mi(sual).com

TV Series hmuhnawm tak

Discovery TV network hian Bible leh a kaihhnawih hrang hrang programme an siam thin a, Mahse secular point of view tak tak anni zel. Mahse kar hnih kalta atanga History Channel in The Bible an chhuah chu a ziak ang deuh tak, quality sang tak ani. Tunah chuan Season 1, Episode 1 leh 2 chauh a en theih a. Ringtu tan chuan en ngei ngei chi. Ka rin dan chuan Gospel music video siam tute pawn Mel Gibson a film The Passion ami an hmang sup sup ang deuhvin The Bible (2013) ami hi an hmang uar phian ang.

History Channel hi ram thenhkata History A&E nen a inang lo. India ram cable network ah chuan a hmuh theih rih loh ka ring.

TV series mah nise, hun an ren aniang, Jakoba leh Josepfa an kal kan daih. Ambrahama leh Isaaka ne pafa atangin Mosia a thleng duai.

Hetah hian a en theih. Hetah hian a en theih. https://www.free-tv-video-online.me/

Tumkhat Tel Aviv atanga Mumbai pana thlawhnaa kan chuan laiin kan thlawhna chu thlipuiin min nuai ta mai. Air Hostess ho chuan a hlauhawm loh thu an sawi chunga life jacket hman dan an sawi takah chuan thil ri hlekah pawh ka meng tang hru tawh mai. Beiseina sang tak nen ka tawngtai a; a hnu reilo teah a reh ve ta mai. Mak ka tiin ka lawm hle.

Hetianga harsatna kan tawh a, kan tawngtaia, chhana kan lo awm chiah hian, “Lalpan kan tawngtaina a ngaithla thin. Kan dil apiang erawh a aw mai ngai lo. A changin ‘nghak rawh’ a ti a, A changin ‘heti chuan ni love” a ti bawk thin. Kan tan a thil tha a ruat zawk vangin. Pathian khawtlaina hi min hnawlna a ni lova; kan tawngtainate a ngaithla thin a ni. Kan harsatna engkim a hre vek a; ni tina kan lungkham em em pawh a hria a ni. A tanpuina chu a rawn thleng mek a ni. Hringnuna kan mangannate a thlir reng a. A hnen kan pan lehna hmanruaah a hmang a ni. Ani chu a rinawm a ni tih i hmu ang. I harsat leh mangan lai ber pawh khan i tan thil tha ber a lo ruat diam tawh asin!

Kristiante nunah hian tawngtaina chungchang hi sawi uar tawk a awm thei lo. A chhan chu van hawnna chabi a nih vangin. Kan thlarau nuna Pathian hnathawh theihna thlentu a ni a, tawngtaina chuan Thlarau Thianghlim thiltihtheihna chawk thovin Bible thute chu ruh chhunga meiling inkhung ang mai in a ti nung a. Ruh chuktuah thlenga kangin Isua Krista’n a taka min awmpuinate min hriatchiantir thin a ni. Tawngtaina chuan nunna, thlarau leh rilru a tilawm a; Pathian duhzawng hre thei tur leh zawm thei turin kan mit a ti meng a; min tichak bawk a ni. Tawngtaina chuan tlang sawn theihna mai nilovin kan duhna a tichak a; kan ngaihtuahnate Lalpa a nghatin sual leh setana hnathawh do let theihna khawngaihna min neihtir a ni.
(more…)

Pathianin lei leh van leh a chhunga thil awmte a siam zawh vek hnuin mihringte chu amah kawm hlim turin min siam ve chauh va; mahse chu a mihring siamte chu suala an lo tluk tak avangin an thlahte zawng zawng chu misual, boral mai tur kan lo ni ta. Chumi chu ngai ngam lovin Pathian chuan a fapa mal neihchhun Lal Isua Krista chu kan dam nan a rawn tir a. Kalvari tlang Kross lerah anchhe tinreng phur chungin a nun a hlan a nih kha.

Kha thil kha kan rin phawt chuan chhandamin kan awm ang a; Vana kan tana lallukhum daha awm chu kan chang ngei ang. Kan rin loh erawh chuan hremhmun rapthlak tak kan hmachhawn vek dawn a ni.

Khawvelah mi fel famkim kan awmloh avangin mi zawng zawng chu misual, siamthat ngai. Sual sim tur nei vek kan ni. Mifel sim chuan tur nei lo 99 aiin misual pakhat sim chungah kan Pathian a lawm zawk avang hian kan sim tur a ni. Ngaihdamna hun a la awm lai hian mi tinin kan hringnun kaltate in enletin kan sualte I sim ang u. Chutilo zawng chatuan hremhmunah kan kal hlauh dah ang e. Chutih hunah chuan inchhirin awmzia a nei dawn tawh si lo.

Pathian thuah kan sâng, kan dai ril kan ti thin tak nain Mizote hian Pathian thu thenkhat a awmzia hriat fuh chiah loh kan nei a. Kan man fuh tawk lohte zingah hian simna pawh hi sawi hmaih theih a ni lo vang.

Simna chu khawvel atanga hawikir a Pathian hnena kirna a ni a. Thilsiama lungawina famkim neih tuma kan rilru leh ngaihtuahna te khawvel thila innghahtir kan tumna atanga hawikir a, Pathian hnena tlukluhna a ni a. Pathian tel lo chuan mihring hi a awm thei lo a ni tih hria a, fapa tlanbo anga inchhir a mahni thlitih sual leh ngaihtuahna dik lo zawng zawng dah bova inngaitlawm taka Pathian hnena tlukluhna a ni.

William Barclay chuan, “Simna chu mahni kawng zawh lai kalsana Pathian lam kawng zawh a, lei lam chauh kan thlirna atanga van lam hawina leh mahni hawi zawng thlak a, Pathian kal bosanna atanga kir lehna a ni,” a ti a. Simna lo chuan chhandam a nih theih loh a; Pathian paw’n a ngai pawimawh em em a, Thuthlung Hlui leh Tharah vawi tam tak sim tura kohna kan hmu.

Sualna avanga mi a inchhir loh chuan a sim ngai lo va, mahse inchhir ringawt a tawk hauh lo. Sual nih inhriat a, inchhira mittui tlakna hi simna a la ni ringawt lo. Ngaihdan/rindan tha neih ringawt hi simna a ni lo va, sual kalsana thiltih sual bansanna a ni ngawt hek lo. Simna chu thinlung thlakthlengna leh thiltih thlakna a ni.

Simna dik tak chuan a chunga mite a huam vek bakah inngaihtlawmna a keng tel ngei ngei thin. A thinlung a keh a, misual nih a inhria a, Pathian hnen a pan a, A hnenah a tlu lut a, nun inthlakthlengna a lo awm ta thin a ni. Simna dik taka miin a sim chuan sual a hua a, setana dovin theihtawp a chhuah thin.

Piangthar kan tam a, da leh pawh kan tam. A chhan chu simna dik taka kan sim loh vang a ni. Sual nih inhriatnaah duhtawk kan ngah a. Kan thiltihsual leh ngaihtuahna dik lote bansan kha simna a ni ringawt lo va, simna dik takah chuan heng sualte bansan hnuin Pathian hnena kir lehna a awm ngei thin a ni.

“Ngai teh u, tun hi hun lawmawm chu a ni a; ngai teh u, tun hi chhandamna ni chu a ni,” (II Kor 6:2) Tun hi sual simna tura hun tha ber a ni.

A, ka laklawh tlat! Junior berte zing ami ni mah ila zawhna kan inzawt pawp ta sa sa tun tum chu ka’n sual leh leh lawk anga. Senior-te khan min lo hrethiam hram ula ka beisei leh phawt ang ch’u.

Atheism/Atheist chungchang chu kei aia bel, ka hriat bak bak hria in ni ang tih hi ka ring a, chuvangin Atheism chungchang chu ka sawi zawm lo phawt mai ang. Kan topic ang hian lut nghal pawp mai ila(h). Thuhma bâk chu pehhêl kual deuha sawi tum lo ila. A khal deuh a nih tâk leh kan vaw darh law law mai dâwn nia.

Keimah lam:
Artist ka ni lo va, writer lah ka ni hek lo; thiamna lamah phei chuan a bo tawk leka thiam; tawng bungrua lah nise mi dangte ha hawlh za tâwk lek bawk; mi biangbiak lamah chuan chingpirinu hmel anga simile feis nei lo; mahse, mahni tapchhak zâwl atanga ka lo vei ve êm êm, vei chhuahpui awm chuang si lova ka lo chil per au pui ve duam duam thin thil a ni a. Chu thil chu ‘Pathian awm rin lohna remchang,’ kan ti dâwn nge? ‘rin duh lohna tizualtu’ kan ti zâwk dawn? Engpawh chu nise topic ka hêl thui mah mah ta, lut phawt ang aw. A tlak tlak vanduai ti teh ang.

Vawi khat leh chiah site dang hming ka’n lam ri leh teh ang!
Sawi tawh angin facebook lamah groups hrang hrangah thiante duhsakna avang leh kuthlei zarah ka awm ve nual a. Gospel groups leh I.T solutions lamah ka active deuh ber. I.T lam chu sawi zui mai tûr pawh ka hre lo, (doctrines an post ve ngai loh vâng a nia’nge). Gospel groups thenkhat lam ka’n thlir phawt anga, a bâk chu ‘live’ tualchhung lam kan thlir leh ang.