mi(sual).com

Thu Kamkeuna
Matthai 2:1-29-a kan hmuh angin, Lal Heroda khan Isua tihhlum a tum avangin Bethlehem leh a chheh vela nausen a thah-tir vak a, kha kha kan dem nasa êm êm a, kan ti dik chiah em aw? Thil rêng rêng hi side khat chauh aţanga thlir hi chuan a dik mawh a, thudik dik tak pawh a hriat theih loh. Hei vang hian, Secular Court-ah pawh, lehlam lehlam thusawi uluk taka an ngaihthlak hnuah Judgment an siam chauh ţhin a ni. Lal Heroda kha interview neihpui ta ila, a sawi dan a dang viau-in ka ring. Heroda khan a tih tur dik tak a ti a. Dem chi a ni lo. A tirtu duhdan leh a tirtu-in tih tur a pek ang chiahin a ti a, a ti dik chiah a ni.

1. Thil Engkim Hian Tum An Nei Vek
Thufingin, “Everything has a purpose” a lo tih angin, ‘engkim hian tum a nei vek’ a, chhan neia awm leh chhan neia thleng vek an ni. Lal Isua phei chuan, “Chawngzawng pakhat pawh a chhan awm lovin leiah a tla lova… in samzai-te nen lam pawh chhiar vek a ni” a ti (Mat.10:29, Lk. 12:7).  Mi tam tak chu kan fellohna te, kan dinhmun ţha lo tak-te aţanga harhchhuak turin vanduaina te, chhiatna te leh thihna te hial kan tawh phawt a ngai ţhin. Malsawmna-in a kaihthawh zawh tawh loh te chu Chhiatna hmangin Pathianin a kaitho ta ţhin a, chhiatna hian mihring nun-ah thu a lo sawi ring zawk nge nge ţhin bawk.

Mahse, chhiatna hriatthiam phak loh (series of unfortunate events) tawn sek erawhchu kan hrethiam vek seng lova, kan hrethiam vek lo hrim hrim. Mahse, ‘everything has a purpose’ tho hi kan nun-a Pathian thiltum chu a ni.

2. Pathianin Ringlomi-te A Hmang Ţhin!
Pathianin Lal Isua ringlote hi hmanruaah a hmang ngai lo emaw i lo ti ngawt ang e. Ringlote, misualte, thil ţha lo (nâtna, chhiatna, thihna etc.) te thlengin Pathian siam tho an ni a, Pathianin hmanrua atan a hmang ţhin. Pathian thilththeihnaa a innghah lehzual theih nan Tirhkoh Paula hnenah pawh khan ‘nâtna tihdam theih loh’ pek a ni a.

Mithianghlim Joba kha a sual vang ni lovin, Pathianin a rintawk êm avangin a duh tawka a khawih turin Pathianin Setana kutah a pe phal. Pathian remtihnaa thilthleng a nih avangin Pathianin a tawk chin a hria a, a tihchhiat tur a hria a, a tihdam dân tur pawh a hria. Pathian aw ngaichang thiam a, Thlarau Thianghlim hruaina zui ţhin chuan Pathian hnathawh dân te, remruat dân te, a nun atana Pathian thiltum te a hrechhuak ngei ngei ţhin. Pathianin ringlo te, misual-te, thil ţha lo te pawh hmanruaa a hman zia tichiang turin, Assuria leh Balylon te pawh Pathianin “ka talh tum, ka tiang” a lo ti nghe nghe a nih kha (Isaia 10:5, 19:25, Ezra 6:22).

3. Setana Hmanrua Heroda!
Lal Heroda kha Setana’n hmanruaah a hmang tlat a. Chuvangin, a thiltih kha Setana thlirna aţang chuan pakhat mah a tisual lo. A tirtu Setana ngaihdanah chuan, Heroda khan a tih tur dik tak a ti a ni. A neitu leh a tirtu, a pu Setana thu thu a ni a, a thuhnuaia awm a ni a, a neitu leh a tirtu Setana thu-in thil a ti a, a tisual lo. Chubakah, Pathianin Setana kha a duh anga chet a phalsak tlat! Joba chunga thilthleng pawh kha Pathian remtihna chauhvin a thleng a, Setana khan Pathian permission kaltlang chauhvin Joba kha a khawih theih chauh a ni (Joba 1:6-22, 2:1-13).

Potiphara nupuiin a thlêm theih loh hnu a, dawta a puh a, Jail-ah hial Josefa a tan te, a unaute khan an pianpui nau ngawih ngawih Josefa kha khawngaihna tel hauh lova tihhlum an tum mai te, an huat êm êm te kha Pathianin a phal tlat! Tirhkoh Paula pawh, Rawngbawlnaa harsatna tawk khawpa nâtna-in a tihbuai kha Pathianin a phal tlat. Setana duhzawng tituten Pathian mite laka an duh an mak a an chet hi Pathianin a phal. Mahse, hei hi Pathian mite tan an tawpna emaw, a final emaw a ni lo. Chuvangin, Lal Heroda pawh kha tunah hian interview neihpui ta ila, a sawi tur chu a chiang nghal, “Ka pu, ka Boss Setana hmanrua ka ni a, amah Setana’n min tih tir vek a lawm” a ti ang.

4. Engahnge Pathianin A Phal Le?
Ringtuten misual-te, tiduhdahtute kaltlanga harsatna kan tawrh Pathianin a phalna chhan hi “chhan pawimawh tak” a awm. A chang chuan ringtute hi kan awm nuam lutuk a, rawngbawlna lam te kan ngaihsak tawk lova, Thlarau lam thil kan hlamchhiah a, kan thlarau nun a lo chak loh phah ţhin. Hei hi Pathianin a hrechiang êm êm a. Kan awmna bu zawlnuam tak te min tihchhiat sak a, nâtna, hârsatna, chhiatna leh vanduaina te hmangin min ti-harh a, min kaitho ţhin a ni. Kan awmna bu zawl nuam tak (comfort zone) chhuahsan a, Lalpa tana mi ţangkai kan nih theih nan Pathianin hârsatna leh buaina leh lungngaihna te hmangin min chawk harh ţhin a, min kaitho ţhin a ni.

Tirhkohte pawh khan, Jerusalem-a thlamuang taka rawngbawl a, anmahni ngaisângtu ringtute hnena ei tur leh in tur sem kha nuam an ti êm êm a, kal chhuak a, Chanchin ţha hril tura Thupek kha an theihnghilh hial. Chuvangin, Stephan aţanga ţanin, Jerusalem aţanga hnawhchhuah a, tih-darh hial an lo ngai ta a nih kha (Tirh. 2:42-47, 6:1-7, 11:19). Ringtute hi hmantlak kan lo nih lehzual theih nan, Setana hmanrua kaltlanga khawih harh kan ngai ţhin. Hei hi Davida chuan a hrechiang tawh khawp a, “I thuruatte ka zir theih nan, tihhrehawma ka lo awm kha ka tan a ţha a ni” a lo ti nghe nghe a nih kha (Sam 119:71).

Tlangkawmna
Heroda ang a, Ringlotute leh misualten Lal Isua ringtute an tihduhdah a, an tihhlum hial te hi Pathianin a phal a. Mahse, Pathian a ngawi dawn lo. A hre reng a, a hunte-ah thilsualtitute hi a thungrul ţhin a, a thungrul zel bawk ang. Setana thu awih a, a duhzawng titute hian an thiltih man hi an la hmu ang, a kim biai-in an la hmu dawn a ni. Israel faten rangkachak sebawng no lem an biak laia Mosia’n rawt dip a, a in fai-tir kel ang khan, misualte leh Pathian pawi khawihtute hian an thiltih sual man chu a kim biai-in an la hmu ang a, hremna chu an la in fai kel ang (Ex.32:19-34).

Tunah, i mit-hmuh lai ngeiah chhiatna an chungah thleng lo mah sela, anmahni luchunga meiling chhekkhawm an ni a, hremna ni atan Pathianin hrem chungin a khek mêk a ni (Rom 12:20, 2Pet.2:9-10, 3:7). Kan Pathian hian heng mite thungrulh dân leh hrem dân hi a hre ber a, a hre khawp mai (cf. 2Pet.2:10). He khawvela an damchhung la la pawh hian mite hmuh-theih turin a hrem mêk a, a thungrul ţhin a, a thungrul mêk a ni. Sawi duh ta ila, sawi tur a tam mai. Chuvangin, Setana hmanruaah inphal suh ang che. I thusawi leh thiltih-in thiam a chan tir ang che a, I thiltih vekin thiamloh a chan tir ang che (Mat.12:37, Gal.6:10). Mitin kan thiltih ang zela rorelsak kan la ni dawn a ni (Heb.9:27, Thup.20:12-13).

Similar Posts:

• Joba Malsawmna Thuah-thum {Sunday Pual}
• Aigupta Ramah Tlânbo Rawh {Sunday Pual}
• Zawi Te-in Ka Kal Dem Dem Tawh Ang
• Tihtakzeta Lal Isua Chibai Bûktu – Mifingte {Sunday Pual}
• Pathian hian mihringte hi a hmangaih tak tak em? PART-I

Recent Posts:

• MNF LEH CHAKMA POLITICS; TU NGE A KAIKUANG CHHUI A NGAI E !!!
• Android Games
• Sehrep thenfai dan awlsam
• American flag thui hmasaber tu chu tunge?
• mi(sual).com hi!

This entry was posted on Sunday, December 23rd, 2012 at 5:34 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.