mi(sual).com

United States a Catholic Bishop zingah chuan, Archbishop Fulton Sheen hi lar leh hmingtha ber te zing ami ani awm e. Television lamah te, Radio-ah te rawngbawlna hlawhtling tak a neih thin bakah, University hrang hranga Seminar-ah te thu sawi tura sawm a hlawhin, a thu leh hlain mi lawm leh ngaihsan a hlawh hle thin a, midangte a tha zawnga kaihruaitu ropui tak anga ngaih anih avangin, a thih hma lawk thla hnih velah khan National Television ah Interview an neih pui a, chutah chuan, “Mi maktaduai tam takte nunkawng atha zawnga kaihruaitu ropui tak ini a, Nangmah hetiang taka I nun theih na chhan, I nun kawng a tha zawnga her danglamtu leh kaihruaitu hi tunge ni? Pope em ni?” tia zawhna chu chhangin:-
“Ka nun kawng a tha zawnga her danglamtu hi Pope emaw, Cardinal emaw Father leh Nun te nilovin, Chinese hmeichhe naupang kum 11(Sawm leh pakhat) mi ani e” tia a chhanna chuan mi ngaihven a hlawh hle mai a. “Chu chu tu ngeni a, I sawi chiang deuh thei em?” tia an zawh leh na chu, heti hian a chhang a ni.
Kum 1911 vel laia Communist hovin China-ah rorelna an han chan tan a, Sakhua zawng zawng, a bik takin Kristianna hnawhsak tiin, tih bo vek an tum lai khan, Sap Missionary Puithiam pakhat, Kohhran pakhat enkawl mek pawh, a kohhran(Biakin) enkawl bul mai a, a inah an tan tir(house arrest) a. A pindan tukverh darthlalang phen atanga a han thlir chuan, Communist Sipai ho chu an Biakinah chuan an lut a hmu a. Biakin bungrua te chu an tichhe ri rum rum mai a, a Sacrament semna ketli leh a Sacrament no 32 awmna Tray(Sacrament no dahna) te pawh chu a no chawp chuan, an paih darh keh chuai chuai mai a ni.

Chutia, an duhtawka an suasam zawh hnua an chhuah lai chuan, anmahni lo thlir reng tu leh, Biakin hnunga lo tawngtai char char Chinese hmeichhe naupang kum 11 mi lek chu an lo hmu chang lo va. Chumi zan chuan, chu hmeichhe naupangte chu, a ruk tein, chu Puithiam in vengtu sipai hmuh loh chuan, Biakinah chuan a lut ru a, Puithiam awmlo mahse, ti tak em emin a thingthi a, Sacrament tui la baw bangte chu a kutin tawk thianglo mahse, a thingthi a, a kut inbengkhalhin a liahin a zu liak a, tih tak zetin a tawngtai a, darkar khat vel hnuah, a ruk tein a haw leh a ni.
Chutiang chuan, zantin pelh hauh lovin, a hun pangaiah chu hmeichhe naupang chu Biakinah chuan a rawn kal thin a, a tihdan pangai chuan, urhsun takin Pathian a pawl thin a ni. A zan 32 naah chuan, thawm a dim tawk ta lo va, Puithiam in vengtu chuan, a hmu fuh ta a, a Silai kawm chuan chu hmeichhenaupang khawngaihthlak tak chu a chhu ta chawrh chawrh mai a, a chhu hlum ta der mai a ni.
Chu thu a han hriat zet chuan, Bishop Sheen-a chu a rilru a khawih ta kher mai a, mi thar lo ni tain, a rilru a siam fel ta a, ‘Tun atang chuan, chu hmeichhe naupang ang chuan, Zantin pelh miah lovin, Pathian pawlna hun darkar khat a insiam ziah tawh ang a, eng thil mahin a dang tur ani lo’.
Bishop Sheen-a chuan a thutiam chu a hlen chhuak satliah mai pawh a nil ova, chutiang anga nitina Lalpa pawlna hun nei ziah turin midang tam tak a zirtir a, an nun a khawih danglam a ni.
Lal Isua tehkhin thua Samari mitha kha tunge a hming tih kan hrelo ang bawkin, he Chinese hmeichhe naupangte hi tunge a hming tih chu kan hre bik lo; amaherawhchu, Samari mitha ang bawkin mi tamtak thinlungah thu a sawi a, a nunna pawh thlahlel hlei thei lovin, Lalpa Ina Lalpa pawlna hun nitin darkar khat tal neih chu pelh a tum hauh lo a ni. Keini ram zalen leh hmun zalen zawka awmte hian, nitin chu sawi loh, karkhata vawi khat, Sunday-ah takngial pawh, darkar khat tal Lalpa tana serh hranga Lalpa nena inpawlna hun hman te hi, ‘hman lo’ kan inti em le?
Lalpa nena inpun hmang turin darkar khat chauh tal pawh I hun I pe ve thei dawn em le?

Similar Posts:

• Sacrament leh Naupangte
• Ti nge?
• Zanriah hnuhnung leh fanghma
• Thil hlu pahnih
• “I âw-ah a âw ka hre thei asin!”

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Monday, March 25th, 2013 at 8:31 am and is filed under Event, Lifestyle, Religion. You can follow any responses to this entry through the RSS 2.0 feed. You can leave a response, or trackback from your own site.