mi(sual).com

Nitish Kumar Bihar CM a nih tirh khan a hmaa CM Lalu Prasad tih ngai loh a rawn ti a, chu chu thil dang zawng aiin an state a kawng a tha thei ang ber siam leh kawng tha tak siam a ni. Kum a han liama nipui a liama, fur a han a thlasik a rawn vawta, chutiang anga hun a han kal chhoh zel hnu chuan Bihar chu India ram state zinga hmasawn chak ber a rawn ni ta. Thil dang tam tak chu he hmasawnna khalh kal tu zingah hian a awm ngei ang mahse kawng ngai pawimawha kawng tha tak siam lama Nitish Kumar hmalakna hi hmasawnna luipui zaua an lawng khalh kaltu pui ber pakhat chu a ni ngei ang-dawt a nih a rinawm lem loh bawk. Hetiang hi state danga an tih dan a ni. Keini lam hi engtin?

Keini lamah chuan hmanni lawkah te pawh khaw pakhat chu Pa ho in an khua a lut tur buhfai phur chu kawng chhiat luattuk avangin a lut thei lo hruiin an thlunga a pawhin an pawt thleng tawp maia. Tun ang fur hunlai phei hi chuan khaw thenkhat khaw kar kawng chu tui hawk avang leh chhan engenge maw hrang hrang avangin kal theih lohin a awm leh ngei bawk ang. Kawng tha hi hmasawnna tur atana a bulpui ber pakhat a ni tih chu tu pawhin an hriat a rinawm mahse a siam that lam leh a tih changtlun lam hi kan ram hruaitute hian an hlau tlat emaw tih mai tur a ni. An tuallenna chin a that chuan an lungawi viau ni te in a lang bawk. Ram aia mahni in leh lo leh thil dang siam hmasawn hmasak ngai pawimawh tu ram hruaitu tan phei chuan khawi maw lai khaw kilkhawr ve tak kawngte chu campaign lai lo chuan ngaih pawimawh te pawh a harsa mai thei bawk.

Thawkkhat lai khan kan district council pakhat chuan direct funding kha an sawi ri deuha. Social media sawikhawmna atang chuan helh tak tak an tam hle in a lang. He kan district council panna kawng hi tha lem lo tak a ni a, amah hnaih bertu district atang hian KM 80 vela hla chauh a ni a, mahse chu pawh chu darkar 5 lai te kal a ngai thin, kawng chhiat luattuk avangin. He kawng chhiate pawh hi an au chhuahpui thin mahse chung chuan kawng chu that lam a pan chhuah tir law. Kan khawpui ber kawng te hi hetiang ang kawngte hi han ni ta se chuan thlalera Israel fate phunna ai khan mipui phunna chu a nasa zawk ngei ang. “A ni e” chu a tih theih loh anga mahse kawng chhiat lutuk avangte pawh hian direct funding sawi a lo ni te pawh hi a awm lo lem lo a tih a rinawm.

Hmasawnna kal rual lo te kan tia. Khawpui leh thinglang-rural leh urabn divide-te kan tia hengte pawh hi kan kawng chhia hi a chhan pakhat tling a tih theih ngei ang. Kawng chhiain supply a ti kal muanga, thil a tih to belha, transportation ah kawng a chhiat avangin tul loah charge a lo san phah ngei bawk si a, mipuiin kan tuar ta thin reng a ni. Ram hmasawn nan chuan human resource a pawimawh, phat rual a ni lo, khaw hrang hrangah sikulte din a ni, chunga thawk tur lak an ni, mahse sikul awmna khua pawhtu kawngte chu a chhiat luatah thawktu tam tak a kai that tir theih loh phaha, a then chu an kal peih loh phaha, a ti thei deuh chu khawpui hnaih lamah an insawn zung zunga, nghawng a nei leh ta thin a ni, Sikul chauh a ni law, health centre leh hmun pawimawh dangte pawh a ni tho. District demand te pawh hriat tur a awm leh zeuh zeuh thin, hengte pawh “kawng chhiat lutuk vang vek hi alawm” tih tur chu ni lo mahse a chhan thuk takah chuan kawng chhia hi a ni ngei ang-a nih loh pawhin a chhan zinga pakhat chu a ni ngei ang.

“Ava chhe tak em, kan kawng chhe lutuk hi chu, kan sawrkar tak hi chu aw” kan han ti ve thin tak na a, tluang tak leh him dam taka kan kal tluana kan thlenna tur kan thlen chuan kawng chhiain kan rilru a luah tawh ngai lo. Ni, tih theih chu kan nei lo, mahse heng kawng siam that tum reng reng lo te erawh hi chu an thil tih loh avangin lungtea kan chil chhak phak leka awm mihring aai lian sava kan vawm thlak theih tur ai pawha awl zawkin kan vawm thla pawp pawp thei thung, a tu a pawh ni se. kan kawng chhe kum tluan avang hian kan lo neituten an thlai tharte a man ang an ei theih loh phah fo a, khaw thenkhata huan thlai thartute lahin an hlawkna tur an rut tha thei lo bawk, an thlai leisak tuten kawng chhiat luatah a man tur angin an lei sak ngam thin si lo a.

Kan kawng chhe bumboh u chuak tak han hmuh chang leh a chunga hun leh nun hmangtu nih hi chuan “Nunna kawng chu a zima” ti a kan thurin bu in nunna kawng chu kawng zim leh RUALREM lo mahse kan thlan zawk tur a ni tih thute hi kan ram hruaitute hian an ngai pawimawh viaua, a takin an nunpuia, nunna thurin bu hi an ringin an nunpui tha hle emaw tih mai tur a ni, mahse mipuite chan ai tur tam tak eiral tu an ni tih sawi nagi lo a lang theia hmuh theih reng a nih lai hian nunna thuchah awmna bu ring lo ber tu an ni tih a lang chiang hle lawi si. Tisa mi kan nih lai hi chuan kan intun nunna tur atan chuan kan chenna khawvela kan awmna kawngte hi kan siam that hle a ngai a ni tihte, kan hmasawnna tur atana chanchintha a taka kan nunpui tak tak ngai a ni tihte hi kan ram hruaitute hian nunpui zawk se chhandam loh te pawh hian chhandamna thu hi an hnaih phah zawk mahna le.

Similar Posts:

• BRTF Kawng ve hi le!!
• Autonomous District Council tamtak kan mamawh
• I Nuar ang u hmiang !
• I ngaihtuah ngai em?
• Thingtlang mirethei te

Recent Posts:

• Thingkha Par Lai – Nghatun Mut Hun (Ka tawn hriat te) !
• Chiahpuam Part II
• FANCHUN
• Chiahpuam Part II (Sawrkar hian hmalakna a nei tawh em?)
• Lal Isua Leh Nikodema {Sunday Pual}

This entry was posted on Sunday, June 16th, 2013 at 7:36 pm and is filed under Mizoram, Opinion. You can follow any responses to this entry through the RSS 2.0 feed. You can leave a response, or trackback from your own site.