mi(sual).com

Mess Hall ah chaw i ei laiin nula leh tlangval rual au rual thap thapin an lo inzui lut dum duma. I ngaithla emaw ngaithla lo emaw chhuat zau lai takah rem leh rem lovin an ding khawma. An zinga hruaitu chan chang deuh pakhatin vai tawng leh sap tawng inpawlh nawkin a thlun phelh ang par parin thu a’n sawia. Thahnem a ngaih em avangin hrethiam chiahlo mah la a khat tawkin i va melh leh zauh thina. Chutin laiin a thenin lehkha var an rawn sem zar zara, eng thu nge inziak pawh chhiar lem lovin Mess dawhkan sirah i hnawla. Mahse i thawh rualin a dang an pe leh tho chea, tum vang reng pawh ni lovin i chhiar ta nge nge a.

Eng thu nge lo inziak?

Thih leh dam thu anih ngei ringin i kut fai lam chuan i lek kanga, i’n chhiar deuh puat puata. Rin ang ngeiin India ram chhim lam kil khawr ve taka Marxist putar thih thu emaw, West Bengal-a jail tang an sawisak thu emaw Terrorist pakhatin khaihlum a phuloh thu anih loh vek chuan University nawrh huaihawt thu alo ni tlangpui ang. A tawp ber hi alo nih chuan politics ah inhmang lo mah la thawklehkhatah nawrh an huaihawt chu dik leh tha i ti em em anga. An pawl han zawm ve tak te pawh i nap rum rum hial ang. An ideology leh party thurin te tha i tih tak thut vang chu a ni chuang law. Nikhat lek kha hremhmun pate, hriatna zungzam leh thanhnemngaihna rilruin tap chunga ha a thialna hmun pan ngai lova i chawlh der der theih dawn avang zawk a ni.

Engtin zel?

Helai hmunah hi chuan politics hi Zindabad leh Murdabad inkar a ni. Manmohan-a Sawrkarin tih dikloh a neih chuan Murdabad, Arvind Kejriwal-a te angin eirukna case a thling baw hawka an phawrh fai chang chuan Zindabad. University-in Ph.D te ho a duatloh viaua, zirlai pawlte thil ngiat hrang hrang laka a beng a hawn loh viau chuan Murdabad.Hei hi Nehru, Gandhi, Ambedkar, Phule, Sardar Patel leh Karl Marx te arpa channa hmun a ni a, Mamata Banerjee, Congress leh Modi tih velin lawm an hlawh lem lo.

Korean film aia Chinese Peasant Revolution ngaisangtute hian KFC a Foreign siam thawmhnaw inbela car chhuak thar chanchin sawi ai chuan Ganga Dhaba (kan hostel bul) lung hmun remlo takah ‘ek cup Chai’ sa ver vawr dawm chunga thosi vir nuai nuai kara Kashmir ram ri buai chanchin sawi nuam an ti zawk. Hmeichhiate pawhin inchei parh leh inhnawih hnum hlarha Class kal mawl tawp ai chuan samsei bal ro ri re nen silipar hlui lam bun chunga an campaign thu hla vahpui hnek hnek an thlang zawk. Hei vang hian an thing tihna a ni kher hek lo.

Zanlai mut reh hun laia zawhte ngiau, arawn rual hram ri leh an kawngzawh au rual thawm i hriatloh chuan i beng a chhet anih loh vek chuan vanneihthlak takin i mutui ve hle a ni ang. An au ri hrelo mahla a tuk i thawh chhuah hunah i khumah chanchinbu phek 30 a chhah i room mate-i’n a rawn theh phei anga, a phek hmaah chuan- Petrol man a san loh vek chuan inthlan alo hnai hle tho ang.

Mahse

Heng poster zozai, kawngzawh zozai, seminar zozai leh kiltin kiltang fanga ring kham urha an thusawi zozai te hi an mimal thatna tur a ni hauhlo. A chang phei chuan keini an “tribal unau duhtakte” tana an beihna te pawh a ni. Mahse Communist i ni lova, BJP, BSP, RJD, CPI(M), Samajwadi, Shiv Sena, Akali Dal, Congress leh MNF pawh aniang chu, tan leh awn lam i nei lova, in khuaah takngial pawh vote thlakin ila haw ngailo.  Student Union ah i inhnamhnawih lova, helai hmunah hian lehkha zir satliah tura lo awm satliah ve mai i ni.

Chuvangin Gate pawn i pelh hlek apianga , “Nang enge politics hi i ngaihdan?” an lo tih ve hman ziah che pawhin, “Politics chu maw…..heng ho buaipui tur hi mawle” ti liam mai turin ka inhrilh fo thin.

Dedicated to U Mapuii and U Engkima

Similar Posts:

• Andhra Mess
• Party Politics tel lo Politics meeting boruak sang hle
• Mizoram kan Kohhran leh Politics
• Khawngaihna Formula
• Politics leh zirlai pawl.

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Monday, April 22nd, 2013 at 6:27 am and is filed under Lifestyle, Politics. You can follow any responses to this entry through the RSS 2.0 feed. You can leave a response, or trackback from your own site.