mi(sual).com

“Lalazarzo chawei siam rawh”

A awka leh a tawng ki atang chuan a sawitupa lungawi lohna chu a hriat theih a, chutih rual erawh chuan a hmel hmu miahlo pawhin chu pa chuan tuisik danglam a in tih an hre ngei ang le. Thlasik lai tih takah boruak chu a vawt a, current a awmlo bawk nen chu awka rawn chhuahna in, hla phuahtu ina “Run in tlawmte” a tiha mawi ah chuan bati lian chi pathum hi kawisawi takin a inchhi eng a, inchhung lai takah chuan sikri alo ling vam hiamin , chu sikri lo aia thu napang 2 te chuan an Pa rawn haw chu hlauh hmel taka enin , an hmel ah erawh zantin an tawn thin tihtakah mak tihna a lang lemlo.

“Lalzarzo, Mihur nu, chaw ei siam rawh ka ti che ani lawmni”

“Ka insu laklawh alawm le. A mak vak vak thin, tinge i rawn ruih leh tak ni”

“Ka duh leh ka rui ang, nanga sawi tur a awmlo” chu tawngka chu a vinin a ring tawh hle a, mahse Pi Zari chuan a hriat fo thin tawngkam anih avangin engtin vakah a ngai lemlo.

“Mihurnu”

“A mak teivet e, naupang awmlai in tawngkam chhe tak tak hmang fo suh ka tih thin…”

A ri bur a, naupang mangang tapin a zui nghal a.

“Tenawm lutuk, Lalhmangaiha nen chuan Pi Chhuani te inah eng maw inlo tih a. Nanga sumdawng hian thawmhnaw chiah ilo zuarlo ani maw. Ka in chhung atang hian chhuak nghal rawh”

A ri leh chawrh a, naupang tap chu nutling tapin a rawn zui a. Chutia an rik tak luih luih takah chuan thenawm khawveng te pawh chu an rawn tlan lut a.

“Chhuak nghal rawh”

Chutia, an Nu khawih leh a tum chu midang chuan anlo dang a,

“Pu Zam, amak emai. Insum teh, insum teh”

“Tenawm lutuk, nang, Uire Nu kha ka inchhungah i awm a remlo. Zanin la la hian kei leh i fate hi min chhuahsan ang che”

Khang te kha kum 1 liam ta aniin Pi Zari chuan a theihnghilh lova, a theihnghilh lo mai nilovin kha zan kha duhlo mahse a mitthla ah a cham reng a, a rilru ah a riak rengin vawi tam a mittui ti tlatu leh zan tam zanmu chhin tir theilo tu anisi. Nia, hmeichhe pasal nei tawh tana hmingchhiat tawp theihna ber “Uire” a puh aniin , a pasal ina a then tak hnuah pawh kum 1 chuang ral tawh mahse, a tuartu tan zawng a na a, tawrh a harin, keini Mizo tena kan sawi nuam tihchi alo nih bawk nen, khawtlang sel leh rel nih hlawh reng reng a nichhuak chhiar nitina, a hun hmangraltu Pi Zari tan zawng ana in nghilh ni a awm tawh dawn silo.

Pi Zari tia koh, a hming pum Lalzarzovi hi Satual khawchhuak, Pu Hrangtawna fate zinga upa ber leh a nulat lai pawha hmeltha leh fela sawi ani. A nu, Pi Zathangi pumpui cancera a boral hnu phei kha chuan a naute leh chhungkaw enkawl chu a kutah awmin a Pa a hrisel lo chho bawk nen lehkha pawh zir thui lovin a theih ang anga sumhmuh dan ngaihtuah a ngai ta a, thawmhnaw leh eng ilo zuar kualin a kal kual a, amah a felin, mi biangbiak a thiam nen an chhungkaw mahmawh khawp chu a thawk chhuak a, a Pa leh a nau te pawh ina an zah leh vengchhungah pawh nula fel ti a sawi thin ani thin.

Gospel Centenary lawm kum, kum 1994 khan Khuangleng khawchhuak Zama an tih, Lalthanzama nen an innei a, Zama hi PWD a J.E thawklai ani nen chutia kamding pasala a nei ta chu, a nau tlangval in hna a hmu tawh nen a hmalam hun chu mihring ngaihah chuan eng tak tura ngaih niin amah mai bakah an chhungkua pawh an lawm a, beiseina sang tak leh hlim takin an nupa chuan khawvel an hmang a, hmalamah beiseina sang tak annei si.

Mahse, mihring te hian hmalam hi kan sawi thei lova, harsatna kan tawh turte leh malsawmna kan dawn turte hi kan hre lawk lova, chu erawh khawvel nihphung leh mihring nih tinuamtu ani si. Mihring tupawh a hmei a pa in kan nunkawngah hian thil tamtak kan tawng a, kan khawvel a danglam hret hret a,kan thil tawn ten kan nunkhua nawm leh nawm a hrilin a bik takin hei hi nupui pasal kan neih hian a chiang a, kan nun nawm leh nawmloh chu thui tak kan kawppui te fuh leh fuh lovah a innghat a, a bik takin hmeichhe tan phei chuan damlai hremhmun leh vanram a siam theitu a ni a. Hei hi kan Mizo society, hmasang ata tawh a , a awmnem, zawkte “Hmei” “Chhia” kan tih ngatna khawvelah hian a dik lehzual si.

Pu Zama te nupa pawh chu tuak dang te ang bawkin hlim taka nungin damlai hun an hmang chho va, fate an han neih phei kha chuan an mahni rilra rah ngei “nui hmel” leh “chevel” te chuan an nunnah hlimna dang a rawn thlen a, an fate hmalam thlir leh “Mami hi chu chuan Doctor, Matea hi chuan Pathianthu lam zir se” ti a duhthu samin, chhangchhe hle mahse an nunah tudang an ngai lova, an hlim thin.

Sawrkar hna hi hna tha tak ani a, a bikin kan Ram zimte ah phei chuan hna duhthusam leh lukhawng nei, mitin te pawhina kan duh leh thil dang aia kan thlan thin nimahse, hmu danga insawn a ngaifo erawh a hna ina a kentel, mawhphurhna nimahse thil nuam tak chu, a bikin chhungkuaah chuan ani lem lovang le. Pu Zama pawh chu a thawhna Aizawl atang chuan Lawngtlaiah sawn ani a.Chhungkua an buai a,an mangang a, an chhangchhe bawk nen a nupui leh a fate chu In lamah awm se, amahin a hna thawhna hmun turah va kal phawtse, A Patea, sawrkarlai party a inhmang ve tak leh Block hruaitu in a ranga lama a insawn let dan tur buaipui se tih chu an rorel ani ta a.

A hnathar lamah chuan kum khat pawh a va thawh hmain , Pu Zama pawh hmelhriat azarah Aizawlah transfer leh vat ani ta, hetia an Pa an han transfer let leh ta chu Pi.Zovi pawh chu a lawmin a hlim hle a, an fate an nupa thlazar na hnuaia an han seilian tur chu a thla a muang a, Pathian hnenah pawh lawmthu a sawi fo thin.

Mahse, mihring duhthusam ang hian thil a thlenglo fo si. Pu Zama pawh chuan Aizawlah a hna zawm tawh mahse, a khat tawkin office hna kala zawh kimloh a awm tiin a bial hmasa lamah a zin ta zauh zauh a, hun a kal deuh a, ahma a thiante nena thil tihkhawm baka ti ngailo khan zu a in ta zeuh zeuh a. Chu “In zeuh zeuh” chu nitin in a ching chhova. “Zu in mah ila rui khawpin ka in ngailo” ti khan khawlai ah mi tuizem nghengin a thu muhil ta fovin, “Local chu a hrisello” ti thin kha, sum lamin a daih senglo ania nge , R.V lamah a kal ngunin vengmawng Hmeithai ta pawh a ba thin ta hial ani awm e. Zu hrim hrim hi a tantu te tih dan takah ”sual chu a ni hauhlo”, mahse ruih phallo tu khian a chhan thatak a hriat vanga “Ruih phallo” ani tih hriat takin , a kentel thil tamtak te hian chhungkaw tamtak a ti khehdarhin mi Nu leh mi fa tamtak tahna ruamah a hnuk lut thin si.

Hun a rei a, nitin ruih chu an chhungkua chuan ngaiah an nei chhova, a thlawna rui anilo tih hriat takin chhungkua erawh an harsa tial tial a, a hma a, fate tana ti a sum khawl thin khan hlawh thlen mumal loh chang a ngah chhovin chawlhni Sa leina tur leh fate fee tur an neihloh chang an nei tafo thin. Pi Zari tan chuan a pasal rui nitin pawh chu tawrh a har tawh nen, ngaihsam a min siamtu leh rilru fim min put tir theilo tih taka, Pu Zama pawh chuan ruih ringawt a duh tawklo chhova, tunlai a, Khawpuia Patling te tih fo thin danin an office ah ngaihzawng neiin, zan tam a haw lova,a chhungkua a thlahthlam fo thin. A hma ami kha anilo aniange tiha mawiin, tunhma a,a nupui leh a fate thlahlel thin khan “a in” chu lunghahnan chauh a hmang a,faten nakina an zirnan ti a a hlawh khawl te chu a thlunglung ah a cham tawh mawlh lovin, fate zirna tur leh chhungkaw mahmawh ai chuan a bialnu tana kawr thar tur leh an zu in dun tur lei nana sum hman chu a hlawh tam zawk luanralna ani tasi.

Pa berin a hlawh chanve pawh thlen nachang a hriatloh fo chuan, Nuber tan chuan faten Wai Wai an eichak pawha leina tur sum neih a har a, mahni runlum a an thanglian enkawl a chak nen, thiam ang tawka sumhmuh ve dan zawn chu hreh mahse, hreh theih ani silo. Pi Zari pawh chuan a nulat laia Commision atih thin a, a thiannu, tun hnua thawmhnaw dawr siam ta, Pi Siami chu belin thawmhnaw te a zuar chhawng a, a nulat laia a tih thin alo ni bawk nen, kar lovah hmelhriat thar a ngah chhovin an Pa iona a hlawh a thlen ang aia tam mah a hlawh chhuak thlatin a, chu chuan hreawm ti mahse a nunah lawmna thar a thlen fo thin.

A lehlamah chuan, a hma a, an pa hlawh ringa in lama awm nuam thang chuan hreawm tih chang a nei fo thin. Hah takin nitin thawk chhuak mahse, inlam a, a fate enkawl ngai bawk, an Pa rui zantin a buaipui a ngai bawk nen, zan lamah pawh a awm hahdam hman lova, hreawm a tih chang a tamin a bula zu rimnam chunga engmah hre lova, mu hnar buah buah thin an Pa bulah chuan zantam mittui nen a hmang a, tap chungin Pathian a au fo thin. Mihring te hian kan nuna harsatna a thlen tak tak hi chuan kan duh danlo angin kan awm fova, rilru fim kan pu lo fo si. Chutiang huna kan chunga that chhuah te erawh rilru chhungril hian a hre reng a, mipa leh hmeichhia ah phei chuan inngainatna a piang hma a.

Pi Zari pawh chu a thawmhnaw lak chhawnna thin leh duhsak em emtu , Pu Hma a an tih, a nupui a boral avanga a fate hova parawl hian a ngaizawng nasa in, a tah leh mangan changa khawngaihtu leh hnemtu anih avang chuan Pu Hma a pawh chu ngaina ve mahse, a in veng thiam a, chetsual loh a tum fo thin. Mahse, a dinhmun avang chuan a rilru pawh chu inthlakna chen alo awm ania nge, Pi Zari rilru ah pawh Pu Hma ngainatna chu a awm chhova, a pasal rui reng leh kuthhlak zantin bula awm ai chuan a bula awm nuam a tiin, hna tul avang te pawn an inzui nasa ta hle a. hetia, Pu Hma a ava ngaina ve e kan tih avang hian an inngaizawng kan tihna erawh a ni lova, a bula awm nuam atih tihna mai chauh ani.

A dinhmun atang chuan amah duhtu leh duattu bula awm chu a chakawm, mahse a fate tih fahrah chu a ngam lova, bakah an inneih thutiam a zah ani. Vawi tam Pu Hma a chuan beisei thin mahse vawi khat pawh a fawp lova, a inveng a, mi rilru tha ani nen Pu Hma a pawh chuan a tumlui ngai heklo. Tumkhat chu an dawr bungraw lak thinna Pi chhuani te inah Pu hma a chuan kalpuiah sawmin , thawmhnaw thar lakpui pahah a sawm a, a zawrh anuam zawk ang tih ngaihtuahna a nei nen a kalpui tain hemi ni hian ruah a sur avanin an haw lawk lova, tlai ruahsur bana an haw tur inphur chhuak chu Pi Chhuani te in pengah chuan Pi Zari chuan an pa thianpa Sangtea chu rui rih hriat mitmeng taka hmuin a rilru a nuamlo ru hle a.

Hemi zan khan ani, an Pa office bang ina kut a thlaka “Uire Nu” tiha a then tak ni. Kum tam nitin a pasal rui pawh tuar hram a hram a, a fate thlamuanga an nawm zawk nana tiha hna thawk hram hram tih Lalzarzovi chu, thil hrechiang lova kan sawi peihna leh Kristian ni chunga thenawm khawveng te rel leh an chhiatna sawi nuamti Mizo society ah chuan mualphovin a awm a, mitin dem leh hmuhsit a hlawh a, a nun a, a phurh mek pawh a rih tawh nak alaia, phur rit lehzual chu, “Zar Uire i” an tih tak chuan a phurh belh a, mualphovin a nun a hmang ta. “Zari mualphona” chuan kum tam vei mahse, a nunah nghawng anei kumkhua tawh dawn a, chu chu tam takin an chhut pha lova, an tawngkam hlek a “An Pa a UIRE sana ” tih chu an sawi duhdan ani si.

Similar Posts:

• Nuthlawi nge Hmeithai?
• Chhangchhe Thufing
• Fa enkawl
• Catherine Lalpuii psychiatry ward-ah
• Nupui/Pasal neih leh fa neih chungchang!

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Monday, January 7th, 2013 at 11:31 am and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.