mi(sual).com

Natna khumah, natna khirhtak mai tuarin ka mu a, ka taksa chu mawngkaw tha nena ka tan ngial pawhin mahni chuan saisir a inleh takngial pawh ka thei ta lo. Ka chau ngawih ngawih a, taksa nalo lai a awm zeuh zeuh a, eng thil mah ka ei chak hek lo. Ka tana nuam ber chu tuma chimbuai lohva, khum laizawla mahni tal tal a tal kual mai mai aia thlakhleh engmah dang reng ka nei lo. Ka khawhmuh a la dik a, ka beng lahin hna ala thawk tha viau lawi bawk si a. Thenrual tha te leh laina hnai deuh te chuan min kil bial tuau mai a, ka hriat phak si loh hian an in hrilhru ser ser a, min melh hrek hrek a, an hmel han en chuan an thla a muang lo tih hi a hriat reng mai a, kei lah chu ka thla a muang viau lawi bawk si a.

Chutia chau em em leh na tak tuara ka awm lai chuan khawi veng mihlim in ti rau changsang vakvel pakhat chu a rawn tei lut ve nawlh mai a. Keia damlo chau let reng chu min rawn tawngtai ta hluah mai a. Eden huan bawhchhiatna atanga chui chho zelin Bethlehem bawnginah. Chutah Kalvari tlangah, chutah Paula hovin Korinth khua vel ah min zin kual pui leh hrep a, chutah Hmangaih Johana nen tawtawrawt pasarih ham vel min han hmuh pui leh te te hnuah Lalthutthleng varah ro kan han rel leh te te a. Tichuan keia damlo thi lek lek chu Pathianin a rawngbawl tura min kohna ah an puang daih mai a. A tawngtai rei lutuk hian min ti chau zual, ka tan a ninawmna bak chu a tangkaina ka hre lo, tin Pathian hian a rawngbawl turin min ko chu nise ani mihlim vakvel hrilhhriat ngailo hian keimah ngei min hriattir ka rin tlat bakah mi natna zawng zawng hi Pathian kohna a nih ka ring lo bawk. A kal liam chu ka thaw huai mai.

Nuam ka tih dan ber in ing-euh kawisawi deuh takin thei leh thei lovin ka’n mu ting-tawm kual ve hram a, chutah rang lutuk maiin ka laina hnai-te pahnih chuan, “Awi a mut dan hi a hrehawm hmel lutuk…” ti chungin an mahni duhdan tak chuan min han siam rem nghal zat mai a, an mi mut tir dan chu kei chuan nuam ka ti reng reng lo, mahse anmahni chuan a nuam ka tihdan ber tur anih ringa inti polite tawka min mut tir duh dan a ni tlat. Aw! ka va han thu lo tak em.

Ka kaah engmah a lut thei tawh lo, eng ei mah ka chak lo bawk, mahse ka chhungte bengvar tak tak chuan ka ril a tam an hlau leh ta tlat mai le. Thil engemawni thlum da lip lep, nem deuh pir per hi thirfiante hian min han tulh lui hram a. Enge a ni ka hre lo, ei chakna pawh ka nei lo, tin a tui pawh ka ti hek lo, ka lem chak hlawl lo, mahse chhak turin tha ka nei tawh lo, thei leh theilovin ka chakna zawng zawng sawmkhawmin ka’n lem lui hram a, chumi an han hmu chu an phur ta khawp mai a vawi hnih vawi thum lai min barh nawn ta mawlh mawlh mai a. Aw! tawng chhuak thei ila, “Ka duh lo, ka ei peih lo, a tuilo em mai” han tih theih ka va chak tak em, mahse engmah ka sawi thei der bawk si lo. A khat mawi tawk lah chuan min kuai zangthal, saisir, khaikhup chhen mai leh nghal a. Ka va ning tak em!

Chutianga ka duhloh dan hlira hun engemaw chen min enkawl hnu chuan zankhat chu ka mu chu ka ral riai riai a, ka taksa atang chuan ka chhuak ta hlawl mai. Engmah na reng ka nei lova, ka zang huih mai a, ka engthawl em em mai bawk a, mahse chutianga ka awm rual chiah chuan min awmpui tu ka chhung leh khat te ho chu an tap ta laih laih mai le. Kei lah chu ka thawveng huai mai a, han lungchhiat nachhan tur reng reng ka hre bawk si lo.

Chutah ka chhung leh khat te ho chu an phili buai ta nasa mai, a thenin khawtlang hruaitute leh chhungkhat laina hmun hrang hrang ami te an lo phone kual a, a thenin ka taksa chu an lo mut that tirin ka thawmhnaw te chu min thlak sawk sawk mai a. Kei lah chuan an zing atang chuan ka thlir reng a, tumah lah chuan min hmu thei mang der bawk si lova. Mahni buai buai a buai chuan a awm awm chu an in sul-pel sup sup mai a ni.

Thenawm hnai leh khawtlang hruaitute, thalai ho te chu an rawn thleng khawm zel a tichuan kan in chu an singsa fel tan ta a. Pindan bang te an thiat darh a, kan pindan chhungril ber leh chawmpang kar zawng zawng chu an han lipse kual ta tak tak mai a. Nula hovin hmun an phiat khu rum rum, hmana ka kekawrte bo ka tih te chu khawilai almirah hnuai kar atang emawni te hian lazam kai deuh lek luk hian an rawn phiat chhuak ta nawlh nawlh mai a, saruh bung te, naute mawza khing te, cigarette bawm ruak te, ka pa ha lem hlui te, hmanlai thlalak black & white ngat te, damdawi bur ruak te, Kristiana vanram kawngzawh bu kawm te…engkim mai chu an rawn phiat chhuak khu ta rum rum mai a. An thil phiah chhuah kan hmuh chuan a lang a mawi a kan lo chet fel ve thin tehreng nen a langlo chinah chuan kan chhungkua kan lo chet tawp ruk zia te ka han hmuh chuan ka zak chem chem mai a, kan Mizo Kristianna min ti hre chhuak zawk nghe nghe a ni.

Kan in leh a chehvela mi chetla suau suau mai chu ka thlir reng a. Thalai thenkhat te thingpui ka ruang rawn tlaivar pui tu te in tur lumin zahmawh leh ti ti pawhraw tak tak sawi pah a nuih ho dar dar pah in an lo vir buai viau bawk a. Kan hruaitute ho pawh a mipui tamna lai deuh ah tih em em nei silovin pawimawh hmel tak tak in an lo vei kual ve sek mai bawk a. Inchhung lamah chuan lengkhawm hla nen ka chhungte khawhar hnem tumin an zai dup dup mai bawk a, a khat tawkin khawi veng mihlim vak vel emaw leh kan veng in la rau deuh ho chuan thu an in sawi chhawk sek mah bawk a. Ka chhungte rilru chu ka hmu ran mai si a, chutianga khawhar rilru tawt a awm lai chuan khuang ri tlut tlut mai leh khawi lam fawm chhawp Pathianthu lo iak pui vak vak chu an hne ru hle tih chu a hriat reng mai a. Chutah zan a lo rei a, nu leh pa lam an tin a, thalai rual lam an rawn tleh lut ve leh ta. Lengkhawm zai chu solfa zai in an rawn thlak a ka chungte ho tan pawh chuan tlemin a zangkhai chho ve tan ta a. Mahse chung thalai rual ho, ka thihna avanga rawn kalkhawm te awmdan chu kei an hmuhtheihloh a lo thlir reng tu tan chuan a lawmawm hranpa loh kher mai le. A inkawp te te hian an thu far mai a, tlar hnung kil thim laiah phei chuan shawl hi an in zawn a, an shawl inzawn hnuaiah chuan an kut chu a vak kual nasa ngei mai le. A thenin nihawichi an chip hnawk nuaih a, a then in an mobile phone in hmun dang ami tu tu te emaw an lo SMS daih bawk a, thenkhat lah in tute sex video leak-out an neih thar emawni te an lo in thawn ve mek bawk a. Chutiang reng reng chuan ka ruang lumen zan chu kan hmang tlingtla thei ta hram a.

A tuk khua a lo var chuan tlangval YMA member nih avanga tihtur ve reng a ngai leh hruaitu tena an phut tlawmngaih chawp ho chuan ka ruang an zalhna tur thlan chu an lo lai laih laih bawk a. Thlan lai tura kal an tam ang hu ah a thlan lai hah tak chu an tam lo hle mai lehnghal a. Thlan khur leh a bul thlan dang velah chuan an thu bial a, ka chanchin te, dawt te, zahmawh te leh thil chi hrang hrang an sawi a an nui leh dar dar thin a. Thlanmual lam atang chuan kan in lam ka pan leh ta a. Kan inbul hnai tlem azawng te chu tui fahran lo hian an zai tleng tleng a. Ka chhung te ho hmana ka damlai a min ning ru em em tu te ho chuan ka ruang chu an kil taih mai a, ka kir leh tawh dawn lo tih hre reng chung chuan ” Mama, vawi khat tal lo kir leh rawh, kan la phal lo che asin…” min ti ve tak lawm lawm a. Han thih meuh chuan a hma a min ning em em tu te pawh khan min lo ui ve deuh nge min ui der phei chu ka hre lova, mahse vantlang hmuh ah chuan min ui ve hmel khawp mai.

Tichuan min vui a lo hun dawn ta, Kohhran outlaw te kan ni lem lo bawk a pastor ngat in min vui a, thuchah tha tak mai a’n phuh chhuak dap dap a, chutah ka chhung-leh-khat te, hman a sual min ti em em thin tu te khan ka damlai a ka thil tha tih ni ve awma an hriat zawng zawng an han fawm khawm a, ka thih dawn hnaih a ka rilru a Pathian thu leh Pathian hla awm niawma an hriat ang ang te nen tang kawpa vanram min sawi luh phet an han tum sa-sawi leh te te a. Chutah kuangah min zalh ta. He khawvel atanga piallei thuahriat thim lama min thawn liam hun a hnai ta hle mai a, chumi hma chuan ka dam lai a thla min lak pui tum reng reng lo leh an thlalakna ah pawh ka lang ve ang tih hlau ru ngawih ngawih thin ho khan ka kuang nuhovin inti thiam tak mai a an rawngbawl ve na a ngai a an chei mawi ve chu thla an han lak pui leh sap sap phawt a. Chutah thlanmual lamah chuan min nawr liam ve ta a.

Thalai thi tih takah ka thlan tur chu an lo lai tha phian leh nghal a. Chutah urhsun tak a kan upa pakhat in vanram lut ngei tur anga min han chhampual leh hnu chuan thlan chhungah chuan min thlak thla ta ruai ruai mai a. Ka kuang in lei a zuk dek chu a in sawh ri dawt a, ka phu zawk a, ka harh zawk a, ka mumang a lo ni reng mai a.

{ He article hi 21st June, 2012 a Aizawl Hospital khuma ka mut lai a ka ziah a ni a. Ka bul a damlo mu an sawngbawl dan ka hmuh atanga ka suangtuahna vak vel atanga ka rawn phuah chhuah ve ani e…}

BigDaddy Hmahmatea

(R.Lalhmangaiha)

Kulikawn.

Similar Posts:

• Zan vak
• Mekong Lui
• Nau ka awi ve a!
• Tuklo no chawm.
• I thinlung hawng la

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Wednesday, February 6th, 2013 at 2:04 pm and is filed under Fiction, Luangliam. You can follow any responses to this entry through the RSS 2.0 feed. You can leave a response, or trackback from your own site.