mi(sual).com

1st. Wednesday: Sairang Branch YMA member 14 te chuan Rih dil hleuh chhuakin a thuk zawngte an teh nghal. Rih dil hi Mizote thinlungah chuan hmun sang tak chang a ni a; chuvangin a hlu em em a ni. A thuk zawng leh a zauh zawng hi mumal taka teh theih a nilo naa; a dung hi km 1 leh a vang hi km chanve vel nia ngaih a ni. A thuk zawng hi hruiah lung thlunga an teh dan chuan patling hlam sarih vel a ni a; chu chu feet 38 nia ngaih a ni. Li mawng thlenga hleuh tur hian an bei nasa hle a; pakhat chauhin li mawng thleng theiin chu pawh chuan a mawng tak thleng chiah lovin an lung khai tuamna buara a zu khawih thu a sawi. Hmun hrang hrang atangin a thuk zawng hi teh a ni a; a inan tlan deuh put a vangin a mawng hi a zawl deuh duai niin an ngai. Rih dil tlawh tur hian Sairang Branch YMA OB 4 leh member 62 an kal a ni.

2nd. Thursday: Pu John Rotluangliana Deputy Speaker Bialtu MLA ni bawk chuan MSDP hnuaia Rs. 40 lakhs senga sak RMSA Girls Hostel Rajiv Nagar a mi chu khuallian niin a hawng. Hawnna inkhawm RMSA School a buatsaih hi Pu Lalrammmawia Colney District Education Officer, Mamit in a kaihhruai a ni. Rajiv Nagar a RMSA Girls Hostel hi 40X24 a lian niin room pariat a awm a, mi 16 awm theihna a ni. He Girls Hostel hian Choka a chhawm tel bawk a ni. Bialtu MLA hi Pu R.S Lalzamliana, Addl D.C, Mamit, leh Mamit a Department hrang hrang hotute thahnem takin an tawiawm a ni.

3rd. Friday: MBSE hnuaia kumina Higher Secondary School Leaving Certificate Exam result, tihchhuah takah za zela 58.57 an pass. Kumin hian HSSLC exam beitu hi 10,542 an awm a, a pumpuiah distinction-ah 50, 1st division-ah 708, 2nd division-ah 1,943, 3rd division-ah 3,268-in an pass a, pass hi za zela 58.57 an ni.

4th. Saturday: 24th October 2012 a tan tak Mahindra 2 Wheelers Mizoram Premier League session hmasa ber chu zawh a ni ta a; a pumpuiah Dinthar FC in an veng team tho FC RS Annexe chu 3-1 a an hneh avangin champion nomawi an dawng ta. Dinthar derby hmasaah Dinthar FC hian FC RS Annexe hi 4-1 in an lo hneh tawh a ni. Heti hian Dinthar FC hian lawman tangka fai Rs 5,00,000/- an dawng a ni. Fair Play award chu Chanmari FC in dawngin tangka fai Rs 20,000/- an dawng. Best Player-ah R. Laldanmawia, Dinthar FC chu thlan a niin Mahindra Scooty a dawng.

5th. Sunday: Baptist Church of Mizoram (BCM) chuan Kamalanagar (Chawngte-C) ah mahnia ding turin Chakma Baptist Church (CBC) an hawng. Chakma Baptist Church hawnna inkhawm hi BCB Mission Co-ordinator Rev.B.Lalrinawma’n a kaihruaia; BCM Gen. Sec. H.Lianngaia’n a hawng thung.

6th. Monday: Lalhunhlua (3) S/o Vulthanga Champhai Kanan Veng chu an thenawm te septic tank siamna tur khur laih tuitlingah a tla hlum. Lalnunhlua hi khurah hian a tlak lai hria an awm lova, a nu hian a hmuh loh rei tak avangin a zawn a zawn hnuah a slipper tuia lang an hmuh atangin tui chhung an han en a, tuiah a tla tih an hre ta a ni. Lalnunhlua an lak chhuah chuan chhantlak a awm tawh lo a ni.

7th. Tuesday: Mamit District-a Zawlnuam Bawrai Veng naupang kum 11 mi, Lalchhuanliana chu mi nunna chhanhimtu chawimawina, Jeeven Raksha Pradak Mamit Bawrhsap Office-ah Additional DC, Pu RS Lalzamliana’n a hlan. He chawimawina hian Rs. 40,000/- leh thuziak a keng tel a ni. Thu sawiin Additional DC chuan, mahni nunna chan pawh huam khawpa midangte nunna chhanhimna atana beitu Lalchhuanliana chu chawimawi phu a ni tih tarlangin hun lo kal zel turah pawh tanpui ngaite tanpui tura a inpekna chu chhunzawm zel turin a fuih a ni. Zawlnuam Bawrai Veng naupang, Lalchhuanliana hi Lallungmuana fapa a ni a, kum 2011 July ni 2 khan Bawrai luia tla, Lalruatmawia, kum 12 mi chu a chhanchhuak a ni.

8th. Wednesday: Pu Hrangchhuana (76), Sihphir atanga Israel a pem ta, Kiriat Arba khua Israel ami chu chaw kawng cancer avangin a boral. Pu Hrangchhuana hi 2006 kuma Israel rama pem ta a nia; a nupuiin a boral san tawh a; a fate pakua leh a tu 29 a kalsan.

9th. Thursday: Pu Lalram Thanga, IFS, Principal Secretary, Agriculture Department hovin RKVY hnuaia hmalakna hrang hrang thlirletna (Review meeting) neih a ni. He meeting-ah hian RKVY scheme hmang tangkaitu Department 8- Agriculture (Crop Husbandry), Agriculture (Research & Education), Horticulture, AH & Vety, Soil & Water Conservation, Sericulture, MIFCO, Fisheries Department te leh Autonomous District Council 3 atangin Officer pawimawhte an tel. RKVY hi kum 2010-11 atang khan Mizoram-ah hman tan a ni a, nikum 2012-13 chhung khan Cheng Vaibelchhe 184.73 lai hmuh a niin, heng sum hmuhte hi Agriculture leh a kaihhnawih Department hrang hrangah te semchhuah niin tangkai taka hman a ni. Department hrang hrangte hian he scheme hnuaia an hmalakna hrang hrangte report pein, an hmalakna te a tha hle a hriat a ni. He meeting-ah hian Department hrang hrang ten an harsatnate sawiho-in, he scheme hi kuthnathawktuten tangkai lehzuala an chhawr theihna tur leh uluk lehzuala kalpui a nih theih dan tur te chipchiar taka sawiho a niin, chumi atana rawtna leh ruahmanna thar eng emaw zat sawiho-a pawm nghal a ni bawk

10th. Friday: India Organisation of Chemist & Druggists (AIOCD) huathawt, ram pum huap lungawi lohna lantir chu Mizorama damdawi zuarte pawhin zawmin an dawr an khar. Aizawl-ah chuan Civil Hospital canteen tih loh damdawi dawr inhawng hmuh tur a awm lo a, Mizoram Chemist & Druggist Association chuan ram pum huapa nawrh an huaihawtah hian sorkar-ah thil phut hrang hrang an nei niin an sawi.

11th. Saturday: Laipuitlangah nasa takin lei a min a; he leimin hian PWD Office leh a dinna lei minin Ramhlun PWD Mual chung lama In13 a ti chhia a. Mi 17 in nunna chanin mi paruk in hlam an tuar. A thlang kawngpui hi motor an hun thup thinna hmun a nih avangin two wheller tiamin motor 17 a ti chhia. Lei minna lai hi kum 1957 leh 1968-ah pawh khan nasa takin a lo min tawh a ni. Nikuma Laipuitlang Branch YMA vice president, Vanlalmuana chuan, nikum September thla khan lei hi a chet leh avangin a chetna huam china in ding, PWD quarters-te chu mi thiamte’n enfiahin, thiat turin an ti a, PWD quarters Assam type-te chu thiah nghal a ni a, RCC building pakhat, chhawng li erawh chu PWD hotu pakhatin a remtih loh avangin thiah a ni ta lo niin a sawi a, khawtlangin thiat turin nawr mah se, PWD-in an remtih loh avang leh, FIR thehluha police mantirah hial an vau avangin thiah a ni ta lo nia sawi a ni bawk. Hetiang a nih avang hian PWD lama hotute chuan mipui dem an hlawh hle.

12th. Sunday: Khawvel pumah Mother’s Day hman a ni a, Mizoram-ah pawh Salvation Army ten kum tina an tih thin angin Corps tinah he ni hi an hmang a ni. He ni-ah hian nute chu an faten an ngaih hlutzia entir nan leh chawimawi nan pangpar an pe a; Mother’s Day hla, hla inchhang chu nu leh naupangten an in sak chhawk bawk a, chawhma inkhawm banah kawng zawhin Nute chawimawina thu ziakte an keng a ni. Mother’s Day hi US sorkar phei chuan National Holiday-ah a puang a ni.

13th. Monday: Ruahman lawk tawh angin Aizawl City Bus rate thar hman tan a ni a, a rate thar hi a hma aiin a sang hret a ni. Rate thar ang chuan stand khata cheng 3/- ni thin chu cheng 4/- a ni ta a, stand 2-ah cheng 5/-, stand 3&4-ah cheng 7/-, stand 5-7 cheng 10/-, stand 8-11 cheng 12/-, stand 12-14 cheng 14/-, stand 15-19 cheng 15/-, stand 20-27 chu cheng 18/- a ni ang.

14th. Tuesday: Zarkawt-ah leh Chaltlang Lily Veng-ah Aizawl Police Station Narcotic Branch-in damdawi, ruihna atana hman thin, Pseudo-Ephedrine mum nuai khat an man. He ruihhlo hi Sams Uddin, Doidanpur, Cachar leh Nur Jaman Borbuya, Natikhal, Silchar te hnen atanga man a ni a, a zatve hi Sams Uddin hnen atanga man a ni a, Zarkawt-ah Sumo chhungah a lo thukru a ni. A zatve dang zawng hi Nur Jaman Borbuya ta a ni a, hei erawh hi chu Chaltlang Lily Veng-a Pu Lalvuta Zadeng te inah man a ni. Ruihhlo neitu pahnihte hi man nghal an ni a, an thil man hi cheng nuai khat man vel nia chhut a ni.

15th. Wednesday: PRISM chuan Chief Minister telin, minister leh MLA 10 lakah Anti Curruption Bureau ah FIR an thehlut a, Sawrkar Department sum hmangin hmun hrang hrangah in te sa-in, ram te an lei ni a an hriat chu chhuichian ni se an ti a ni. PRISM thuchhuaha tarlan danin, chhuichian tura an duh te hi Chief Minister Pu Lal Thanhawla leh Speaker Pu R.Romawia bakah minister 3- Pu Lalrinliana Sailo, Pu PC Zoramsangliana leh Pu JH Roṭhuama te, Parliamentary Secretary Pu KS Thanga te, MLA Pu John Siamkunga, Pu Joseph Lalhimpuia, Pu TT Zothansanga leh Pu Lalrobiaka te an ni a, sawrkar hruaitu ṭhenkhat ten in leh lo lianpui pui dina mipui sum hmanga an inhai vur ṭhin chu PRISM chuan ṭha an tilo a, hei vang hian heng mite hi chhuichianga a ṭul anga an chunga action lak a nih theih nana hma la turin ACB-ah FIR an thehlut a ni.

16th. Thursday: Mizoramah thlipui na tak ‘Cyclone Mehasen’ an tih mai chu Mizoramah a rawn tleh dawn nia thuthang avangin Zoram mipui an chi ai hle. Zirna in zawng zawng pawh khar vek a niin Aizawl bazaar hmun pawh hma takah an insaseng hlawm a ni. Nimahsela, vanneihthlak takin he thlipui hi Prediction aia a kal ngil tak avangin Mamit Distrcit lam leh Vanghmun tlangdung te Cachar leh Manipur khawthlang lam a hrut ta zawk. A speed hi 56Km/hr a ni.Lawngtlai leh Mamit Dist. vel chu na vaklo a a nuai tih loh chu hmundangah a tleh ta lo hlauh a ni. Mi tamtak chuan ringtute tawngtaina rah niah an ngai.

17th. Friday: Khawvel puma thisen sang pual ni, World Hypertension Day a ni a; he hun hmanna chi khat atan a duh apiang tan damdawi in hrang hrangah a thlawna ‘Blood Pressure’ enna buatsaih a ni a, Indian Medical Association, Mizoram Branch huaihawtin Aizawl Civil Hospital-ah Seminar neih a ni bawk. Doctor-te chuan thisen sang tia hriat lar, Hypertension hi natna hlauhawm tak, hrisel lohna inhriat lawk pawh awm lova thih thut theihna a ni tih an sawi a, thisen sang hi a vei an tam thu leh he natna avang ram tui lei lova awm pawh an tam thu an sawi. World Hypertension Day thupuiah hian ‘Marphu Hrisel, Lungphu hrisel’, tih hman a ni. Doctor-te chuan, mi hrisela ngaih chu a hniam lamah BP tehnaa minute khata 120/80, a sang lamah 140/90 aia sang lo a nih thu an sawi a, thisen sang neite chu nikhaw hre lova tluk leh thluaka thisen zam chat (stroke) thlen thei a nih avangin, inenkawl that a tul thu an sawi bawk. Doctor-te chuan he natna hian natna dang kaihhnawih – Lung natna leh lungphu chawl, kal chhia leh a dangte a thlen thei tih an sawi a, hei vang hian BP titha turin insawizawi that te, ei leh in inchawih ei te, zuk leh hmuam laka insum te, chi ei tlem leh zu laka insum a tul thute an sawi bawk a ni.

18th. Saturday: International Museum Day a ni a, Mizoram ah pawh he ni hi hman a ni a. He ni puala programme Mizoram Art & Culture Department hnuaia awm Mizoram State Museum-in Museum Library-a an buatsaih chu Art & Culture Secretary Pu C. Thatkunga’n a hmanpui a. Programme hi Art & Culture Department Director Pu Ngurbiaka’n kaihruaiin sawmbik MUP Unit panga ten an telpui bawk a ni. International Museum Day lawmna chikhat atan hian nileng in Museum hi hawn niin man chawi lovin a duh apiang tan tlawh thei a ruahhman a ni. Pu C. Thatkunga chuan Mizoram State Museum tobul te sawiin Museum hi a pawimawh a, thil hlui leh thil hlu kan neih te ngaihsanna leh ngaihhlutna chang hriat a pawimawh hle a ni, a ti a. Musuem-a thil dahkhawm te hi chu man to em em nilo mahse Mizo tan chuan a hlu a, heng thil atang te hian thangthar ten hmanlai chanchin an hriatna kawngah thil tangkai tak a ni. Khawvel pumpuia Museum hrang hrangten ni bik, mahni remchan ang theuha a ruala an hman tlan turin International Council of Museum (ICOM)-in kum 1977 khan he ni hi International Museum Day atan a puang a ni. Mizoram State Museum chuan he ni hi kum 2004 atangin an hmang tan ve a. Museum Seminar/Symposium neih nan te, mizo kutthemthiam thil – belvuak, pawnpui tah-te leh mizo rimawi tum a taka entirna atan te an lo hmang tawh thin a ni. .

19th. Sunday: Pentikos Ni a ni a, Presbyterian Kohhran chuan Pentikos ni hi Assembly puala tawngtai rual hun atan an hmang. Pentikos tih awmzia hi ‘Sawmngana’ tihna a ni. Thuthlung Hlui-ah chuan Kalhlen Kut tiak ni atanga ni sawmnganaah an hmang thin. Thuthlung Thar hunah erawh chuan Isua Thawhleh tuk (Easter) atanga ni 50-naah hman a ni ta a ni.

20th. Monday: Synod Multipurpose Training Centre (SMTC)-ah Kohhran Upa te pualin Lay Leaders’ Training vawi 177-na chu neih a ni. He traning hi 23rd. May-ah a tiak ang.

21st. Tuesday: Mizoram State Boundary Committee chuan an chairman C Chawngkunga hoin Bairabia Mizoram leh Assam inrinna an enfiah. Bairabi-a ramri enfiahnaah hian Boundary Committee member-te – Wg.Cdr. Lalnghinglova bakah, Revenue department-a superintendent, RL Rindika leh surveyor C Lalrinzuala te an tel a ni.

22nd. Wednesday: Bethlehem Vengthlang-New Market line bus, MZ-01 C-4347, Kapzauva, Bethlehem Vengthlang ta chu Chhinga Vengah a break a fail a, kawng síra electric ban leh cement beam su-in a ding. Bus-a chuang mi pali an hliam a, Aizawl Civil hospital panpui an ni a, an ngaihtuahawm lutuk erawh anni lo.

23rd. Thursday: Chief Minister Pu Lal Thanhawla’n Hindu pathian biak naah serh leh sang a khawih thin nia an hriat avangin MNF party chuan Aizawl khawpuiah ‘Milem biak duh lohna kawngzawh’ an huaihawt a, mipui ṭhahnem tak an tel. Kawngzawh hi chawhma dar 11:00-ah Chanmari Kâwnah an ṭan a; Chanmari Kâwnah hian MNF treasurer, R Tlang¬hmingthanga’n thu a sawi a, Zarkawtah Dr H Lallungmuana’n thu sawiin, Israel Point-ah Lalthlengliana’n thu a sawi. MNF president Zoramthanga chuan kawngzawh tawpna, Vanapa Hall kawtah thu a sawi a, kawngzawh an huaihawt chhan sawiin, Zoramthanga chuan, “Pu Hawla’n ram dan a bawhchhia tih vanga nei kan ni lo a, Bible-a Pathian thupek a bawhchhiat vanga duh loa kawngzawh kan ni,” a ti. MNF-te’n kawng an zawhnaah hian, Zarkawtah hnam dang pakhatin lehkha khawng hláiah Pathian thu ‘Sualna nei lo chuan déng hmasa rawh se’ tih a lo tàr khum avangin amah venhim tumtute leh kawngzawhte an innawr deuh a, mahse buaina leh harsatna lian a thleng zui lo a; a lehkha tar erawh chu MNF-te chuan an laksak a ni.

24th. Friday: State Disaster Management Authority huaihawtin New Civil Secretariat Complex-ah chhiatna liantham a insingsak dan (mock-drill) enchhin a ni a; hetah hian lirnghing na takin New Secretariat Complex building-te a sawi anga tih a ni. Mock-drill hi a tak ang thei ber tura ruahman a ni a, hnathawktute pawh hriattir lawk an ni lo a; chhanchhuah hna thawktu turte pawh ral aṭanga koh chawpa lokal tura ruahman a ni. Chawhnu dar 2 ah ralkhel dar nasa taka tihrik a ni a, hnathawktute chu police-te’n awmze nei takin an tlanchhuahtir a ni. Hemi hnu hian Fire & Emergency Service lamte lo thlengin, chhanchhuah ngaite an buaipui a, kangmei chhuakte tuiin an phuh hlum a ni. Hemi hnu hian Sports & Youth Services leh Central YMA hnuaia Adventure Team leh Rescue Team te an rawn thleng a, anni bakah hian 3rd Bn MAP atangin rang takin State Disaster Response Force-te, medical team te, Power & Electricity dept. te, I&PR team te, PHE dept te, MPRO te, DM&R team-te leh police-te an rawn thleng zui nghal a ni. Mock-Drill zawh hnua inkhawm buatsaihah Disaster Management & Rehabilitation (DM&R) minister,Nihar Kanti Chakma chuan thu sawiin, “Kan ramin chhiatna kan tawk zauh zauh a; Civil Secretariat phei chu sawrkar hotu lute leh mi pawimawh tam zawkte hnathawhna hmun a nih avangin chhiatna lian a lo thlen pawha tluang taka sorkar inrelbawlna a kal theihnan insaseng dan leh mahni inbuaipui dan kan thiam a ṭul a ni,” a ti.

25th. Saturday: Kolasib Police-te chuan Kolasib SBI-a pawisa deposit tum Khualzangaua, Kolasib Khuangpuilam hnen aṭangin pawisa lem Rs. 1,72,500/- an man a, he thila inhnamhnawih mi pathum an man bawk. Kolasib State Bank-ah hian Khualzangaua hian cheng nuai khat chu Kamlalmawia, Kuangpuilam bank account-ah deposit a tum a, a pawisa deposit tur Rs. 500/- note hlirah hian a chanve Rs. 50,000/- chu lem a ni tih bank-a thawktute chuan an hmu chhuak a, police hnenah hrilhin Khualzangaua chu police-te’n an man nghal a ni. Khualzangaua chuan heng pawisa hi Ginlala, Tuithiang, Manipur tuna Kolasib Khuangpuilam-a thleng mekin Rs. 2,000/- hlawhin a deposit tir thu a sawi a, police-te’n Ginlala chu man leh nghalin a kekawr ipte aṭangin Rs 22,500/- an man tel bawk. Ginlala hian Thangvela, Rengtekawn chu pawisa dang, cheng nuai khat a kawltir a, hei pawh hi police-te chuan an man leh bawk a ni. Ginlala chuan pawisa hi Silchar-a vai pakhat hnen aṭangin Rs. 15,000/- chu Rs. 10,000/- zela a lei thu a sawi a, bank-ah Rs. 25,000/- a lo deposit tawh thu a sawi bawk.

26th. Sunday: Vanlalfela (29) s/o Lalthangi, Lunglei Ramthar Veng chu Ramthar Venga Falkawn khamah a tla hlum. Vanlalfela hi Falkawn khampang-a bulding sak mekah kalin a chesual nia rin a ni a, ALMA Adventure Club, Chanmari-te’n kham thlang Tlabung kawng aṭangin an la chhuak a ni.

27th. Monday: Tuipuiral NGO Coordination Committee huaihawtin tlawmngai pawl hrang hrang aiawhte’n Khawbung committee hall-ah ni thum awh tur chaw an nghei ṭan. Chawngheia an nawr te chu – Tuipuirala kawng pawimawh Champhai, Khawbung, Biate, leh North Vanlaiphai kawng chhe lutuk siam ṭhat te, khaw hrang hranga primary school leh sikul danga inzirtirtu indaih lo lutuk pek belhte leh Tuipuirala police station pakhat tal dahte a ni. Chawnghei hi May 31 thleng neih a ni phawt ang a, sorkarin awmze neia hma a lak loh chuan Tuipuiral huamchhunga sikul awm zawng zawng leh sorkar office zawng zawng khar an tum a ni.

28th. Tuesday: Laipuitlang leimina mawhphurtua puh Er Vanlalduhsaka PWD Highway suspend-na Order chu tih chhuah a ni. He chhiatna chungchang chhuitu Magisterial Inquiry committe chuan an suspend tak hi kha chhiatna thlenga mawhphurtuah khan a puh a ni. Sorkar order-ah chuan Vanlalduhsaka hi Magisterial Enquiry-in mawhphurtu-a a puh avanga suspend a nih thu tarlan a ni a, suspend a nih chhungin sorkar phalna la lo chuan Aizawl chhuahsan lo tura tih a ni.

29th. Wednesday: Phunchawng-ah CADS leh Mizo Insuihkhawm Pawl, Phunchawng (MIP) chuan Lalpanliani, kum 36, Kawlsawimanga fanu, Burma rama Tuithiang a mi, tuna VL Nawli, Phunchawng in luah nia insawi hnen atangin Rakzu litre 440 an man. Zu hi ama motor Gypsy hardtop var, MZ-O1 7727 atanga man a ni a , a sawi dan chuan zu hi Burma ram atanga a lak a ni a, Thenzawl, Serchhip leh Lungleia sem tur niin a sawi. An zu man zawng zawng hi Rs.7,92,000/- man nia chhut a ni.

30th. Thursday: Pu R Romawia, Speaker, Mizoram Legislative Assembly chuan Pu Hausanga Hauzel ziah ‘Ka Hmangaih Mizoram’ a tlangzarh. Lehkhabu tlangzarh inkhawm hi Salvation Army Conference Hall, Dinthar ah neih a ni, Pu Ramhmangaiha Ralte, Principal, Govt.J.Thankima College in a kaihruai. ‘Ka Hmangaih Mizoram’ lehkhabu ah hian article, essay leh hla hrang hrang lawrkhawm dah a ni.

31st. Friday: World No Tobacco Day a ni a; Mizoram State Tobacco Control Society, Indian Society on Tobacco & Health (Mizoram Chapter) leh Mizoram State Legal Services Authority te buatsaihin Vanapa Hall-ah hman a ni a, Speaker, R Romawia’n a hman pui. Speaker chuan Mizo mipui 65% vaihlo leh a kaihhnawih lakah an fihlim lo chu vanduai thlak a tih thu sawiin, “Mizote hi hnam hrisel zawk kan nih theih nan vaihlo hmang lo tura inzirtir hi mitinte mawhphurhna a ni,” a ti a, vaihlo nun suattu dona kawnga tan la theuh turin mipuite a sawm a ni. World No Tobacco Day hi kumtina hman thin a ni

Similar Posts:

• NLUP atan Rs 100 crore hmang hman ta lo
• Aizawl Town Bus chuan man ti sang
• Eiru 287 chhuichhuah tawhah Pakhatmah la hrem lo
• Health dept sum bo House-ah an khel
• Black Hill Regional Park

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Monday, June 3rd, 2013 at 7:59 am and is filed under Information, Mizoram. You can follow any responses to this entry through the RSS 2.0 feed. You can leave a response, or trackback from your own site.