mi(sual).com

(As told to the author by MJ)

Kan bul tanna a ho ang bawkin, kan tawpna pawh a ho bawk. Mahse, he ka hringnuna hmangaihna mel lung min lo phun sak tawhtu hi nghilh a har em em lawi a. Ka tum a, ka bei a, ka tuar bawk a. Ni lo, ni lul love, an lo thar leh thin. He ka thinlung ram tuma la tlawh pawh ngai lohna ram lo dai dar hmasa bertu hi, kei ka tan chuan nghilh har chuang ka di a ni si a.

Scotland Of The East tia an koh thin Shillong chu 10 Degree Celcius vawtin a nghaisak mek lai a ni a, karkhat hnuah chuan ka zirna ka zawh tawh avangin ka chhuahsan a hun dawn ta si a. Ka la tem ngai lova, ka tawnhriat hmasak ber a nih bawk avangin, hmangaihna ka la na em ka hre lova, ka la na lo em ka hre hek lo. Shillong ka chhuahsan dawn ta tak tak erawh chuan, eng emaw min mawlh tlattu awm hian ka inhre tlat lawi a. Martin Luther Christian University, Campus ka chhuahsan a hun ta tak tak a, ka liam thlenga min bye bye lawm lawm laite kha thamral lo mitthlaah an lo thar leh thin. National Highway 44A ah 60 km/hr a hmelhriat loh kara kan tlan lai khan, hmangaihna hmanga bual ka ni tih ka inhre chhuak ta.

Lenna vangkhua hmun lo ta na na na chu, kan inngai mai a ni lo, lung hi a leng vawng vawng a ni ber. Ka tih ngam ngai loh tur leh ka tih tur pawh a ka rin loh chu ka tih a ngai ta hial a, ka chhungte hnenah engkim ka hrilh tlang a tul ta. Pasal atan pawh ka duh a, ka ring em em a, ka tan engkima ka engkim a nihna hi nghilh a harna chhan a ni hial reng a ni. A chhungte pawh zak chung chungin ka hmu vek tawh a, ka chhungte hnenah pawh ka inhmelhriat tir tawh bawk. Mahse, vawiina he nun khawhar leh natna hi ka chan an lo ni ta a ni!!

Khua hmun loh di neih zawng kan tuar thiam ngang lo ani ang e, inngaia inthlahlel em em thin khan, dawt thu leh selna awm hauh chuang si lovin, hmangaihna ramri kan lo kham dun tawh chu chhut chhiat an ni teh tawp a. Hetiang taka inthenna dangdai leh hrilhhai thlak hi a awm kher dawn chuang em ni tiin ka in zawt nawn awn awn thin. A aw kha vawikhat tal hriat nawn leh chakin ka nun hmanga, a thinlung mi hneh em em thintu kha tem leh chakin ka nitin hun ka chhiar bang lova, duhaisam mai an chang leh si thin.

A aw leh lehkha ip chu lo thleng tur ang maia ngaiin, ka nghak a. Beiseina hian beidawnna kawlah mi tir liam leh thin a, mathei lovin mit ata mittui a luang leh thin. Hun in kum te a her liam zel ang a, nghilh zai ka rel mahna tia ka inhnemna chuan thinlung hliam thar zawk a chawk tho va, dam zai reng an rel thei mawlh si lo. A mah biak pawh theihna pawh ka nei a, ka hria, ka hria alawm. Mahse, ka zama, thlanfimin mi bual a, ka tuar nawn leh thin. A awrawl chu lo hre theiin, inbe leh pawh ni ta reng reng ila, ka thinlunga thu tam tak ka lo khawlkhawm tawh hi ka sawi chhuak thei mawlh lovang.

Na-in rum thin mah ila, amah kal bo sana tang dang bel leh turin huaisenna ka nei thei tawh lova, tuihawk hmahruai kawng bo ang mai ka lo ni ta. Kalna kawng ka bova, ka zawn pawhin ko bo leh thin. Ka hmui hmel leh sakruang te’n an zir vang pawh ni suh i, ngaihmelhtu ka tawn chang hian namen lova thinlung hliam chu kaih thawha awmin, he ka thinlunga hmangaihna awm hi sawisak nawn an ni fo thin. Kan cho a, kan rel a, kan tiam thlu tawh a, kan phu tawk rengah ka ngai. Mahse, a na tiin ka rum bang chuang love.

Engtin awmin, engtin lunglente tuar ve ang i maw? Zantiangah a di hlui ngaiin laikhum thlehnem chu bel ve thin tak maw? Nge min nghilh zai relin, lengdang a chhai tawh zawk ang em le? Zawhna tam tak a lo lut a, chhan zawh leh chhan sen an ni mawlh love. Ka duhaisamah phei chuan mi rawn zawng chhuakin, ka banah mi vuan se, hmangaihna bul kan tan lai ang khan nuiin tap leh dawn mah ila, ka lawm tawh ang.

If I got down on my knees and told you I was yours forever,
Would you get down on yours too and take my hand?
Would we get that old time feeling,
Would we laugh and talk for hours,
The way we did when our love first began,
Would you tell me that you’ve missed me too?
And that you’ve been so lonely,
And you’ve waited for the day that I returned,
And we’d live and love forever,
And that I’m your one and only,
Or would you say the tables finally turned tiin, tu hriatpui loh hian luaithli nul zai ka rel leh thin!!

Zana lalnu chhawrhthlapui leh vana siar leng te u, hei hi min lo hriatpui rawh u. A hnenah ka kir leh tawh lo’ng e, a zunzamte’n aiang-in min phuar mah se, suihlunglen biahthu di ka hlan a mawi tawh love. Ka tahna avanga hlimna leh lawmna a chan theihnan tawngtaina ka hlan ang a, ka tawngtai hla pawh ni mawlh rawh se. A ral ang nau ang tahni zawng pawh, kumsul hai lo ten an her zel ang a, liam zai ka rel tawh nang e…Mangtha.

Samah sam luat a awm nem maw tia lunglen hril chung zel hian, hun in kum a her liam pui zel ang a. Lungngaihna leh tahna chhumpui hian min kiansan zai an la rel ang a, min tichak tu leh min ti fingtu an la ni zawk dawn chauh alawm. Chu hunah chuan, lungngaihna leh tahna chhumpuite kan la thlir kir ve ang a, hmangaihna der dep leh khuahmun loh lunglennate hi min ti chaktu an la ni dawn asin tiin chhun ni leh zankhua, ka chhiar liam leh thin…

Similar Posts:

• Ṭiavuta Hmangaih Biahthu
• What is Love? What does it mean to me?
• Nung hlut a hlu
• An nem mi u
• Hmangaihna Ka Ngen ani

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Sunday, January 27th, 2013 at 10:21 pm and is filed under Luangliam, More than words. You can follow any responses to this entry through the RSS 2.0 feed. You can leave a response, or trackback from your own site.