mi(sual).com

Kum 2007 fur lai kha a ni a, ka ke na avangin khawiahmah ka kal chhuah theihloh avangin inah ka awm a, thuthleng sei a mu chung in TV ka en mai mai a. Ka chhungte ho an chhuah vek avangin keimahin inah ka awm a, mahni a awm hi tithang viau mah ila engemaw chang hi chuan khua hi a har ve hle thin a ni. Hemi ni pawh hian ruah a sur cherh cherh a, thawm dang em em hriat tur a awm bawk si lo a, TV ah lah chuan hmuhnawm deuh han en tur a chhuak der bawk si lo, SMS in thiante ka text kual mai mai a, han sawi em em tur lah chu ka hre der bawk si lo. Ka bulah chuan ka zawte putar lu lian zet mai chu min ngheng chung hian a mu ngut mai bawk a, ani lah chu han biak in awmzia a nei der bawk si lo. Khawhar tizual ting tur hian ruah lah chu a sur ri cherh cherh mai bawk si nen.

Chutia khawhar taka ka awm chuan tunhma hun kal tawh te ka ngaihtuah kual mai mai a, chutih lai tak chuan kan in luhna step chu mi kal an awm tih hriat tak hian a rawn ri chho deuh khat khat a, chutah door bell a rawn ri ral ral a, ‘lo lut rawh’ ka tih rual chuan kawngka a rawn inhawng a, ka thianpa Mapuia, college kan kal lai vel a ka kawm thin, kum sawm chuang a ka hmuh tawh loh leh a chanchin pawh ka hriat tawh loh chu huh deuh phingpheng hian a rawn tei lut nawlh mai a. Mak ti taka en he-haw chung chuan ‘Ehee, Mapui teh hlawl che chuan. I dam maw? Lo leng rawh, i lo inchibai hial teh ang,’ tih pah chuan ka tho chhuak nghal a. Mapuia chuan, ‘Ka dam ve tawk tawk alawm, hei helaiah hian ka kal a, rawn tlawh che a remchang em a, i ngaihawm thei ve roh bawk si a ka rawn peng zawk anih hi,’ nui deuh var var chung a tih pah chuan a kut a rawn phar chhuak a, kan han inchibai lawp lawp a…a kut chu a vawt thlar mai a. Thutthlengah chuan  a thu ve ta nghal a.

Mapuia te nen hian 1989 khan Hrangbana College ah kan lut ho thin a, amah hi ho ve tak mai, pa fiamthu duh ve deuh mai a ni a, kan duhzawng te a lo inang bawk nen kan inhriat tirh atangin kan inkawmngeih nghal viau mai a. Inhre sa nilo pawh duhzawng inang ta na na na ho kha chu kan inkawp nghal deuh chawt mai a. Morning class a la nih avangin class han tlanbo pawh hian zingkarah hi chuan han teihawina tur hi a vang ve duh khawp mai a. Kan thianho khan bike kan neih deuh vek avangin Zemabawk dai velah te sawn ganja te kan va zu ringawt thin a ni. Hetiang hian ho tak mai in kumkhat kha chu kan kal tluan ho dal dal a, chumi hnuah Aizawl College lam kha zan lam a kal anih avang khan a boruak a hit deuh zawk a kan rin avangin kan thianho chuan kan insawn ta dial mai a. Chet lah kan che na ta reng bawk a. 1993 thleng khan ka Aizawl College ah hian ka lut a, hetih hun chhung zawng hian Mapuia te nen hian kan in kawp chho chawt reng a. A ngainat pawh kan in ngaina viau reng a, an in lam leh kan in lam hi kan kar tawn chhen thin in chhungte pawh hian min hre ve ve hle thin a ni.

93 khan BA final exam zo lo in Aizawl College hi ka chhuahsan a, ka tal ho chho zui hle bawk a. Hetih lai hian Mapuia te erawh hi chu an kal tlang chho ta zel a. Veng kar te a lo inanglo nen engemaw chang chuan han inkawm thin mah ila college kan kal ho lai ang tak tak kha chuan kan inkawm ta lo a. Tin ani phei hi chuan a nun te insiamtha in pangngai takin a nung chho zui ve ta a, eizawnna eng engemaw te a buaipui chho a kan inhmu khat ta tial tial a. 96 hnu lamah phei kha chuan engtinnge a khawsak tak zel a, khawnge a awm tak a, enge a thawh tak tih te engmah chanchin ka hre zui ta lo reng reng a. Kei lah ruihtheihthil bak engmah ka ngaihtuah loh avangin thian hluite engtinnge an awm tih te chu a ngaih hian ka ngaihsak hman teuh tawh bik si lo. Tichuan chanchin pawh inhrelo chuan kan awm ta vang vang mai a.

Chutia kum 10 chuang fe a chanchin pawh ka hriat tawh loh beisei loh lutuk mai a a rawn tei lut nawlh mai chu mak pawh ka ti in lung hlui te pawh a leng ve hial zawk a. Chanchin te kan in zawt a, kan ti ti a kan ri dun bawrh bawrh mai a. A mize ngai te, tawngduh tak, fiamthu duh tak mai kha a lo la ni reng a. Enge a thawh tak a, nupui te a nei ve tawh em tih te ka zawh chuan nupui pawh a hmuhzawh ve loh thu leh eng vak a tih tak loh thu in min chhang liam ve mai a. Tunhma chanchin te kan sawi dunna, thingpui te ka lum sak a, kan veranda thlanglamah te chuan zuk chhuak in ruah sur cherh cherh kar a Reiek tlang chung zawna tlai ni tla tur eng no ruih mai te chu kan thlir dun vang vang a, a mawi thei reng lah tak a. Rei tawk fang kan inkawm hnu chuan khua te pawh a thim dawn hnaih tawh avang chuan hawn tumin a tho ta hluai mai a. Ruah a la tlak seng seng avangin lirthei a keng emi tih ka zawh chuan nui vur chung hian nihliap a ken thu min hrilh a. A kal dawn chuan pen hi a phawrh a kan dawhkana chanchinbu tlangah chuan phone number hi a ziak nuap nuap a, ‘hei hi kan in number a nih hi, min rawn call thin dawn nia mobile phone pawh kan neih ve loh hi…,’ a ti a. Tichuan kan kawt thleng ka zuk thlah a, kan in mangtha hnu chuan kan in chhak step ah chuan hmanhmawh vak lo chuan nihliap khum chung chuan a chho a, a kal liam thleng ka thlir nghe nghe a.
Hemi hnu hian kar khat chhung vel zet chu call pawh ka call ta chuang lo a. Kan inhmuh atanga karkhat vel a liam hnu chuan nikhat chu Mapuia chu ka rilruah a rawn awm thut mai a, ka phone number pawh ka pe ve miah lo tih ka hrechhuak thut mai a, tichuan a rawn kal tum a chanchinbu tlang a an landline number a ziah ka phone a ka save chu ka hmet chhuak a an in chu ka va call ta a. Phone chu a ring ri ral ral a, rei deuh hlek hnuah chuan hmeichhe pakhat hian a rawn pick up ta a. Mapuia te in a nih leh nih loh ka zawt a, min rawn chhang tu chuan, ‘Tu Mapuia maw?’ a rawn ti deuh he-haw a. Mapuia hmingpum kan sawi chuan rang deuh mai hian, ‘Tunge i nih a, engatannge?’ a rawn ti nghal a. Mak deuh mai in a aw chu hriat theih khawp in a danglam nghal tlat mai a. Ka hming te sawi pah in tunge anih ka zawh chuan Mapuia farnu Matei kan tih mai thin chu a lo ni a. Amah pawh chuan ka hming ka’n sawi chuan min lo hre nghal mai reng a.

Matei chuan, ‘U.Hma, engatinge i rawn call a, engtinnge kan phone number i neih a, hman ami kha i neih ka ring tawh bawk si lo?’ a rawn ti a. Kei chuan a hma kar a Mapuia a rawn len thu leh an phone number chu Mapuia min pek a nih thu ka hrilh chuan Mapuia nau chuan ‘Awi kareiii leh,’ a ti a a reh ta hmak mai a. Ka hello tiah tiah a tumahin min rawn chhang lawk lo a, mahse minute hnih dawn hnuah chuan hmeichhe dang puitling deuhhlek aw hian, ‘Hmaa, i la awm em?’ a rawn ti ta a. A aw atang chuan Mapuia nu a nih ka ring nghal mai a. Amah chuan, ‘Mapuia nu ka nia, engtik maw i thianpa chu a rawn len a, enge a sawi?’ a rawn ti ta a. A aw chu a khur deuh engemaw tlat hian ka hre nghe nghe a. Mapuia rawn len ni te, kan inkawm dan tlangpui te chu han hrilh thuak thuak pah in enatinge thil awmzia tih ka zawt let ve ta nghal a.

Mapuia nu chu a ngawi deuh vang vang a, chutah muang fan deuh raih hian, ‘ Hmaa, i thianpa chu 2004 khan a boral daih tawh alawm,’ a ti ta mai a. Mak ka ti kher mai le. A nu vek chuan, ‘2004 kum khan nupui a rawn ru ve a, mahse a nupui rawn hawn chu kan mi duh chi a nih loh avangin neih kan remti lo a, kan dah let leh a. Vawi hnih- vawithum an rawn in hruai haw leh a, mahse kan remti thei si lo a, tichuan nikhat chu zu hi a rawn rui nghek mai a, inchungah te buaina a siam a, a pa thinrim chuan police mantirah a vau a, tichuan rui chungin a bike in a tlanchhuak a a va chesual ta a ni…’ a rawn ti ta mai a. A thih ni tak ka’n zawh chuan a nu chuan ‘In ina a rawn len ni tak kha a ni e a thih ni chu. Ti hian a thih hnu hian a thih champha lo thlen hian a thiante tu emaw ber hi a tlawh a, kan phone number hi a pe a, an rawn phone ziah thin a, nikum leh kum hmasa lam pawh khan hetiang hian a lo ti tawh a enge a chhan pawh kan hre bik lo a. Khatia amah in phone number a pe che tih in sawi khan Matei khan mak a ti lutuk a a be zawm thei ta lo che a nih kha…’ a ti ta mai a.

Pialral rihsang chu kai in
Hringnun hnutiang chu chhawn mah la.
Ui leh ngai chung zel che hian e
Auh din che kan nuam asin.
He lei hringnun hi a ral hun in
Chatuan a chawlhna ram nuam an
Awi te’n lungruala leng turin
Pialral ah chuan min lo hmuak nang che aw Mapui.

*Hetang lam post hi a leng ve turah ka’n ngai ve ngawt  a. A tawp hla chang tlar tin a hawrawp tir ber theuh hi chhuk zawngin in chhiar thla dawn nia.

**He ka thu ziak hi College kan kal lai a ka thiante chatuan ram min pan san ta zawng zawng te tan ka hlan e.

BigDaddy Hmahmatea

(R.Lalhmangaiha)

Kulikawn

Similar Posts:

• Mapuia (Zephyr) rilru a na hle
• Mobile Phone nei te tan
• Mobile-phone hman dan dukdak lo
• misual.com avangin F.I…
• Mobile phone number hlauhawm

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Monday, April 29th, 2013 at 8:00 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.