, Delhi lam mite leh Pu Chawngkunga leh Pu C.Zothansanga te hmalakna te chu a phurpui loh avanga puitling ta lo an nih thu a sawi a. Pu Davida hi chu a tumruhna avang leh luhlul chhuah a a nawr sek vanga lo puitlin ta a ni a ti a. Hetia a chanchin lehkhabu meuha siama alo puitling ta chu, Pu Davida hriat duh zawng zawngte kha lo hrilh vek ta ila tiin, tlangzarh ani ta hian ngaihtuah let tur tam tak a awm thu a sawi a. ‘Ziak leh tur nise ka hrilh teuh tawh ang’ Pu Hawla chuan a ti bawk. ‘Lal Thanhawla’ hi phek 190 a chhah niin, thlalak 40 vel dah tel a ni a. Bu khat hi Rs. 100/- zela lei theih a ni.

10th. Saturday: Lalawmpuia (15) s/o Thanthuami Chhangte, Hnahthial Bazar Veng chu Mat lui-ah a tla hlum a; a hnu rei vak lo-ah a ruang hmuh a ni. Thu dawn danin, Lalawmpuia hi a thiante pasarih nen Mat lui kamah thingtuah la turin an kal a, thing an lâk hmain Mat luiah an cheng a ; an zinga pakhat, Hmangaihzuali (13) chu tuiah a tla a, chhan tumin mi dang pasarihte chuana an bei a, an chhanchhuak thei a ni. Hmangaihzuali chhan tura tuia lut mi dangte’n vaukama an hleuh kai laiin, Lalawmpuia chu a hleuh kai ve zo ta lo a, tuiin a la ta a ni.

11th. Sunday: Zotlang pa Pu Edenthara (44) chu a thianpa Lalrinchhunga (48) Luangmual Vengthlang chuan a vit hlum. A thianpa vithlumtu Rinchhunga hi Chaltlang Transport office-a thawk a ni a, Edenthara pawh hi Zohanco Driver a ni. Edenthar leh Rinchhunga te hi Luangmual Chhangurkawn atanga Zotlang panchhohna step bul lawk, Zotlang huam chhunga Pu Ramfangzauva inah an leng a, an ti ti dun a, inleng dang 4 vel an awm bawk a, in neitu ber Pu Ramvangzauva hi bazar lam kal in a rawn thlenga a thu fel hman chiah tihin Rinchhunga hian a thianpa Edenthara hi a vit ta thut mai a ni. Rinchhunga leh Edenthara te hian an office canteen-ah pawisa i ba rei tiin an in hnial a, mindang awm ve te chuan an inhnial fiam mai mai emaw tiin an ngaihsak lem lova, TV an en san a, chutia ngaih thatlohna pawh an neih lem loh lai chuan Rinchhunga hian hnung lam atanga kuahin chawhmehchanna chemtein Edenthara hrawkah hian thuk takin a vit ta thut mai a ni. A vih nat em avangin a vih atanga reilo teah a chatthla zui ta mai nghe nghe. Edenthara vittu Rinchhunga hi inchhunga lo awm ve mipa dang te chuan kuah betin kut te pawh an thlak hman nual a, chuta tang chuan talchhuakin Vaivakawn Police Station-ah a in pe nghal a ni . Pu Edenthara hian nupui a nei tawh lova, fa 4 a nei a, a fa u ber hmeichhia chu pawl 10 zirlai a ni. Chhuangkaw chawmtu leh enkawltu ber a ni sia; a pawi tak zet a ni.

12th. Monday: Lungleia BSF sipaite leh Vairengte police-te chuan Mizorama tawlh luh tur damdawi, Amlesun Plus (Levo citerazine) mûm 31,12,000 Vairengte police checkgate-ah an man. BSF leh police-te hian an thudawn bawhzuiin, Vairengte police checkgate-ah an lo châng a, Assam lam atanga lo chho 407 truck, cement phur atangin Amlesun Plus an man a, damdawi neitu nia hriat Vanlalchama s/o Thansanga (L), Cham¬phai Bethel Veng nia insawi an man nghal bawk.

13th. Tuesday: Lairam Isua Krista Baptist Kohhran (LIKBK) a tualchhung Kohhran hrang hrangte chuan LIKBK Assembly rel angin Lai rama Chanchin Tha thlen kum za na an lawm a; centenary thupui chu ‘A thlawnin in hmu a; a thlawnin in pe chhuak tur a ni,’ tih a ni.

14th. Wednesday: World Health Organisation-in November 14 chu World Diabetes Day-a a puan angin, Mizoram Diabetic Society huaihawtin I&PR Conference Hall-ah World Diabetes Day hman a ni a, Rajya Sabha MP, Lalhmingliana’n a hmanpui. Inkhawmah hian Medicine specialist, Dr Zoramthanga’n zunthlum natna chungchang leh a kaihhnawihte a sawi a; zawhna leh chhanna hun hman a nih bakah, chawhnu lamah free clinic buatsaih a ni.

15th. Thursday: Aizawl atanga chhuak ni tin chanchinbu, The Aizawl Post chuan kum 10 tlinna (Tin Jubilee), Synod Conference Centre-ah an lawm a; Minister H Liansailova’n a hmanpui. The Aizawl Post hi October 30, 2002-a din a niin editor chu C Lalrambuatsaiha a ni.

16th. Friday: MJA Gen. Hqrs. leh I&PR department huaihawtin Zirtawpni khan Aizawl Press Club-ah National Press Day hman a ni. Former Legislators’ Association of Mizoram (FLAM) President, KL Rochama’n kumina National Press Day thupui, ‘Freedom of the Press towards Communal Harmony’ tih a sawi. National Press Day hmanna inkhawm hi I&PR Dy. Director, Lalsiama Fambawl-in a kaihruai a, chanchinbumite leh I&PR officer eng emaw zat an tel a, MJA President, C Lalrambuatsaiha’n inlawmna thu a sawi. National Press Day thupui, ‘Freedom of the Press towards Communal Harmony’ tih hi sawiho zui nghal a ni a, mi eng emaw zatin Mizo leh hnam dang inkara thil thleng a awm chánga hnam ang zawnga thu lak vung vak a that lohzia leh hnam hrang hrangte inkara inngeihna a awm a tulzia an sawi a ni.

17th. Saturday: Mizo band hlawhtling Boomerang chu Vietnam-a Hanoi khawpuiah an zai. Hanoi-ah (he hun) hian India mite festival ropui ber Diwali Night INCHAM (Indian Chamber of Commerce in Vietnam) buatsaiha neih a ni. Boomerang hi 2005 kuma indin kha an nia; An vocalist chu Lianmawia (Atea) a ni. Rolling Stone Magezine chuan kum 2009 khan Top 10 Indian artistes-ah an lo thlang chhuak tawh a; An music hi blues leh hip-hop chawhpawlh deuh, nu-metal-te nena chawimawi a ni a; anni chuan ‘Junk Rock’ tiin an sawi thin. India ram mai bakah ram pawnah ngei pawh hnuhma an lo nei nual tawh a; NDTV, TV 9 leh Headlines Today-ten an lo tilang tawh a; MTV leh Arirang lamah pawh an mikhual lo hle.

18th. Sunday: 17th. Saturday atanga Salem Boarding School a tan tak Retreat leh Praise & Worship chu a tiak ta a; he hun hi Synod Choir-ten an hmanpui a, Synod Choir Director Pu Vanlalhruaia leh T. Upa Lalhruaizela, CKTP Committee Member ten an tawiawm.

19th. Monday: LPS in a buatsaih Youth Icon 2012 chu neih tan a ni ta. Ruahman ang chuan 17th. December khian Grand Finale neih a ni ang. Elemination round hi Zarkawt Recreation Center-ah neih a ni anga; ni ruk chhung neih a nih hnuah top 50-te an thlang anga; chung ho chuan Ignite Studio, Khatlaah intihsiak an bei leh dawn a ni. Kumin hian tel tuma form thehlut hi mi 680 an nia; heng zinga 431-te chu mipa niin hmeichhia 249 an awm bawk. Pakhatna hian Rs 100,000/-, pahnihna Rs 50,000/- leh pathum nain Rs 30,000/- an dawng anga; top ten-a tling ten Rs 5,000/- theuh an dawng bawk dawn a ni.

20th. Tuesday: Vanapa hall-ah All India Cooperative Week vawi 59-na leh International Year of Cooperatives 2012 lawmna inkhawm hman a ni a, Home Minister, R Lalzirliana leh Cooperation Minister JH Rothuama ten an hmanpui. R Lalzirliana chuan, UNO-in co-operative chu khawvel huapa mipui inhlawmkhawmna lian leh tangkai berte zinga mi a nih hriain, UNO General Assembly, December 8, 2009-a resolution angin, kum 2012 chu International Cooperative Year atan a puan tih a sawi a, “An chhinchhiah dan pawh ‘Cooperative chuan retheihna ûmbo kawngah te, hnathawh tur siam kawngahte leh mipui vantlang inpumkhatna kawngahte a thawh hlawk hle’ tih a ni,” a ti. Minister-te hian All India Cooperative Week leh International Year of Cooperative lawmna puala Souvenir buatsaih te, Cooperative Movement in Mizoram tih te, Handbook of Farming Cooperative Society tih te, Handbook of Consumer Cooperative Society tih te, Handbook of Pig Producer Cooperative Society tih te, Handbook of Primary Multi-Commodity Producer Cooperative Society tih te, Handbook of Handloom Cooperative Society leh Sericulture Cooperative Society tihte an tlangzarh nghal. He hun hi District hrang hrangahte pawh hman a ni.

21st. Wednesday: Mizoram University (MZU) chuan an campus-a Multipurpose Hall-ah Convocation vawi 8-na an hmang a, National Disaster Management Authority (NDMA) member, Prof. Harsh K Gupta chu khuallian a ni. MZU Convocation-ah hian degree course, master degree, M.Phil leh Ph.D zo mi eng emaw zat hnenah certificate hlan a ni. MZU Convocation hi Vice Chancellor, Prof. R Lalthantluanga’n a kaihruai a; Convocation-a tel thei zirlai – degree course zo 154, master degree zo mi 229, M.Phil zo mi 16 leh doctor of philosophy zo mi 17 hnenah degree certificate hlan a ni a; Convocation-ah hian zirlai 2,200 kal lo an awm. Subject hrang hranga ti tha ber mi 25 hnenah Gold Medal hlan nghal a ni. Mizoram University hi kum 2000-a ding tan a ni a; tunah hian school pariat leh department 30 a awm mek a ni.

22nd. Thursday: Kolasib district-a infiamna chi hrang hranga titha zual infiammi 17 hnenah Minister, PC Zoram Sangliana’n Sports Incen¬tive Cash Award a hlan. Incentive Cash Award semna inkhawm hi AMFU Hall-ah neih a ni a, PC Zoram Sangliana chuan, “Tun hmain Sports Minister ka lo ni tawh a, khatih laia kan suangtuahna kha tunah a takah a chang ta a ni. Sports Minister Zodintluanga hoin thalaite rualawhna phuhru turin nasa taka tan lak a ni a, tunah chuan artificial turf pawh hmun eng emaw zatah phah a lo ni ta,” a ti. Incentive Cash Award dawngtute hi Kolasib district-a sport discipline chi hrang paruka titha mi 17 an ni a; nimina pawisa sem zawng zawng chu Rs. 1,11,000/- a ni. Incentive Cash Award hi kum 2001 atangin sorkarin a sem a, mi 2,269 hnenah pek tawh a ni.

23rd. Friday: Australia atanga rawn kal, New Life Ministries chuan ni thum awh tur nau pâi thei lote leh nau pâi lama harsatna neite tan tawngtaina hun Archives Hall, Babutlangah an hmang tan. New Life Ministries team-te rawngbawlnain a tum ber pakhat chu, nau pai thei lo leh nau pai kawnga harsatna neite tana Pathian thu anga fa an hrin theihna tura tawngtai a ni a, an tawngtaina avangin mi eng emaw zatin nau an pài nghe nghe. New Life Ministries team hian an rawngbawlna chu internet hmangin an kalpui bawk a; an website, https://newlifeministries.org.au/ ah a tlawh theih a ni.

24th. Saturday: Cheng nuai 353.5/- sênga Bukpuia power sub-station bun thar chu hawn a ni a; bialtu MLA, Hmingdailova Khiangte in a hmanpui. Bukpuia power sub-station hi March 2008-ah bun tan a ni a; Bukpui, Lungmuat, North Chaltlang, Thingthelh leh North Hlimen ten an chhawr thei dawn a ni.

25th. Sunday: Mi tu tih hriat loh panga, silai kengte’n Tuipuibari II-a Rajivnagar Vengah Mizoram khawthlang lama teak lei khawmtu vai pathum an hruaibo (kidnap) a; a rubotute hi National Liberation Front of Tripura (NLFT) mite nia hriat an ni a, Mizoram Police-te’n an chhui zui mek.Teak leitu an mante hi Tuipuibari II-a Viveka Nanda Chakma in luaha khawsa an ni a; Sahan Rai (52) leh Govinda (45), Tripura lam mi ve ve leh, Sankar Dev Nath (35) Karimganj-te an ni. An in luaha a rubotute an luh lai hian mi panga an awm a, mahse pahnih chu khum hnuaiah an bihrûk hman avangin mi pathum an hruai bo ta niin an sawi. A rubotute hian commando uniform ang kawr tial an hâ a, AK-47 rifle an keng vek a; Debarman tawng an hmang a, an mi mante chu Tripura lamah an kalpui nia hriat a ni. Helho hian an mi rûkbote atangin phût an neih leh neih loh hriat a la ni lo.Mamit Addl. SP leh 4th IR Bn. Luangpawla mite leh West Phaileng O/C ten an ûm zui nghal.

26th. Monday: Education Minister, Lalsawta chuan J Thankima College Women’s Hostel, Durtlanga mi leh Mizoram Hindi Training College (MHTC) Women’s Hostel, Durtlang North-a mi a hawng. J Thankima College Women’s Hostel hi University Grants Commission (UGC) pawisa hmanga sak niin, a sakna atana ruahman cheng nuai 40/- atangin nuai 36.3/- hman tawh a ni. Mizoram Hindi Training College Women’s Hostel sak nan hian Rs. 7,21,71,199/- ruahman a ni bawk.

27th. Tuesday: Zamuang khua chuan kuhva kutpui an hmang a; Parliamentary Secrectary KS Thanga’n a hmanpui. Zamuang khua hi in 250 awmna a ni a; heng zinga a tam zawkte hian kuhva hmun neiin kuhva kung 5,19,601 lai a ding thuau mai a ni. Kutah hian kum 2011 chhunga Zamuang khuaa kuhva atanga Rs 1,00,000/- chin lalut chhungkaw 47 hnenah chawimawina an hlan.

28th. Wednesday: Aizawl Civil Hospital-a department thenkhatte Referral Hospital, Falkawna sawn tan a ni a, Referral Hospital atana hman mek, Administrative building-a damlo awm mekte chu damdawi-in tak tak tur, main building-ah sawn luh an ni. Referral Hospital hi a hming pangngai (official name) tur chu State Referral Hospital tih a ni a; department panga – Medicine, Paediatric, Gyneacology, ENT leh Surgery-te chu sawn hmasak tura tih a ni.

29th. Thursday: Central leh State Sorkar Department Media Unit hrang hrangte intelkhawmna, Inter-Media Publicity Co-Ordination Committee (IMPCC) chu PIB Media Centre-ah an thukhawm.Meeting-ah hian Department hrang hrang – Doordarshan, All India Radio, Agriculture, Social Welfare, Nehru Yuva Kendra Sangathan (NYKS), Press Information Bureau, Mizoram Khadi & Village Industries Board (KVIB), Forest, Directorate of Field Publicity leh Health Department te an tel a, November thla IMPCC thupui “Naupangte nun kawng dik kawhhmuh” tih chungchanga mipuite hnena inzirtirna Department hrang hrangten an neih dan thlirlet. Meeting hi an Chairman, Doordarshan News leh PIB hotu ni bawk, Pu Mangjangam Touthang-in a kaihruai a, December thla thupui atan “Vanduai zawkte ngaih pawimawh” (Sensibility on the under privileged” tih an thlang nghal.

30th. Friday:Vanapa Hall-ah Praise 2012 neih a nia; he hunah hian Mizo band hlawhtling ber ber heng: Scavenger Project, Magdalene, X Strings,Andrue, Freddyleh TBC-a te an zai a ni. He hun hi KTP Saron Veng Branch-ten Krismass behbawma gospel hla hmang mite huikhawm an tumna hmanrua a ni.