mi(sual).com

(Chhunzawmna…)

Khatianga ngaihdan sakhat leh ngawltawt chhuah lui tlat mai kha ka lo ni na vang vangin, thilmak danglam deuh mai chu ni 14 November 1991 khan ka chungah a lo thleng thut mai a, tun tleng pawh hian mak ka la ti tawp thei lo a ni. Ka sawi fo tawh angin damdawi ngaihsak vak lo mi hi ka ni a; damdawi tha ber a ka rin tlat thung erawh chu, “Hayward’s Brandy” hi a ni. A rim hi Scotch rim nghir ngher ai pawha ka duhzawk anih avangin, kha leh chen kha zu dang in zen zen lovin chawei dawn ve leh a ka in ber pawh a ni nghe nghe a; a man pawh a tlem daih zawk bawk a ni.

Zep nak emaw, nikhat chu ka nupuiin, “Ka u te ho hi zunthlum deuh vek an ni a, kei pawh ka lo ni ve reng mai thei a; chuvangin damdawiah ka in entir duh” a ti a. Kei chuan Shillong khawpui laili tak a Roman Catholic fatherte din leh fel-fai eltiang maia enkawl leh vawn that bik tlat ‘Nazareth Hospital’ ngei maiah ka hruai ta anih chu. He hospital hi hmanlai Shillong Catholic Bishop Secretary, Rev. Fr. M.Bianchi, S.D.B. khan a din dawnin, Damdawiin chelek bera a hman tur Spanish Sister te chu Spain ram atanga Shillong khawpui an lo luh theihna tur ‘Visa’ te lo hmuhsak turin min ruai nghe nghe a ni.

Tin, heti hi a ni a, nurse pakhatin kan nu thisena ‘Blood sugar’ a awm leh awm loh fiah nana a thisen a han laksak hlek hnu khan, ka thisen pawh chu ngaihthat nan ‘ar-chil’ zat emaw lek tur chu min han laksak ve ta bawk a. Nimahsela, ngaihtha feta ka thisen result ka lo nghak ve kha, ka lo nghak sual hui mai zu ni reng a. Kan nupa thisen endikna result a lo chhuah meuh kha chuan le, ka thisenah chauh khan, ‘Blood Sugar’ tam zet mi kha an hmuchhuak ta a, keimah aia lo inringhlel daih zawk ka nupui kha chu a fihlim zawnalh ta mai a ni.

Nimahsela ka lungawilo pheng chuan, “Zu nghei se min tih vangin nurse hote hi i lo tham ru tawh a ni ang, mahse zu in chu ka sim dawn chuang lo, diabetes tih ang reng te chu ka thih hnuah a reh mai ang,” ka ti chhum hmak hmak mai a; Brandy pawh tun hmalam ang bawkin ka in zui ta ngei a ni. Nimahsela ni 14 November 1991 khan ka nupui leh ka fanute hovin Nazareth Hospitalah min hruai zai an rel ta thut mai a, kei pawh chuan Damdawi in a zawnga ka tlangnelna ber leh ka lo intih neitu vena anih bawk avangin ka hreh lem lova. Mahse duhtawka brandy ka in hnu a, “Hnahtumthiam Hrai” an sawi ang panga chawhmeh tui tha tha te nena ka inhrai puar nalh hnu chauh khan, an rawtna chu ngaichang leh pawmpui ve thluam niawm takin, an mahni ho chu ka zui ve ta poh a, a mak ang reng khawp mai.

Nazareth Hospital kan han thleng chu ka rin ang lo deuh maiin thil a lo inruahman reng mai a; Doctor lian ber leh thuneitu ber Rev. Sister Aquinas leh a puitu nurse pakhatin min chin leh vel hnu chuan, damlo nawrna (wheel chair) khalhtu a an chhawr ber Gurkhali pa chuan sawi set set lovin, a wheel chair chuan min khalh kual vel ta pap pap a, chutah hospitala room tha ber leh to ber No.9-ah chuan min awi chho ta a ni. Room chu an lo siam that tawh avangin tun hmalam ai khan a lo nuam daih zawk tawh a, chuvangin Sister Aquinas khan chhuang awm taka nuam ka tih leh tih loh min han zawh pawh khan, “A nuamin khaw han thlir vel nan pawh a remchang khawp mai, chawei hma apianga brandy peg hnihkhat ka in phei chu phal ula duhthusam a ni ang; lehkha ziak nan lah a fianrial tha tawk bawk si,” tiin ka chhang nghal a. Brandy in lam thu a han hriat veleh khan Sister Aquinas chuan, “Lehkha ziak I peih phawt chuan I duhtawk I ziak thei ang, nangma thu thu a ni; brandy in erawh chu kan hospital danin a phal loh bakah I hriselna atan pawh a tha lo,” a ti fithla nghal hmak mai a. Chutah zet chuan, “Hetiang ka duh in ka tawngtai ngailo,” tih hi ka’n hrechhuak hmasa ber phawt ta mai a ni.

Chumi zan chuan khum mawng tlawhchhan meuhin, “Kan Zoram Villa-ah ka haw thla leh mai dawn nge ni a, chaw ei dawn apiangin ka in ru hlek ang” tih ngaihtuahin ka inkhapthlu hlei thei lawk lova. A tawp a tawpah erawh chuan St.Anthony’s High School, Shillong a lehkha ka zir lai a ka pu Vanchhunga’n min lo fuihna kha ka hrechhuak thar thut mai a. A bik takin ei leh barah hian chintawk neih a tha. Mahni hrawk hma ringawt ngaihtuaha insum lo mite hmel hmuh hi hrehawm ka ti. Tumna a awm phawt chuan a insum theih. Kei pawh ka insum avangin mei ka zu lova, zu ka in lova, kuhvakhawr ka ei lova, sahdah ka hmuam bawk na hek lo; ka lei ka hmuam a, ka duhtawk mai a ni,” tih lai hian ka rilru chhungril rawn fan in, a rawn khawih danglam phut ta mai a. Ka hmaichhan thungah min rawn zilh leh ta ang hrima ka ngaih tak tlat avangin zu nghei chu ka tum ta nge nge a ni.

Chuti mai pawh a la ni hlei nem! Kei tehlul hi Pathianin min hman duh vena neiin, ka ‘pianken Tho-a’ a rawn sawi harh ta ni berin ka ring nghet tlat bawk a; chuvangin keima duhzawng ang ringawt lungkham tawh lova, Lalpa duhzawng zawk tihve tawh tumin, “Ka chhandamtu chu tawk turin kut ruakin ka kal ang maw ?” tih hi mittui parawl kuang chung leh lungrun deuha ka ngaihtuah hnuin zu nghei ka tumna pawh chu ka tuihnih ta a, Ka nembekin ka sawrfu ta bawk a ni. Takana, ka pu Vanchhunga khan hmanlai chuan, “Pastor F.H.Vanchhunga” tiin hming a ziak thin a; a awmzia leh hming pum chu “Fawngtet-Hualthang Vanchhunga” a lo ni chheu mai ! [P.S : Pu Vanchhunga hi Pu Vankhama, hla phuah thiam pa a ni (?) ]

 (………..chhunzawm tur)

Similar Posts:

• Odyssey Events leh Firehouse in inremna ziak
• Amazing Race -Honesty-Integrity- Tuai leh Patil
• Dentec Care hi a hlauhawm em?
• Ka tih awmtak tihloh ka nei em.
• Early Life (tlem)

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Sunday, May 12th, 2013 at 3:00 pm and is filed under Copy Paste, Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.