mi(sual).com

Zirtawpni zing a ni a, ka thianpa luikala ka thurualpui thin, ka kawmngeih em em nen chuan Tuivai lam panin mutbu, bel leh luikalna hmanrua nen chuan Pathianni pawh cham tlang tumin hlim takin kan inzuithla dun a. Kan kalna tur lui hi Mizoram leh Manipur inramrina lui, khawkrawk leh chhengchhia, suar tamna a ni a. Kan kal hunlai 2007 ah hi chuan sangha pawh an la tam khawp mai.

Zing dar 11 velah chuan luipui reh ruih mai chu kan thleng thla ta hlawl mai a. Ral lehlam chu Manipur, hel pawl hrang hrangte vawk lal lenna, Self styled army naupang te te ten M-16 leh AK-47 silai kenga an duh duh an check thinna ram a lo ni ta.

Luiah chuan lui mawng lam panna tur mau pum siamna tur satin kan buai nghal hle a. Pum kan siam zawh chuan kan thiandun chuan hlim takin lui mawng lam pan chuan kan tawlh thla tan ta a. Tuan leh manga mi tawh niawm tak lung inthuah erh urh mai kara, mau pum ther huang maia han inkar thlak chu nuam dangdai ve ang reng thin tak a ni.

Peng lawk ila. Tuivai hi Manipur tanga rawn luang chhukin, Mizoram leh Manipur ramri tawite a zawh hnuah, Daido khaw bulah chhim lam panin Mizoram chhungah rawn luang lutin, Aizawl leh Champhai Ditrict inrina a rawn zawh thla zel a. Heng khua Daido, N.E Tlangnuam, Khawlian leh Phuaibuang a luan kual hnuin, a rawn luan luhna bul Daido khaw thlang lamah a luang chhuak leh a. Tichuan, Mizoram leh Manipur ramri zawh thla zelin, Ratu thlangah Tuivawlin a rawn fin hnuin, Khawpuar thlangah Manipur atanga rawn luang Tuiruang nen anin fin ta a. Hetia an infinkhawm hnu hi chuan lui lian tak a lo ni ta a. Tichuan, hmar lam panin Mizoram leh Manipur inrina zawh thla zelin. Mizoram hmar tawpah, Tuiruang (Barak)tih hmingpuiin Mizoram a luan chhuahsan ta a ni.
Khawpuar thlanga Manipur atanga rawn luang Tuiruang nena an infinna hi Tipaimukh Kai bul lawk a ni a. He lai hmun Tuivai leh Tuiruang infinna hi ‘Lalruanga chhum halna’ an tih kha a ni nghe nghe.

Pum hma lamah ka thianpa chuan ruksai(racksack) ak puar luah chungin pum chu a khalh a, keiin a hnung lamah thuin ka lo hawlh kal pui ve mek bawk a. Li champo mai, lung bang sang takin a karcheh khup mai kara kan inkar laite chuan kan pum karna mau chuan li chhuat chu a zuk hawlh phak tawh thin loh avangin, tui dum kuk mai han bih thlakte chuan hnungzang hi a hit mer mer thei a.

Kan pum karna mauin lui chhuat a hawlh phakna lai, vaukam hnaih zelah pum chu kan khalh thla hram hram zel a. Thui ve tak kan inkar hnu chuan, suar thui tak mai kan hmachhawn tak avangin, kan pum chu hnutchhiahin kham bang sang tak takahte chuan hruizam rinchhanin keiin kan kal chhunzawm leh ta zel a. Li chung zawn atanga hnuai lama li dum kuk mai han thlir thlak chuan mawng chu za duh thin tak a ni.

Kawi enge maw zat kan kan liam hnu chuan sangha perh kan chan tumna li, lipui an tih mai chu kan hnaih ta hle. Kan hmalamah chuan mihring thawm kan hriat tak avangin, kan lo nghak ta a.

Kan thawm hriat chu pa pali bawmranga sangha rep khat tlat mai phur chunga rawnin zui chho diah diah hi a lo ni a. Kan han biak chuan kan beih tum li ngei chu an lo beia, an hlawhtling hle ti kan hre ta zel bawk a. Mi hlawhtlinna lawmpui chu thil har a lo ni, rilru a hnual nghal rawih mai. Nuih a za mawlh lo a ni e.

Chutia kan tum ber an lo khawih tawh takah chuan, lunghnur tak chunga ngaituahna thar sen a tul ta. Kan bul maia li zau ve tak bula pukah chuan riahbuk sual mai zai kan rel ta a. Ka thianpain thing tuah tur a fawm laiin, keichuan riahbuk kan sual tumna bula li tawntirh a awm lungpui chungah chuan thuin sangha manna tura kan bomb ken chu ka la chhuak ta a.

Ka fit zawh hnu chuan ka’n hawi kual vel a. Li tawp vaukam lamah chuan mau pum, fur tuilianin a len thlak niawm tak chu daidul laia lungpui kara lo inzep chu ka’n hmufuh hlauh mai a. Pum tel lova tui thuk laia sangha chhar hi keini ang tuithiam ve lo tan chuan buaithlak tak a ni reng a. Tichuan, jelatine fuse chu li mawng thleng lo tawk tur vela puak tura ka tan hnuin vawm turin ka meizial zuklai chuan ka dep kai ta.

Tlai ni tla tur eng khamphei raih mai karah chuan jelatine chu a thlawk chik khu phei chal chal a, li lai tak velah chuan a tla lut ta a. Second 10 velah chuan a puak ta. Bomb puak ri hlau chuan luikama savate chu hram chungin an thlawk ri chel chul hlawm a. Amaherawhchu, tlawn khat chauh a nih avangin duh angin a hneh teh chiam lo, tui pawh a rawn phul balh lek chauh a ni.

Lensuah keng chungin, muangchangin sangha lang an awm leh awm loh en pahin pum awmna chu ka pan thla a. Pum chu harsa vak lovin lung kar atang chuan ka’n hnuk chhuak thei mai a. Mahse! Ka’n en chian chuan rala ka hmuh aidaih main a lo chhe tawh a. A hma zum tawn khawmna leh a hnung parh phuarna hruite chu chat then nual tawhin, a phuartu awm chhunte pawh mawih hmel tawh tak a ni. Mahse phuar that nan hun a awm tawh lo. Thingthi chunga chuangin, nghate lang ho chu ka suak phei pah zela. Zanriah tur chu kan nei ngei dawnin a lang ta.

Li lai ka thlen hma deuh chuan.. Thil mak a lo thleng ta tlat mai. Beisei phak loh tawp nghatun rual awmkhawm ka zuk bomb fuh a ni ngei mai! Nghatun hmui pawrh bawl hrup maite chu van lam kawkin tuichhung atang chuan rawn ang chhuak ta phuau phuau mai le! Bomb-in a hneh tawk loh avang chuan a thente chu luhai tawk chauhin an awm ni chek ang chu, tui chhhungah chuan an tleng kawi zur zur bawk a. A va nuam ngai em!

Ka hlim au thawmah chuan ka thianpa chuan a thing hnuh thlak mek chu dahin, lung kara tlu nawk nawk chungin a rawn tlan a. Nghatun hmui pawrh bawl hrup mai chung zawnga awm fur mai an hmuh chuan, a lawm lutuk chu a tawnghriat loh thlarau chang a ang maiin vaukamah chuan a tlan kual ruai mai a. A hmaa kan han lungngaih hman teuh nen. Hlimna awmzia hre tur chuan lungngaihna awmzia hriat hmasak phawt a ngai a lo ni.

Nula bawnghnute chhipchhuan thawnthu iangin, suangtuahna chu chak takin a thlawk kual nghal zung zung a, Khuaa ka thenawm chhungkuateho nghatun rep an hmuh huna an lawm nui ri tur te, Naupang ho rawn dak lut hiang hiang tur te nen. Tin, Aizawla ka chhungte, an fapa rethei ve takina a chhungte a duhsakzia lantir nana sangha rep a rawn thawn ve an hmuh huna, an hlim hmel tur te chu fiah takin ka suangtuahna mit chuan a hmu nghal zung zung a.

Nghatun ko chhuak zeta lian tawhte chu lensuahah chuan leng hek lo le. An ang phiau lai chu ka zuk zena, pum chhuatah chuan ka hnuk chhuak zel a. (Nghatun puitling hi feet 2 atanga feet 2 leh a chanve vela sei anni tlangpui. African mihang hmui ang maiin an hmui hi a pawrh turh mai a, a thap em em bawk. Lunga patek/bal eichi an ni a. An hmui bawl hrup mai hi lung bal nawr nana a hman a ni a. An lung liahna/nawrna hnuhma hi a rang neu nuau thin. Sangha tui tak a ni a. He sangha tilartu chu a lu hmui tak hi a ni)

Panga vel lai pum chhuata ka dahkhawm tawh hnu chuan. Ngaiteh! Beisei loh thil bawk a thleng leh ta! Pum hma lam chu a ri thawta, pum hma lam chu a darh nghal ta suau mai a.
Rang lutukin pumah chuan ka bawk vata, ka kut vei lam chuan pum hma lam darh zel tur chu ka vuan tawk tawk a, kut lehlamin ka sangha mansa tla liam tur chu ka chelh khawm hram hram bawk a.

Ding, vei, hma leh hnung lamah pum chu li zau takah chuan a bu tawn lawk lawk a. Hnung lam phuarna pawh chu a nghet tawh lo, maute chu a mal te te in an rawn tawlh chhuak tan ta. Rilrua Pathian hming lam mawlh mawlh chungin ka thianpa chu ka va melh tawk tawk a. Ani lah vaukamah thawmhnaw pawh phelh lovin sangha rawn lang chhuak chharin ama tawkah a buai ve em em a. Min hmu pawh ni se, kan inkar hlat lam leh tui thuk dan ngaihtuah chuan min rawn chhan hman ngaihna a awm lul lo ang, tih chu ka chhut chhuak rang ve khawp mai.

Ngaihtuahna chu a fim, mahse riru erawh a chiai thung a ni. Chu second reilote chu thi leh dam kara awm mek tan chuan rei tak hi a ni ringawt mai. Ka kut pahnih chuan pum chu pawm tlat ila chuan ka chhuak thei em em ang tih chu ka hria. Mahse ka sangha man khawmsa chu ka chan dawn tihna. A hmaa hisap letling thawkin ngaihtuahna chuan rang takin ramtin, kil tin a fang kual nghal zung zung a. Khuaa kan chhiat tawh thu an han inhrih darh tur te, lungchhe vankaia ka chhungte tah hla chham tur te… Lungphu su dup dup chung chuan chung lamah ngaihdam dina leh tanpui dilna ka’n thawn chho nghal zung zung a. Mahse chu hun tawitea ka rilrua thu rawn lut ve chu dang tak a ni, ‘mahni intanpui rawh’ tih thu mai hi.

Ekhai! kei hi mi duham mai ka lo ni. Pathianin Amah biakna ni a min ruatsak pawh zawm thei lovin luiah riah ka tum a. Chutah A tanpuina ka dil leh si! Kut khing hnih pawha pum darh tur vawn khawm tum si lo hian, tanpuina ka dil mek chu a ni si a! Mahni intanpui thinte hi a ni lawmni kan Pathian hian a tanpui zawk thin. Zir tur ka lova la ngah tak em! Tichuan, ka kut ding lama sangha ka kuah khawm chu thlahin, ka kut khinghnih chuan pum darh mek chu ka kuah khawm ta rawp a.

Tlai ni tla tur hnuaia ka thlah tak sanghate thlang lam pana tuiin a len liam mek lai chuan, keichu lungawi takin vaukam lam panin pum bawh chungin ka tawlh phei ta a.

Zirtawpni, ka tan chuan zir tan ni a lo ni ta si a.

Similar Posts:

• Sangha tui !
• Thingkha Par Lai – Nghatun Mut Hun (Ka tawn hriat te) !
• YMA hnathawh that!
• Luia Cheng Nungchate.
• Nghatun Rep !

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Friday, March 8th, 2013 at 7:12 pm and is filed under Adventure, Mizoram, Religion. You can follow any responses to this entry through the RSS 2.0 feed. You can leave a response, or trackback from your own site.