mi(sual).com

Kum 15 dawn lai a vei ve ta, kha zan kha ka la theihnghilh thei reng reng lo mai. March thla laihawl vel a ni a, boruak nawm lai tak a ni. Zankhat chu ka mu lai chu zan dar 11 velah hian hmeichhe aw hian pawn atangin min rawn au hi ka hria a, tunge ni ang aw ti a ka ngaihtuah vang vang lai chuan ahma aia fiah mah hian min rawn ko leh ta a. Tichuan, kan inha te te a pawnah chuan ka va chhuak ta a. Kan in kawtah chuan hmeichhe pakhat samsei deuh, kekawr tlawn ha, pian nalh zet mai hi alo ding a, electric eng in a chhun phak chiah loh avangin a hmel chu chiang tak chuan ka hmu thei lo va, mahse hmai bial lam deuh hlek ani tih chu ka hrethei a. Ka rin dan chuan vengdang a ka thiante tu emaw, kan veng vela lo kal in min rawn ko zawk mai mai emawni chu aw ka ti deuh hlek a, amah chu kan enchiang ngial dawn thina, a hmel tak ka hmu chiang hleithei tlat lo mai.

“Nangmah emi min rawn ko tu kha,” ka ti ta tawp mai a. Ani chuan aw ngaihno bei tawk hian: “Ni e, koh i va hre theilo em em, ka lo nghak reng che a,” ati a. Mak deuh mai in nel ruk nghal na riau hi ka nei a. “Enge ni a, tunge i nih ka va hre mai lo e,” ka ti a, ani lah chuan, “Min hriat ka ringlo rengah, keiman ka hria che alawm, kan thil tih na ah ka rawn sawm ve dawn che a,” ati a. Kei chuan “Eng thil tihna ah maw, khawiah maw” ka lo ti deuh hu a. A aw chuan engtin emaw tak hian min hip riau mai a, ka zui hreh lo nghal em em ringawt mai a ni. “Lo kal la i hre mai ang,” ati a, kal a rual ta nghal ta mai a, kei lah chuan engdang sawi lemlo chuan ka zui ve nghal chawt a. Mak deuh mai chu tunhnu a ka ngaihtuah let leh hian khatih lai khan rilru fim ka pu lo reng reng in ka hria.

Kan in piah lawk hi thlanmual kawng a ni a, chulam ah chuan a chhuk a ka zui ve ta zel a, in a awm thla vek a, mi inkawt eng deuh zawnah chuan a hmel chu kan en chianga, hmai bial lam deuh, hnar ngul nalh tak mitmeng zim lam lek lek, ngo lampang hi ani a, a hmel te chu a tha reuh in a ngainatawm phian mai a, ka lam a rawn hawi a, “Mak min va tih hmel ve,” nui deuh chung hian a rawn ti a, a nuih zawng chuan a biangah chuan biangsum hi a awm lehnghal a. Kei chuan, “Mak ti deuh e, tunge i nih ka hre bawk si lo va, khawnge kan kal dawn pawh ka hre si lo va,” ka ti a, ani chuan, “Sangte, tiin min ko mai dawn nia, kei chuan ka hre lutuk che alawm abak chu nakinah thlen hun ah i la hre mai ang, i lo muhil hman tawh em ni a?” a ti a, eng eng emaw hi kan sawi thla dun bawrh bawrh a. Kan veng thlanmual in tawp ber ni a ka hriat chu kan kal pel a, a thlang lawk chu lui ni tawh a ka hriat ah chuan in pakhat thar deuh mai pangnai tak hi alo awm reng mai a.

Mi hi an lo ri deuh laih laih bawk a. Hriatloh kar in inthar an sa anih dawn hi ka ti rilru a, mak chu ka ti ve deuhhlek a. Ka rilru hria niawm takin Sangtei chuan, “Inthar kan lawm a, ka pa in han sawm ve rawh a ti a ka rawn hruai che anih hi,” a ti a; tichuan, inchhungah chuan min hruai lut ve ta a. An in chu rinai takin a lo zauva, a chhung vel pawh an chei nalh in an tawk felfai phian mai a. Mi hi 30 bawr vel hi an lo awm a, nula tlangval an ni tlangpui a, tumah ka hmelhriat ka hmu lo va. Inchhung ah chuan pindan panga vel hi a awm a, living room leh, choka leh sitting room ang chu an hawng tlang vek a, Sangtei chuan min kai a min hruai zel a, alo awm ho chu a hmei a pa in hmel pangngai tak tak vek an ni mai a, a tam zawk chuan min ngaihsak awm pawhin an lang lo va, no hi an dawm far hlawma, music hlang ka hriat ngai loh cool deuh mai nalh zet hi an play bawk a, an inchhung bungrua vel chu a changkang hlawm kher mai a.

Sangtei chuan pindan pakhat ah min hruai lut ta a. Chu pindan ah chuan nula pathum hmeltha deuh deuh leh an nu leh pa ni awm tak la valai tak hian dawhkan bial lian angreng tak hi an lo kil a, eitur chi hrang hrang hi an lo inchhawp teuh mai a, in tur pawh a um hian an lo chhawp far bawk a. Pa lo awm chuan, “E, kha i rawn kal thei maw, lo thu rawh, kha Sangte a bulah khan thu la han thlit ve phawt teh alo zak palh ange,” a lo ti hlut a. Sangtei chuan thutna min pek pah chuan um chu ala a no pahnih ah chuan a thli ta nghal a, no pakhat chu min rawn pe a, amah chuan no pakhat chu a dawm ve bawk a, eng khaw sawi lemlo chuan kan tlak pawp mai a, a tui in a tak kher mai, ka sa nghal pawp in ka hria. Sangtei chuan tlem tlem a lem pah chuan min rawn tlit khah sak lehnghal a, ka rilru chuan ka tlak pawp tawh miah lovang ka tia, chutih lai chuan a pa chuan, “Tikhan i duh duh kha eiin in rawh, hei in vengah kan rawn awm thar ve dawn a, kan han lawm ve anih hi, laina hnai ho nen, mak min ti maithei a mahse tlang deuh in tute nge kan nih ka hrilh nghal mai ang che,” ati a. Kei chu ka lu a kai deuh der mai a, ka ngampa nghal sawt mai a, dawhkana an eitur chhawp chu ka ban a, sa chi hrang hrang kan ro deuh te, eng eng emawni tuihnai tak tak a ni hlawm a.

Sangtei chuan, “Hei hi ka pa ania, hei hi ka nu ania, he mite pathum hi ka nau te an nia, ka u te pahnih chu pindan pawn lamah sawn thiante ho an kawm anih kha,” alo ti a; a unau te ho pawh chu an hmeltha kher mai. Chutah apa chuan, “Ni e, Sangtei hian alo hmu thin che a, a sawi a sawi thin che a, han sawm ve rawh ka ti a, a rawn hruai che a,” ati a. A pa vek chuan, “Kan hrilh tlang nghal law law mai ang che, hei helai in veng leh a chheh vel bial tu te hi kan ni a, nangni chuan LASI te, RAMHUAI te min ti a, min hmuh dan dan hian in duh duh hian hming min phuah vel mai mai a, kan inlar dan ang ang hian hming hrang hrang hi min phuah vel mai mai chu anih hi. Tunah te hi chuan ramhuai in tih ang hi kan nih pawh i ring tawp nang, mahse hlauthawng suh thlamuang deuh khan i awm dawn nia,” ati a, a nui huah huah mai a. Kei chuan ka lo rin rilruk deuh anih avangin mak pawh ka ti vak tawh chuang lo va, ka hlau hranpa chuang lemlo bawk. Pindan pawn lamah chuan an ri laih laih a, Sangtei nau te ho pawh chuan eng eng emaw min zawt a, min be hluah hlawma.

Tichuan, eng eng emaw chu kan sawi a, kei pawh pa tawngduh tih takah ka phul ve hluah mai a. Sangtei chuan, “Ka pa hi chu i hrethiam dawn nia, a tawng duh ania, tihian thil a sawi leh vak mai ang,” ati a, a nui deuh sak a, anui lai han hmelthat duhawm zia kha aw! Tun thleng hian mithla ah a cham reh thei lo. A nu chu a thova, “Midang ho ka lo va be lumlam ange,” a ti a, a chhuak phei ta a, an eitur siam lah chu a tui hrep mai. Hriatloh karin a no 4na ka lo dawm leh der tawh mai. Kei chuan Sangtei pa chu eng chen nge an awm tawh a, enge an tih ber tih te ka zawt ta a; ani chuan, “In veng bawr ah tak hi chuan kan la awm rei vak lo va, kum 10 vel bawr aniang, keini ho hi chu mi tina chi te kan ni ve lo va, tihian kan awm a, in chetla te hi kan thlithlai reng che u a; tichuan, report te kan pe ve leh thin a; tin, kan in thlak kual ve fo va, nakinah chuan midang kan awmna ah hian an rawn awm ve leh anga, chung ho an sual deuh chuan in tan a hrehawm deuh animai” ati a, min en vung vung a.

Tichuan, ka hnenah tihian a sawi ta a: “Hmaa, Mizo ho hi chu in mawl ka ti,” a ti ta deuh tawp mai a. “Engatimaw?” ka ti deuh hu a. Ani chuan,”Hmanlai in pi leh pu te atang khan in mawl em em a, khang hun chu ka hrethiam a, chutah sap hovin an awp che u a, an hrual fing zolo che u a, an kalsan dawn che u pawn in changkan zawk na tur an thu hnuaia awm aiin an mahni in nin avangin in changkan loh na tur zawk India awpna hnuaia awm in Hruaitu ten an thlanga, in inti fing si in fing si lo,” a ti ta deuh duah mai a. Amah vek chuan: “Ka hrilh tawp mai ang che, in inti fing in thil in inti hre si, mahni thu in duh si, bum in nuam si, in thatchhe bawk si, in rilru a tawi, hmalam thlir in thiam si lo, tuman in ram in hmangaih tak tak bawk si lo,ram leh hnam ka hmangaih in ti a mahni tanghma inhai vur nan bak in hmangaih tak tak bawk si lo, a der a nun in hrat bawk si, rim taka thawh a hausak ai chuan awlsam taka pawisa hmuh in duh bawk si, thalai ho lah hi hnamdang sap ho nundan ka entawn in ti a, an incheina leh a chhe lai chauh hi in entawn a, an taimakna te, an tawrhchhel na te, an tum ruh na te, mahni intodelh an tum na te entawn mang si lo. Hna a vang in ti a, in iak in iak a, in ram a hnamdang vai leh khawchhak mi ho heti zat eizawnga awm thawh ang te hi an thawh ai thawk peih ula hna avang in ti lovang. Tin, hnam dang an tam pawh in ti in ti lovang. Hetiang chuan in la ral tawlh tawlh anga, in ram hi ala chhe tawlh tawlh ang” ala ti ta deuh deuh a; Sangtei nau te ho chuan, “Ka pa chu i ti leh vak thin a, nuamlo a ti ange,” an lo ti laih laih a. Ani lah chu a thu nui vun mai bawk si a, a tawng ka ngaithla atalangin ka no dawmlai chu ka lo theihnghilh pek a, tlem chu kan lem leh a, Sangtei pawh chu a meng nawi ve deuh tan tawh a, nuih sen sen pah hian min rawn melh leh zauh thin a.

Sangtei pa chuan ala duhtawk lo nasa mai, “In kohhran hruaitu leh rawngbawltu tam zawk te phei hi chu kan thiante ho pawn tihbuai en ah pawh an en peih lo, an lem hlawm ropui si. Kohhran a rawng bawlna hi kawr ah an hmanga, a ruk in thil sual an Lalpa duhloh zawng an ti hreh chuang si lo. Keini ho takngial pawn heng ho hi chu kan nuih pawh an ti za phalo, kan ngainep ve tho,” a ti tlat mai. Ka ngaihtuah a mak ka ti khawp mai. Sangtei pa vek chuan, “Hetianga in awm reng a, thalai ten in nun dan leh rilru put hmang te in thlak loh a, in ram hruaitu te leh kohhran hruaitu ten an nun dan leh rilru puthmang te an thlak loh chuan tun atanga kum 100 a vei leh chuan in la inchhir viau ang mahse a sawt tawh lo ang. Chuvangin in ram in hnam hi in hmangaih anih chuan TUNAH HIAN MIZO MIPUI TE HI HARHCHHUAK MAWLH TEH U” ati ta a. A dik ka ti bawka ka ngawi ta vang vang. Ka sana kan en a alo tlai tawh hle mai a, zanlai a lo pel daih tawh mai a. Ka rilru hria niawm takin Sangtei pa chuan Sangtei hnenah chuan, “Hmaa hi han thlah tawh rawh, zan dang ah in pahnih in inla inkawm tha leh zawk dawn nia” ati a. Sangtei chuan min rawn melh a; tichuan, ka thova a pa te leh a unau te chu ka mangtha a, apa chuan, “Kan mu ve ngai hleinem,” nui vur vur chung hian ala ti hram a, kan chhuah phei chuan midang ho chuan min lo mangtha sap sap a.

Sangtei chuan ka kutah a vuan a, a kut chu a vawt thler mai a, min rawn en a, “Zan dang ah pawh i la inkawm thin ang aw, min hmu lo mah la i bulah ka awm fo ania” a ti a, “Ni tehreng e a,” ka ti a. Tichuan, kawngka chu min pen chhuah pui ta a. Kawngka min pen chhuah pui chiah chu ka phu zawk a, ka harh hlawl mai a, KA MUMANG ALO NI RENG MAI A.

By: BigDaddy Hmahmatea

{R.Lalhmangaiha}
Kulikawn, Aizawl. Mizoram

Similar Posts:

• Camping ah Isua inlar
• Hnung Lama ZU Barh
• Misual ho ngaihdan hriat a van chakawm em
• Youtube video post zir nan
• Misual lo thleng

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Saturday, February 2nd, 2013 at 5:00 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.