Lalpa,eng ti tur in nge min duh?

January 11th, 2013 9:32 am by reubo

Tun tum chu Tirhkoh Paula chanchin, Pathian nena an in tawh dan atang hian thil thenkhat i han zir ho ve leh teh ang u.

Tirhkoh Paula chu Damaska daiah, ringtute man tura a kal laiin eng in a chhun thlu a. Aw in ” Saula, Saula, engati nge mi tihduhdah le?” a ti a. Saula chuan “Lalpa, tunge i nih ?” a ti a. Chuan a tawp ah Paula’n, “Lalpa, eng ti turin nge min duh?” a ti ta a ni.

Paula hi mi lehkhathiam, mi vengva, vantlang chung lama leng pha, mite ngaihsan a ni. A hming hmasa pawh Saula a ni a, chu chu ‘desired’, ‘asked for’ tihna a ni. Pathian mi nia a pianthar hnuin Paula a ni ta a, chu chu ‘humble’, ‘little’ tihna alo ni leh ta a. Chung sanna leh dinhmun tha a dawn zawng zawng te chu Pathian atanga a dawn a ni tih ngaihtuah lovin amah siamtu Pathian dodal nan a hmanga, Ama mite hrem in, christianna dodal nan a hmang a ni. Tichuan, Lal Isua zuitute man tura akal leh laiin, Damaska daiah Lal Isuan a tawka, a ko ta a ni.

Lal Isuan, “mi sengkhawm pui lo chuan a tidarh a ni” a ti a. Lal Isua leh setana indona ah hian khawvel ram indona ang in neutral a awm theih lova, remna saui a tan ve theih loh. A khawi emaw zawk zawk ah kan tan a ngai a, Isua lama kan tang lo a nih chuan setana lam a ni mai. Keini,’setana lamah kan tang lo’ ti mah ila, Isua kan sengkhawm pui loh chuan setana lamtang ah min dah tho tho tih hi kan inhrilh nawn fo a ngai. Chuvang chuan keini pawh, Pathian atanga kan dawn zawng zawng, Chanchintha avanga kan dawn zawng zawng te hi en ila, min petu Lalpa tan hian kan hmang em? A chanchintha puandarh nan kan hmang em? Kan hmang thin nge kan hmang zauh zauh? Nge kan hmang ngai lo? Nge mi fak hlawh turin, alang a mawi tur thlir chauh in kan hmang zawk? Isua hian thinlung zawng zawng, rilru zawng zawng a duh a, a demand a ni tih i hre thar leh ang u.A hranp in ringtute kan tiduhdah kher lo a ni ang, Isua hi kan sawichhe kher lo a ni thei. Mahse Ama tan a kan thawk lo a nih chuan, A Chanchintha puandarhna ah tha kan thawh ve lo a nih chuan kan tihdarh sak a ni. Paula pawh hian a hranpa in Isua a tiduhdah kher lo, mahse Isuan “mi tiduhdah” a ti tho a ni. Sengkhawmna ah kan tel loh chuan tihdarhna ah kan tel a ni.

Chutichuan Paula, Pathianin a kohna aw hi vawiin a Pathian min kohna aw a ni tih i hria ang u. I pawm ang u. “Engah nge mi tihduhdah a, engah nge mi sengkhawm pui loh, engah nge mi tihdarh sak !?” tiin vawiin ah hian Lal Isuan min ko e. Paula chuan chu Lalpa aw a hriat rual rual chuan a in hrechhuak a, Pathian hmangaihna leh A tana a thawh loh zia in hrechhuak in Lalpa hnenah a in hlan,”Lalpa, eng ti turin nge min duh” tiin. Tichuan, saula, desired-a, asked for-a (kan dil ngei, kan duh ngei kha a ni e) kha Paula, little-a, humble-a (mi te-a, mi tlawm) a lo ni ta a ni. Keini pawh vawiin a A aw kan hriat hian ama tan i inhlan thar ang u. A tan kan lo thawk tawk lo em? Sengkhawmtu lam ah nge kan tan tidarhtu lam ah? Pathian malsawmna, Chanchintha avanga kan dawn zawng zawngte hi Ama tan kan hmang em? Chanchintha puandarh nan kan hmang em? ‘puandarh nan ka hmang lova, tihdarh nan pawh ka hmang lo’ kan ti a ni mai thei. Puandarh nan a kan hmang lo a nih chuan tihdarh nan kan hmang a ni. Chuvang chuan vawiin a A aw kan hriat hi “Lalpa, eng ti turin nge min duh” tiin Lal Isua hi chhang ila, mi chapo te kha mi tlawm kan lo ni dawn a ni. Chu chu Isua duhdan a ni si a.A hma ah i kun ang u.Ama tan i in pe thar leh ang u.HAPPY MISSIONARY DAY(Mobile atang in ka lut a, chhiar a nuam lo deuh mai thei, tih sual a awm mai thei, min hrethiam dawn nia)