Puithiam rinna ngah tak mai hi a nupui leh fapate pahnih nên hlim takin an chêngho a. Ni khat chu thil tûl avangin ni eng emaw zât thang bo tûrin a zin a. A zin hlân chuan a fapate pahnih chu car accident-ah an thi ve ve ta hlauh mai a.
Thu inthawn zung zungna a awm loh avangin puithiam nupui chuan a pasal lo hâwn hun nghâkin khawhar takin a tuar ta ngawt ngawt mai a ni. Hmeichhe tuarchhel tak, huaisen tak leh Pathiana rinna ngah tak a nih avangin chu thihna râpthlâk tak pawh chu a tuar chhuak thei hrâm hrâm a. A rilru tibuaitu leh hlauhthâwn ber zâwk chu a pasal rawn hawn hunah eng tin nge a lo hrilh ang tih chu a ni. A pasal chu tûnhmain lung lam that lohna avangin damdawi inah te a lo awm tawh thin a, a fapate thih thu a hriat chuan a lung tha lo chhuak lehin a thih phah mai ang tih a hlau hle a ni.
A pasal rawn hâwn hma zânah chuan theih tâwpa tawngtaiin a mamawh chhânna chu Pathianin a rawn pe ta a. A tûkah puithiam chu a rawn hâwng a. Puithiam chuan a nupui chu duat taka kuahin a fapate chanchin a zâwt nghâl a. A nupui chuan a fapate chu ngaihtuah buai rih lo turin leh inbual faia châwl hahdam rih tûrin a ti a.
Darkar a liam leh chuan chaw ei tûrin an thu dûn a. A nupui chuan a zinna chanchin te a zâwt a. Puithiam chuan a zinnaa Pathian zahngaihna leh awmpuina a chan nasatzia te a hrilh a. A fapate chanchin chu a zâwt nawn leh ta a.
A nupui chuan zawi sat leh hrilhhai ang reng tak hian a pasal chu a chhâng a, “Ngaihtuah buai duh suh, nakinah kan la sawi chhunzawm dâwn nia. Tûnah chuan harsatna lian tak ka neih hi min chinfelpui hmasa phawt la ka duh a ni,” a ti a.
Puithiam chuan ngaih tha lo tak leh hlauthawng ru tak chung hian “Eng thil nge thleng? I chauh hmêl êm êm lehnghâl! I harsatna chu min han hrilh teh. Pathian tanpuinain kan chingfel ngei ang,” a ti a.
A nupui chuan, “I zin bo hlân khân kan thian pakhat a lo zin a, thil hlu tak pahnih, a hlut zâwng chhut chhuah zawh rual loh hi min rawn pe a. Khati ang rêng rênga thil hlu kha ka la hmu ngai lo. Kan thian chu ni eng emaw zât hnuah a rawn kîr leh a, a thil hlu min pêkte chu lâk lêt leh a duh thu a rawn sawi a. Ka duh êm avangin kei chuan ka pe phal ta lo a. Ka chân phal hlawl lo a ni! Nang eng nge i ngaihdân?” a ti a.
Puithiam chuan, “Kan ta ni lo kan pêk lêt hian chân kan ni lo. Kan ta ni lo kan kawl tlat hian rûkru tluk chauh kan ni zâwk. Kan pe kîr leh ngei tûr a ni. Vawiinah ngei hian kan pe kîr leh ang, ka pui ang che,” a ti a.
“Ka duh tak, a tha alawm, i duh ang tak chuan kan ti dâwn nia. Chu thil hlu tak pahnih chu kan pe lêt leh ngei ang. A nihna takah chuan kan thil tih tum chu hlenin a awm tawh zâwk. Chu thil hlu pahnih chu kan fapate kha an ni. Pathian chuan min ring zo a, min enkawltîr a, i zin hlân khân a rawn la leh ta a ni,” tiin puithiam nupui chuan hnuk ulh teuhin a sawi a.
Puithiam chuan a nupui chu a kuah vawng vawng a, an mittui a sûr zung zung a. A nupui thusawi awmzia chu a hre chiang hle. Chu thihna râpthlâk tak chu lâwmna, lungawina leh lungchhiatnain an hneh ta a ni.
Similar Posts:
- Zorama chirhdumah a tla
- Nupa nun hlimna tur atana zawm ngai thenkhat te.
- Josefa Lehkhathawn
- Nupa
- I pasal duhzawng i hriat sak em? (Hmeichhe pual)
October 10th, 2013 at 11:36 am
Fa nei tawh tan chuan mittui a hnai mai dawn ka ti! Rilru a khawih zawr mai. Good post.
Report this comment
October 10th, 2013 at 6:06 pm
Kei pawh min hneh khawp mai.
Report this comment
October 10th, 2013 at 11:33 pm
A lo kawl hawhtu mai kan ni tih min hriatchhuah nawn tir leh e. Good post.
Report this comment
October 10th, 2013 at 11:43 pm
A va tha em, he lei a kan awm chhunga Pathianin ro min pek kan fate hlut zia min hriat thar tir leh e.
tren tren
Report this comment
October 11th, 2013 at 6:43 pm
Tha ve
Report this comment
October 11th, 2013 at 11:10 pm
Kan fate mai ni lo kan nunna ngei pawh hi keimahni ta a ni si lo a.
Report this comment
October 12th, 2013 at 2:10 pm
kei zawng ka fate hi ‘kawl hawh’ angah ka ngai phal meuh lo chu a ni e…ka ta dik tak..ka enkawl tura min pek liau liau ni tlatin ka hria….
Report this comment