Panlai Nun – U-a-ma Urlawkin

December 19th, 2012 11:26 am by Dr Mahminga Sailo

Pathianni tlai
Pathianni tlai inkhawma kohhran ziaktu’n, krismas ruai atana vawk phurh hlawh turin Pu Kima-te chhungkuain an buh phur turin kohhran min sawm a. Naktukah, a-pui-a-nawiin kohhran member-te tlang buh phura thawhchhuah tur a ni e a’n tih takah chuan, inkhawm ban kan nghakhlel nghal em em a. Kan bang ta maw tihah, thian te nen a tuka buh phurhnaa kal dan tur sawi hovin, sawi tur inchuhin kan ri nawk nawk thin. A va’n nuam thin tak.

Thawhtanni
Thlasik khaw vawt vur chuan kan phurna a tikhingbai reng reng lova. Buhphurh hahthlak tak chu phur takin kan pan zawk a nih thin kha. Khai le, nula leh tlangval, nunau leh buh phur thei tawh ek ek kha chu awl tum reng an awm lo. Tlangval phur fal deuhin kohhran khuang khaiin, hlim taka lamin khuang a’n vua a. A thenin chang an tum rawih rawih bawk. Ngai teh, a hnunglamah kohhran dar an vaw ri bawk. Khawchhung a reh ruih a, feh kawng erawh a reh mawlh lo.

Tlang buh phurh chu
Tichuan thlam chu kan thleng ta. Thlam chhunga buhzem lo vum thur mai, nikhat maia kohhranin kan phurh zawh mai tur chu chhungkaw bila phurh tur ni se a huphurhawm ngawt teh ang chu. Mahse, kohhran tawnah zawng a tam lem lo. Chutichuan naupang chumchiap leh chhangchhe ho phur rut tanin, a thatawl te tein kan phur ta thliai thliai a. Haw lam pawh kal lam ang thoin thawm a reh ngai meuh lo.

Pa thenkhat fiamthu duh deuh te lah, a hmingin em an phur a, buh erawh an phur rit ngai lem lo. Midangte chawkhlim turin em phur ut chunga lamin, nuihza siama fiamthu thawhin an hmanhlel bawk a. Khua atanga lo a hlat deuh kum chuan, hmun remchang laiah bunlawk neiin saiip emaw silpoulin lian tak phahin kan chhung khawm a. Tan a’n nat tak tak chinah chuan kal lam leh hawlam kan insulpel nuai nuai thin.

Phur thut leh bansan
Naupang na na na chu, kan phur chhung a rei lo deuh. Mahni zawh tawk theuh phura vawi hnih khat kan han vei meuh chuan bunlawkna hmunah kan inhawrkhawm a. Thingkung lawnna remchang awm apiangah kan lawn a. Ei leh in tur awm apiang thahnemngai leh insumkarna awm map lovin kan eiin kan in thin. Mi ina len changa uite rim in nam min titu be rte pawh, thlan tla phunga buh an phurh tlat avangin inthlahrunna tur lah awm hek lo.

Naupang harh deuh thenkhatin, an buhphurh kawnglai taka an han tibaw zuih mai te kha aw, a neitu tan chuan a uiawm dawn teh reng nen, a neitu te ber lah in lamah thingpui lumin an buai bawk si.

Tlangval tam ber chuan, an nula chhawm te ngei chu inti-tatu takin an tanpui tlangpui a. Buh phurin hah hle mah se, an hmaa kal avangin hah hmel an pu ngai lo va. Keini naupang lahin, kan veng nula hmeltha deuh chhawmtu tlangval erawh, kan hmuh hmaih ngai lova, kan lo ngaisang ru ve em em thin.

Mizote leh hnatlang
A huhoa hnathawh nuam ti leh, intihhlim hrat tak Mizo te nunah hian hnatlang emaw inlawm emaw hian hmun a luah thuk hle. Chhungkaw bilin, nitina thlakhat aia rei mah buh kan phurh ngai thin kha, kohhran duhsaka, mi inpe chhungkua erawhin, phur hah miah lovin nikhatah an buh chu kohhranin kan phurh thlen sak vek a. Kohhran tan lah nikhata buhphurh avanga vawk talh tur hlawhchhuah theih kha chu, remchang tak a ni bawk nen. Phur takin mitin te’n buh kan phur thin.

Englekhawle, Sikni engmawi a lo en a, vanthiang pawl ruih mai te leh zanthiang vawt raih kara khua han chuan chang hian, nunhlui ngaiin suihlung a leng lo thei lo a nih hi maw.

14 Responses to “Panlai Nun – U-a-ma Urlawkin”

1
Dr John Says:
December 19th, 2012 at 11:35 am
First e
Report this comment
2
bbney Says:
December 19th, 2012 at 12:34 pm
Ngaihnawm e, thingtlangpa lung a tileng pha tlat mau.

Buh tak hi chu kan phur hman lo a, mahse tumkhat chu tuirini ah serthlum phurin kan inhlawh tawh. Keini kha chu a thlawna min pek tawp aia a hminga an serthlum phurhsak kha kan ni deuh a, bawng kan hlawh hehe…
Report this comment
3
kawlhawk Says:
December 19th, 2012 at 2:38 pm
chhiar hmain kawmen… a pawstu atang hian ngaihnawm leh ang chu aw…
Report this comment
4
Dr Mahminga Sailo Says:
December 19th, 2012 at 2:54 pm
@ bbney… A mak khawp mai, tlang buh phurh ni te kha chuan, hah kan hre hman lo a ni awm e. Tin, kan tihthan vang pawh a ni mai thei, hnathawk hahin chau deuh mah ila, daihlima reilote han chawlh mai kha a tawk viau thin..

@ kawlhawk… ka phu lo..
Report this comment
5
chhana Says:
December 19th, 2012 at 3:45 pm
Lung i leng mang e.
Report this comment
6
Chemtatrawta Says:
December 19th, 2012 at 4:18 pm
Nghawngkawl nei tha leh tha lo kar kha a hla thin asin. Nghawngkawl tliang hlarh tawh nen hi chuan rit viau mahse, taksa a tang khawm a, a tih theih phian thin.

Thlasik khaw vawt vin tuk maia, pheikhawk bun tur mumal pawh nei lova, silipar chhe ve tak, pen 10 vel pen apianga a hrui dawk ziah mai, tlan paha chil hnawm mawlh mawlh chunga siam tha chunga kan han infiamte kha, lung a tileng thin mange. Krismas ruai tura vawk an talh kan kil ho thap a, a phing kan inchuh a, vut nen kan vaw fan a, laipawp kuang ngei maiin kan han hampuar a, savun hampuar dik tak kan han pet kang lawng lawng te pawh rilruah a rawn thar uai uai mai.
Report this comment
7
Chhuaklinga Says:
December 19th, 2012 at 4:39 pm
A ngaihnawm hle mai, a nawm hmel bawk. Nuam ka tihzawng tak tur a ni.
Phai lo kan neih thin avangin thingtlang lovah hian ka feh tlem khawp mai. Ka vawi khat thingtlang buh chhawpnaah tin thum min ruh sak a, a zang awm emai ka ti khang lang a (phai buh kan chhawp chuan thingtlang buh aiin a zang zawk bawk a tin ruk te kan pu thin, a hmun a zawlin chhawpna a hla ngai lo bawk nen) tin li min ruh sak a, kawng lah chu a chho nasa mai si a, kezungpui bih ngar mai a km thum zet mai kan han kal chu(h) . Kha tiang khawpa ka chauh kha ka la hre lo. Theihnghilh mai chu a har tawh ang
tren tren
Report this comment
8
Dr Mahminga Sailo Says:
December 19th, 2012 at 4:48 pm
@ Chemtatrawta… Silipar hrui dawk khi a ni teh tak e ti raw. Pathianni zingah kan silfaia, inkhawmna’n kan bun leh mai bawk a, a hahdamthlak thin ngawt a sin.. Kephah leh kuthphah chat khichat nat theihzia kha.. Khatiang hunlai tak khan, vaivut khawih/chen a nuam em em bawk si..

@ Chhuaklinga… Buh tin 4 (tel tin) phur zo kha chu khawkhat pa chak an ni thin tak a sin. Tin thum phur thei an awm nual thung a.

Tuikuk hian ritphurh chu an chak, nge an fei ve hrim hrim pawh ka hre lo. Pawl riat kan nih kum khan leileta kan buh phur turin tuikuk hlawhfa kan chhawr a. Nghawngkawl nen meuha tin 2 leh a chanve ka phurh laiin, tuikuk nula tleirawl khan, saiipa tawnkhawm vaiza hruiin ka phurh ang tho kha an phur zo nia. Em phurh leh sawiip phurh chu dan dang tak a nia..
Report this comment
9
sheldon Says:
December 19th, 2012 at 8:00 pm
A ngaihnawm in lung a tileng thin Kan lung hi a tileng viau thin tak na a a practical a let leh tur ni ila kan hreh viau tawh lawng maw?
Report this comment
10
bbney Says:
December 19th, 2012 at 9:18 pm
Krismas bawng thlah te, hnah lak te kha… lung a leng hle mai
Report this comment
11
mr.Duhlova Says:
December 19th, 2012 at 10:12 pm
6
Chemtatrawta # Silipar hlui-hlai chi te pawh a awm ngei kha le….
Report this comment
12
Dr Mahminga Sailo Says:
December 20th, 2012 at 9:06 am
@ sheldon… A dik khawp mai. Chutih rualin, keimah bikah chuan ka chak khawp a sin. Theih na se’ng chuan, thil dang chu eng pawh ni se, ka nu (fam) khawsakpui leh theih hi ka thlahlel khawp mai. Chutih rualin, vanram beiseitu ka ni erawh vannei ka inti..

@ bbney.. Dik chiah, ziah tur a tam, lunglen tithartu hlir an ni maiin ka hria…

mr. Duhlova… Silipar chhuat la tha si, a hruiin a peihpui tawh si loh, a hrui thar kan han lei a, kephah a’n hreng mar pawng thin te kha, zo-pa kephah hlai a tichiang thin teh a sin..
Report this comment
13
Awmtea Leo Khiangte Says:
December 20th, 2012 at 9:50 am
Chhiar dawn ang
Report this comment
14
mama Says:
December 20th, 2012 at 10:55 am
U ama i lo fak ang…
Report this comment