Saizahawla-2

January 11th, 2013 12:23 pm by TuaiSialA

Tlangval puitling a lo niha nupui a nei dawn hnai ta tihah chuan Zawlbuk buantualah chuan a rawn inlar ve tan ta tak tak a. A aia chak lo zawk nia a hriat chian sate chu an tha mil tawk chauh zela tangin a hneh hram chauh alawm le tih tur hian a buan zel a. Amah cho ru leh er ru deuh nia a hriatte erawh chu chiang zet zeta phawi kangin a chang phei chuan a bin zek mai thin a, mite mak tih a lo hlawh tan ta a, an lalpa Pawibawiha phei chuan a zinna apiangah a kaihzavengtu berah a hmang ta hial a. Tun lai angin kaihhruaina tha hnuaia seilian ni ve ngat se zawng Zofate tihmingtha turin khawvel a deng chhuak ngei ang le.

Kan sawi tawh angin Saizahawla hi a naupan tet atang rengin a nunzia pawh a phawk a, a lo puitlin chhuah tak hnu phei chuan a phawk lehzual a. Khawlaia a ngaihzawngte a tawh changte hian ka zak e ti ni awm tak hian a puanven chuan a inlukhup ta thin a! A ngaihzawngte chuan en ngam lovin kimki chuih chuih chungin an tlanchhiatsan ta thin a ni. A chang leh a nula ngaihte hi naupangho a tlangautir mawh hek lo. Anni chuan an lo haw ngei bawk thin a, an hua tih a hriat veleh naupangho bawk chu tirin, “A ngai lo leh,” tiin a tlangautir leh a. Saizahawla nunzia zawng a dangdai ve reng reng a ni. Mahse, chuti chung pawh chuan mite thlamuana chawk hlimtu ber, Khawruhlian khua ina an tawng chhan ber a ni lawi si a ni.

Puithiam nih leh Thirdeng hna a kawp kan tih tawh kha. Thirden tur a han rawh ling a, a han dêng a. Naupang thenkhat pûm lo zahsaktute chuan, “Uai, a va han dêng na awm ve maw le!” an lo tih tawh chuan Saizahawla chuan, “Uai, uai, uai!” tia lo chhan let pah hian a thirden lai chu a dêng na telh telh a, “Uai, iau,” tia inchhawn chung zel hian a chem chher zawh tep tawhte hi a dêng khawlo zo leh ta vek mai thin a, a bul atang bawka tan a ngai leh mai thin a ni. A nupui pawh chuan naupang tê tê avanga a thir chher zawh tep tawhte a bul atang veka tan a ngai leh mai thin a han hmuh chuan, “Naupangho ai mahin i naupang chhe zawk alawm maw thin le,” a ti ve hial thin a ni. Naupangho nena han inchhawn chhaih vel chu a nuam tihzawng ni miau si hek le.

A Puithiam hna han thawh ve dan te reng reng lah chuan midangte Puithiam hna thawh dan lah ang hek suh. Bawlhlo engkim mai hi a nei lawk vek a! Damlo thawi tura puitlingin an koh hi chuan a kal duh ngai miah lo va. Mahse, naupangin awmze nei taka zaizira an koh tawh hi chuan hna laklawh engmah sawi lovin a zui nghal thung si thin a ni. Naupangin an koh dan pawh, a kutah emaw a nghawngah emaw kutphah saisira an han zai nãw nãw tawh hi chuan damlo thawi tur an awm tih hriain a zui nghal mai a ni. Cghuvangin damlo thawi tur an awm tawh hi chuan puitlingin ko lovin naupang an tir mai thin.

A thianpa Vungtawna chuan, “Saizahawla nen hian tette atanga inkawp chawt kan ni a, hmun khata riak leh mu dun chawt reng kan ni bawk a, kan puitlin hnu thleng pawhin lal kaihza venga zin dun thin kan ni. Thlen inahte hian mi a insual derpui leh ta chiam mai thin a, thlen inte kan tihbeidawn leh tihhrilhhai chang a tam khawp mai! Saizahawla kawp chu buaithlak chang a tam khawp mai,” a ti a ni. A sawi zelnaah chuan, “Antam te hi han hmeh ila, kan lak chiah kha a rawn la ve chiah a, han thlah ila, a thlah ve leh roh thin bawk si a, zupawl sate hi kan zâwn dun leh nawlh nawlh mai thin,” tiin. Nupui neia a indan hnu phei chuan chak leh phawk satliah ringawt a lo ni awkawng lo mai tih chu a lo hriat chhoh tan ta a ni. Mizo pasaltha dangte ang bawkin Saizahawla chuan zepui pathum a nei a, chu’ngte chu — i) Mi chak a ni ii) Mi phawk a ni iii) Mi huaisen, mi ral leh sa ral hmaa zâm ngai lo mi a ni. He’ng thil pathumte hi mi bik a nihna thil pathumte chu a ni. A ngaihnawm dawn chauh va, chhunzawm leh turah aw…