March 2013, Mizo(ram) Diary

April 8th, 2013 7:00 am by chhana

1st. Friday: Chief Minister Pu Lal Thanhawla chuan Mumbai-a Tata Memorial Centre bulah Mizoram House tur lungphum a phum. He house thar tur hi damlote tan leh thalai zirlaite tana ruahman aniin damlote ngaihpawimawh an ni dawn a ni. He house hmun hi a man thuah chuan Rs. 200 Crore (cheng vaibelchhe 200) man a ni a, amaherawhchu, kum 2000 chho laia Maharashtra Governor S.C. Jamira puihna leh a hmalakna avangin a thlawnin kan neih theih phah a ni.

2nd. Saturday: Kaladan Multi Modal Transit Transport Project kawng, km 100-a thui sial mek chu Road Transport and Highway Ministry-a Regional Officer, Pu Sudip Chaudhury-a’n a tlawh. He kawng hi Lawngtlai atanga intanin Zochachhuaha Border Trade Point, Composite Land Custom Station siamna hmun tur thleng laih mek a ni a, tunah hian km 52.15-a thui laih zawh tawh a ni. Regional Officer, Pu Sudip Chaudhury hian Bungtlang South atangin Lawngtlai thlengin he kawng hi a zawh a ni.

3rd. Sunday: KTP Rorel Inkhawm, Lunglei Chanmari Presbyterian Kohhran Biak Ina 1st. Friday a tan tak chu a tiak ta. He inkhawmpuiah hian bial leh branch aiawh pakhat theuh leh ex-oficio dangten ro hi an rel a ni. Kum 2015 KTP Rorel Inkhawm chu Mission Veng Kohhran Biak Inah nghah a ni a, kum 2016 General Conference chu Champhai-ah an nghat bawk. Nakkuma General Conference, chu nikum General Conference khan Khawzawl-a neih turin a lo tifel tawh a ni. Central KTP-ah hian Mizoram Synod hnuaia Mizoram chhung leh Mizoram pawna Pastor Bial 169 atangin Branch 793 a awm a, member 1,31,085 an awm a ni.

4th. Monday: 8-Chalfilh Assembly Constituency atanga bye-election-a Member of Legislative Assembly (MLA) tura thlan tlin, Indian National Congress party candidate, Dr. Ngurdingliana chu Assembly Speaker Pu R. Romawia chuan rinawmna thu tiamtirin, MLA-ah a lal lut. He hun hi Assembly Annexe Conference hall-a inkhawm buatsaihah Mizoram Legislative Assembly Secretary Pu Ngurthanzuala chuan Returning Officer Pu A. Biaklawma’n MLA atana Dr. Ngurdingliana thlantlin a nih ziaka a nemnghehna a chhiarchhuak a; hemi hnu hian Speaker Pu R. Romawia chuan rinawmna thu a tiamtir a ni. He inkhawmah hian Minister leh Parliamentary Secretary te, Deputy Speaker, Pu John Rotluangliana leh rorel lai pawl leh eptu lam MLA-te bakah chanchinbumite an tel a ni. Dr.Ngurdingliana hi Assembly Speaker hlui leh Minister hlui, Dr. H. Thansanga leh Pi Saihlupuii te fapa a ni a, kum 1966, September ni 21-ah lo piangin, zirna lamah Ph.D a ni a, Pachhungah University College-ah zirtirtu hna, engemaw chen a thawh hnuah he hna hi bansanin politics-ah a lut a, Congress Party zawmin Mizoramah NSUI President a ni tawh a, Congress Thalai Pawl, MPYCC Secretary leh General Secretary te, MPCC Secretary te leh North East Coordination Committee General Secretary te a lo ni tawh a ni. Ani nen hian Mizoram Assembly ding laiah rorel lai, Congress chuan member 32 an nei leh ta a ni .

5th. Tuesday: Mizoram Rural Bank (MRB), Branch 68-na, MRB Seling Branch chu Home Minister Pu R. Lalzirliana’n a hawng a, hemi hnu hian bank hawnna puala inkhawm tawite YMA Run, Seling-ah neih lehnghal a ni. Bank hawnna puala inkhawm YMA Run Seling-ah neih hi Pu F. Lalhmangaiha, Senior Manager (Accounts) in a kaihruai a, hunserh Pastor R. Lallianpara’n a hmang a. Pu C. Lalrinliana Manager (NPA, IOR) chuan MRB hnathawh leh an hmalakna tlangpui a tarlang a, Seling VCP Pu Pu Raymond Lalbiaknunga leh Seling Branch, YMA President Pu Lalhleia pawhin thu an sawi bawk a ni.

6th. Wednesday: Taxi MZ01C 9965 chu Sairang kawng PTC hlui peng thlangah Lengpui a pan laiin a engine atangin kangmei a chhuak a, kengmei hian a pumin a man a, a kang chhe hneh hle a, thi leh hliam an awm lo hlauh. Motor hi kawng chhak side drain ah a lir lut hman a ni. Taxi hi C.Laldawngliana Zonuam ami ta a ni.

7th. Thurday: Pu Rohmingliana (RHC) Farm House Lengpui Airport Road, Lengpui atanga 4 Kms, kawngpui atanga half Km vela hlaah Explosive dahna Box ruak chhungah heng arms te hi man a ni: AK47 Rifle – 23 nos (21 USSR siam leh 2 China siam), LMG 5.56 – 1 no (Singapore siam), CBAR Rifle – 1 no (USA siam), AK silai mu – 86 nos., CBAR Rifle mu – 67 nos. leh LMG 5.56 mm mu – 24 nos., Magazine – 30 nos. Hemi chungchangah hian Farm House a lo awm Chakma pathum man nghal an ni a, chungte chu: Moni Tripuri(58) s/o Debr Tripuri of Khakrapur village, Chittagong Hills Tract, Bangladesh, Robi Chakma(38) s/o Kiran Chakma of Mahajan Para, Kakrachori District, Chittagong Hills Tract, Bangladesh leh Sabuj Chakma(40) s/o Diren Chakma of Ragamati, Chittagong Hills Tract, Bangladesh te hi.

8th. Friday: Police Training Center, Thenzawla Police constable training mek, batch 65-nate chuan training an zova; anmahni thlahna hun, passing out parade neih a nia; Home Minister Pu R.Lalzirliana’n a hmanpui. Police training chhuak tharte hi mipa 104 leh hmeichhia 16, an vaiin 120 anni.

9th. Saturday: Chief Minister Pu Lal Thanhawla chuan Helicopter-in lehlangin Chawngte a tlawh a, Chakma Autonomous District Council hmalakna a Cultural Hall cum Museum Kamalanagar a sak a hawng. Cheng Vaibelchhe 6 senga sak, Kamalanagar Cultural Hall cum Museum hawnna inkhawmah Chief Minister chuan hetianga hall tha tak cheng vaibelchhe 6 man lai mai sak zawh a ni chu a lawmawm a tih thu a sawi. Chief Minister hi Aizawl atangin Pu Nihar Kanti Chakma, Minister of State in a tawiawm a. Chawngte ah hian Pu Nirupam Chakma, MLA, Lawngtlai DC Pu B.Lalhmingtanga leh CADC CEM Pu Kali Kumar Tongchangya leh thawhpui ten an tawiawm bawk a ni.

10th. Sunday: Khatla North Presbyterian Kohhran Biak In bula R.Lalawia building, Quality Hostel chhawng chung ber a kanga; bungrua engemawzat a kang chhe hman a; in chhawng dang a kan kai hmain thelh mih a ni. Kangmei hi hostel pindan pakhata mombati chhit atanga chhuak nia hriat a ni.

11th. Monday: Olimpic 2016-ah India ram aiawha Mizo infiam mite an tel ve ngei theihna tura hmalakna, ‘Vision 2016’ chu Hawla Indoor Stadium-ah Sports Minister Zodintluanga’n a hawng. Minister chuan ‘Vision 2016’ atana thlan infiam mite chu kum khatah ni 300 chhung traning an neih tur thu a sawi. Minister chuan, “Vision 2016 hian Olympic medal hawn ngei tumna lam ai mahin Olmpic-a tel ve hrim hrim tumna hi kan step hmasa a ni,” a ti bawk. Vision 2016 atan hian item hrang hrangah infiammi hetiang hian thlan chhuah chin anni: Archery 12, boxing 16, badminton 16, TT 16, weightlifting 12, hokey 24, judo 12 leh shooting 8 te a ni. Heng infiammite hi Olympic hma zawng kum khatah ni 300 chhung traning pek tum an nia; midang tha tur hmuh belh annih chuan lakluh theih tura ruahman a ni bawk. Vision 2016 hawnna prog. hi Sports & Youth Services Director, Lalzirmawia Chhangtein a kaihruai.

12th. Tuesday: Mizoram Legislative Assembly 6-na Session 13-na chu tan a ni a. Session tan ni hian Larsap Pu Vakkom Purushothaman chuan thu a sawi a, a thusawi ah hian Mizoram leh mipui hmasawnna atana Mizoram Sawrkar hmalak tawh nate leh hmalak mek hrang hrangte tarlang in Sawrkar hlawhtlin nate leh hmachhawp hrang hrang te pawh a tarlang tel bawk. Tin, NLUP chungchang a sawi bawk a; he thu a sawi lai hian opposition leader Dr. R Lalthangliana chuan NLUP chu Prime Minister Special Pakage atanga hmuh tura tih hmuh leh si loh a nih thu a chhangin MNF-MDF legislator member palite chuan house an chhuahsan. Larsap thusawina ‘Motion of Thanks’ chu Chalfilh bialtu MLA Dr. Ngurdingliana’n a pu lut a, motion of thanks hnu hian Assembly Speaker Pu R. Romawia chuan Session chu a titawp. Tum tum Assembly Session hian April ni 3 thleng a awh dawn a ni.

13th. Wednesday: Serchhipa PHE Dept. hotuten DC, Juhi Mujkherjee hovin tunlaia Serchhip khawpuiin tui harsatna a tawh chungchang an sawi hova; tui harsat chhan ber chu booster pump-a diesel engine thatloh vang leh kawlphetha duh ang hmuh theih loh vang a nih thu an sawi.

14th. Thursday: Sericulture Department hmalakna in Serchhip I.O.C Veng Y.M.A Information Centre-ah Serchhip khawchhunga pangang khawi thin chhungkaw 50 hnenah pangang khawi chungchanga thil pawimawh inzirtirna hun hman a ni a, an zinga a tam zawk hi NLUP beneficiaries te an ni. Hetih rual hian 2nd Phase NLUP beneficiaries chhungkaw 124 te bank account ah NLUP 1st Installment Rs. 15,000/- theuh an bul tanna tur thun sak nghal an ni bawk.

15th. Friday: March ni 11, 2013-a hawn, kar khat chhung awh, NLUP Implementing Board, Soil & Water Conservation Department leh Hnam Chhantu pawl tangkawpa buatsaih ‘Hmunphiah Kut’ Vanapa Hall kawta hman chu Mizoram Chief Minister Pu Lal Thanhawla’n a khar. Hmunphiah Kut 2013 kharna inkhawm hi Hnam Chhantu Pawl Vice-President Pu C.Lalthakima’n a kaihruai a. Hmunphiah chungchanga an hmalakna chu Hnam Chhantu Pawl Gen. Secretary Pu R. Romawia’n a sawi a. Kumin hi Hnam Chhantu Pawl din kum 19-na a ni a, hemi pual hian Chief Minister’s Relief Fund atanRs. 30,000/- an pawl Sr. Executive Member Pu Lalzamlova’n Pu Lal Thanhawla hnenah a hlan nghal a ni. Hmunphiah Kutpui kharna hunah hian Chief Minister nupui Pi Lal Riliani, NLUP Implementing Board Vice-Chairman Pu P.L. Thanga, Industries Principal Secretary Pu P.C. Lawmsanga leh sorkar official pawimawh engemawzat an tel a ni.

16th. Saturday: Khawvela lung zai upa ber nia hriat, VL Bela (102) Tuikual Aizawl chu a thi. Vuiliam nghal a ni. Pu VL Bela hi kum 94 mi a nih lai, 23rd. April 2005-ah BM Birla Heart Research Center, Kolkata-ah Dr. Tarun Praharaj-a’n hlawhtling takin a lung a zai a; a zaitu doctor hian khawvelah amah aia upa lung zai an la awma a hriat loh thu leh hrisel tha taka lung zai a nih hnu a kum sarih lai mai a la dam chu lawmawm a tih thu a lo sawi tawh nghe nghe.

17th. Sunday: Lunglei Bazar Veng Baptist Kohhran Biak Inah pastor pariat missionary-ah tirhchhuahna leh anmahni thlahna inkhawm neih a ni a; BCM President Rev. F.Sangvela’n tirhchhuahna hun hmangin Rev. Dr.K.Lalrintluanga’n thlahna thuchah a sawi. Tirhchhuah takte zinga pasarih hi Field Director tur annia; pakhat hi non-Mizo pastor tur a ni.

18th. Monday: NLUP Conference Hall-ah Pu P.L. Thanga, Vice Chairman, NLUP Implementing Board (NIB) hovin NIB Monitoring member te, AH & Vety Department te, Industries Department leh NIB Official ten Aizawl khawpui chhung bika NLUP Beneficiaries pem bo ta te, ti tha duh lo te leh thi te chungchang an ngaihtuah. NLUP Beneficiaries pem/insawn te chu an awmna hmasa Local Council leh an awmna thar Local Council te hnenah an pem/insawn dan te report tur a ni. April 5, 2013 hma a in report lo chuan an instalment lak leh tur an la thei lovang. Local Council te hian report hi NIB ah leh Aizawl DC hnenah an pe thuai tur tih an rel a;
mahni trade ni lo trade dang mahni thu a lo siam ve ngawt ang chi NLUP Beneficiareis-te pawhin an dinhmun Aizawl DC ah an hrilhfiah tur a ni a, heng mite pawh hian report an siam loh chuan an sum hmuh tur an hmuh zawm loh bakah an chungchang ngaihtuah a nih tur thu leh NLUP Beneficiaries lo boral palh chhungkaw mawhphurtu ten Dead Certificate leh Local Council te hriatpuina DC, Aizawl (NLUP Cell) ah an thehlut tur a ni tih te an rel.

19th. Tuesday: Synod Missionary Training College bultumin Synod Conference Centre-ah Ramthar rawngbawlna chungchang zirhona Mission Seminar neih a ni a, seminar-ah hian Tualchhung kohhran hrang hrang aiawhte bakah, Ramthar rawngbawlna tuipui kohhran hruaitu mi 150 chuang zet an tel a ni. He seminar hi session hniha hman a ni a, Session hmasa zawk ah “Mizo Mission Theology: Kum zabi 21-na atana a pawimawh dan” tih thupui hmanga Rev. Remlalfaka, Lecturer, MTC buatsaih paper zirho a niin session hnihnaah “Contextualization” tih Rev. Dr. K. Lalrinkima, Principal, MTC paper buatsaih zir ho a ni bawk.

20th. Wednesday: Central KTP Committee chu Synod Committee Room No. 2-ah Leader Rev. Lalrinmawia kaihhruaiin an thukhawm a, KTP Rorel Inkhawm 2013 thlirletna neiin thurel bawhzui dan turte an duang bawk. Tun thla tir lam khan Lunglei Chanmari Biak Ina neih a nih kha. Khami tuma an rorel hmachhawp thenkhatte an duang fel a ni. Central Committee thutkhawm naah hian Bial leh Branch hrang hrang atanga Leadership Training leh programme chi hrang hrang hmanpui tura sawmna leh Synod Choir te rawngbawlna nei tura sawmna an ngaihtuah a, a tihhlawhtlin theih ang chin chin chu tihhlawhtlin ni se, tiin an rel a. KTP General Conference 2014/Diamond Jubilee lawmna Thupui atan “THO LA, ENG RAWH” (Isaia 60:1) an thlang a, Conference Hla Bu buatsaihtu tur sub –committee an din nghal bawk. I Love Taiwan 2013 (Youth Exchange Programme) leh Presbyterian Youth Fellowship (PYF) Biennial Conference 2013-a palai intirh dan turte rel a ni a, Presbyterian Church in Taiwan Thalaite (PCT Youth) leh KTP te hian kum tinin Thalai intlawhtawnna programme an buatsaih thin a, kuminah hian I Love Taiwan Mission Camp chu June 26 atanga July 23, 2013 chhunga buatsaih tur a ni a, Mizoram atangin mi 5 vel intirh theih beisei a ni. PYF Conference, kum khat dana neih thin chu April 26 -28, 2013 chhungin Fiangpui Presbyterian Church-ah Kristian Vanglai Pawl (Biateram Synod)-in an thleng dawn a, hruaitu thlan thar kum a nih avangin KTP atangin mi 2 nominate tura hriattir an nih angin Tv. R. Lalruatkima leh Tv. R. Lalramnghaka (CKTP committee member)-te ruat an ni. Central KTP Committee meeting hian KTP Rorel Inkhawm (2013) thurelte bawhzuiin hma lo la tur sub – committee 3 an din a, chungte chu – Counselling Training buatsaih dan tur lo duangtu sub –committee, Kohhran Thurin Inzirtirna buatsaih dan tur lo duangtu sub – committee leh KTP Kum Puan (2014 -15) “I Pathian tawk turin inpeih rawh” tih chungchanga hma lo latu tur sub – committee te an ni. KTP Inhruaina Dan leh KTP Handbook enthat ni se, tiin rel a ni bawk a. Inhruaina Dan enthat chungchang bik hi Synod Executive Committee (SEC)-a thlen phawt tur a ni ang

21st. Thursday: Nithum chhung awh tur Mizoram Thalai Kristian Pawl Inkhawm pui vawi 45-na chu Haulawnga khelmualah ‘PUM’ tia a hming sak Ft 210, Ft 126 a lian, mi 6500 vel thutna awm tura ruahmanah tan a ni ta. A tantir zan inkhawm hi palai lawman atana hman a niin Rbt.R.Lalnghakliana Exe. Commtt. member, MTKP in he hun hi a kaihruai a ni. He inkhawmpui hmang tura palai thleng hmsa ber chu TT Lalnunmawia Kolasib a ni. Inkhawmpui thupui atan “Lalpa Hmantlak” (II Timothea 2:21 ) tih a nia; Speaker hran nei lovin mi hrang hrangin an sawi dawn a ni.

22nd. Friday: Khawvel hmun dangte rualin Mizoramah World Water Day chu Siktuithiang Kut tia vuahin Vanapa Hall-ah hman a ni a, PHE Minister, Pu S.Hiato leh Parliamentary Secretary, Pu H. Zothangliana leh PHE Deptt. hotute leh hotu hluite dangten an hmanpui. PHE Minister chuan, “He kutin a tum ber chu awmze neia tui hman leh enkawl kawnga mi zawng zawng lungrual taka thawh ho a ni,” a ti

23rd. Saturday: Bualpuiah Aizawl lam pana tlan bullet (oil phur motor) AS 04 B-9345 leh Bilkhawthlir pana tlantaxi MZ 01 B-3198 an insua; bullet driver Pintu Dev, Silchar lam mi chu motor atanga tla in motor hian a chil zui a; ka chhawn lohin a thi. Taxi-ah hian naute pakhat tiamin mi panga an chuang a; an vai hian hliam tuar vekin driver hi a ngal ruh a tliah avangin damdawi inah admit a nia; midang zawng chu first aid pek annih hnuah chhuahtir leh vek anni.

24th. Sunday: Sihphir Branch YMA Platinum Jubilee a ni a; zanah an khaw hming chherna pakhat Sawiremtlangah meidet a ni. Sihphir Branch YMA hi 1938, 24th. March khan Lower Primary School-ah ‘Young Lushai Assn.’ tia din a nia; 1947-ah ‘Young Mizo Assn.’ tia thlak a ni. An president hmasa ber chu Pu Lalchuailova [L] a ni. Sihphir Branch YMA hian fa pakhat hring ve in 1970, 29th. March khan Sihphir Vengthar Branch (Tuna Venghlun Br.) a lo piang a ni. Sihphir Br. YMA-ah hian member 2081 (mipa 1196, hmeichhia 885) an awm mek a; section paliah an inthen bawk a ni.

25th. Monday: Reserve Bank of India huaihawtin Falkawn-ah Financial Outreach Programme neih a ni a, RBI Executive Director, Pu S. Karuppasamy leh Finance Secretary, Pi LN Tochhawng-in an hmanpui a ni. Pu Karuppasamy chuan thingtlang khua, mi 2,000 awmna chinah bank account nei vek tura infuihna beihpui thlak a nih thin thu sawiin, ‘hetiang programme hi kum 2008 atang khan kalpui niin ram puma khaw awm zawng zawng, nuai 6 zinga 60,000-ah zawh fel a ni tawh a ni’ a ti a, khaw nuai 2-ah financial year zawh hma ngei hian kut thlak tum a ni thu a sawi bawk. RBI Executive Director chuan Mizoramah chuan hetiang beihpui hi khaw 3-ah thlak a nih tawh thu leh, Falkawn chu a 4-na a ni thu pawh a sawi a ni. Finance Secretary, Pi LN Tochhawng pawhin mi tam takin Bank leh Company hriat chian mang loh, hun rei lote chhunga a pung tam tak pek tiamte hnena pawisa dah chu a him loh thin thu sawiin, ‘a pung chu sawi loh, pawisa dah luh sa pawh a riral fo a, Mizoram-a bank lo lutte chu RBI phalna-a hawn a nih leh nih loh chik a tul hle a ni,’ a ti bawk.

26th. Tuesday: Central Sorkar Media Unit hrang hrang leh State Sorkar Dept. thenkhatte intelkhawmna Inter-Media Publicity Co-Ordination Committee (IMPCC) chu Forest Dept. Conference Hall-ah an thukhawm. Meeting ah hian Dept. hrang hrang – All India Radio, Doordarshan, Press Information Bureau (PIB), Directorate of Field Publicity, Directorate of Advertising & Visual Publicity, Army Recruiting Office, Mizoram Khadi & Village Industries Board, Agriculture, Soil & Water Conservation, Health, Social Welfare, A.H.& Vety leh Forest Dept. te an tel a ni. Meeting-ah hian tunlaia Aizawl leh a chhehvela vawk hri leng chungchang tarlan a ni a, vawk hri darh zau zel tur ven nan vawk sa ei loh a that zawk thu tarlan a ni bawk.

27th. Wednesday: Ram puma kum nga dana neih thin, Economics Census vawi 6-na atana khaw tin leh veng tina chhiarpui buaipui tura ruat Enumerator-te hnena Training pe chhawng leh turte tan NLUP Conference Hall-ah Economics & Statistics Department-in Trainers’ Training a buatsaih a, Economics & Statistics Directorate leh an District Office atangin Officer leh Field Staff 40 an tel a ni. Economics Census vawi 5-na, kum 2005-06 a neihah ram puma titha zual state pathum thlan chhuah zingah Mizoram a tel a, tun tumah pawh hian tan lak an tum hle a ni. Economics Census hian a tum ber chu sum thawk chhuaktu chi hrang hrang dinhmun dik tak hre tura chhiarpui neih a ni a. Economic Census hi April atanga June chhunga neih tur a ni.

28th. Thursday: Ni 38 chhung hel ho-in an hren hnuah Mamit Dist Chikha khua atanga rukbo bo mi panga te chu dam taka chhuah an ni ta. Rukbote hi Bangladesh-a Mizo te kutah a rubo tu ten an hlan a ni.

29th. Friday: Neihdawn khuaa Darthanmawia in, Assam Type chu bungrua engmah chuh hman lohvin a kangral.

30th. Saturday: USA-ah Mizo tawng chanchinbu ‘The MIZO’ Vol. I No. 1 (Mizo Literary Journal, USA) chu Lengzem magazine publisher-editor Vanneihtluanga’n Video hmangin a tlangzarh. He chanchinbu editor chu Lalchhanhima a ni. He chanchinbu hi USA ram chhung State hrang hrangah a thlawna sem a nih hnu-ah USA leh khawvel hmun hrang hranga Zofate hnenah Soft Copy (PDF) sem chhuah tura ruahman a ni. He chanchinbu hi Quarterly a chhuak tur a ni. Thu leh Hla chanchinbu The MIZO (A Quarterly Mizo Literary Journal, USA) hian a tum ber chu “USA Mizote thuhlaril leh ziak leh chhiar lama tihhmasawn” a ni.

31st. Sunday: Thihna hneha Isua thawhlehna ni, tlanna hna a thawh zawhna, Easter chu khawvel ram danga kristiante rualin Mizorama kristiante chuan an hmang. Aizawlah chuan Salvation Army Corps hrang hrangte chuan Aizawl khawpui chhung hmun hrang hrangah kawng zawhin, rimawi nen ‘A tho ta’ tih hla an sa a, tholeh Isua Krista’n tlanna hna a thawh zawh tak fakna hla an sa a ni. Suala tlu mihringte chhanchhuah na tura Pathian thu anga Isuan tlanna hna a thawh zawh tak hi a lawmawm takmeuh a ni.