An nem mi u

April 30th, 2013 7:00 am by lr hlonchhing

(Thlan piah lam ramah chuan, a rim a ra pawh kan hre tawh dawn si lo)

Kei chauh hi maw nunhlui vanga indawm kuna tap thin ka lo inti a, mahse a lo ni lo. Ni e, hmangaihna kawngah hi chuan, kan tahpui lah kan nuihpui hi a inzat a; kan ngaihtuahna an luah tam zawh poh leh a na zual thin niin a lang. Nunhlui chu nunhlui a ni a, hun liam tawh chu hun liam tawh a ni a; theihnghilh a tha. A dik…Mahse, hman hun kha tun huna kan han hmehbela, kan han chantir chiah hian; kan tahna leh kan suangtuahna chuan tahkhua a tisei kan ti leh tho si thin.

Nunhlui tham hnu dawn kirin thinlai lo thar si thin e,
Nangngaih a zual an nem mi u hmana suihlungrual dar ang;
Kan lenlai dawnin tunah tahkhua ti sei mai tur…

tiin Malsawmtluangi Fanai (MS-i) chuan mi awi vawi za tam tawh a. Kan inhmangaihna a tam zawh poh leh, a sawhkhawk erawh a na tih a chiang. He ti hian lungrun takin min chhunzawm sak a…

Chung siar ten thlang lenkawl an her liam a,
Mahse i tawna suihlunglen chuan e;
Kum tluang chenin kian zai a rel si lo maw?
Chhun ni, zantiang tawnmang lungmawlah pawh,
Ka nghilh lo che asin an nem mi u.

Ni e, a dik ka ti. Mihring hi kan lung alen tak tak chuan, hmehbel leh ngaihbel tur a tam duh ngang mai. Van lam kan han thlir a, arsi leh thil siam tin reng mai chu, inngaih leh lungrual bik em em a hriatna nen kan khat a. Hla phuahtu leh thuziaktu tam takte hmehbel an lo ni chawk reng a ni lawm ni?

Theihnghilh kan duh a, kan tum bawk thin. Chhun ni, zantiang tawnmang lungmawlah pawh, ka nghilh lo che asin an nem mi u tih hi kan chan tawk an chang leh ve fo thin-in a lang. Kan lunglenna chuan, ngaihtuah turin min turlui a. Kan ngaituahna chu a tak ram chang se, lo thleng se, ni se, theih se kan ti a. A thleng chuang si lo. Chu chuan, thinlungah ser nung a siam leh thin.

Hmanah tunah i sakhmel leh nui ri kham ni ka nei si lo,
Kim te’n han dawn chiang leh la e i thinlai tui ang,
Han nem leh se tlei dang par ang lawmlai i bang mahna.

Hun tha leh hlimawm kan nuna kal tawh leh liam tawhte, kohkir leh chak lo hi mihring zingah kan vang ngawt mai thei. Chung chu kohkir leh thei pawh lo ni ta reng reng i la, ngai kan awh leh a har tawh ngawtin ka ring thin. Kan inthen chhan, in kalsan chhan leh ngaihsak lo nia kan inhriat thinna te chu chhut nawn ve thin se, inchhir leh tura kan rinna mai mai chuan; min hnem chawk a ang bawk.

Suangtuahna thiantha-ah kan sawm a, lunglenna chabi kan hmatheh a. Kan inngaihtuah lungkuai a, kan inkhawngaih a; khawharna nen hun kan hman tawk lah a bo ngai chuang lo. Chu chuan thil awmdan a thlak danglam chuang lo va, a thlak danglam ngai hek lo ang. Heti hian a tawp Ms-i’n min khar sak a-

Engan kher nge nangkher ka lo tawn che thinlai dam ni awm lo,
Engtik nge maw nang nghilh zai rela suihlung dam te’n;
Zan mut chhina ngaihngam te-in nunkhua ka hman hun tur?

Chung – lunglen leh khawharna te chu theihnghilh kan duh a, kan tahpui leh lawi thin a. Kan bialnu/bialpa te chu, an mahni kher tawng lo i la, ka chuti kha ti lovang tiin kan inhnem chawp a. A hun laia kan hmangaih leh kan duh ber ber te, an aia hmeltha leh duhawm awm chuang lo ni a kan lo hriat thinte erawh an ni lawi tho bawk.

Hringnunah hian, duhaisamin kan khat a. Duhthusam leh suangtuahna hlirin kan khat mai niin a lang. Min pawmpui em ka hre lo. Sam rawh, sam tawp tawp rawh..samah sam luat a awm chuang lo. Hmangaihna avanga kan tahna nge tam ang a, kan nuihna tih hi lo chhut ve thin ang che…

Similar Posts:

Recent Posts:

9 Responses to “An nem mi u”

  1. 1
    Awmtea Leo Khiangte Says:

    Chhiar dawn ang.

    Report this comment

  2. 2
    sheldon Says:

    Tukchhuah nuam vek u le (L)

    Ka hman ve leh chhiar ang.

    Report this comment

  3. 3
    lr hlonchhing Says:

    Tukchhuah nuam vek u (L)

    Report this comment

  4. 4
    mate ainawn Says:

    Chhiar hma hauhin kan “Eih-ah” phawt ang e..

    Report this comment

  5. 5
    lr hlonchhing Says:

    Comment test lawks…

    Report this comment

  6. 6
    Chhuaklinga Says:

    Sam an sam luat a awm nem maw ka lungkham ainawni ka lo ti ve lawk ang e. :) (F)

    tren tren

    Report this comment

  7. 7
    mate ainawn Says:

    Ehermss..@ 6 Au Chhuaklinga

    Report this comment

  8. 8
    lr hlonchhing Says:

    Inva inchhai hnai ve aw :-P

    Report this comment

  9. 9
    Dr John Says:

    (Y)

    Report this comment

Leave a Reply

You must be logged in to post a comment.