Isaia 14:12-14
Aw ‘Varparh,’ ‘Zing lam fapa,’ engtizia nge van ata i tlak tak chu le! Hnam tin titlawmtu, engtizia nge leia sah thlaka i awm tak chu le! I rilruah chuan, ‘Vanah ka chho vang a, Pathian arsite chung lamah khian ka lalthutphah ka chawi sang ang; tin, inkhawmna tlang, hmar tawp reta awmah chuan, ka thu ang a: chhum aia sang zawkahte khian ka chho vang a; Chungnungbera ang maiin ka awm ang,’ i tih thin vei nen khan.
Rom 5:13
Dan awm hmain khawvelah sual a awm tawh si a.
Aw le hei le, Kristian tam takte hriatfiah loh leh, kohhran tam tak thurin thiat dartu chu ‘SUAL BUL’ chu. Rom 5:13 thu kan tarlan khi Mihring chungchang bika bawhchhiatna bul sawina a ni a. Isaia 14:12-14 thu kan tarlan erawh khi chu SUAL BUL tak tak lo intanna, mihring awm ve hmaa lo awm chu a ni. Mihring sualna, bawhchhiatna lo, Eden huan kha sual bul intanna emaw kan ti fo va, mihringbawhchhiatna bikah chuan a dik thei ang a, mahse Sual lo awm tanna tak tak erawh chu mihring suala a tluk hma daiha lo awm tawh kha a ni zawk a. Chu chu kan BIBLE min zirtir dan pawh a ni. Tin, thuhriltu tam takin, “Lei leh van awm hmain sual a awm tawh,” tia an sawi i hre ngai em? I hria a, i lo awih ve em em thin em? Mahse maw, lei leh van awm hmaa sual awm tawh thu hi vawi khat mah kan Mizo version Bible ah hian ka la hmu ve lo. Word search hmanga ka zawn hnu pawhin ka hmu chuang lo.
Lei leh van hi engtik laia siam nge tih kan hre thei lo. Mahse, sual bul erawh chu lei leh van awm hnua lo intan a ni tih kan hre thei. Isaia 14:12-14, Ezekiela 28:11-19, Thupuan 12:7-9 te kha uluk takin han chhiar teh. Lei leh van awm hmaa sual awm tawh anga min lo zirtir(tu) thin hi a dik lo a ni tih i hmu ve thei ang. Thudik leh Thutak Bible atang kan hre thei a, mi phuahchawp erawh chu a hlauhawm thei.
Pathianin lei leh van a siam hma kha chuan ‘VAN’ a awm lo va, tin, ‘LEI’ pawh a awm thei hek lo: awm thei se- lei leh van pian hmaa LEI leh VAN awm thu hi Engkim inziahna Lehkhabu, Pathian Lehkhabu Thianghlimah hian a inziak ve ngei tur a ni. Mahse Setana kha van atanga leia paihthlak a ni tih Bible-in min hrilh si a: chuvangin
SUAL BUL tak tak lo intanna kha ‘Lei leh Van’ awm hnuah a ni tih kan lo hrefiah thei ta a. Genesis 1:2 ah pawh, ‘Tin, lei hi a chhiaa a ruak ngawt a ni a,’ tih kan hmuh kha.
Pathianin lei chu a chhe sain em ni a siam?
Ni lo ve, lei a siamah chuan Diabola paihthlaka a awm khan lei chu a chhia tiin a sawi ta mai a ni. Adama avanga anchhedawnga a awm nen tehkhinna a ni.
VARPARH, Setana lo ni ta chu:
Kan Bible ah hian Setana hian hming tam tak a nei a: tin, Setana tehkhinna mi tam tak an awm bawk. Aigupta lal te, Tura lal te, Edom, Moab, Suria, leh a dang tam tak an awm, kan tarlang seng vek lo vang. Tunah bik chuan, kan thupui bika Bible-a tehkhinna kan hmuh chu Tura lal a ni (Ezk 28:11-19). Tura lal chungchang kan sawi dawn lo va, Setana chungchang kan sawi zawk ang. Setana hi a rilrua khawlohna a neih hma chuan a ropui em em a, mawina tinrenga thuam a ni. Khai aw: ‘Pathian huan, Edenah i cheng; Lunghlu tinreng i inbel a, Sardion, Topaz lung leh Diamond, Berul, Onuks, Jaspi, Sapphir, Smarakdin, Karbankul. A phum nghehna leh a ziak mawina rangkachaka siam te, nangmah siam nia buatsaih tawhte chu (Ezk 28:13). Aw, a ropui a ni, Edena cheng tih avang hian mihring Adama emaw lo ti suh, Adamate kha chu saruakin an awm a, lunghlu chi 9 hmanga thuam an ni ve lo.
Tihian Setana mawina chu i hrethiam ruai ruai ang. Varparh nihna tluka thuam a ni a, Varparh chu Krista a ni (Thup 22:16). Khai leh aw, Setana chu, ‘Vengtu cherub hriak thih i ni; Pathian tlang thianghlimah ka awmtir chia, Mei vam iang lung zingah i leng. I tha famkim, siama i awm ni ata, Nangmaha khawlohna a awm hma reng zawng.’ tih kan la hmu ta (Ezk 28:14-15).
A chunga Ezekiela 28:13-15 ziak kan tarlan takah khian Setana thuam famkim kan hmu a, tin, a nihna ropui tak, ‘Vengtu cherub hriak thih’ a nihna pawh kan hmu a. Cherub hriak thih a nihna hi a sang em em a, lunghlu chi kuaa thuam a nih pawh hian a mawizia leh a ropuizia a sawifiah tawk em em a. Chu mai a la ni lo, ‘Pathian tlang
thianghlimah a awm a; Pathian huan, Edenah a cheng thin. Mahse, chung a mawina leh a finna a vang chuan a rilruah khawlohna a lo awm ta a, Pathian, amah siamtu aia ropui zawk nia inngaihna chu
a lo nei ta a (28:17).
Tichuan Isaia 14:12-15 thu leh Thupuan 12:7-9 a kan hmuh angin, van ata leia paihthlakin a lo awm phah ta a. Chu chu sual bul intanna tak tak chu a ni ta a ni. Mihring sualna erawh Eden huana SUAL lo irh chhuak leh chauh kha a ni a, mahse, chu pawh a bul tumtu chu amah Setana bawk chu a ni.
“Chutian unaute u, Pathian khawngaihna avang hian inthawina nung leh thianghlim leh Pathian lawm tlak ni turin in taksa chu inhlanah ka ngen a che u.”
*Controversial post a ni a, mahse a duh tan chuan a interesting theih viau ang*
Similar Posts:
- The original creation of God
- Setana hi a biak tlak tak tak em?
- Pathiana mihringte dinhmun;
- Setana Thlêmna Thang Hlauhawm Ber 3
- Lucifer-a hi tunge?
March 23rd, 2013 at 10:18 am
A inthuamna lunghlu ringawt pawh hausak lawih na tham tren2.
Report this comment
March 23rd, 2013 at 12:36 pm
Sual chu engnge? Pathianin sual hi a siam em?(Engkim siamtu a nih chuan).Nge engkim awmzia hian limit a nei zawk?
Report this comment
March 23rd, 2013 at 12:56 pm
Alanism, sual hmasa ber chu ‘MAHNI INDAH-CHUNGNUNNA of CHAPONA’ a ni. Chu chu ‘PATHIAN AIA ROPUI TUMNA’ a ni. Chu thil chu Vengtu cherub hriakthih, Varparh- zing lam fapa, tuna Setana lo ni ta atanga lo awm a ni a. Ka Bible hman lai, Mizo version bu 2, leh English version bu 3 ah hi chuan Sual hi Pathian siam anga a ziah awm reng reng ka hre lo..
Tuna ka comment pek dan hi
a chapo thlak i ti em? Hetiang deuh hi a nih ka ring.
Report this comment
March 23rd, 2013 at 1:10 pm
Sual hi engkim zingah a tel lo em ni? Isaia 45:7 kha chhiar teh.Evil tiin version thenkhatah a awm a,calamity tih pawhin ziah a ni.
Report this comment
March 25th, 2013 at 2:15 pm
A tha viau mai.
Report this comment