«
»

Khiang Min Awihsan!

January 23rd, 2013 4:58 pm by Dr Mahminga Sailo

(Post thar a va’n awm lo ve. Buichhe laih loh a inpuang an tih iangin, mahni chanchin sawi leh zuah zuah mai ang te’ng.. :-D )

Ka tlangval lai chuan!
Putar thukhawchang an sawi iangin, rawllai nun sawi ve ang hmiang! Vengkhata putar reng reng, an vanglaia luck lo leh insawithei lo an awm ngailo an tih kha maw le. Tar hmain, insawithei daih te’ng. :-P

Chhai khatna
A sakhming zep mai ila, a hunlai na na na chuan ka thinlungah a khatliam hle. Pawl sawm ka nihin pawl sarih a zir a, a zirpuite khaikhin chuan a fel fal hle. Thangthar tawngkam takin a zei bik. Zirna runsang bela, kumpui linglet meuh kan chenho takah chuan; tukthuan ei lai te, chawchhun fak hunlai leh zanriah ei hun bakah, inkhawm hun thlengin kan inhmu fo thin.

Kum tawp exam kan neih laiin ani chuan class a la kal a. Chawlhlawk apiangin kan inkawm ve thin. Exam zo va, hostel ka chhuhsan tuk atangin thaikawibawngte tir tanin, chhuanlam fahrah te te siamin hostel chu ka tlawh fo va. Ngai teh ani’n, Hostel a chhuahsan ve dawn meuh chuan, khua hmuna leng kan ni si lo; sikul a inang bawk si lo ta chuan, duh viau che mah ila, a rem lo a ni tiin min hnawl ta.

Tin heti hi a lo ni a; kum thum a vei a, pawl sawm a zir kum chuan kan principal tawnah khiang min a awihsan ta. :-)

Chhai hnihna
A sakhmel ka tawn hma rengin a duhawm leh hmelthatzia ka hre tawh a. Sakhmel kan intawn meuh chuan, rin aiin a zun chuan min phuar nasa zawk! Beisei sang teh chiam lovin ka bem a, rin loh tak maiin min chhang nia!

Ngai teh, kan inngaihzawn hmaa min duat em em tu a chun leh zua chu an hraichawi tleitiri ka duat avangin doral an chang a. Ran daktawr kara UPC tlangval lehnghal chu tiin sirah min hnawl. Harsatna kara inngaihzawn reng chu ani tleirawl te tan chuan theih reng a ni ta lo. Kum chanve a vei meuh chuan thian anga in en turin min sawm a, chu erawh tlawmngai thei ve tak vala hian ka pawm thei bar lo. Kan inthen ta. Kum a vei a, min rawn beisei leh chang a awm. Mahse, kei chuan a chun leh zuate tawngkam ka hre reng a, kir leh thei ka ni tawh lo.

Kum ruk a vei meuh chuan, ran daktawr tawnah khiang min awihsan a, hlim takin an awm ta. :-)

Chhai thumna
Kei aiin kum hnihin a upa zawk, mahse a hmelthat leh no lama en chuan ani aiin ka upa zawk ta ve ang. Fanu mal a ni a, mahni lirthei kenga college kal thin a ni. Ani dinhmun leh ka dinhmun ka khaikhin thin a, chhai ngam chi niin ka hre lo. Khua hmun lova leng kan ni lehnghal. Vawkte til lak changin an vangkhua chu ka tlawh zauh zauh a. Kan inbe tam chuang lo, ngaihzawng tak pawh a ni hman paw’n ka hre lo. ;-)

Mahse, nikhat chu an veng maxi cab remchanga chuangin Zawlkhawpui kan pan a. Ka rin loh tak mai lirtheia chuang te chuan an sawi ta. Pu Englova fanu hi chu aw, a chhelo ngawt mai, fanu mal a ni bawk si. Ran daktawr zirlai nen an inngaizawng an ti a. Mahse, englovi hian a sawi dan chuan, Mahminga hi chu a fel, ka duh ve reng; mahse UPC kher a ni a, a buaithlak e, a ti an ti ta mai. :-O

Kan college peng atang lirthei chang kan ni si. Ka sira thu chuan, ran daktawr zirlai in nih chuan, Mahminga hi in hre mial lo maw? tiin kei ber kher chu min zawt a nih chu! Ka thianpa tawng hmain ka tawng vat a. Kan college hi a lian ang reng a, Mahminga chu ka hre lo tlat mai, ka thiante ka lo zawt dawn nia ka ti ve mai bawk a. Titi dang ka sawipui ta daih. Maxi cab atanga kan chhuk chiah chu, ka thianpa nen kan han nui tak tak mai a. :-D

Tin heti hi a ni a, chu nula tawih zet chu, kan zirnaa ka buai bakah, rokhawlhna eng eng emaw vangin ka be chhunzawm thei ta lo va. A kum lehah tlangval hmeltha tak tawnah khiang min awihsan a. Ka lawmpui hle. :-)

(Nimin lawka Amah Charice_Mizo thuziak ang deuhin; nupui-pasal inzawn kawngah hian kan khawsak phung, kohhran leh nihna te hian harsatna min siam ve thin em le? In ngaihdan ka ngaichang e.)

Similar Posts:

Recent Posts:

This entry was posted on Wednesday, January 23rd, 2013 at 4:58 pm and is filed under HAHAHA, Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.

32 Responses to “Khiang Min Awihsan!”

  1. 1
    Chhuaklinga Says:
    January 23rd, 2013 at 5:09 pm

    Chhiar ngha1 ang.

    Het, current a tawp daih, a awm leh hunah a ni mai. :)

    tren tren

    Report this comment

  2. 2
    sheldon Says:
    January 23rd, 2013 at 5:50 pm

    Van ngaihnawm. Chhiar a kal zaih mai. Mahminga chu damlai lu i lo sun nual tawh niin. Nupui thatak i la nei dawn chiang khawp.

    Hmangaihna tak takah chuan kohhran, kum leh social status leh adt hian a dal lo em aw (H)

    Report this comment

  3. 3
    Amah Charice_mizo Says:
    January 23rd, 2013 at 6:11 pm

    Ekhai nang chu sulhnu van ngah tawh bik ve, khiang min awihsantu tur pawh kan la tawng velo aniah (W)

    An la naupan hmel hlawm tehlul nen pasal neih an hmanhmawh ve hlawm em bawk anih chu mawle, pawi ka tihpui rual chein lo inzar buai tir reng ta la chuan tun dinhmun pawh hi i thlen loh phah ve thei tho asin, nakinah an chan ropui zia an la hre dawn chauh alawm, lungngai suh :-)

    Report this comment

  4. 4
    chhangteval Says:
    January 23rd, 2013 at 6:50 pm

    Lungngai lo la, nakinah a aia tha i la neih san ve lawp lawp dawn nia (H)

    Report this comment

  5. 5
    H.Vangchhia Says:
    January 23rd, 2013 at 7:39 pm

    I kalsan zel zul tawh bik :-P

    Report this comment

  6. 6
    Dr Mahminga Sailo Says:
    January 23rd, 2013 at 7:56 pm

    @ Sheldon… Tawnhriat nei an awm takin ngaihdan ka hre duh si a, ni awm ve takin ka rawn kak ta hluah a nih hi.. :-)
    @ Amah Charice.. I thuziak zulzui khan ka rawn phur deuh a ni. Nula zawk hian min chet khalh zawk zel a, an fanu te chu kan rim em bik lo’ng chu.. :-D
    @ Chhangteval… Dawn chiang rap, ka la awhfik hlawm ang.. :-P
    @ H Vangchhia… Min kalsantu hi chu kalsan ve zel mai tur niin ka hre ta… :-D

    Report this comment

  7. 7
    H.Vangchhia Says:
    January 23rd, 2013 at 7:57 pm

    #6 a fihlim thlak duh ber awm e hairehai :-P

    Report this comment

  8. 8
    century child Says:
    January 23rd, 2013 at 8:20 pm

    Luck bik2 hi ka ti em mai a (U)

    Report this comment

  9. 9
    Lamji Says:
    January 23rd, 2013 at 8:42 pm

    Khiang chu an awi mawlh mawlh hlawm tak mai a.. :D

    Report this comment

  10. 10
    Dr Mahminga Sailo Says:
    January 23rd, 2013 at 10:02 pm

    In ngaihdan in sawi leh duh si lo va. Ka post chhan ber chu a tawpa ziak awn thli thliai chiah khi a nia. A hot deuh nan tiin chithlum ka’n tat mai mai zawk a sin le.. :-D

    In insum te pawh a ni mai thei e. Mi(sual)-ah hian ngaihdan tlang tak kan sawiho thin vang a nia, ka’n tarlan chhan chu.

    Amah Charice_Mizo post-a comment pakhatin kohhran hrang hrang kan inthen atang reng hian… ti lampanga a comment khan ka rilru a’n hruai ding ta deuh a. Fiamthua min ngamtlak deuhte’n, UPC ni reng duh suh emaw, UPC i ni tak tak elo? ladt., min han tifiam thin a. Ka haw miah lo a, huat chi lah a ni lo. Mahse, chhungkaw khawsak leh dinhmun mai bakah kohhran thleng hian engemaw chen chu Mizo khawtlangah daidanna a siam ta em maw ni le? ka’n ti a ni e.

    Report this comment

  11. 11
    mate ainawn Says:
    January 23rd, 2013 at 10:34 pm

    Ehermssss..ngaihnawm e (Y)

    Mahse, “Khiang i awih siloh chuan ngaihzual..Lengdang chhai a rem lo” i lo ti lovang tih hi kan sawithei bik lawi si lovah.. :-P ;-)

    Report this comment

  12. 12
    caribou Says:
    January 24th, 2013 at 12:03 am

    Pawl sawm a zir kuma principal tawna khiang awihsan tu che khi ka hre hial lo maw?????

    Report this comment

  13. 13
    winning Says:
    January 24th, 2013 at 12:49 am

    Ka sakhaw biak avanga min duhlotu chu ka la tawng lova, mahse min nuihsawhtu erawh chu ka tawng ve nual ta mai, chungmite chu ka duh bik lohte an ni ve thung. Mahse ka retheih em avanga min duhlotu erawh ka tawng tawh chiang mai. Chung avang chuan keimahah tumruhna thinlung a intuh nasa lehzuala, a tha zawnga hman tangkai tum leh an inchhir leh ngeina tura hlawhtlin tumin tan ka lak ve phah a, engtin nge tunah hian min ngaih phei chu ka hre lem hlei lova. Retheihna leh hausakna hi chuan ramri chu kan duh emaw duh lo emaw a kham chiang khawp chuan ka hria. Aizawl mi hausa ve pawl tak duatlai pawh khan a hunlai khan min hnial vak bik lova, mahse a chhungte hawiher ka hmuh khan ngampatna vak chi anih loh avangin ka inthiarfihlim ve hna hna tawh a lawm.
    Dr. Mahminga chu nupui tha deuh i la nei ngei dawn a, heng i sawi takte hi chu tunah pawh hian an inchhir ngei tawhin a nia ka rin!

    Report this comment

  14. 14
    hlatekhua Says:
    January 24th, 2013 at 1:32 am

    Mizo society leh rilru puthmang (mentality) thlir chuan kohhran hrang inneih hian hmeichhia-in lungsi taka a pasal pawl a zawm loh chuan a buaithlak ru duh riau (a ni awm e!). Mipa tam tak hi chuan tlawmah te an la deuh roh thin a.

    Khawsak phung inang lo-ah hian mipa aiin hmeichhia an inher rem thiam/thei zawk fo. Mahse tu tan pawh dinhmun harsa leh hniam zawka inher rem aiin dinhmun tha leh nuam zawka inher rem chu a awlsam zawk ngei ang.

    Report this comment

  15. 15
    Asteric Says:
    January 24th, 2013 at 2:20 am

    A dik khawp mai…Mizo te hi kan racist ve khawp chuan ka hria. Kan hmusit zawng chu a khaw nawt in a hre chiang lemlo pawhin kan hmusit a, kan ngaihsan zawng lah tu a ni nge pawh hre mang lovin kan ngaisang dual dual a. Hei tak hi ka vei thin. Pathianin hriatthiamna nei tur hian minduh ni ngei ah ka ngaia, Kohhran inpawlhna chhungkua ah ka awm a, heta tang hian thil tam tak ka zir. Mi tam tak in an hmusit te hi an hre chiang lova, mi hnungzuiin an hmusit ve tawp a ni tih hi hriat ka ngah mai. TMEF te, UPC te, Kohhran thianghlim te, Catholic te leh kohhran hrang hranga thuhriltu te thuchah hi a sawitu nihna en lovin Thlarau thanlen nan ka hmang fo mai, vawiin ni thlengin. Ka thian te ngei pawhin an en dan hi an rilru nen ka en a, an thu leh hla engmah kei aiin an hre lo, dem dawn pawh nise kei aiin demna tur sawi tur pawh an nei tlem zawk ngei ang, Blind Despition a ni tih chiang tak tak a tam a ni.
    UPC nei duhlo in ringlo mi a thlang leh tho si te, Atheist emaw piangtharlo tih chiang a nei duh tho si anih chuan rinna avanga duhlo nilovin hmusitna avanga duhlo ani tihna a ni. Chu thinlung chu Pathian hmuh ah pawh a tenawm ka ring.
    Mahminga pawh UPC khal run lo la :D Pathian dawr turin pawl hi dah len lutuk loh a tha in ka hria. Lunglei ah chuan awm ila Baptist ah ka hming ka ziak anga,vairama ka awm pawhin Mizo inkhawmna aia Catholic inkhawmna a hnaih zawk avangin ka inkhawm mai. Pathianin mindahna hmun hi pawl aiin ngaipawimawh zawk ila kan tisual lo tlangpui. Pawl avangin tumah hi ringdik bik an awm lova, kan thinlung leh Pathian thinlung inzawmna ah chiah kan rinna dik leh diklo chu a innghat a ni. Vanrama lut tur select te hi pawl hrang hranga mi te an la ni ang :-)

    Report this comment

  16. 16
    Awmtea Leo Khiangte Says:
    January 24th, 2013 at 6:47 am

    Tukchhuah nuam ule. (C)

    Report this comment

  17. 17
    PKfanai Says:
    January 24th, 2013 at 7:47 am

    15. Asteric (Y) Tleirawl/rawlthar lai hi chuan, thil hi a chhe zawngin kan ngaihbel hma em em mai a, kan hnual hma bawk si. Tunah te chuan eng pawl ami pawh i UPC nihna ngaimawh miah lova nei duh che an tam awm em mai. Tawngkam nazawng intih hnual tir tawh reng reng suh. In ngaihbel hi a awl a, chapo ni silovin induhtawk ve nalh tur.

    Report this comment

  18. 18
    Dr Mahminga Sailo Says:
    January 24th, 2013 at 9:11 am

    @ caribou.. I hre mai thei a nia. Ehh, hemi chinah hian STOP tur.. :-D

    @ winning… Ka chhuang hle mai che. Thurawn tha tak min pe a, ka lawm e.. (Y)

    @ hlatekhua.. A dik chiah. Ka sawi lang ta sa sa a, tin post danga ka comment-ah pawh fiamthu chuan ka sawi lang tawhin ka hria. A hmaa ka hriat dan chuan, UPC leh Catholic kohhran bik hi nupui/pasal neih chungchanga khirh bik nia sawi an ni thin a. Mahse, tun hnaia ka hriatah hi chuan (mi zawng zawng an ni ka ti lo va), kohhran khat ang hiala kan ngaih Baptist leh Presbyterian member thenkhat pawh hian indaidanna deuh chu an nei a ni awm e. Englekhawle, ka sawisel theih a ni lo va. Mimal leh pawl duhdan zel a ni e.. :-)

    @ Asteric… I comment chu ka pawm zawng tak a ni. (Y)
    Nia, Kohhran chungchang kher lovah pawh hian Mizote hi kan thikthu a chhe thin hlein ka hria. Hnam naupang leh tlem kan nih vang te pawh a ni mahna..

    Nia, kohhran chungchangah hi chuan ka zau ve khawp chuan ka inhria (ka ngaihdan a sual a nih chuan Pathianin min ngaidam se). Denomination hi chu chhungkua leh mimal ngaihdan inmil deuh te min phuarkhawmtu ni maiin ka hria. Tin, Pathian zarah college kal lai leh tun thleng paw’n, evangelical union leh Pathian rawngbawltu pawlah phak tawka ka inhman hian denominational ka selna ni lovin, ecuminism hian min awn deuh zawk tlat nia!

    @ PKfanai… Ka lawm e. In thurawn hi ka lo zawm ang e.

    Ka sawilan tawh ang khan, huat enah ka en ngai lo va, chutih rualin nuihzatthlak erawh ka tawng ve ta nual.

    Vawikhat chu BMA leh MSA (Bangalore) joint meeting kan neih tumin, Mizo officer pakhat chuan fiamthuin (ani nen hian kan innel a, mahse ka kohhran a lo hre miah lo thung) Mahming, UPC i ni maw? UPC-ah chuan laktlak pawl tak i ni ve a tiin. Kawng lehlama ka tan a lawmawm rualin, ka kohhran nihna zawnah erawh a uanthlak vak lo.. :-D

    E khai, comment a sei em mai. Ni hman nuam vek u le.. (U)

    Report this comment

  19. 19
    mama Says:
    January 24th, 2013 at 10:24 am

    Min duhtu tak mi pakhat nupuia nei tur kan ni a, min duh lotu hi chu kan tawng nual tur a ni reng a ni (W)

    Report this comment

  20. 20
    SHauzelSailo Says:
    January 24th, 2013 at 10:36 am

    (Y)
    Chhai hnihna chu aaa, a run tuk lawm. Love never surrender, never die a va lang lo veeee :-( Love tawk lo emanle :P

    Report this comment

  21. 21
    THELH LOH HMUITAWK Says:
    January 24th, 2013 at 11:12 am

    In mil lo mahse kan sawi lawk .Tourists lodge privatise tur hi a zahthlak deuh lo maw u ,tourism hi a ngaihna Mizoram eng sawrkar pawh hian a hre lo tak zet a ang ka ti.Private nen enkawl chuan a thatna tur chu tam hle mahse kei chuan zahthlak in a tlawm thlak deuh lo maw sawrkar tan hian ka ti a ni.Enge in ngaih ve dan le.Hei hian a ngaihna Mizoram sawrkar eng pawh mai hian an hriat pui loh zia a lailang ka ti a ni.Hun dangah khan privatise a tha ang tia ka lo comment ve tawh na chhan chu a ngaihna hria an tlem em vangin ka lo fiamthu deuh a.

    Report this comment

  22. 22
    Spider Man Says:
    January 24th, 2013 at 12:41 pm

    ka rilru ang pu mi.. :-D keipawh hi maw le, avawksa eilo chi leh mirualpawllo zawnga inkhawm thin hi ka ni reuh va, nula te hi han rim ve thin bawk mah ila, thingpui intheih loh trut hi angai thin a, point kan score tlem sawta, chutah Kohhran an han hriatchian ve leh Kristian lo ang deuhvin min han hre thar ta thuta(an chhungte or a thianten0 ;-) marawhchu keizawng ka zam ve love, hmalam pan zel ka tum si a :-P

    Report this comment

  23. 23
    Dr Mahminga Sailo Says:
    January 24th, 2013 at 1:00 pm

    @. Spider Man.. E khai, kei aiin nula i chhai thelh tam tawh elo chu? :-D

    Ka ngaihtuah tak mai mai chu, vai inneiha Brahmin, SC, ladt., an inthliar ang em em hian inthliar lo mah ila, Mizote hian eng system emaw hi chu kan lo zui ve tlat a lo ni. A, Mizote chauh ni lovin, khawvel nunzia a ni ang e.. (H)

    Report this comment

  24. 24
    vakul Says:
    January 24th, 2013 at 10:45 pm

    A ngaihnawm e. nang zawng i tuihnang reng mai.

    Report this comment

  25. 25
    loneeagle26016 Says:
    January 24th, 2013 at 11:47 pm

    Ngaihnawm fu mai… kan thianpa chuan direct hit hi a pawimawh ber a ti ve tlat…policy/tactic dang dang han apply pawha, a chhungte’n wall leh boundary an siam reng chuan naute han pai phot mai sela, ‘Pathian remruat in ni e’ min ti leh mai zel a ti ve tlat… (Y) :-)

    Report this comment

  26. 26
    Chhuaklinga Says:
    January 25th, 2013 at 4:45 am

    25@loneeagle26016 :D (B)

    A kohhran ang zawnga inthliarna lam sawi tur chu ka hre teh chiam lova, hausak leh rethei ang zawnga inthliar hi chu tunlaiah miin an apply duh vak tawh lo ni hmiang ka lo ti mai a. A ruihhlo ang zawnga inthliarna hi a nasa za ber lo maw te ka ti mai mai.

    tren tren

    Report this comment

  27. 27
    Dr Mahminga Sailo Says:
    January 25th, 2013 at 9:17 am

    # 25… loneeagle26016.. (Y)
    Tihdan thlak vat te’ng… :-D

    Chhuaklinga… Nia, ngaihdan zau zawk hriat nan ka tawnhriat ho te ka’n tarlang a ni. Tin, ka tawnhriat ve zingah pawh kohhran bil en lutuk hi chu tawng an huat thu suhah kohhrana in hmang lutuk pawh an ni bik lem lo. Midang chungchang erawh ka sawi thei lo.. ;-)

    Report this comment

  28. 28
    appy thianhlun Says:
    January 25th, 2013 at 12:51 pm

    Kan naupan lai in Mahming in kohhran naupang ho nen chuan kan inhau nasa thei khawp mai hehe..alo at theih thin hi ka tia.. :-D ;-)

    Thu i thiam bawk a,post ngaihnawm tak ani e (Y)

    Report this comment

  29. 29
    Dr Mahminga Sailo Says:
    January 25th, 2013 at 1:02 pm

    @ appy thianhlun… Ka lawm e. I thiante chu an hnialhrat ve viau ang maw? :-D

    Kan thiannu pakhat pawh, hmeichhe lukhum chungchanga, ka thiante’n an hnial a. A duhthawh lutukin, Korinth thawn sawmpakhatna kha chhiar r’u a’n ti mai chu(h). Thinrim eng phiara inhnial e ti lovin an nui-ho dar dar. :-D :-P

    Report this comment

  30. 30
    appy thianhlun Says:
    January 25th, 2013 at 1:17 pm

    Kan hnialhrat zek lehnghal hehe:-)

    Hahahaha :-D ‘Korinth thawn sawmpakhatna’ ava vang duhom ve o Bible ah…

    Report this comment

  31. 31
    Jacka Pi Says:
    January 26th, 2013 at 10:04 am

    Ka rin ang chiah!! Mahminga hi a insawi ino ang a ni lo ang ka tih thin reng kha!!! Chhai thumna khi chu chhai chiah pawh nih loh khi a!!! She is khian emaw a inti ringawt a nih awm khi!! :-P. Ran doktor ni bawk, UPC ni bok chu hit fuh hun a la awm dawn hrim hrim

    Report this comment

  32. 32
    Dr Mahminga Sailo Says:
    January 28th, 2013 at 2:44 pm

    @ Jacka Pi.. Khaih khaih khaih.., ka tawn chhun chhun ka rawn tlangaupui thin a nih khi… :-D

    Nia, chhai thumna khi ka beisei aiin ka lo chet bon hmel a. Mahni hming chhal ngeia dawt han sawi pap mai kha chu(h), a tihchi teh chiam lo nangin, pumpelh dan dang awm hek lo.. :-P Sap ho paw’n, Laaa viss blainnn an tih kha… (U) :-D

    Report this comment

Leave a Reply

You must be logged in to post a comment.