Thuhmahruai
Matthaia 2:1-23 chhungah hian ringtu nun ţhanlenna atana thil pawimawh tam tak a inphum ţeuhva. A haichhuak thiam leh a hmang ţangkai thiam apiang an vannei dawn niin alang. Vawiin chu Vantirhkoh kaltlanga Pathian thupek, “Tho la, naute leh a nu hruai la, Aigupta ramah tlânbo rawh. Ka hrilh leh hma loh che zawng chutah chuan awm reng ang che. Herodan naute tiboral turin a zawng dawn a ni” tih thu hi Krismas Ni Ropui lo thleng tur inbuatsaih nan kan zirho dawn a ni.
Pathian Thutiamah Hian Thilchhia Pawh a Tel
Ringtu tam tak chuan, Pathian thutiamah hian malsawmna leh thil ţha chauh a tel niin an ngai ţhin. Chuvangin, an nunah harsatna te, lungngaihna te, hlawhchhamna te, vanduaina te, tuarna te, tihduhdahna te a lo thlenin pawm harsa an ti a, an tuar thei ţhin lova, an rinna te a chak loh phah a, thlarau lamah an hnungtawlh ţhin a ni. Joba khan Setana îtsikna avanga tuarna nasa tak a paltlang lai khan, a nupui ţawng nâ leh sa tak chu hetiang hian a chhemdai a, “Pathian hnen aţangin thil ţha kan hmu a, thil ţha lo pawh kan hmu lovang emni?” (Joba 2:10) tiin.
Lal Isua pawhin, amah zuitute malsawmna dawn tur zingah hian “tihduhdahna” a tel thu a sawi a, “Tupawh, keimah avang leh Chanchin ţha avanga in emaw, unaupa te emaw, farnu te emaw, nu emaw, pa emaw, fate emaw, ram te emaw kalsan tawh phawt chu, tun damchhung la la hian, In te, unaupa te, farnu te, nu te, fa te, ram te, a leh za-in, tihdudahna-te nen hmu lo tur tumah an awm lo, hun lo la thleng tura chatuana nunna nen,” (Marka 10:28-30) tiin. Chuvangin, Tirhkohte Thu ken leh Kohhran-te an fuihna ber pawh “Hrehawm tam tak tuarin vanramah kan lut tur a ni reng a ni” (Tirh.14:22) tih a ni nghe nghe a nih kha. Hei hi a pawimawhna chhan Tirhkoh Paulan a rawn sawifiah a, “Kan hrehawmnaah pawh i lawm ang u. Hrehawmna chuan chhelna a siam a, chhelna chuan hriatfiahna a siam a, hriatfiahna chuan beiseina a siam a” (Rom 5:3-4) tiin.
Tirhkoh Paula sawitum hi a chiang tawk hle. Harsatna te, manganna leh thil ţha lo kan tawn aţangte hian Pathian nihna hi a fiah lehzual a, ringtu (mihring) pawh engang mi nge a nih a chiangin a fiah lehzual ţhin bawk a ni. Chuvangin, harsatna leh tuarna-te hi ‘rangkachak fiahna mei’ angin a ngaih theih a. Pathianin rinna kawngah leh thlarau lama kan ţhatna tura min thawhsakna vek a nih thu Paula’n Rom 8:28 ah “an ţhatna turin engkimin a thawhsak hlawm thin” tiin a lo sawi diam tawh bawk a ni. “Engkim” a tih-ah hian thil ţha leh ţha lo a huam tel vek tih a chiang.
Hemi avang hian, Tirhkoh Petera phei chuan, “Miin Pathian hriatna avangin tuar loh tur tuarin lungngaihna a tuar hrâm hrâm chuan, chu chu Pathian lawmzawng a ni” (1 Pet. 2:19) a ti hial a. “Tuar loh tur tuar” tih hi, dawta sual tinrenga hêkna avanga hmingchhiatna te, mualphona te bakah, thihna hial a kawk a (cf. Mat.5:10-12). Ringtute tan chuan engkim tuar huam a ngai tih a tichiang hle. Chuvangin, Dr. William Carey chuan, “Attempt great things for God and Expect great things from God” a lo ti nghe nghe a nih kha.
Mari leh Josefa khan Pathian thu an awih avangin, an chunga thil ţha leh thil ţha lo lo thleng tur zawng zawng kha i-he lovin an pawm hmiah hmiah a, Pathian thupek awih-in an che-chhuak nghal zel bawk a, malsawmna an dawnna chhan pawimawh tak a ni ta bawk a ni. Pathianin a zan zana chhuak tura a tih khan Josefa phunnawi thu kan hre lova, Mari’n Pathian thutiam ringhlel a, Pathian laka a âng thawm pawh kan hre bawk lo.
Pathianin Ama Ringtu Hmanruaah a Hmang Duh Tlat!
Lal Heroda’n nausen Isua tihhlum a tum lai khan, a duh phawt chuan kan Pathian thiltithei tak hian Heroda leh a sipaite kha chawp-leh-chilhin a tihlum phiar thei! Anih loh paw’n, Isua awmna lai hmu thei lo turin an mit-te pawh a tihdel sak thei bawk. Khing thilmak te khi ti ta pawh nise a dik lohna a awm lovang. Pathianin a duh phawt chuan thil mak ropui leh rapthlak tak hmangin nausen Isua leh Mari leh Josefa-te kha a venghim (protect) thei êm êm a ni. Mahse, Pathianin thil mak a ti tlat lo!! Pathian thiltihtheihna a che chhuak thei lo tlat!!
Mari leh Josefa’n nausen Isua chu anmahni mihring theihna leh chakna hmanga Aigupta rama an tlanbo-pui a ngai ta tlat!! Hei hian Pathianin ama ringtute a rintawk zia leh harsatna tuarte ţanpui turin mahni ngeia paltlang tawh-te an pawimawhzia min zirtir a ni. Lal Isua kawng zawh, “Mihring anga lo piangin, bawih angah a insiam a, amah leh amah a intitlawm ta zawk a, mihring anga awmin a in ngaitlawm a, thi khawp hiala thuzawmin a lo awm ta a, Kros-a thihna ngei chu” (Phil.2:5-11) a tih ang khan, Pathian hian ringtute hi ‘mahni ngeia kan rah chin leh thlen chin rama cheng a, amah Pathian hi hre-fiah turin min duh a ni’ (cf. Joshua 1:3, 9, etc.).
Chuvangin, Pathian hi a hmutu (experienced)-te’n an hmu-fiahin an hre-fiah ber ţhin a, Fakna Hla-in, “Nang hmutu (experienced)-ten an lawm zia hi thu-in an sawi thei lo” a lo tih kha a dik zia a chiang tulh tulh ţhin a ni. Joba pawhin, “Benga hriatna mai zawngin ka lo hre tawh che a, tunah chuan ka hmu ta che…” (Joba 42:5) a tih kha. Helai Joba’n “Hmu” a tih hi “mahni dinhmun dik tak leh Pathian nihna dik tak, tisa leh thlarauva hmuh/hriat chianna” sawina a ni. Pathianin Joshua hnenah, “In kephaha in rah (chin) apiang chu ka pe vek ang che u (i ram a ni zel ang)” (1:3) a tih ang khan, Pathianin ama ringtute hi kan nun ngeiin thil a tawn (experience) a, amah Pathian kan hriatchian a, thlarau lam nun thûk leh ril kan dai a, tisa leh thlarauva sual kan do zel hi min duhsak a ni.
A Thunawn Sak Nawn Sek A Ngai
Pathianin hmantlak tak tak tura ama ringtu a chher-chhuah dawn hian, a lo hmantlak a, a lo thianghlim lehzual theih nan harsatna leh fiahna (tests & trials) vawi tam tak a kaltlang tir ţhin. Khawvela thilhlu ber pawl Rangkachak chu a nihna dik tak phawk-chhuak tur chuan, Meia vawi 1 rawhtui kha a tawk mai lova, vawi tam tak rawh-nawn a ngai ţhin a ni.
Mi ţhenkhat chuan, Pathian pawh hi a ti lutuk êm êm hian an hria a. Hemi avang hian khawvel mite pawhin rin harsa an tih phah hial niin an sawi. Pathian fapa, Lei leh van Lal, Khawvel Chhandamtu meuh leia mihringa tlawm taka a lo piang kha tawk ti mai lovin, a pian hlim aţangin tlanbo-pui a ngai a. An Tlanbo-puina hmanrua lah, khawvela Ran azawnga hmelchhe ber pawl, tlanchak thei lo an la hmang zui a. A nu Mari nau nei zo hlim, chak lo êm êm leh Josefa engmah la hrefiah tak tak lo, mahse thuawih em em ringawt chunga Pathian thiltih hi chu a dem duh tan chuan a demawm viau, a Thunawn an sa zing lulai êm bawk a ni! (cf. Mat.2:13-14, 19-23).
Mahse, Chungnungbera remruatnaah chuan Mari leh Josefa’n harsatna an tawng-nawn mawlh mawlh ang khan, Pathian rinawm leh thiltitheia Thutiam, Humhimna leh Enkawlna (God’s promises, protection & providential care) Duhawm tak-te hi ringtuten a pawimawh-zia kan hriat a, a tak ngeia kan tawn kha Pathianin min duhsak tlat avangin ringtu nunah harsatna leh tuarna kan tawng-nawn awn awn ţhin a ni. Tichuan, Setana leh a pawlten ringtute min beih rengna hmun khawvelah hian, Pathianin a thiltihtheihna hi ringtuten, keimahni ngeiin kan hmanchhuah a, kan hriatchian a, kan hriatfiah hi a duh a, keimahni ngei hi min chet-chhuah-tir ţhin a ni.
Engtin Nge Ni Ang Le?
Khai le… Lalpa’n thu a pe che a, tih tur a hrilh che a nih chuan Josefa angin thuawih takin thawk mai rawh, thuawih takin kal mai rawh (Matt.2:14, 21). Pathian thupek zawm a, Pathian tirh anga i kal a nih ngat chuan, i thusawiin ram a la ang a, i thiltih-in awmzia a nei ang a, Pathian ram a zau ang a, Lalpa a ropui ang. A chang chuan Phumbo nun (Isua phuma awm thu) te, Tlanbo nun (Aigupta rama tlanbopui) te, Bibo nun (Elija bihruk thu) te, Ngawi nun (Pathian ngawih tlat hun) te hi Pathian Inpuanchhuahna ropui tak a ni ţhin reng a ni. Pathian aw i hria em? Pathianin a hrilh ang che-in thil i ti em? “Thu ka pe che a ni lawmni? Chak tak leh huai takin awm phawt mai rawh. I rah chin apiang chu i ram a ni zel ang” tih hi Pathian thupek leh thutiam danglam ngai lo ding reng chu a ni.
Similar Posts:
- Ringtute chunga Pathian beisei leh duhzawng{Sunday Pual}
- Isua i pai ngam dâwn em?
- Thlarau Râlthuam {Sunday Pual}
- Beiseina siamtu thawhlehna
- Heroda Khan A Tisual Lo {Sunday Pual}
December 16th, 2012 at 6:05 am
A ropui hle mai.
Report this comment
December 16th, 2012 at 7:18 am
Pu John a ngaihnawm hle mai. Amen…
Thil pakhat ka hmuhchhuah chu, typing pawh i duh uluk a, mi invawng felfai mi i nih ka ring tlat, a ropui e. Live ngei mai a i sermon ngaihthlak a chakawm khawp mai.
Report this comment
December 16th, 2012 at 8:21 am
Tukchhuah Nuam Vek Ule …
#1 Thanks Pu Chhana,
#2 Ka Lawm e, ka Nau. Nia, mahni tawkah thil hi ka uluk ve viau thin a… a-tu-a-mah hi ka tluk lem hlei lova, LoL. Min beisei ang khi pha dawn lo mahila min Duhsaknaah ka ngai a, ka lawm hle mai. Pathianin remchang a la ruat ngei ang.
Ka buaina zawk chu, Mizotawng hi duhthusam hian ka ziak tha thei tlat lova, han inzir tha leh dawnin ka harsat deuh tawh sia… ka insit deuh thin khawp mai.
Tin, ka Post reng reng hi a ‘Sei Thei Lutuk’ a, tih-tawi deuh ka tum pawhin ka duh aia thui fe hi ka lo ziak leh thin a. Hemi thu-ah hian insiamthat ka mamawh ngang mai. Nangni-ho zawng a Kawngkal dan in hre tawh a, a tawk chinah in rekbung thiam a, in fakawm thlawt e
Report this comment
December 16th, 2012 at 11:35 am
Post leh comment a ropui e.
Report this comment
December 16th, 2012 at 2:21 pm
A tha hle mai…Pathian thu awih hi ringtu tena kan tih tur pawimawh tak ani reng ani….
Report this comment
December 16th, 2012 at 4:25 pm
Dr. John, i ziah khi ka chhiar chhuak vek a, ka hmuh dan chuan tunlaia an sawi “prosperity gospel” evangelist ho (Joyce Meyer, Joel Osteen, Paula White et al) thusawi dan i pawm loh thu ani deuh berin a lang, a dik em?
Anih loh vek chuan Kristian doctrine a thuawihna pawimawh zia i sawi lang chiang hle a.
Mari te kha naute pian zan la la emaw, pian hnu ni 3 lek emawa kal annih chuan thil awlsam ani awzawng lovang.
Tunlaia kan hriat tak, post-natal care awm miah lova Bethlehem, [tuna West Bank, Palestine] atanga Cairo, [Egypt] thleng camel a kilometre 420 (261 miles) han chuan chu peihawm lo tak ani. Cairo zuk thleng kher lovin Sharm Al-Seikh thleng pawh kal se a hla reng reng. A karah 3-star hotel takngial pawh a awm si lova. Passport leh visa pawh an lo nei sa tehreng emaw ni dawn ni.
Report this comment
December 16th, 2012 at 4:39 pm
A tha Khawp mai, Pahian hi Mihringte nunah hian, mak danglam taka rawn inlar ai chuan, mihringte vek kaltlanga hnathawh te, a tawngbawltute(a tirh te) hnathawh malsawm sak te hi a chet dan ani thin tlat. Tul bik tak te chu a awm ang chu. Kawng min kawhhmuh a, chutah chuan kal thin tur a ni. A aw leh duh dan ngaihthlak/ngaihchan peih a ngai thin.
Report this comment
December 16th, 2012 at 7:39 pm
In comment a ngaihnawm hle mai. Thanks!
#6 Borat, an kal thui zawng tur i rawn ziak chhuak chu ka va lawm tak em! Modern context lehnghalin, million thanks. Ka chhinchhiah tlat ang.
Mahse, Prosperity gospel zirtirna kalh vang chu ni chuang lo ve. Pathian thu-ah hian mahni ngaihpawimawh zawng deuh hi a awm thin a {thuhmahruaiah pawh ka tarlan khi}, Pu PK-a sawi ang khian, Pathian hnathawh tur lam hi kan sawi lian lutuk thin a.
Pathian lah hian amah ringtute hi hmanruaa hman ngei a duh bawk thin si, helai vel tak tifiah tur leh tichiang turin ka rilru-ah “hlau leh khur chungin nangmahni chhandamna thawk chhuak rawh u” tih te nen khan, ka rilruah a lian hle a, Krismas denchhenin, Pathianin mihring lama tih tur min phut hi thahnemngai taka kan tih hlawhtlin zel a pawimawhzia ka rawn sawi a ni.
Report this comment
December 17th, 2012 at 6:01 am
Dr John nge nge, ziak tha thei thuai thruai hle mai. Pathian thu lampang hi chhiartu kan tam, mahse comment pe ngam erawh kan tam lo niin ka hria.
Report this comment
December 17th, 2012 at 10:50 am
A ṭha leh mang e
Report this comment